Tòm gung lòt jat Yàng, bol he gơs oă tú lơm pah nàng bơtê git bơh Kơnràn kơnòm dê ală tú bơtê Sră Goh, tú jơ duh khoai Yàng, bơh ală sră bơta bơtê mơ ală sră đơs bơh Kơnràn. Mơya, nchi bơh tài geh bơtê oă bơh Yàng, mơya rai kis oă cau tòm bol hê gam ro rãn mơ ò sên gó bơta têh dơng tòm bơta dòp git Kơnràn? Gen tàng he neh git Yàng hala he ming git bơh Yàng lơm taih?

Ngai do, ngai 07/09/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ Janice Moore bơh tơnggume GIT YÀNG HALA MING GIT BƠH YÀNG?

“Ngan behơ̆, añ sền jơh ală bơta kung be bơta roh lơm, bơh bơta dòp git Yàng Jesu Krist, Yàng añ jê, la dờng màng rlau jơh; bơh Kơnràñ mơ añ neh sang lòi jơh ală cồng nha hơ̆. Añ sền ală bơta hơ̆ kung be thul ơmul tồ añ in dòp geh Bơtau Krist.” (Philip 3:8)

Oă cau tiơng pơnro òs gơs mat tòm ală bơta chò hòp dơng, krơi is la tòm ală bơta mơ bol khai gơs pơnah ơn. Bơta ơn pơnah hớ la bơta niam, mơya công nha gen gơs tú ò di jat nùs he. Digơlan, gơs tú cau lơh ală bơta niam hớ ming ai cau in git oă bơh să tòm he lơm. Mơya gơs bơta ò chò hòp, pah rài do kung gơs bơta kơlôi sơnơng lah la ală cau tiơng pơnro pal ngui ală phan mơna he gơs nàng lơh ală broă niam, lai ngan la bòn tòm he. Bơta do kung neh gơlik gơs mơ Yàng Jesus tòm gơnoar broă Kơnràn dê.

Sră Goh cih wơl lah tòm tú sơntòm lơh gơnoar broă, Yàng Jesus rê tòm bòn Galile mơ mut tòm hiu duh khoai tòm Na-xa-rét, bòn tòm Kơnràn dê. Tòm tiah hớ, Kơnràn neh sền Sră Goh Êsai 61 mơ bơto lang bol: “Kơnràñ lòt tus hơ Nasaret, la tiah Kơnràñ ơm bơh dềt tus di dờng. Jat bơta òs mòng, tòm ngai Saƀat Kơnràñ mut tòm hìu jum cau Juda dê, ñă ntào mơ sền sră. Gơs cau tong Sră cau gơnoar hwơr Esai Kơnràñ in. Kơnràñ pò Sră di di tiah gơs cih lah: “Hwềng Yàng dê rơp hơđang Añ, Bơh Kơnràñ neh bong mơñà Añ in nàng bơto yal Jơnau Niam ală cau rƀah lơòi in, Sồr Añ lòt yal ală cau gơkòl kup in geh hồ toh, Cau jơngo geh àng, Cau gơkòl rồn bơklơn geh khat gơboh, Mơ bơto yal nam ai bơta nđàc Yàng dê.” Gen Kơnràñ til Sră, tong wơl cau dong broă in, lồc behơ̆ nggui; ală mat cau tòm hìu jum sền trol di Kơnràñ. Kơnràñ sơntòm đơs mơ bol khai lah: “Ngai do jơnau tòm Sră Goh do neh gơlik di ngan di tồr bol mê rau.” Cau lơi kung lơh cơng niam bơh Kơnràñ, ai lơh krơi bơh ală jơnau bềng bơta nđàc lik bơh di bơr Kơnràñ, mơ đơs lah: “Hơ̆ ò di la kòn Jôsep ơ?” (Luca 4:16-22)

Tòm tú neh sền rau, Yàng Jesus đơs dô bă loh lang lah tòm Sră Goh Êsai đơs bơh Kơnràn. Digơlan oă cau tòm Na-xa-ret neh kơno bơh ală têl krơi mơ Yàng neh lơh oă cau in tòm Cabenaum. Mơ bol khai kung kơp kỡn Kơnràn rơp lơh ală bơta behớ sơl, bơh bol khai kơlôi lạ he dipal nàng dòp ală bơta hớ.

