Achăng mĭnh anih bơ̆jang mă kơdih đei đĭ jơhngơ̆m pơjing tơiung ưh tim mă đei layơ jơ̆ tơdrong ‘bônh ôh. Pơdrâu ăn tơdrong jang ‘noh kơ bơngai nai kơplah jơhngơ̆m oei đei lơ tơdrong dŏng tơgŭm, tơpă gô pơm kơ lu bơ̆n hmach păng ưh kơ hiôk. Mă lei gô đei dôm kơplah Kră Yang krao lu bơ̆n tơjruh akâu kơdih kơdŭn tơrŏng wă ‘măn anih kơ bơngai nai, pơih trong ăn kơ jơhnơr đơ̆ng rŏng, thĕng hreh tơgŭm lu sư năm tơ anăp kơjung hloh lăm tơdrong tơtă hơdai. Yua kơ đơ̆ng dêh char ‘Bok Kei-Dei đei pơih să hloh kơ plah lu bơ̆n gô tơjruh jơhngơ̆m hloi, dŏng tơgŭm, păng hơdai hăm chăl đơ̆ng rŏng lăm jơhngơ̆m ‘maih bơwih bơwăn.

Năr ‘nâu, ‘năr 06/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Gary E. Roberts kơ̆l ‘bai HƠMET TRONG ĂN KƠ CHĂL ĐƠ̆NG RŎNG.

“Sư rai đunh rai pơm tih; gah inh rai đunh rai sruh rai iĕ.” (Yôhan 3:30)

Inh hơoei tơ anih bơ̆jang, tơchĕng pơwao gah ‘bai sơnăm ‘bĕnh kơ tơdrong pơlong lăng mă lei kŭm lơ tơdrong pŭn hiôk, kơplah inh bơ̆jang tơdrong jang Bơngai Tơm tơ mĭnh anih hnam trưng Đăi hŏk anăn gơ̆p đei pơ-ư.

Inh đei jet kơdih: pơm thoi yơ wă pơtôch trong ‘nâu kiơ̆ hăm trong mă Kră Yang lăp đon, kŭm thoi tơgŭm đei yua kơ hnam trưng păng bơngai pơtrơp tơdrong jang? Lăm jơhngơ̆m inh oei đei lơ tơdrong ưh tim mă plơih yaih, yua kơ tơpă inh oei ‘maih wă jang pơtrơp tơdrong jang ‘nâu. Mă lei inh băt kơdih kăl “pơ̆ng kơđĭnh” jơhngơ̆m mơn đei ưh kơ hiôk, yo mơlŏu, ưh kơ ăn dôm tơdrong mơn lăm jơhngơ̆m ‘noh pơm kơdih pơm tơ’bôh thoi mĭnh ‘nu bơngai ‘lơ̆p oei ơh blĕk kuăr tơmam pơngôi brŏk tơhnam.

Jơ̆ bơngai kiơ̆ Kră Yang, inh ling lang adrin arih trŏ hăm jơhngơ̆m bơwih bơwăn lăm kơdih tơdrong bơ̆jang pơgơ̆r đơ̆ng kơdih. Inh đei tơ’blŏk gah kơ mĭl đơ̆ng Yôhan ‘Ba-tem. Kơplah ‘bôh tơdrong bơ̆jang kơdih rai kơdŭn tơrŏng wă ‘măn ăn anih kơ Kră Yang Yêsu, sư ưh kơ đei pơma jŏk dah ơh sơ’ngon. Tơplơ̆ dơ̆ng, sư tơ’bôh tơdrong chu iŏk đon ala: “Sư rai đunh rai pơm tih; gah inh rai đunh rai sruh rai iĕ” (Yôhan 3:30). Nơ̆r pơma ‘noh pơm kơ inh ‘brĕng hơdơ̆r. Tơplih kơ nŏng kơ kuăr jơhngơ̆m hil blĕk păng jô̆ yo, inh băt kơ inh kăl kơ arih trŏ hăm tơdrong tơbăt mă kơdih oei juăt kơ bơtho, ‘noh bơih jơ̆ dan tơdrong đei yua kơ khŭl tơpôl păng nơ̆r tơtă hơdai tơ kơpal hloh.

