He gơs tŭ lơi gơlơh he kư̆ ntoat sum mơ ò tus tơnggu sơl? He lơh tơl ală broă, jơh nùs, ngac ngar, ơn să, mơya tòm dơlăm nùs, he găm gơlơh siơ̆u dô bơta lơi? Gùng dà bŏl he găm lòt ò tŭ lơi rĭng lơngai, mơ bềng ală “Lŭ dềt”, là ală bơta lơh hwing nùs bŏl he gi ga, lơh jơng he di gơtup pừ hơđăng gùng dà jat Yang. Mơya kŭng gơs tŭ, bơh ală lŭ dềt hơ̆ gen la jơnau pơndòm pơniang bơh Yang wơl: “Kon găm gơs lòt tòm tọh jat gùng dà gen Ăñ họi sac kọn sơl?”

Ngai do, ngai 09/09/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl mò Linda Vulcano dê bơh Tơnggume GƠTUP PỪ BƠH ALĂ BƠTA DỀT RHỀN.

“..Bol he kung pal sơrbì sang jơh ală bơta be phan àñ kơnjơ̆ bal mơ tồi glài gơđềt di he, pal kơ̆ cê ntoat jat bơta ntoat pơrlòng neh ràng tơlik di đap bol he;” (Hebrơ 12:1b)

Rài kis la dô nơm gung dà jŏ jòng, mơya gùng dà ò di tŭ lơi kung ơnang buơn nàng lòt. Digơlan he neh găm kơno cau lơi đơs lah: “Ăñ mìng la cau nac crih lòt găn dunnia do” hala “Dunnia do ò di bòn tòm”. Ngăn behơ̆, lơgar đăng trồ la tiah ơm bŏl he di, mơya tŭ do, bŏl he găm kis , găm cơnđòa lòt kòp ngai hơđăng tiah do. Sră Goh cih:“Tiah lơi jơng mê jă gen Añ rơp ai bol mê in, be Añ neh ho mơ Môise” (Jôsue 1:3). Bơta do gơtha lah Yang họi jà bŏl he lik lòt, ơn să mơ tòm pit ai ală tiah hơ̆ Lơgar Kơnrẵn ĭn.

Gùng dà hơ̆ ò di tŭ lơi kung rĭng lơngai be dô nơm gùng pa lơh niam. Gơ kŭng be dô nơm gùng dềt oă cau neh lòt găn, gơ guh mù, nđàng, bềng oă lŭ, buơn ngăn lơh cau ĭn gơtup pừ. Gơs tŭ lơi he găm cơnđòa lòt khin cha, gen nisơna gơtup pừ bơh dô nơm lŭ dềt rhền mơ gơtup pừ, tềl sồt să jan sơl? Gùng dà jat Yang kŭng behơ̆ sơl. Sền gơlơh be buơn, mơya bơh oă bơta dềt rhền lơh he ĭn gơtup pừ, dilah ò sền sơwì kơlôi mơ drơng kơp.

Oă dơ̆, bơh ală bơta kơp koñ is lơh he ĭn wơl tìs gùng. Ăñ òs họi ală bơta hơ̆ la “Ală lŭ dềt”, hơ̆ la ală ală broă lơh he ĭn ò ơn nùs tôr kơlôi nền. Mơ tòm hơ̆, gơs dô bơta òs pơrlồm bŏl he rlau jơh: Bơta kơlôi rcang oă broă. Rài kis cèng oă bơta kơlôi rcang, la broă lơh, hiu nhă, hiu Jum, rwat ală phăn ngùi, gen la ală broă dờng màng càng lơh ngăn. Găm ală tŭ lòt tơrgòm, ală mpồl bŏl he tơrgòm gen mbe lơi? Gơs tŭ lơi bŏl he kŭng geh Yang họi sac tồ lơh ală broă hơ̆? Hala gơs bơta lơi găm lơh he ĭn lòt găn ir lik bơh tơnggu rài kis he di ơ?

Ăñ kŭng neh behơ̆, kư̆ đơs òm lah: “He la dô nă cau duh broă Yang ơ, bŏl khai càng tus he”. Mơya dilah ăñ kŏng iat kơno jơnau Yang, digơlan Kơnrẵn rơp đơs mơ ăñ: “Kon koñ gơboh, klọ săng tĕ ală bơta do, tồ Ăñ ơn kon tòm toh di tiah ăñ koñ ngùi kon, jat bơta niăm rlau jơh.” Ñcau lơi ò koñ kis jat nùs koñ niăm her mơ wil tơl Yang di, ngăn sơl? Gen la, dilah he gơlơh he kư̆ pơwài, lơh tơl ală ală bơta mơya nùs gơlơh ò hừh nùs, digơlan neh tus di tŭ he càng dơh wơl dô êt mơ họi lùp Yang lah: “Bơta lơi Kơnrẵn koñ họi sac kon lơh taih?”

