Tom gùng lòt jat Yàng digùl rài kis do, nền cê oă cau tom bol he neh pal sơrlèt rlau ală tŭ ngềt ngơt, oă bơta moat-jrùng, kung gơs ală bơta lơh òsup-òiàng tài bơh bơta tìs he dê. Bol he neh lòi ală bơta hơ̆ lơh nùs nhơm jê-sồt. Mơ ya gơs dô jơnau song tom Sră Goh rơp ceng tus bol he in bơta dong-klàs. Hơ̆ la Yàng kòñ gơboh mơ kòñ gơs bơta tomgơl gơwèt mơ bol he: Kơnràñ rơp ai jơh ală bơta jê-sồt, àñ ơnòng jơh ală bơta tìs glàî, mơ ai bol he in bơta sàng-gọh, ring-lơngai mơ khat gơboh tom Kơnràñ. Oh mi kòñ lơh bơta tomgơl mang ryŭ do sơl?

Ngai do, ngai 08/09/2025 Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnom di bơta dong kơl Jacqueline J. Overpeck bơh tơnggume BƠTA TƠM PƠRGƠL ĐAH HWỀNG.

“Yàng Tom Trồ la bơta kòñ gơboh, cau lơi ơm sùm tom bơta kòñ gơboh la ơm sùm tom Yàng Tom Trồ, mơ Yàng Tom Trồ ơm sùm tom cau hơ̆.” (I Jang 4:16)

“Bol he git mơ dòn bơta kòñ gơboh Yàng Tom Trồ gơs gơwèt mơ bol he. Yàng Tom Trồ la bơta kòñ gơboh, cau lơi ơm sùm tom bơta kòñ gơboh la ơm sùm tom Yàng Tom Trồ, mơ Yàng Tom Trồ ơm sùm tom cau hơ̆.” (I Jang 4:16)

Tom tŭ oh mi tùs mơ Yàng tom bơta hòi dan, gơs dô pơnah tom oh mi geh săng-lòi. Pơnah hơ̆ la ală bơta moat-jrùng, jê-sồt, bol glar, roh gơchoh mơ oh mi neh lòt gan tom jơh rài kis he dê. Tom tŭ oh mi jơh nùs yal tơlik ală bơta jê-sồt tom nùs he di đap Yàng, Kơnràñ rơp lơh bîng tơl hwềng nùs oh mi mơ bơta kòñ gơboh Kơnràñ dê. Yàng Tom Trồ la bơta kòñ gơboh (I Jang 4:16) mơ tom Kơnràñ gơs bơta sơmbòi (Đơs crih 103:1-5).

Hơ̆ la dô bơta tơm pơrgơl wơl: Oh mi ơn Yàng in bơta jê-sồt he dê, Kơnràñ sơmbòi oh mi mơ lơh bîng liu nùs nhơm oh mi mơ nùs kòñ Kơnràñ dê. Oh mi ơn hơđơm bơta rngòt-rngơt, Yàng rơp tơm pơrgơl wơl mơ bơta dòn. Oh mi ơn Kơnràñ in tồi glài he dê, Kơnràñ ai oh mi in bơta gơlik gơs sang-goh Kơnràñ dê.
Dô bơta tơm pơrgơl wơl, pơrdòn wơl mang ryŭ gơlik gơs. Cau rgơi pơndròm bơta tom pơrgơl wơl do mơ gùng mattơngai ai bơta kis. Dô gơtha bă-lĭa gùng mattơngai ai bơta kis dê la: bơh bơta ji duh mattơngai dê gơlik gơs gơnoar pràn ‘hoá học’ bơh ală jơi phan kis. Mơ jơh ală bơta kis pal gơs gùng tom pơrgơl do ting hơ̆ gơs chi che, phan poan jơng mơ kòn mơnùs.

Pơnyơu kung be, nha chi kis kơnòm di bơta àng. Gùng ai nhơm tă sơntòm tom tŭ bơta ang pơnđang sol tom ñha. Ñha chi gơròm mơ bơta àng, ai bơta ji-duh mattơngai dê nàng lơh gơs ală phan dềt ròng să he, mơ kung gơlik gơs phan sa ală phan kis ndai in sơl. Hơ̆ la gùng tomgơl bơta ji-duh mattơngai dê gơlik gơs bơta kis.

