Sơnăm hŏk plơ̆ng đei jơhngơ̆m chơt hiôk ‘nă hal kư̆m đei ‘bôh hlĭch. Mă lu bơngai hŏk oei hơ’lơ̆p dah ‘lŏ, thây bơtho dah lu mĕ ‘bă, đĭ đăng lu bơ̆n wă pơtơm đơ̆ng blŭng a hăm tôm tơdrong tam mă nhen hơđăl oei chang gô: mĭnh anih hnam hŏk plơ̆ng, anih cham jum dăr kư̆m plơ̆ng, dah đei kơ chĕp tơdrong jang plơ̆ng. Mă tơm kơ đơ̆ng tơ drong blŭng a iĕ noh, Kră Yang oei krao buăl yak năm hăm Sư, hăm jơhngơ̆m đon lui păng chu yom. Lu bơ̆n ưh kơ kăl chă tơdrong pơtơm đơ̆ng blŭng a ‘lơ̆ng tôm, mă lui ngeh kơ Kră Yang gô lăp đon kơplah rim ‘nu pơ̆n yak năm đơ̆ng blŭng a lăm tơdrong iĕ đơ̆ng Sư chông anhăk.

Năr ‘nâu, ‘năr 05/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Lori Wilkerson Stewart kơ̆l ‘bai PƠTƠM BLŬNG A ĐƠ̆NG TƠDRONG IĔ.

“Yua kơ bu pơ̆n pơjăm kơ năr tơdrong iĕ âu? Sư gô chơt hiôk ‘bôh tơlei dăng pơtŏ ‘bơ̆t ti Sôrôbabel. Đei tơpơh tŏ măt ‘nâu măt Kră Yang năm tơmang lăng jơ̆p kơ teh đak.” (Sachari 4:10)

Inh ling lang băt bơnê yua kơ Kră Yang ling lang lăp đon kơplah inh yak năm lăm tơdrong jang plơ̆ng. Kră Yang băt kơ yak năm hăm đon lui ưh kơ đei ‘bônh ôh, yua kơ yak năm hăm Sư gô đei hơdai tơ drong kơnê̆ gô truh.

Brei mơsơ̆ ‘nâu, inh pơtơm blŭng a lăm trong yak năm plơ̆ng lăm tơdrong arih. Mă khan inh wă jê̆ puăn jĭt sơnăm bơih, Kră Yang oei krao inh weh đơ̆ng anih pơlei inh arih tơ pơlei nai, năm tơhnam trưng na hŏk pơhrăm dơ̆ng. Jơ̆ minh ‘nu bơngai jing akăn, bơngai mĕ kơ pêng ‘nu kon, buăl tơchĕng pơwao lăng nhen yak “pơplŏng” lăm đon lui ‘nâu tơnat thoi yơ hăm hnam dơnŏ nhôn. Mă lei, inh mơn ‘bôh nơ̆r ‘Bok Kei-Dei kư̆m đei lơ kơ hơ’mon tơdrong thoi noh.

Kơplah lu bơngai đe phak đơ̆ng Babilôn wih brŏk tơ Jêrusalem, lu sư đei tơ’bơ̆p tơdrong pơlong lăng đơ̆ng tơdrong ‘nâu truh tơ tơdrong to. Mă hơdrol hloh, lu sư pă đei anih wă ‘măn kơkuh kơ ‘Bok Kei-Dei mă pơtao Salamôn đei pơm, pơrăm đĭ bơih. Serupbabel jơ̆ bơngai pơgơ̆r păng Jêsua noh ‘bok soi đei pơjao tơdrong jang pơjing ming hnam akŭm kơkuh. Mă hơdrol kơ wă pơm hnam akŭm, lu sư pơm minh pôm chơnang soi wă soi kơ Kră Yang.

“Lu sư hli kơ kon pơlei kơtă, mă-lei pơm ming chơnang soi tơ hơnă so sư păng soi pơyơ̆r tơmam soi kơ Kră Yang tơ noh, wă khan tơmam soi ‘buh gah pơgê păng kơsơ̆.” ( Esơra 3:3)

Buăl hăm hli tơrơ kơplah wă pơtơm tơdrong bơ̆jang blŭng a kơ Kră Yang ưh? Pơma tơpă, Kră Yang krao iŏk lu bơ̆n bơ̆jang dôm tơdrong jang pơm kơ lu bơ̆n hli krưp dêh. Kư̆m đei, Kră Yang wă tŭk lê̆ dôm kơ tơdrong hli tơrơ lăm jơhngơ̆m lu bơ̆n hơdrol hloh, wă kơ lu bơ̆n pơhrăm iŏk lui gơnang kơ Sư păng nơ̆r Sư đei hơtă ăn. Yua kơ đơ̆ng đon lui pơm kơ Kră Yang lăp đon.