Ală tŭ rềp do ăñ gơs cih sơnđăn măt dô tŭ pơjum họi dăn, mơ ăñ neh họi dăn mơ Yang ai he ĭn git iat kơno jơnau Yang ngăn. Ngai hơ̆, cau Bơtọ tòm pà bơh broă lòt tus rềp mơ Yang rlau. Ồng neh lah pơrhơng lah bơh ală bơta kơlôi rcang lơh bŏl he ĭn wơl ơm ngài bơh Kơnrẵn ò tŭ lơi he git. Iat kơno tus tềng hơ̆, tòm hwing nùs ăñ be gơlơh gơs jơnau tơngkah. Ăñ git lọh Yang găm tơngkah he păl klọ săng dô nơm gơnoăr broă lơi mơya he kư̆ koar. Mơ tŭ do, ăñ neh rcang sir dòn bơr Kơnrẵn. Sră Goh gơs cih: “Do la dơ̆ pe mơ añ lòt tus hơ oh mi. “Jơh ală broă geh lơh nền jat be jơnau bàr pe nă cau lơh cơng.” (II Kôrintô 13:1), mơ Yang ò lòi ăñ păl gơn jŏ tồ geh dơñ nền cê.

Ò jŏ tơnơ̆, ăñ geh dơñ dơ̆ bar bơh dô nă cau bơyô dềt mềr, khai la dô nă cau pồ gru bơtê Sră Goh. Tŭ họi dăn ăñ ĭn, khai đơs lơbơn niăm lah: “oh găm gơkòl ò ơn nùs tôr bơh gơnoăr broă he di. Yang họi sac ọh bơtọ sôr tĕ jơnau Kơnrẵn.” Ăñ iat lơh krơi ndăng mơ rngoh rngac ndăng. Gen la, dô dap rài kis pa tòm rài kis ăñ ji neh găm sơntom pò tơlik.

Ngăn behơ̆, rài kis bŏl he di kŭng be dô nơm phăn kơñhơl ntoat bơh pin. Gen rơp gơs tŭ gơlik gơs dô tơm pe bơta do:

Dơ̆ dul: jơh pin, gơtha lah bŏl he jơh pràn poăc să, lơbơn đah hwing.

Dơ̆ bar: Tơm tòm tường, gơtha lah bulah pơnđơl, bŏl he găm ò sơmbat tus tơnggu.

Dơ̆ pe: Gơtup phăn kơryan, tŭ hơ̆, bŏl he càng cau ndai dŏng he wàs gùng tồ cơnđòa lòt tai.

He găm ơm tom pơnah lơi taih? Tŭ rềp do he găm gơtup bơh lŭ dềt lơi sơl? Dilah gơs, ưnngai Yang tĕ bơh bơta hơ̆. Gơwèt mơ ăñ lŭ sơnđăn “gi ga broă” neh lơh ăñ păl sơwì wơl broă he găm kis, mơ broă he găm lơh gơnoăr broă.

Gen behơ̆, khin cha tĕ cơnđòa mut tòm gơnoăr broă mơ kŭng kơrhia tĕ bơh broă he găm lơh gơnoăr broă mơ Yang họi sac. Tŭ bơh să tom neh tih dờng hơđăng gùng dà bơta dòn, bŏl he rơp yò đo mơ dŏng cau ndai pleh ală lŭ dềt hơđăng gùng lòt, tồ jơh ală bŏl he găm sơmbat geh tơnggu gen Yang neh rcang lài he ĭn.

Dan jà bol he dô nùs bal tòm bơta hòi dan: Khoai Bèp koñ gơboh. Kon ưnngai Yang tài bơh Kơnrẵn òs sum ti lăm kọn kòp ngai. Dăn dŏng kọn ò gơtòmmut tòm rài kis kơlôi rcang ir tian gơs hŭi huơr jơnau đơs lơbơn niăm Kơnrẵn di. Dilah gơs bơta lơi lơh kọn ĭn lòt tìs lik bơh gơnoăr sôr Yang jào, dăn ràng tơlik kọn ĭn git mơ dŏng kọn khin cha hồ ñhờr. Kọn hur hir geh cơnđòa lòt tòm nùs koñ sàng gọh Kơnrẵn, tồ sơlơ ngai tus rềp tơnggu gen Kơnrẵn neh rcang lài kọn ĭn. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, Yang ò chồl bơklơn he păl lòt mhăr, ò bat ò, hala koar oă broă lơh. Kơnrẵn mìng koñ he dơh wơl mơ git sền sơwì gùng dà he găm lòt. Gơs ală bơta lơi he kơlôi là dềt rhền, mơya kơryan he jat tơngguh tòm tọh di tơnggu Yang họi sac. Bơh tŭ he lơh gọh ală lŭ dềt hơ̆, he rơp sền lọh lang gùng dà Kơnrẵn rcang lài he ĭn, la gùng dà tề lăm tus wil tơl tòm nùs koñ sàng gọh Kơnrẵn di.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.