Mơya, Yàng Jesus ò lơh jat bè ală bơta bol khai kơp kỡn. Kơnràn đơs: “Kơnràñ đơs mơ bol khai lah: “Ngan bol mê ai jơnau pơnrĕ pơnring do đơs mơ Añ lah: ‘Ơ cau gơnoar sơnơm, sơmbòi tĕ is să he; ală bơta bol hi kơno ồng neh lơh tòm Kapenaum, gen kung lơh tĕ tòm ƀòn tòm ồng dê sơl.’” Gen Kơnràñ đơs lah: “Di ngan Añ đơs mơ bol mê, ò gơs cau gơnoar hwơr lơi geh dòp rò tòm ƀòn tòm khai dê.” (Luca 4:23-24)

Gen tàng, Yàng Jesus đơs wơl bơh bơta yal yau neh gơs tòm Sră Goh yau: cau gơnoar hwơr Eli geh sôr lòt tus hơ Sa-rep-ta, la tiah lang bol bơdih dê. Êlise gen sơm bòi ồng Na-a-man in, kung la dô nă cau lang bol bơdih: “Añ đơs song mơ bol mê, tòm rài Eli tòm trồ gơkòl til kơ̆ tòm pe nam prau kơnhai, jơh lơgar gơs jơgloh rung dờng; tŭ hơ̆ tòm Israel gơs oă cau ùr bơnrau, mơ Eli ò geh sồr lòt tus hơ dô nă cau lơi tòm mpồl bol khai, mìng sồr lòt tus hơ dô nă cau ùr bơnrau tòm Jarepta lơgar Sidôn lơm. Tòm rài cau gơnoar hwơr Elise, tòm Israel gơs oă cau dun; mơya ò gơs cau lơi geh sơmbòi, mìng Naaman cau Siri lơm.” (Luca 4:25-27).
Tú Yàng Jesus đơs wơl bơh broă cau gơnoar hwơr Eli mơ Elise lơh cau lang bol bơdih in ò di lang bol Israel in gen ală cau tòm hiu duh khoai gơhào nùs. Bol khai hwai Kơnràn lik bơdih bòn nàng tơnchơt Kơnràn: “Ală cau tòm hìu jum cau Juda kơno jơnau hơ̆ gen gơhào gơjrañ ngan, ñă ntào mơ bơtrơh tơlik Kơnràñ bơh di ƀòn dờng, hwài Kơnràñ tus di tiah cìr bồmơnơm mơ bol khai neh bơt ƀòn dờng, nàng sơrbì Kơnràñ pơrlă rkồn rkài. Mơya Kơnràñ sơrlèt bơh digùl bol khai mơ lòt tiah ndai.” (Luca 4:28-30)

Gơs tú lơi ồng mò oh mi rê wơl tòm bòn tòm he mơ sên gó lah ală cau mơ neh git he … gơlơh bè la ò git bơh he sơl? Bơta hớ neh gơlik gơs mơ ẵn tú ẵn rê wơl tòm klơng bơtê nàng tip mat ală cau gơp bơtê bal mơ ẵn. Ngai hớ gơs oă ngan cau. Dô êt nă cau gam kah ẵn, đơs wơl ală bơta bol khai git bơh ẵn, lah ẵn la kon ur cau do dê, la cau mbe lơi, hala ală bơta gơlik gơs tú gam dềt. Bulah bol khai kah mơ git bơh ẵn, mơya bol khai ò git loh.

Lang bol Naxaret kung ò git Yàng Jesus dô bă loh lang. Bol khai git bơh Kơnràn jat bơta git wă kon mơnùs dê: kon klau Jôsep dê, dô nă cau lơh chi bè cau ndai. Bol khai ò git Kơnràn la Bơta Mesia, Bơtau geh bong mơnà, Bơtau tus tòm dunnia nàng bơto yal bơh Jơnau Niam Lơgar Đang Trồ dê, nàng dong tă ală cau gam kol jam, cau jơngo geh ang, cau dí geh hồ toh. Bơta “git” bol khai dê la bơta “git” đah bơdih lơm. Mơ tú Yàng Jesus rang tơlik Kơnràn la Bơtau behớ, bol khai ò dòp rò Kơnràn bơta dòn, bol khai gơhào nùs mơ kỡn tơnchơt Kơnràn.