Kơdih Kră Yang Yêsu kŭm đei pơm kơmĭl lăm tơdrong ‘nâu. Kơplah wơh lu bơngai pơhrăm yak năm bơ̆jang Tơdrong Jang Tih Hloh, Sư khan: “Bơngai bu lui kơ Inh, bơngai ‘noh gô pơm dôm tơdrong Inh pơm mơ̆n. Păng sư gô pơm tơdrong tih hloh kơ Inh dơ̆ng mơ̆n, kơlih kơ Inh wă wih tơ ‘Bă Inh boih.” (Yôhan 14:12). Kră Yang lăp đon dah ‘bôh bơngai nai pơtrơp nơ̆r tơtă đơ̆ng Sư, păng gơh pơm lơ tơdrong đei yua hloh dơ̆ng. Tơpă, ưh kơ đei kơ mĭl ayơ gah tơdrong chu iŏk đon ala tih hloh thoi noh!

Dah băt kơnăl kơ tơdrong ‘noh, nhen thoi đei mĭnh hơyuh kial ‘nao dơhlu mơ̆t lăm jơhngơ̆m inh, chĕp ba tơdrong kơnhăm, đei tơm kăl păng đei tơdrong hiôk chơt dai. Inh thar hlôh băt: tơdrong gĭt kăl hloh kơdih gơh pơm lăm kơplah pơjao tơdrong jang ‘nâu ưh kơ trŏ jơ̆ dui bơwei anih bơ̆jang, mă jơ̆ hơmet tôm tơdrong mă ‘lơ̆ng wă kơ bơngai đơ̆ng rŏng gơh pơtrơp kiơ̆ hăm tơdrong tơproh hloh.

Inh pơtơm proh hơmet pơjao hơđăl, pơm pơkeh dôm tơdrong jang kăl hloh thoi kơ gah jên tơmam, chih hơmet gah jên tơmam, păng lu bơngai bơ̆jang, ăn kơ bơngai pơtrơp gơh jang pơtrơp ‘bônh ‘lơ̆ng, ưh kơ kăl kơ bơngơ̆t hơmet dôm lu tơdrong oei tim mă pơkeh. Kăl hloh kơ đĭ đăng, inh pơtơm krao khan kơ tơdrong bơ̆jang đơ̆ng bơngai tơm anih jang ‘nao păng đĭ đăng tơdrong jang pơgơ̆r. Inh đei ‘măn jơnăr jơhngơ̆m wă hơmet tơdrong mĭnh jơhngơ̆m đon hăm lu bơngai bơtho, bơngai hŏk păng bơngai bơ̆jang; păng inh hơpơi kơ tơdrong ‘noh gô pơtrơp gơh bơwei, tơiung pran hloh dơ̆ng.

Đĭ lăm dôm jơ pơđâu tơpă păng dôm wơ̆t pơma dơnuh rim năr, inh ling lang tơ’bôh kơdih kâu khan inh pơdrơ̆ng tơpă păng lui ngeh kơ bơngai pơtrơp. Inh lui khan lu sư gô pơtrơp ba hnam trưng ‘nâu rai tŏk truh tơ anih kơjung ‘nao. Mĭnh wơ̆t dơ̆ng, inh đei tơ’blŏk ăn yua kơ kơmĭl ‘lơ̆ng rŏ đơ̆ng ‘Bok Dŏng Pơklaih Yang Yêsu. Adrol kơ wă achăng teh đak, Sư đei krao khan apĭnh ‘Bă ăn tơdrong mĭnh jơhngơ̆m đon kơ đĭ đăng dôm lu bơngai lui kơ Sư: “Inh wă kơ Ih ăn kơ lu sư pơgơ̆p băl minh jơhngơ̆m minh đon. Ơ ‘Bă, ba minh jơhngơ̆m minh đon, na Inh wă kơ Ih ăn kơ lu sư oei pôm đon păng ba, wă kơ lu bơngai ala teh âu ‘bôh thoi noh na lui kơ Ih wơh Inh.” (Yôhan 17:21)

Bơnê kơ Kră Yang yua kơdih inh kŭm đei rơih iŏk arih kiơ̆ jơhngơ̆m ‘noh. ‘Lơ̆ng rŏ tơpă, inh gơh yak mơ̆t lăm mĭnh chăl ‘nao lăm tơdrong jang kơdih inh, hơđơ̆ng hloh, hơiơch lăm jơhngơ̆m hloh, păng ‘bĕnh lăm jơhngơ̆m lăp đon ala tơdrong pơgơ̆r gơh hơgei, ‘bĕnh tơdrong pran đơ̆ng bơngai tơm anih ‘nao. Ưh kơ đei tơdrong pŭ trăp, tŏ sĕt tơdrong tơ tăm, păng jơhngơ̆m ĭnh lei ‘bĕnh tơdrong hiôk chơt.

