Cau lơi tòm bol he mơ ờ kơp kờn cau ndai dờn dờp, sền git mơ jòng rơ bơh ală broă mơ he neh lơh ờ ơ. Tòm đah hwềng kung gơs bè hớ, bơta kơp kờn geh cau jòng ro, mơ bơta do lơh he in lơh roh jơnau song ngan: bol he kis ờ di nàng jòng ro să tờm he dê, mơ la nàng lơh gơkló sơnđan Yàng – Bơtau neh dong tă mơ dong klàs bol he bơh bơta nđàc, bơta kờn gơboh mơ gơnap gơnoar dờng ơ nàng Kơnràn dê.

Ngai do, ngai 6/8/2025, rơndap bơta hòi dan kòp ngai hòi jà ồng mọ oh mi kơlôi sơnơng Jơnau Yàng bal mơ mò Maria Schleicher bơh tơnggume KƠNRÀÑ PAL TƠNGGUH.

“Kơnràñ pal tơngguh, añ pal tơmù.” (Jang 3:30)

An la dồ nă cau kờn geh oă cau git an. Bơh gam dềt neh bè hớ rau, tú lơi kung kờn cau dờng pal kah kơlôi an rlau jơh. Tú an geh cồng nha tòm bơta bơtê, an kơp kờn me bàp, cau pơrgu dờn dờp mơ jòng ro. Bơta dờn dờp cau ndai dê cèng wơl an in bơta khin cha. Tus dê tú an neh dờng, an jòi ală pơnah is nàng yờ tơnguh să tờm an, tồ oă cau ndai git ală broă niam mơ an gam lơh.

Mơya Sră goh tơngkah bol he tòm Jang 3:30 lah: “Kơnràñ pal tơngguh, añ pal tơmù. Jơnau song do ngan tomdră mơ rài kis mơ an jòi jat – dồ rài kis kờn geh cau ndai ‘jòng ro’, rlau mơ kis nàng duh broă Bơtau sùm gó loh làng ală bơta.

Bulah tú an neh ơn rài kis an dê Bơtau Krist in, an kung ờ hềt sang lòi broă kờn jòi cau ndai jòng ro an. Dê gùl ală oh bi tòm hìu jum goh, an sền gó pal lơh mbè lơi nàng cau ndai dờp git an. An kờn cau ndai jòng ro ală broă lơh an dê tòm đah hwềng.

Tòm bơta dờn gam bè cau kơnòm dềt, an neh tomgơl ală broă mơ Yàng Jesus neh lơh tòm rài kis an gơlik gơs ờ niam. Ngan an ờ hềt git loh làng hớ là să tờm an mìng la dồ pơnah dềt rhền tòm rơndap dờng ơnàng Yàng Tòm Trồ dê. Sătờm Yàng la Bơtau at bồ tòm ală broă mơ ai gơnoar an in geh ơn tê jơng tòm gơnoar broă hớ.

Tòm dồ dớ ne, bol hi gam bơtê rơndap bơtê lòt bơto yal jơnau niam. Cau bơto sồr bol he cih wơl jơnau lơh cơng nàng tompà wơl cau ndai in. tú neh cih sir mơ sền wơl, an nrơt nrơl tú dờp git ală jơnau an cih mìng đơs tus să tờm an dê lơm! Tài bơh kơp kờn geh cau dờn dờp mơ kờn cau git să tờm an dê, an neh híu jơnau song jơnau Yàng dê mơ ală broă crih crài mơ Kơnràn neh lơh hơđang rài kis an dê. An neh tomgơl jơnau lơh cơng bơh gơnap gơnoar tomgơl Yàng Jesus dê gơlik gơs jơnau lơh cơng nàng yờ tơnguh sătờm an dê!

Ờ jó mơ hớ, gơs dồ ngai an sền gó dồ nơm mpàn dờng yồng tòm ơdú lơh broă cau bơyô an dê, hơđang hớ cih sèng Sră Goh Jang 3:30. Bơh sơnrờp an ai lơh krơi – nchi bơtài khai sac sèng do? Do ờ di la dồ sèng mơ oă cau kờn bè ală sèng Jang 3:16, Jeremi 29:11 hala Jơnau Pơnđik 3:5-6 … la ală sèng Sră Goh mơ bol he ờs mờng gó hơđang ală mpàn mơ cau bơka tòm hìu. An đơs ngan tòm tú hớ, să tờm an ờ hềt git gơnoar bơh sèng Sră Goh do.

