Yog koj yog ib tug ua ib leej txiv lossis leej niam, koj yuav nkag siab txoj kev txaus siab thiab kev hlub thaum saib yus tej menyuam loj hlob zuj zus. Koj lub siab yuav puv npo kev zoo siab thaum saib tej menyuam loj hlob txhua hnub. Tsis yog vim tej menyuam ua tau ib yam dabtsi twg loj, tiamsis tsuas yog vim ntawd yog koj tej menyuam uas koj hlub! Kuj ib yam li ntawd, peb tus Vajtswv zoo siab thaum saib Nws tej menyuam. Tsis yog vim peb zoo, tiamsis vim peb yog Vajtswv tug, thiab Vajtswv hlub peb los ntawm txoj kev hlub tsis hloov pauv.

Hnub no, yog hnub 08/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dr. Paul J. Palma dhau ntawm Zaj kawm ZAJ NKAUJ ZOO SIAB.

“Tus Tswv uas yog nej tus Vajtswv yeej nrog nraim nej nyob; nws lub hwjchim ua rau nej kovyeej lawm! Tus Tswv yuav txaus siab kawg rau nej vim nws txojkev hlub, nws yuav pub nej muaj lub neej tshiab. Nws yuav hu nkauj thiab zoo siab heev rau nej”(Xefaniyas 3:17).

Wb ib niam txiv kub siab lug txhua zaug uas mus saib tej menyuam hu nkauj tom tsev kawm ntawv. Tomqab kev hu nkauj, peb sawv daws sawv ntsug npuaj teg nrov nrov. Muaj zaug tag nrho cov niam txiv sawv daws sawv ntsug npuaj tes ntev ntev txog qhov uas cov menyuam lawv txaus siab heev rov qab mus rau pem sam thiaj ua dua ib zaug ntxiv! Wb zoo siab heev thaum tau txais los ntawm ib zaj nkauj zoo siab puv nkaus tsev kawm ntawv lub tshav puam.

Peb Leej Txiv tus nyob saum ntuj kuj zoo siab saib Nws tej menyuam ib yam li ntawd. Thaum tus poj vajntxwv Senpas tuaj saib Yeluxalees ntsia txhua yam uas Vajtswv tau ua dhau ntawm Xalumoos, pog xav tsis thoob. Nyob hauv 1 Vajntxwv tshooj 10, peb nyeem pom cov Yixalayees lub tshwjchim nws loj tshaj tej uas pog xav. Pog hais tias cov pej xeem no yuav nco ntshav ntuj heev, tsis tas li xwb cov Yixalayees tus Vajtswv tab tom zoo siab. Pog hais rau vajntxwv Xalumoos:

“Ua li cas koj thiab koj cov tub qhe los muaj hmoo kawg li, lawv niaj hnub nrog koj nyob thiab hnov tej lus txawj ntse uas koj hais. Cia li qhuas tus Tswv uas yog koj tus Vajtswv! Nws ua rau sawvdaws porn hais tias nws txaus siab heev rau koj, nws thiaj tsa koj ua vajntxwv kav lub tebchaws Yixalayees. Vim nws txojkev hlub cov Yixalayees nyob mus ibtxhis li, nws thiaj tsa koj ua lawv tus vajntxwv coj lawv ua raws li nws txoj kevcai thiab txojkev ncaj ncees.” (1 Vajntxwv 10:8-9).

Vajtswv tau xaiv Xalumoos los ua vajntxwv kav cov neeg Yixalayees uas Vajtswv hlub. Thiab Vajtswv yuav zoo siab heev rau yawg. Vajtswv tsis yog tus nyob deb tsis quav ntsej. Nws kuj nthuav tawm kev zoo siab, txaus siab, zoo li txoj kev uas peb zoo siab thaum peb tej menyuam loj hlob. Yog Vajtswv cov menyuam, peb yog Vajtswv kev zoo siab, kev txaus siab. Tus cev lus Xefaniyas kuj hais txog txoj kev zoo siab puv npo uas Vajtswv pub rau Vajtswv haiv neeg:

“Tus Tswv uas yog nej tus Vajtswv yeej nrog nraim nej nyob; nws lub hwjchim ua rau nej kovyeej lawm! Tus Tswv yuav txaus siab kawg rau nej vim nws txojkev hlub, nws yuav pub nej muaj lub neej tshiab. Nws yuav hu nkauj thiab zoo siab heev rau nej”(Xefaniyas 3:17).