Lăm tơdrong arih, bu kŭm gô tơ’bơ̆p dôm kơplah jơ pơjao ăn: đei kơplah jơ̆ lăm tơdrong jang, lăm hnam dơnŏ, dah lăm Khŭl Bơngai Lui. păng dôm kơplah thoi noh, Nơ̆r Kră Yang tơ’blŏk kơ lu bơ̆n ‘blŏk truh tơ pêng tơdrong gĭt kăl dêh. Mă mĭnh, athei tơpăt hăm Kră Yang păng tơbral tơdah lăm jơhngơ̆m lu bơ̆n đei tơdrong gar klai dah ơh sơ’ngon. Mă ‘bar, apĭnh Kră Yang ăn kơ lu bơ̆n jơhngơ̆m chu iŏk đon ala păng jơhngơ̆m pran wă kơ bơ̆jang đĭ jơhngơ̆m dah gơh, tơgŭm kơ tơdrong jang pơjao ăn gơh ‘lơ̆ng tôm mah, hiôk ‘lơ̆ng. Păng tuch luch, ‘nĕ hiơt kơ krao khan đĭ jơhngơ̆m kơ bơngai pơtrơp tơdrong jang, wă kơ lu sư gơh đei hiôk hian, mĭnh jơhngơ̆m đon păng gơh đei tơdrong pŭn hiôk đơ̆ng Kră Yang lăm tơdrong jang ‘nao.

Yua kơ dah lu bơ̆n băt kơ tơjruh akâu kơdih, kơdih ‘Bok Kei-Dei gô hơtŏk bơ̆n tơ kơpal!

Apĭnh đĭ đăng krao khan hơdai: Kơkuh kơ ‘Bă Kơpal Plĕnh, apĭnh bơtho kon băt arih chu iŏk đon ala, gô ăn jơhngơ̆m kơdŭn tơrŏng ăn kơ ‘nhŏng mŏ oh kon gơh năm tơ anăp, wă kơ anăn Kră Yang gơh pơ-ư păng hơdai tơiung akâu jăn ‘Bok Krist. Hơpơi Kră Yang tơgŭm kon băt lăng bơngai nai yom hloh kơdih, băt hơdai bơ̆jang lăm tơdrong ‘mêm mơnat, păng hiơ̆k bơngơ̆t truh tơdrong đei yua kơ bơngai nai ưh kơ sĭ lăp kơdih kâu. Apĭnh tơgŭm kon pơtrơp arih kiơ̆ kơ Ih lăp đon đơ̆ng lăm rim tơdrong jang iĕ, păng ling lang bơwei jơhngơ̆m tơnăp thoi mĭnh ‘nu bơngai đĭch đam tơnăp ‘lơ̆ng lăm dêh char Ih pơgơ̆r. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, kơdŭn tơrŏng mĭnh yak ưh kơ sĭ khan ưh kơ kĕjei. ‘Noh jơ̆ mĭnh tơdrong pơm tơ’bôh chu iŏk đon ala, ‘mêm mơnat păng lui gơnang, wă pơjao ăn tơdrong ‘lơ̆ng hloh kơdih đei pơjing kơ bơngai pơtrơp. Wă kơ đơ̆ng tơdrong jang gleh hrat đơ̆ng lu bơ̆n, chăl đơ̆ng rŏng gô pơtrơp yak kơjăp păng gơh pơm lơ tơdrong tih hloh kơ Dêh Char ‘Bok Kei-Dei. Anăn đơ̆ng lu bơ̆n na kŭm gô jing hiơt hiong, mă lei hơnă kơjăp mă lu bơ̆n pơjing gô tơgŭm chăl đơ̆ng rŏng pơtrơp yak năm kơjăp lăm nơ̆r tơtă tih hloh Kră Yang pơjao. Păng mŭk tơmam mă lu bơ̆n ‘măn ăn gô oei đei ling lang lăm dêh char Sư pơgơ̆r.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.