Bol he neh geh tŭ lơi tìp tòm bơta cau kơlôi ờ di, tŭ ò geh cau koñ iat, ò gớs dồ nă cau lơi wă broă mờ bol he ơn tòm hwềng nùs? Bơta hơ̆ là kơn jơ̆ ngăn, bè jơh dunnia dŏ nwơl kời, mờ bol he păl dồ nă kong añ bơta jê sồt ò tòm toh hơ̆ mờ ờ rgơi đớs jơnau lơi. Mơ ya, tòm tŭ hơ̆, gen kah té lah bol he ò ơm dồ nă ò. Gớs dồ Bơtau wă loh làng bơta jê sồ ò tòm toh hơ̆ rlau mờ jơh tơl nă cau, mờ Kơnràñ sùm ơm mrềp, sùm ai tê nàng dong kòn bol he.

Ngai do, ngai 04/9/2025, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Consuelo Gadon bơh tơnggume LÒT GĂN BƠTA JÊ SỒT Ờ TÒM TOH.

“Yàng Jehôwa rơp tòmlơh ala bol mê in; bol mê mìng ơm mŏ mŏ lơm.” (‭‭Lik Ejiptơ‬ ‭14‬:‭14)

Añ pah lòt tús dê dồ nơm klơng bơ srăm pa, mờ găm jòi gùng nàg lơh kwèng mơ cau bơyô pu gru. Mờng ờs là dồ nă cau ò khin cha, kòp tŭ añ kung pleh dê bơta nàng cau ndai sền dê să tòm añ. Mờ ya añ kung ờ git ñchi bơh tai năm hơ̆ sùm gơ cèng tús ala broă lơh añ in ba sìl. Oă broă ờ tòm toh neh gơ lik tús bơh pu grŭ kơlôi ò di bơh añ.

Broă sơn rờp gơlik gớs là tŭ jơ họk tin học. Tŭ jơ dồ ơ dŭ rcăng nàng lik bơh phòng máy gen pu gru sền gŏ dồ nơm mpang cih chữ neh roh là tiah mơ añ nggui. Cau pu gru gơ jrañ mờ prơ hơng dờng jơnau, gen kữ đớs añ là cau neh kơñau. Cau pu gru sồr jơh dồ ơ dŭ ơm wơl tús dê tŭ añ ai wơl mpang cih chữ hơ̆, mơya añ ò dôñ gơ! Añ bassìl mò git lơh bè lơi. Añ mìng git ñim tơn.

Bàr pe tuần tơ kời, dồ nă cau pu gru ís kơlôi añ đớs iơh bơh kời pu gru, gen ni sơ na toh chùr chi tềng añ. Añ rơt chừs, ò dòn di măt bơh broă neh gơlik gớs? “Cau pu gru ngăn neh toh dê añ sơl? Ngăn hơ̆ là bơta kơlôi ò di? Añ neh kơlôi ís bè hơ̆. Mơya cau pu gru đớs lah prơ hơng dờng lah añ, đớs añ ờ git duh rngòt dồ nă cau pu gru.

Tŭ do, tŭ mờ neh 42 sơnăm, añ neh ño tŭ yăl wơl bơta hơ̆. Mơya tŭ hơ̆ gen ngăn ò chò hòp dồ êt lơi. Gen añ neh gớs jê sồt, moat jrùng. Gen oă dơ̆ añ neh kơlôi tús mpăl dồ nơm klờng ís. Bơh ờ gớs dồ nă cau lơi koñ lơh bơyô mờ dồ nă geh đớs lah cau kơñau mờ ờ git duh rngòt.

Cau bơto Pol kung neh cau kơlôi ò di mờ yă wơng oă dơ̆ tòm gơnoăr broă ồng dê. Ồng neh đớs bơta hơ̆ tòm II Kô-rin-tô 10. Gớs cau đớs ồng “tòm tŭ ơm di đap oh mi gen lơbơn lơño, mơya tŭ neh ngkòi mat gen cha rma ngan gơwèt mơ oh mi” (II Kô-rin-tô 10:1), cau ờs đớs ồng lah “ cau lơh lòt jat poac să” (2) mờ cah rña lah ““Ală sră pơyoa khai dê đơs kơnjơ̆ mơ pràn kơldang, mơya tus di tŭ tòm mat gen khai lơbơn lơño, mơ jơnau đơs ò gơs kwơ màng.” (10) . Añ neh lùp ís lah ồng neh gớs bơta kơlôi bè lơi. Gen ồng kung gớs bơta jê nùs bè añ sơl? Bơh ồng kung là dô nă kòn mơ nús, kung cèng ala bơta kơlôi sơnơng bè añ sơl