Kung behơ̆ sơl, jơh tơl nă jơi kòn mơnùs pal gơs bơta àng Yàng Jesu dê, Kòn Yàng Tom Trồ, nàng geh tơm pơrgơl pa, geh sơmbòi mơ gơlik gơs wĭl tơl. Dròm kung be kờp pơnah dềt ñha chi pal sa bơta àng mattơngai, kờp pơnah tom mơnùs oh mi dê rơp geh bư mơ geh bơt bơtào wơl bơh bơta gơs mat sàng-gọh Yàng Tom Trồ dê. Công nha bơta gơtom klac di pal hơ̆ la “ròng nhơm kis” bơta kis đah hwềng. “Bơh ‘Tom Kơnràñ mơ bol he kis, wañ mơ gam gơs.” (Broă 17:28)

Behơ̆ ngai do, oh mi chò nùs tơm pơrgơl wơl bơta jê-sồt he dê nàng ai bơta àng bơta kòñ gơboh Yàng Jesu di hala ò? Bơta tơm pơrgơl wơl rơp geh lơh gơs tom tŭ oh mi sang lòi ală bơta yau nàng dòp rò bơta pa mơ să tom oh mi rơp dòp geh bơta pa tom rài kis he dê.

“Ơ hwềng-soàn añ jê, jòng-ro tĕ Yàng Jehôwa: jơh ală bơta lơi ơm tom añ, jòng-ro tĕ sơnđăn sàng-gọh Kơnràñ dê! Ơ hwềng-soàn añ jê, jòng-ro tĕ Yàng Jêhôwa, băñ hŭi jơh ală bơta nđàc Kơnràñ dê. Hơ̆ la Kơnràñ toh jơh ală tồi-glài iơh bơsak mê dê, sơmbòi jơh ală bơta kòp ji mê dê. Kơnràñ dọ̆ng twài bơta kis mê dê klàs bơh tiah roh rui. Ai bơta kòñ gơboh kơ̆-dơ̆n mơ bơta kòñ nđàc lơh gơs bè sơgơn Bơtau tơndau mê in. Kơnràñ lơh mê in hưh-hơh bơh ală phan niam tom jơh rài kis mê dê, nàng mê in geh wơl pràn kơldang bè gam pơnu, kung bè bơta pràn kơldang klang bŭng dê.” (Đơs Crih 103: 1-5)

Dan jà bol he dô nùs bal tòm bơta hòi dan: Khoai Yàng kòñ gơboh kòn dê! Kòn ưnngai Yàng tài bơh tom ală bơta kalkê, gơlòng bòl glar, gơpừ rài kis dê Yàng gam sùm ơm bal mơ kòn. Kơnràñ neh kong chơt hơđang chi pơng nàng tồi glài kòn geh toh, lơh bîng nùs nhơm hut-hâng ò gơs chi lơi kòn dê mơ bơta kòñ gơboh ò git jơh Kơnràñ dê. Dan Yàng ai kòn in ji-gloh tơhir joi jat Kơnràñ kờp ngai, nàng dòp geh gơnoar pràn bơh di Kơnràñ ai, mơ kis, lơh broă mơ jơh nùs ơn rài kis kòn tom bơta duh broă Kơnràñ. Kòn jơh nùs hòi dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, nàng rgơi ceng bơta kòñ gơboh Yàng dê rang tơlik ală cau gùt dar in gen lài ngan rài kis bol he dê pal geh tơm pơrgơl. Digơlan bol he neh la cau sùm kòñ gơboh tồi glài, gơkram tom bơta ham kòñ dunnia ngan sơl? Bơta kòñ gơboh Yàng dê neh tom pơrgơl oh mi ngai do hala òhềt? Gam nđò nơm nùs nhơm, bơta moat-jrùng, jê-sồt tom rài kis oh mi dê, behơ̆ ngai do neh ceng tus ơn di jơng Kơnràñ hala òhềt? Yàng Dọ̆ng Klàs gơboh gam kơp gơn mơ rcang sir dô bơta tơmgơl mang ryŭ, nàng ai bol he in do rài kis pa tom Kơnràñ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.