Nđờ sơnăm lòt jat Yàng, digơlăn bol he ò siơ̆u dơ̆ geh kơno lah Yàng Tòm Trồ là Bơtau Rcăng Ai, Bơtau sùm ai bơntơl ală kòn sau Kơnràñ in. Mơ ya gen, digul rai kis sơrbac sơrbăng, digul oă bơta kơlôi rcăng, digơlăn tòm nùs bol he kung găm lùp is dô sèng lúp: “Khoai Yàng, lơh mbe lơi kòn rgơi kơ̆ nùs dòn lah Kơnràñ găm rong siam kòn?” Ơ oh mi kòñ gơboh, ngai do, Jơnau Yàng hôi jà oh mi ơm bơdơh wơl dô êt phúk mơ sền lăng gùng Kơnràñ rong siam ală bơkào gun tòm ƀlàng – dềt rhền, ò sơp ò sô, lơbơn mơya kung geh Yàng tơnsoh dô nơm bơta niam hang mơnĕ crih crai.

Ngai do, ngai 29/06/2025, Bơta Hòi Dan Kòp Ngai dăn jà ală ồng mò oh mi bơtê bal Jơnau Yàng kơnòm dê bơta dong kơl ồng Missey Butler dê bơh tơnggumê SỀN KƠLÔI TĔ DI ALĂ BƠKÀO GUN TÒM ɃLÀNG.

Sră Goh: “Ñchi bơh tài bol mê kơlôi rcang bơh phan soh taih? Sền kơlôi tĕ di ală bơkào gun tòm ƀlàng hòn be lơi; gơ ò gơs bòl glar, ò rồi brài.” (Mathiơ 6:28)

Nđờ poh lai, añ gơs tŭ lơmpah nggui hơđăng să dô nơm chi neh kol gơpừ digul brê, mơ ală bơta kah kơlôi bơh yau tus. Tŭ lơmpah hơ̆ lơh añ in gơs gơlơh be geh ri wơl hơ hiu. Añ gơboh trồ tiah. Añ kòñ lòt gơlêng hơđơm ală chi nhô jơnhoa, hala nggui sền ală hiong dà ngêt ngơt, sền lăng ală ka rê sơrbac tòm dà ring niam. Hơ̆ la dunnia lơh añ in gơlơh ring lơngai.

Mê mơ mê yo añ jê git loh añ kòñ trồ tiah oă mbe lơi. Añ ơs ri hiu tòm să jăn bơ̆ bơl, să bềng n’ha chi, tê jơng gèn bềng têl ală sơmak kap hala phăn dềt kăp. Kơp dơ̆ tus jơ sao mhô, ală bi klau añ jê ò rgơi bơdơh ñŏ tòm tŭ sền gŏ añ, bơh să añ bềng ală têl bŏng mơ ală sơnơm pleh phăn dềt kăp.

Kơp dơ̆ ơm gợi, añ lòt cop cau bơyô “mơnơm brê” añ jê. Ală ơnih añ kòñ gơboh ơs ơm ngai mơ ală ntas nggôr bòn dơng dê. Kơp dơ̆ lòt cop mơnơm, añ gơlơh be he găm cơnđòa lòt tòm dô nơm dunnia ndai. Añ gơboh iat kơno sêm nrau, ntas nha chi. Añ ơm nggui ngềt ngơt sền lăng ală kòn prồ ntoat kơnhơl tòm jat. Añ nrơt să tòm tŭ kơno ntas lì pơđar dô mpôl sềm dê nisơna par bơh công dô nơm chi kra dơng.

Añ geh tơngkah lah rai kis ò di ming la broă tă nhơm hala plai nùs găm nhơm kis, mơ kung la bơta gơs mat gơs kwơ kơp nă bol he dê. Tòm kơp phăn kis, Yàng Tòm Trồ neh ơn dô nơm bơta pha is, dô nơm tơnggu loh lang, mơ dô nơm bơta mòn gơs ming dul.

Tòm tŭ dô nơm sềm lik rai, ò cau lơi pal cang đơs mơ gơ lah gơ là ñcau. Ò càng cau lơi bơto gơ gùng pal kis be la dô nơm sềm, bơto gơ gùng sa kon tu hala păr bơh ntê chi dô tus ntê chi nê, tai bơh ơs ală bơta hơ̆ neh geh ơm jrô tòm bơta lơh lòt kis gơ di rau.

Bơta ngăn la, jơh ală bơta crơng gơs be la dô nơm têl chờ tiang pơnrơ geh lềp bơh dô mpôl lềp kơñi wil tơl, mơ cau lăm bồ mpôl lềp kơñi hơ̆ là să tòm Yàng Tòm Trồ – Bơtau lơh gơs bơta rơndăp mơ bơta gơtơmklĕ jơh ală phăn crơng gơs Kơnràñ dê.

Sền kơlôi tĕ bơh bơta hơ̆ dô êt! Bơta kis jơh ală phăn dê gơri hơ Yàng, Bơtau neh crơng gơs bol gơ. Kơnràñ ò di ming prăp gar bol gơ, mơ kung lơh gơs bơta pha is, bơta hang mơnĕ is bol gơ dê.