Đunh bơih, Kră Yang krao iŏk inh hŏk pơhrăm gah Ră roi pơma pơdah lăm tivi. Pơm kơ inh ưh kơ hơđơ̆ng. Inh tơchĕng: “Kon hli dêh kơ pơma ‘bơ̆t anăp bơngai tơpôl lơ! Păng ưh kơ băt kiơ kơ wă pơma pơdah rup tơ lăm tivi!”

Rŏ lăng, kơplah noh Kră Yang hiĕk. Inh hơiă dêh kơ lu bơngai Lui đei pơma thoi âu: tơdah Kră Yang krao iŏk buăl bơ̆jang dôm tơdrong pơm kơ buăl hli, na “ kư̆ kơ hli …mă oei bơ̆jang!”

Buăl đei bơ̆jang kơ Kră Yang mă ưh kơ đei bu hnhoi lăng dah ưh kơ đei bu tơgŭm ưh? Jêsua păng Serupbabel lui ngeh kơ ‘Bok Kei-Dei wă kơ lu sư pơjing ming hnam akŭm kơkuh, mă lei tơdrong arih kơplah noh phara kơ dang ei. Lu sư ưh kơđei pơm phĕt wă pơm blŭng a ‘lơ̆ng rŏ, ưh kơ đei jên tơmam lơ wă pơm. Truh tơ, ưh kơ đei jên tơmam wă apah kơ bơngai bơ̆jang. Nơ̆r ‘Bok Kei-Dei đei roi thoi âu: lu bơngai pơm bơnă đei apah hăm phe ‘ba, tơdrô hơmu păng đak rơmă ‘long ôliwơ.

Kơplah hnam dơnŏ lu nhôn pôk năm tơ pơlei tih plơ̆ng, klo akăn nhi ưh tam mă đei tơdrong jang. Kư̆m ưh kơ đei bu sơng iŏk ưh kơ đei hơkat pŭn hiôk ăn kơ lu nhôn, tơpă yua kơ … ưh kơ đei băt kơ lu nhôn noh bu! Mă lei đei minh tơdrong lu nhôn băt kơnăl tơpă: tơ dah ‘Bok Kei-Dei đei wei rong lơ bơngai ‘lơ̆ng tơpăt lăm sơ̆p hla bơar ‘Bok Kei-Dei đơ̆ng sơ̆ khơ̆ dang ei, na Sư kư̆m ưh kơ hiơt kơ lu nhôn.
Buăl tam đei layơ pơtơm yak năm lăm tơdrong plơ̆ng, mă lei jum dăr tă kơ pơma pơjăm, ưh kơ lui ngeh? Serupbabel păng Jêsua kư̆m yua kơ lu bơngai kră chăl noh sơ̆ pơm kơ măr sư bơ̆l hăl. Esơra 3:12-13 đei chih kơplah tơmo hơnă hnam đei dan bơih, lơ kon pơlei đei jreo ôr noh jơ̆ …nơ̆r nhơ̆m hmoi! Lu ‘bok soi kră bơih lu sư nhơ̆m ‘blŏk kơ kơplah chăl arih ‘lơ̆ng rŏ đei hnam akŭm mă Salômôn đei pơjing sơ̆, păng lu sư băt kơ pơm hnam akŭm kơkuh ‘nâu ưh kơ đei ‘lơ̆ng rŏ thoi sơ̆.

Kơplah ‘Bok Kei-Dei đei krao iŏk buăl pơtơm bơ̆jang tơdrong jang Sư, athei hơmet jơhngơ̆m bơ̆jang hloi: blŭng a iĕ đĕch, mă ưh kơ băt gô keh đang ‘lơ̆ng dah ưh, jơhngơ̆m hli tơrơ păng bơ̆l hăl noh, blŭng a đei đơ̆ng lăm bơngai lui kơ Kră Yang.

Mơ̆ng ưh kơ hơiă tŏ sĕt hloi, hăm trŏ ưh? Mă lei, yua kơ đơ̆ng tơdrong noh mă Kră Yang lăp đon kơplah lu bơ̆n pơtơm blŭng a bơ̆jang tơdrong jang Sư. Hăm đon lui păng jơhngơ̆m pơyom gô ling lang pơgơ̆p hăm Sư, păng gô đei tơdrong ‘mêm mơnat hăm mơsêh mơyang đơ̆ng Pơlei ‘Lơ̆ng.

Kơplah buăl pơ̆n nuih yak năm hăm jơhngơ̆m chu yom, ‘Bok Kei-Dei gô tuh ăn tơdrong ‘mêm mơnat đơ̆ng lu bơngai mă buăl ưh kơ ngeh noh. Pơtao Sirus lăp đon kơ lu bơngai bơnă wih wơ̆t pơm dơ̆ng hnam akŭm kơkuh. Lu pơtao Persia đơ̆ng rŏng kơ noh thoi kơ Đarius păng Artaserses kư̆m lăp đon kơ tơdrong pơm ‘nâu. Mă khan kon pơlei kơtă ưh kơ lăp đon, mă lei kon pơlei Juđa đei tơgŭm đơ̆ng lu bơngai yŏng pơgơ̆r tih kơplah chăl noh sơ̆.

