Nyob hauv txoj kev nrog tus Tswv mus, peb muaj ntau lub sijhawm los kawm paub Vajtswv dhau ntawm txoj kev kawm Vajluskub, lub sijhawm pehawm Vajtswv, tej ntaub ntawv qhia kev ntseeg. Tiamsis, vim li cas txawm yog peb twb siv zog kawm ntau yam txog Vajtswv, tiamsis ntau tus lub neej hauv peb yeej hnov cuag li tus ntsujplig qhuav qhawv thiab nrhiav tsis tau txoj kev loj hlob paub Vajtswv tiag? Tsis paub peb puas paub Vajtswv tiag lossis tsuas paub Vajtswv xwb?

Hnub no, yog hnub 07/09/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Janice Moore dhau ntawm Zaj kawm PAUB VAJTSWV LOSSIS TSUAS PAUB TXOG VAJTSWV XWB?

“Kuv ua kuv lub neej kom haum Yexus Khetos siab, kuv thiaj li tso ib puas tsav yam tseg. Kuv saib tej ntawd zoo ib yam li tej liamsim uas luag muab povtseg lawm xwb; kuv ua li ntawd kom kuv thiaj tau Yexus Khetos los ua kuv tus Tswv” (Filipis 3:8)

Cov neeg nto npe feem ntau lawv yuav tshwm ntsej muag hauv tej lub rooj txais tos loj loj, tshwj xeeb yog thaum uas lawv muaj kev pab rau lub zej zos. Qhov uas lawv ua haujlwm zoo thiab pab rau lub zej zos yog yam zoo, tiamsis thaum kawg ntau zaug ho tsis zoo li peb xav. Rau qhov, ntau zaug tej haujlwm zoo uas ua ntawd tsuas yog ua qhuas tus kheej xwb. Thiab yam uas nyuaj siab dua yog lub ntiajteb ntau zaug kuj tso cai rau cov neeg muaj koob npe yuav tau coj ib yam dabtsi twg los ua pub rau yus lub zej zos. Qhov no kuj tshwmsim rau Tswv Yexus hauv Nws tes haujlwm.

Vajluskub sau tseg thaum Nws pib Nws tes haujlwm, Tswv Yexus rov qab mus pem Kalilais thiab lub tsev sablaj hauv Naxales, uas yog nws lub zos. Nyob ntawd, Tswv Yexus nyeem Yaxayas 61 thiab qhia cov pej xeem: “Tom qab ntawd, Yexus mus txog hauv lub nroog Naxales uas nws loj hlob. Hnub Xanpataus nws mus rau hauv lub tsev sablaj raws li nws ibtxwm mus. Nws sawv ntsug nyeem Vajtswv Txojlus rau sawvdaws mloog, luag muab thooj ntawv uas Yaxayas tus uas cev Vajtswv lus sau los rau Yexus. Yexus nthuav thooj ntawv ntawd tau zaj uas hais tias, “Tus Tswv tus Ntsujplig nrog nraim kuv, Rau qhov nws tsa kuv ua tus qhia txojmoo zoo rau cov neeg txomnyem. Vajtswv txib nws mus qhia txojkev cawm dim rau cov neeg uas raug kaw, thiab kho cov neeg digmuag kom rov porn kev, thiab tso cov uas raug kev tsimtxom kom dim thiab qhia rau sawvdaws paub lub sijhawm uas tus Tswv yuav los cawm nws haivneeg.” Thaum Yexus nyeem tas, nws muab thooj ntawv ntawd kauv cia thiab muab rau tus uas saib tej ntawv ntawd, thiab nws txawm zaum. Txhua tus uas nyob hauv lub tsev sablaj saib ntsoov Yexus, Yexus pib qhia lawv hais tias, “Vajtswv Txojlus uas hnub no nej hnov twb tiav lawm.” Cov neeg ntawd qhuas thiab xav tsis thoob rau tej lus zoo uas nws hais ntawd Lawv hais tias, “Tus no tsis yog Yauxej tus tub los?” (Lukas 4:16-22).

Thaum nyeem tas, Tswv Yexus hais tias ntu Vajluskub nyob hauv Yaxayas tab tom hais txog Nws tus kheej ntag. Tej zaug muaj ntau tus neeg nyob hauv Naxales twb hnov txog tej txujci uas Tswv Yexus ua nyob hauv Kanpena-us. Thiab lawv kuj tos ntsoov Tswv Yexus yuav ua tej txujci ntawd, vim lawv xav tias lawv tsimnyog tau txais tej ntawd.