Să tòm Yàng Je-su kung ờ pleh bơta cau cah đớs iơh bè hơ̆. Jat bè añ, Kơnràñ là Bơtau git wă broă hŏ rlau jơh cau ndai. Bulah ò gớs glài, Kơnràñ kung găm cau bơtuh tìs, kong cah rña ò tòm toh, mờ kong cau tơn chơt. Tòm sră Jăng 8, Yàng Je-su neh ràng tơlik nùs nđàc sơngit mờ cau ùr neh cau kup tòm tŭ tìs bơrnàn, gen cau do ngăn là neh lơh tìs. Jat lơgăr tŭ hơ, cau ùr do păl kong cau cơm lŭ tús dê chơt. Mơya Yàng đớs: “Cau lơi tòm bol mê la cau ò gơs glài, cơm tĕ lŭ lài di khai.” (Jang‬ ‭8‬:‭7), ngăn añ kơp gơn ngai hơ̆ Yàng Je-su tơlik mat mờ pơn dang dê añ in là niam ngăn.

Lòt găn ala broă hơ̆, găm gớs tai ala bơta ni sơ na gơ tơng tús, mờ ya Yàng Tòm Trồ sùm là song tơ pă. Bulah là ala ngai añ gơ krăm tòm bơta jê sồt, wi wơ mờ jơh bơta, mờ bơta koñ gơboh Kơnràñ dê, gen añ ò tŭ lơi gŏ Kơnràñ sang lời añ. Să tòm Yàng Je-su neh yờ đơ añ, dong añ sùm ai mat añ dê sền dê Kơnràñ.

Kòp tŭ añ tìp kal ke, añ ntoat tús mờ Bơtau Dong Klàs Yàng Je-su, bơh añ git Kơnràñ là Bơtau Pơn Dơm Pơn Iang añ. Kơnràñ git bơta añ păl kong bơh bơta đớs iơh di gùl mpồl cau gal là bè lơi, mờ Kơnràñ sùm bơtơl pràn añ in tòm kòp tŭ añ lơbơn lơñio. Añ neh toh glài dê ala cau pu gru añ dê, bơh kung bè cau ùr neh geh cau kup tìs bơrnàn rài yau, añ kung neh lơh ờ di, kung neh lơh tìs, mờ añ neh geh Yàng toh glài. Tús dê ngai añ sir bơ srăm, añ ò mìng geh bơta mềr kiar mờ pu gru, mờ añ kung neh geh ala cau bơyô niam tús dê ngai do

Gen ngăn, Yàng Tòm Trồ rơ gơi lơh ala bơta sền là bè ờ niam lơh gớs bơta niam bol he in. Kơnràñ neh lơh bơta hơ̆ añ in, mờ añ dòn nền lah Kơnràñ kung rơp lơh bơta hơ̆ bol he in sơl.

Dan jà bol he dô nùs bal tòm bơta hòi dan:

Khoai Bèp koñ gơboh, ngai do kòn tús dê đap măt Kơnràñ mờ hwềng nùs ưnngài, bơh git lah Kơnràñ là Yàng Tòm Trồ cơng tàng mờ song ring. Ưnngài Kơnràñ bơh nùs koñ gơboh mờ nùs nđàc sơngit song tơ pă mờ Kơnràñ ai kòn in, bulah là tòm tŭ klăm jơngo ngăn. Khoai Yàng, dăn dong kòn ntào kơ̆ mờ nùs dòng ờ nàng, koñ gơboh mờ toh glài, nàng lơh cơng bơh bơta nđàc ờ tŭ lơi jơh Kơnràñ dê. Kòn dòn kơnờm dê bơta at bồ Kơnràñ dê, git lah tê Kơnràñ găm lơh broă, tian gớs jơh bơta rgùm băl nàng lơh bơta geh kwơ kòn in mờ bơh bơta gơklŏ Kơnràñ dê. Kòn jơh nùs hòi dăn tòm sơnđăn Yàng Je-su Kríst, A-men.

Ơ ồng mọ oh mi koñ gơboh, di lah bol he găm kong bơta jê sồt bơh jơnau đớs iơh ò di, gen kah te lah Yàng sùm sền dê he, git wă mờ koñ gơboh bol he. Gen lời té Kơnràñ sơm bời mờ lơh sơm bời wơl bol he in bơh nùs koñ gơboh ờ tŭ lơi tòm gơl. Kơnràñ rơp dong tò bol he mờ lơh jơh bơta iơh gơlik gớs bơta niam rlau jơh bol he in. Bol he rcăng nàng pơndơng jơh tơl bơta Kơnràñ in tòm ngai do sơl?
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.