Tòm tŭ nggui tòm brê, añ sền gŏ ală bơkao bô, hòn digah ală chi thường xuân. Añ sơntơm kơlôi bơh dô êt bơkao ndai mơ Yàng Jêsus neh đơs tus tòm Sră Jơnau Niam Mathiơ tòm tŭ Kơnràñ đơs:

“Ñchi bơh tài bol mê kơlôi rcang bơh phan soh taih? Sền kơlôi tĕ di ală bơkào gun tòm ƀlàng hòn be lơi; gơ ò gơs bòl glar, ò rồi brài. Mơya Añ đơs mơ bol mê, bulah Salômôn tòm jơh bơta gơklŏ khai dê, kung ò gơs soh be dô nơm tòm ală bơkào hơ̆. Behơ̆ dilah ñhơt tòm ƀlàng la jơi ngai do gam mơ ngai hìng sơrbì tòm bơnhă, mơ Yàng Tom Trồ tơnsoh gơ in behơ̆ sơl, tơ ài lah bol mê, ơ ală cau gơs dô êt bơta dòn ne! Behơ̆ gen, bañ kơlôi rcang lah: ‘Ñchi bol he ai sa taih?’ ‘Ñchi ai ñô taih?’ ‘Ñchi ai soh taih?’ Bơh jơh ală bơta hơ̆ ală làng bol Bơdìh òs jòi jat; mơya Bèp bol mê hơđang trồ git bol mê pal ngui sa ală bơta hơ̆ rau. Mơya lài ngan, jòi jat tĕ lơgar Yàng Tom Trồ mơ bơta song ring Kơnràñ dê, gen Kơnràñ rơp ai bơtơl jơh ală bơta hơ̆ bol mê in.”

Ngăn la dô jơnau hơ crih crai! Yàng, Bơtau neh crơng gơs oh mi mơ añ, mơ ală phăn kis, neh gar nền bol he in lah bol he ò cang kơlôi rcăng, bơh Bơtau Crơng Gơs rơp ai bơntơl bol he in. Ndrơm be bơkao gun tòm blang, jơh ală bơta bol he cang lơh ming la gơs măt mơ chò hơp dơp rò rai kis Yàng ai.

Bơta dòn kơnòm dô ò gơs gơtha la bol he bơdơh lơh broă hala bơdơh pơnđơl pràn tòm rai kis. Mơya gơ gơs gơtha la bol he ò kis tòm bơta rngòt rngơt hala siơ̆u siar, mơ git lah Bơtau Crơng Gơs rơp ai bơntơl bol he in ală bơta bol he cang, mơ tòm tŭ bol he ò sền gŏ loh lang gung mơ Kơnràñ rơp lơh bơta hơ̆.

Dan jà bol he dô nùs bal tòm bơta hòi dan:
Khoai Yàng kòc gơboh kòn dê. Ưnngai Yàng bơh Kơnràñ la Bơtau Crơng Gơs crơng ală phăn, mơ Kơnràñ kung la Bơtau Rcăng Ai, sền gar, rong siam bol he kơp ngai. Ơ Yàng, nùs kòn ring lơngai chờ hòp tòm tŭ git Kơnràñ kung ò săng lơi kòn, mơ sùm rong siam kòn tòm kơp jơ phuk rai kis he. Dan Yàng dong kòn gơn kơnơm dê bơta rong siam Kơnràñ dê, be bơkao gun tòm blang, ò gơs bòl glar, ò rồi brài, mơ kung gơ lì tòm bơta hang niam Yàng ai. Kòn jơh nus hôi dan, ai sơnđăn Yàng Jêsus Krist, Amen.

Ơ ală ồng mò oh mi kòñ gơboh, bơta kis jơh ală phăn dê gơri hơ Yàng, kòn mơnùs kung ò pha is. Gen tàng, ală sèng lùp ‘Ñchi bol he ai sa taih?’ ‘Ñchi ai ñô taih?’ ‘Ñchi ai soh taih?’ ò di gơlik gơs ală bơta kơlôi rcăng dơng ir, pit ai bơta ring lơngai tòm rai kis oh mi dê, bơh sèng hơ geh jôi bàn tòm Bơtau Crơng Gơs jơh dunnia dô dê. Yàng Jêsus đơs nền lah: “Bèp bol mê hơđang trồ git bol mê pal ngui sa ală bơta hơ̆ rau.”

Sền kơlôi tĕ lah oh mi gơs wet tus oă ir tòm ală bơta păl càng rai kis kơp ngai mơ hŭi lah Yàng kung găm rong siam prăn crơng gơs Kơnràñ dê, bal mơ ală bơkao gun tòm blang tơn? Ngai do, sơntơm tĕ ngai pa oh mi dê mơ gùng tơngkah wơl jơnau hơ Yàng dê, lah: “ Kơnràñ la Bèp kòn dê. Kơnràñ git ală bơta pal càng kòn dê.” Bulah ồng mò oh mi găm păl ntao diđap mơ bơta kơlôi bơh jền priă, bơta siơ̆u siar, hala ală dôs kơnol găm kơnjơ̆, kah tĕ lah Yàng neh git jơh ală bơta hơ̆. Kơnràñ ò tŭ lơi hŭi oh mi, mơ ya Kơnràñ kòñ oh mi pal ơn bơta hơđăp lai tòm toh ơnih: joi jat tĕ lơgar Yàng Tòm Trồ mơ bơta song ring Kơnràñ dê. Să tòm Yàng là Bơtau rơp dong kơl oh mi têh dơng tòm bơta dòn kơnòm bơh bơta ai bơntơl Kơnràñ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.