Tiamsis Tswv Yexus tsis ua raws li tej uas lawv tos. Tswv Yexus hais tias: “Yexus hais rau lawv tias, “Kuv paub hais tias nej yeej yuav hais lo pajlug no rau kuv hais tias, ‘Koj yog tus kws tshuaj, koJ yuav tsum xub kho koj kom zoo tso.’ Thiab nej yuav hais rau kuv hais tias, koj sim ua tej txujci uas peb hnov koj ua pem lub nroog Kapena-us, rau hauv koj lub nroog no rau peb saib.” Yexus hais rau lawv tias, “Kuv qhia tseeb rau nej hais tias, yeej tsis muaj ib tug cev Vajtswv Ius uas cov neeg nyob hauv nws lub zos yuav hwm nws” (Lukas 4:23-24).

Tas Tswv Yexus rov qab hais txog zaj xwm txheej nyob hauv Vajluskub Qub: tus cev lus Eliyas tau txib mus cuag tus pojntsuam nyob ntawm Xelafas, yog lwm haiv neeg. Tshuav Elises ho kho rau Na-amas, kuj yog lwm haiv neeg thiab: “Nej mloog kuv hais: Kuv qhia tseeb rau nej hais tias, thaum lub sijhawm uas Eliyas nyob, muaj tej pojntsuam coob coob nyob hauv tebchaws Yixalayees. Thaum ntawd nag tsis los tau peb xyoos thiab rau hli, thiab muaj kev tshaib plab thoob plaws lub tebchaws. Vajtswv tsis tau txib Eliyas mus pab cov pojntsuam uas nyob hauv tebchaws Yixalayees ib tug li, tiamsis tsuas txib Eliyas mus pab tus pojntsuam uas nyob hauv lub nroog Xalefas hauv cheebtsam Xidoos xwb. Thiab thaum lub sijhawm uas Elisas tus uas cev Vajtswv lus nyob, muaj cov neeg mob ruas coob coob nyob hauv tebchaws Yixalayees, tiamsis tsis muaj ib tug zoo ruas li, tsuas yog Na-amas tus uas yog neeg Xilias tib leeg thiaj zoo ruas xwb” (Lukas 4:25-27).

Thaum Tswv Yexus rov qab hais txog tus cevlus Eliyas thiab Elises tsuas ua txujci rau lwm haiv neeg ho tsis ua rau cov neeg Yixalayees ces cov neeg nyob hauv tsev sab laj lawv npau taws. Lawv cab Tswv Yexus tawm hauv nroog thiab muab Tswv Yexus tua pov tseg: “Thaum cov neeg uas nyob hauv lub tsev sablaj hnov Yexus hais li ntawd sawvdaws chim heev. Lawv txawm sawv tsees muab Yexus thawb ntiag tawm hauv lub nroog mus, thiab coj Yexus mus rau saum hauv roob, yuav muab Yexus thawb rau hauv qab tsuas, rau qhov lub nroog ntawd nyob saum roob, tiamsis Yexus cia li phoom ntiag phua plhawv lawv thiab khiav mus lawm” (Lukas 4:28-30).

Puas tau muaj zaum twg koj rov qab los hauv zos tomqab ntau xyoo thiab pom tias cov neeg uas ib txwm paub koj… tseeb tiag lawv tsis paub koj? Qhov no kuj raug rau kuv thaum kuv mus koom ib hnub ua koob tsheej nco txog hnub kawm tiav. Hnub ntawd muaj ntau tus neeg tuaj koom. Muaj qee tus paub kuv, tiamsis thaum tham txog tej uas lawv nco txog kuv, lawv ho nug tias kuv yog leej twg tus ntxhais, thiab kuv yog tus neeg zoo li cas, lossis tej uas tseem nco txog thaum kawm qib ib. Txawm yog lawv tseem nco kuv thiab paub kuv los, lawv yeej tsis paub kuv tiag.

Cov neeg hauv Naxales kuj tsis paub Tswv Yexus tiag. Lawv tsuas paub Tswv Yexus raws li qhov uas tib neeg paub xwb: yog Yauxej tus tub, ib tug kws ua ntoo. Lawv tsis paub tias Tswv Yexus yog tus Mexiyas, tus raug ywg roj, tus los rau hauv ntiajteb no qhia Txojmoo Zoo txog Vajtswv lub tebchaws, tus los tso cov neeg raug kaw, tus ua rau tus digmuag pom kev, tus ua rau cov neeg raug caijtsuj tau ywj pheej. Qhov uas cov neeg Naxales “paub” tsuas yog “paub” sab nraud xwb. Thiab thaum Tswv Yexus hais tias Nws yog tus zoo li ntawd, pauv qhov uas lawv txais los ntawm txoj kev ntseeg, lawv ho npau taws thiab muab Tswv Yexus tua pov tseg.