Vajtswv txoj kev zoo siab tseg rau peb loj heev, txog qhov uas Vajtswv tsa suab hu nkauj zoo siab. Peb tab tom pehawm ib tug Vajtswv zoo siab! Thiab qhov zoo dua ntxiv yog qhov uas ua rau Vajtswv hu nkauj vim koj thiab kuv!

Vajtswv txoj kev zoo siab tseg rau peb kuj zoo ib yam li peb txoj kev zoo siab thaum yog ib leej txiv ib leejniam thaum ntsia pom tej menyuam hu nkauj, npuaj tes tsis tseg, xav kom tej menyuam rov qab hu dua ib zaug ntxiv. Thiab kuj zoo ib yam li tej menyuam rov qab mus rau saum sam thiaj hu ib zaug ntxiv rau niam txiv tej kev zoo siab, Vajtswv kuj zoo siab rau peb ib yam nkaus li ntawd, thiab Vajtswv yuav tsis muaj hnub tseg txoj kev nthuav tawm tej kev zoo siab ntawd. Vajtswv zoo siab rau peb, zoo li Vajtswv zoo siab vim cov Yixalayees tej vajntxwv. Thiab nyob hauv Yexus Khetos, Tus Vajntxwv ntawm txhua tus vajntxwv, peb tau suav tias yog tus nrog Vajtswv kav ua ke (Loos 8:17). Vajtswv paub zoo peb txhua tus, thiab los ntawm txoj kev hlub, Vajtswv lub hwjchim uas tsis muaj nrim, Vajtswv yuav cawm peb dim ntawm tej kev txomnyem thiab kev ntshai.

Cia li zoo siab, vim Vajtswv tab tom zoo siab rau peb!

Thov caw nrog kuv peb thov Vajtswv ua ke: Tus Tswv uas muaj kev hlub, kuv qhuas Vajtswv thiab pehawm Vajtswv vim tej haujlwm loj thiab zoo uas Vajtswv txhais tes tau ua. Vajtswv paub zoo txhua yam nyob hauv kuv, ntawd yog Vajtswv yeej tseem zoo siab hauv siab nrog txoj kev hlub kuv. Txawm yog kuv qaug zog thiab txhawj los Vajtswv yeej hu nkauj zoo siab vim kuv yog Vajtswv tug. Vajtswv thov tig kuv lub siab mus rau ntawm Tswv Yexus yog tus Cawm kuv dim ntawm Vajtswv lub hwjchim, thov pab kom kuv paub mloog Vajtswv lub suab nkauj hu zoo siab tseg rau Vajtswv tej menyuam thiab fij lub neej ua haum Vajtswv siab. Kuv thov hauv Tswv Yexus Khetos lub npe. Amees.

Cov kwv tij txhua tus Leej Txiv saum ntuj tsis yuam kom peb yuav tsum ntse lossis yuav tsum ua tau ib yam dabtsi twg loj. Vajtswv xav kom peb hlub Vajtswv, nyob ze Vajtswv thiab ua lub neej nyob hauv txoj kev sib raug zoo ua ke nrog Vajtswv. Thiab thaum peb tag siab muab lub neej ua Vajtswv haujlwm, txawm yog tsuas dhau ntawm tej haujlwm me me los, ruaj siab – vim paub tias ntuj ceebtsheej ci ntsa iab, muaj ib tus tab tom luag thiab tsa suab hu nkauj zoo siab vim peb, vim peb yog Vajtswv menyuam.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.