An lùp cau bơyô an dê nchi bơtài yồng sèng do. Khai tompà wơl mơ an lah, lài òr khai neh kis dồ rài kis sềt pơnhiat, mơya ală broă neh geh tomgơl tú khai dờp git bơta kờn gơboh Bơtau Christ dê. Tú kơno jơnau khai lơh cơng, an đal git loh làng bơta tup bư Yàng Hwềng Goh tòm nùs an dê. An sơntờm dờp git lah: ală ngai neh lòt gan, an sùm yờ tơngguh să tờm an dê hơđang rlau jơh, rlau mơ yờ tơngguh Yàng la Bơtau dờng hơđang rlau jơh.

Tơnớ mơ bơta tombohbơr hớ, an sơntờm gơs dồ bơta kơp kờn pa, hớ la pơndềt să he nàng Bơtau Christ geh yờ tơngguh.

Broă he đơs la jào phi jơh rài kis he dê Yàng in, oă dớ buơn rlau mơ broă he bơtê sang lòi nùs kơp kờn is he dê mơ lơh jat nùs kờn Yàng dê kờp ngai. Kalke ngan he in tòm bơta cơnđoà lòt dồ bă pơndềt să, bal mơ nùs nhơm kơp kờn ơn bơta gơkló Yàng in ờ di ơn să tờm he dê. Ồng Pol tơngkah bol he tòm Galati 2:20: “Añ neh kong pơng di chi pơng bal mơ Bơtau Krist, bulah behơ̆ añ kis, ò di la añ kis tai, mơya Bơtau Krist kis tòm añ.” kis Bơtau Krist in geh gơtha hớ la he tơnchơt rài kis is he kờp ngai, nàng lòi Yàng at bồ mơ tề lăm rài kis he dê.

Sơbàn hwềng nùs he dê ờ di tiah nàng Yàng mơ he nggui bal tềng hớ. Kờp ngai, bol he geh hòi tus pal tơmù să he, nàng Yàng Jesus rgơi geh yờ tơngguh mơ at bồ rài kis he dê.

Digơlan bol he neh geh bơta tơngkah bơta do bơh Yàng Hwềng Goh – hòi jà he sang lòi bơta kơp kờn is he dê, sang lòi bơta jòng să is hala sang lòi bơta at bồ rài kis he dê. Kơp kờn ngan ồng mọ oh mi mơ an kờp ngai rơp bơtê git kis bơh nùs nhơm pơndềt să, mơ dan Yàng dong bol he sùm ơn Yàng la cau tờm hơđang rài kis he dê.

Dan jà bol he dô nùs bal tòm bơta hòi dan: Khoai Bèp Hơđang Trồ, dan Yàng toh glài kon in tài bơh ală tú mơ kon yờ tơngguh sătờm kon dê. Kon neh lòi rài kis kon cơnđoà lòt jat dunnia bal mơ ală bơta ham kờn poac să dê, mơ ờ jòi jat nùs kờn Yàng dê. Dan Yàng tơngkah, pơnniam nùs nhơm kon dê, nàng kon sùm git rê wơl mơ Yàng, nggui hơđơm jơng Yàng bơh nùs pơndềt să mơ tơhìr jơnau song Kơnràn dê mơ jòng rơ sơnđan Yàng bơh rài kis kon dê. Kon jơh nùs hòi dăn, ai sơnđan Yàng Jesus Krist, Amen.

Ơ ală ồng mọ oh mi kờn gơboh, tú Bơtau Krist geh yò tơngguh, hớ kung la tú bol he jòi bàn tiah ntào bol he dê, ờ di la tiah cau dunnia sền gó, ờ di la tiah cau jòng ro he, mơya la tiah bol he geh Yàng sòl pơnđàng bơh bơta àng gơkló sătờm Yàng dê. Kờp ngai pa la dồ jơnau hòi jà pa: tơmù té sătờm he dê mơ yò tơngguh Yàng at bồ mơ tề lăm rài kis he dê jat nùs sàng goh Kơnràn dê. Ngai do, ngan he chò nùs nàng ơn Yàng at bồ hwềng nùs he dê sơl ơ?

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.