Niaj hnub nim no, puas yog peb kuj tsuas paub txog Vajtswv zoo li cov neeg Naxales thaum ub? Peb xav tias peb paub Tswv Yexus vim peb mus pehawm, peb mloog lus qhuab qhia, koom ua dejnum hauv Pawg Ntseeg, ntau zaug tseem qhia txog Vajtswv. Tiamsis yog peb tsuas “paub txog Vajtswv” dhau los ntawm txoj kev xav tsis yog nyob hauv txoj kev sib raug zoo ua ke nrog Vajtswv, ces nyuaj rau peb saj tau Vajtswv txoj kev hlub, kev tshua, thiab Vajtswv kev txawj ntse. Ib lub neej paub Vajtswv zem zuag yuav txi tsis tau tej txiv zoo, tiamsis yuav txi tau yam phem.

Paulus kuj tau hais txog tus neeg uas muaj kev nkag siab tob txog Vajtswv raws li kevcai. Yawg yog ib tug hauv cov neeg Yixalayees. Paub kevcai, yog ib tug neeg Falixais, hais txog kev ncaj ncees raws li kevcai ces tsis muaj ib qhov twg thuam tau. Tiamsis, Paulus saib tej ntawd zoo li tsis muaj “qab hau” thaum muab piv rau txoj kev paub Tswv Yexus. Los ntawm txoj kev ntseeg qhuav qhawv, Paulus saj tau Yexus Khetos muaj sia tshaj txhua yam: “Kuv ua kuv lub neej kom haum Yexus Khetos siab, kuv thiaj li tso ib puas tsav yam tseg. Kuv saib tej ntawd zoo ib yam li tej liamsim uas luag muab povtseg lawm xwb; kuv ua li ntawd kom kuv thiaj tau Yexus Khetos los ua kuv tus Tswv” (Filipis 3:8).

Thov caw nrog kuv peb thov Vajtswv ua ke: Leej Txiv tus muaj kev hlub. Vajtswv, thov pub kom kuv yog tus neeg uas paub koj tiag nyob hauv txoj kev sib raug zoo ua ke nrog koj ntawm kuv tus kheej tsis yog tsuas lam paub koj xwb. Thov zam txim rau kuv vim muaj ntau zaug kuv kawm paub txog Vajtswv tiamsis ho tsis cia tej ntawd nkag rau hauv kuv lub siab, kuv tsis loj hlob nyob hauv txoj kev paub koj, tiamsis tsuas nres ntawm tej uas kuv kawm tau tsis muaj hwjchim. Thov Vajtswv coj kuv kev, pub kom kuv muaj lub siab ntshaw tau paub koj, tsis khav theeb txog tej uas kuv tau paub, tiamsis nkag mus rau hauv txoj kev sib raug zoo ua ke nrog koj. Thov pub kom kuv yuav hais tau ib yam li Paulus tau hais tias Tswv Yexus yog yam uas muaj nqis tshaj hauv kuv lub neej. Kuv thov hauv Tswv Yexus Khetos lub npe. Amees.

Cov kwv tij txhua tus, cov pej xeem hauv lub nroog Naxales paub Tswv Yexus tiamsis lawv tsis ntseeg Nws. Txawm yog lawv lub pob ntsej mloog tej lus Nws hais los, lawv tsis cia lawv lub siab rau Vajtswv chwv. Niaj hnub nim no peb kuj yooj yim poob mus rau tej kev ntxeev ntxias ib yam li ntawd: Kawm paub ntau yam txog Vajtswv nyob hauv Vajluskub, tiamsis tsis cia peb lub siab chwv txog thiab tsis cia Vajtswv tej lus hloov pauv. Hnub no, thov Vajtswv hloov pauv koj lub siab kom koj lees paub thiab ua neej nyob rau hauv txoj kev sib raug zoo ua ke nrog Vajtswv. Txhua zaug los rau hauv Vajtswv tejlus, cia li los ntawm lub siab tau hnov, tau ntsib Vajtswv, tau Vajtswv hloov yus tus kheej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.