Kơplah buăl yak năm hăm đon lui, Kră Yang ưh kơ ăn hơdrô̆ thoi kơ buăl wă đĕch, mă tuh ăn rơkah rơkai kơ buăl. Kiơ̆ kơ khei năr, lu bơngai pơm hnam akŭm đei jên tơmam păng phe ‘ba đe tơgŭm. ‘Bok Kei-Dei đei wơh thim khŭl bơngai bơnă wih brŏk, mă kơplah ‘nâu đei chông đơ̆ng Esơra. Pơtao Artaserses đei ăn kơ Esơra lơ maih hăm tơmam gĭt kăl nai (Esơra 7), truh tơ wơh lu bơngai chĕp jên tơmam: “Mă dôm tơmam kiơ Esơra… apinh kăl wă lu iĕm athei ăn mă tôm.”

Buăl khan gô lăng tơdrong hơmon tơ hơtuch kơnh thoi yơ? Hnam akŭm kơkuh đei pơjing pơm keh đang, păng tơm kơ đơ̆ng tơdrong noh pơm Nêhêmi wih wơ̆t brŏk man ming dur pơlei Jêrusalem. Buăl hăm ‘bôh ưh? Mă khan pơtơm blŭng a đơ̆ng tơdrong iĕ đĕch, đei jơhngơ̆m chu yom Kră Yang gô jing tơm kơ pơtrŭt jơhngơ̆m ăn kơ bơngai nai pơtơm đơ̆ng blŭng a – na tơm kơ đơ̆ng pŭn hiôk noh oei đei hơdai khŏm khŏm.

Thoi kơ nơ̆r Kră Yang đei pơma trŏ tơpă: “Yua kơ bu pơ̆n pơjăm kơ năr tơdrong iĕ âu? Sư gô chơt hiôk ‘bôh tơlei dăng pơtŏ ‘bơ̆t ti Sôrôbabel. Đei tơpơh tŏ măt ‘nâu măt Kră Yang năm tơmang lăng jơ̆p kơ teh đak.” (Sachari 4:10 )

Tơdrong hơ’mon đơ̆ng inh oei lăm chăl “blŭng a iĕ đĕch”. Mă lei inh kư̆m pơma khan tơpă minh tơdrong: ‘Bok Kei-Dei đei wei rong ăn kơ klo inh tơdrong jang hiôk tơpă, păng inh kư̆m đei hŏk keh lăm chăl mă mĭnh lăm trong yak năm hŏk kơpal ‘biơ̆ dơ̆ng. Hơpơi kơ Kră Yang lăp đon kơ buăl, kơplah buăl tơpăt pơtơm đơ̆ng blŭng a đơ̆ng lăm tơdrong iĕ yua kơ anăn Kră Yang.

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ đơ̆ng lăm tôm tơdrong pơtơm đơ̆ng blŭng a mă Ih dan bơih lăm chăl arih kon. Mă khan kon ưh kơ băt hơđăl kơ trong yak năm tơ anăp păng oei chông anhăk kon yak năm. Apinh tuh ăn kơ kon đon lui wă kơ kon huay kơ bơ̆l hăl mă khan đei tơdrong pơmat tat. Apinh tơgŭm kon đei jơhngơ̆m hơđơ̆ng kĕ hlôi đơ̆ng jơhngơ̆m đon hli tơrơ, păng ling lang tơpăt lăm trong yak năm rim năr kiơ̆ kơ tơdrong ‘lơ̆ng tơpăt đơ̆ng Ih. Kon kŭp kơ̆ krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng năr ‘nâu buăl pơtơm đơ̆ng blŭng a lăm tơdrong iĕ đĕch, mă lei ‘nĕ kơ lăng pơhơi tơdrong noh. Yua kơ dôm kơ kơnao yak hăm jơhngơ̆m tơpăt mă buăl oei yak năm lăm ‘năr ‘nâu gô pơih ăn tơdrong tih hloh tơ ning mônh, ưh kơ ăn hơdrô̆ buăl đĕch, mă gô pơm ăn kơ lơ bơngai jum dăr lăp đon. Hơpơi kơ Kră Yang lăp đon yua kơ đơ̆ng pơtơm blŭng a đơ̆ng buăl lăm năr pơtơm năm hŏk pơhrăm tơhnam trưng blŭng a ‘nâu. Hơpơi kơ Kră Yang ăn kơ buăl đei jơhngơ̆m ‘nao, păng chông anhăk hăm jơhngơ̆m chang hơmĕng lăm trong yak năm tơ anăp.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.