Ngai do, bol he kung ming git Kơnràn bè lang bol Naxaret git sơl? Bol he tồn lah bol he git Yàng Jesus bơh bơta lòt tus hiu duh khoai, kơno bơta bơto, ală bơta tòm Hiu Jum Goh, hala bơto bơh Yàng. Mơya dilah he ming git bơh Kơnràn tòm bơta jak chài he dê lơm mơ ò di bơh bơta git làm mơ bơta đềt mêr mơ Kơnràn, gen kal ke ngan nàng he in git bơh bơta kỡn gơboh, nùs nđàc sơngit, bơta nđàc mơ bơta jak chài Kơnràn dê. Dô rai kis ò git Yàng jrô ndơp mơ ò gơlik plai đo niam, mơ gơlik ală bơta iơh lơm.

Ồng Pol kung la dô nă cau git Yàng loh lang kơnòm di ală bơta boh lam. Ông la cau gơrê bal mơ lang bol Israel. Jat bơta boh lam, ồng la cau Pharisi, bơh bơta song ring bơta boh lam dê gen ồng ò gơs tiah geh lah pơrhơng. Mơya, ồng Pol sền jơh ală bơta hớ bè la “thul ơmul” gơwèt mơ bơta geh dòp git Yàng Jesus Krist. Bơh bơta dòn ro rãn, ồng Pol git lam Bơtau Krist oă ngan: “Ngan behơ̆, añ sền jơh ală bơta kung be bơta roh lơm, bơh bơta dòp git Yàng Jesu Krist, Yàng añ jê, la dờng màng rlau jơh; bơh Kơnràñ mơ añ neh sang lòi jơh ală cồng nha hơ̆. Añ sền ală bơta hơ̆ kung be thul ơmul tồ añ in dòp geh Bơtau Krist.” (Philip 3:8)

Dan jà bol he dô nùs bal tòm bơta hòi dan: Khoai Bèp kỡn gơboh kon dê. Ơ Yàng, dan ai kon in gơlik gơs cau git Yàng ngan tòm bơta dòn is kon dê dô bă đềt mer ò di la ming git kơnòm di bơta jak chài lơm. Dan toh glài kon in bơh oă tú kon bơtê bơh Yàng mơya ò lòi bơta hớ mut tòm nùs nàng kon ò rgơi têh dơng tòm bơta dòp git Kơnràn, ming la bơta git jak ro rãn lơm mơ ò gơs gơnap gơnoar. Dan Yàng tề lam kon, ai kon in nùs ji gloh tơhir Kơnràn, ò jong să bơh ală jak chài kon dê, mơ kơp kỡn geh bơta đềt mêr gơwèt mơ Kơnràn mơ Jơnau Yàng dê. Dan ai kon in rgơi đơs bè ồng Pol đơs lah dòp git Yàng Dong Klàs la bơta dơng mang rlau jơh tòm rai kis kon. Kon jơh nùs hòi dan ai sơnđan Yàng Jesus Krist, Amen.

Ơ ală ồng mò oh mi kỡn gơboh, lang bol Naxaret git Yàng mơ ò dòn Kơnràn. Bulah tôr bol khai kơno jơnau đơs Kơnràn dê, mơ ò pò nùs he nàng Kơnràn in tup bư. Ngai do, bol he kung buôn ngan nàng duh tòm ală bơta behớ: bơtê git oă bơh Yàng tòm Sră Goh, mơya ò lòi nùs geh Yàng tus còp mơ tòm gơl bơh Jơnau Kơnràn dê. Ngai do, dan Yàng tòm gơl nùs nhơm ồng mò oh mi dê nàng he in geh dòp git Yàng ngan mơ kis tòm rai kis gơs Yàng tề lam, bơkah lơngùt bơh Jơnau Yàng. Tú tus mơ Jơnau Yàng, tus té bơh nùs ji gloh tơhir geh kơno jơnau đơs Kơnràn dê, geh tìp Kơnràn, geh git lam Kơnràn mơ geh să tòm Kơnràn tòm gơl nùs nhơm.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.