Tòm rài kis, gơs oă dơ̆ tòm dô pah tŭ jơ lơh nền, bol he sền gŏ bơta lơi hơ̆ dờng màng ngăn, mơya kùng bơh tŭ jơ gơ lòt găn, tŭ jơh nùs sền wơl, ală bơta lơi he neh sền la dờng mang ò găm la dờng mang tai. Ñcau tòm bol he kùng gơs ală tŭ sền gŏ bơta lơhờ rài kis càu dê, dunnia gùt dàr dê. Ală bơta găm gơs, găm gơlik gơs di đăp mat nisơna gơtùp pừ, roh jơh, ò găm ñchi lơi tai. Behơ̆ gèn bơta lơi dờng màng tòm rài kis mơ bol he păl càng jòi jăt mơ bơt bơtao nàng geh cèng wơl ală bơta kàs màng kơ̆ cề mơ jŏ jòng?

Ngai do, ngai 11/09/2025, tơnggu Hòi Dan Kòp Ngai dan jà ồng mò oh mi kơlồi sơnờng jơnau Yàng kơnòm bơta dŏng kờl Missey Butler bơh tơnggu me BƠTA DỜNG MÀNG NGĂN.

“Bơh bol he ò tơnggờr bơta gŏ mơ mat, mơya tơnggơr bơta ò gŏ mơ mat; bơh ală bơta gŏ mơ mat la ing lơm, mơya bơta ò gŏ mơ mat la găm sùm sùm.” (2 Kôrintô 4: 18)

Kòp tŭ añ kơlồi bơh ală hwềng soàn kàs màng neh roh tòm àng drìm lơh nền 11/9, añ sùm sền lăng wơl să tòm he mơ lùp is: “Rài kis rờp mbe lơi, dilah ngai hìng sơntòm mơ siău he?

Dô ngai lơi hơ̆, bơta do rơp gơlik gơs ngăn. Ròp ò găm gơ̆ ală tŭ àng drim. Ală ngai, kơnhai, hala sơnăm rơp dơh wơl. Tŭ jơ mơ bol he neh dòp rò kùng ròp o găm. Ală phăn mơna dunnia mơ bol he sền dờng mang, dô ngai lơi hơ̆ ròp roh rùi. Be cau pơlìn pò jơh ală mpồng kơndoh, tồ nàng ală cau in sền gŏ mìng la dô pah gòi lơm ò gơs phăn lơi.

Bulah la phăn mơna, tiang pơnrơ hala gơnoăr pràn mơ bol he rgơi geh tòm rài do ròp ò găm gơs gơtha lơi tai. Jơh ală bơta ròp gơlik ò kwơ.

Jơnau Yàng đơs găn di cau gơnoăr hwơr Esai bơh bơta ngăn mòr gơlik tùs dunnia do:

“Ală bơta yau rơp ò kah tai, ò găm rê wơl tom dơngoh jak tai.” (Esai 65: 17)
Ồng mò oh mi gơs tŭ lơi neh kơlồi tus broă he ò rgơi kah wơl jơh ală bơta bơh dê rài kis he tòm tŭ he găm kis ìng tòm ù do sơl? Ngăn behơ̆, hơ̆ tòm toh ngăn la bơta mơ sèng Sră Goh do đơs tùs. Ală bơta yau rơp ò găm kah wơl tai hala ală bơta rờp gơlik tùs tòm bồ dơngoh.

Kòp dơ̆ añ sền sêng Sră Goh do, gơlơh be rài kís añ gơlik ò gơs ñchi lơi. Ăñ sơntòm gŏ he ơm tìng do mơya digah hơ̆ añ kùng sền gŏ he ò găm tìng do tai. Añ dơh ing “tơnchơt jơh ală ryas”, nàng ai ală bơta kơlôi sơnừng he di lik bơh di bơta gơs ngăn să tòm he di, mơ tơnơ̆ mơ ală dơ̆ behơ̆ añ đal git tŭ hơ̆ ò la ñchi!
Añ ò kờñ đơs nggòc hala, lơh kòp nă cau dai gơ plơ nùs tòm tŭ đơs tùs di ală broă do. Ƀuôn la ăñ mìng kòñ tòm pà ală bơta kơlôi sơnờng do be la dô jơnau tơngkah bơh bơta ing lơm bơh bơta geh sơnđăn la rai kis dê!

“Mơya oh mi ò git ngai hing rờp gơlik mbe lơi! Bơta kis oh mi di la ñchi taih? Ò gơ krơi be dà tŭ gơlik dô êt jŏ gen roh thit.” (Jakơ 4: 14)

Ngăn behơ̆, bol he tus dunnia do ò gơs ñchi, mơ nền cề bol he kùng rơp lik lòt ndrờm behơ̆. Behơ̆ tàng bơta lơi là dơng màng ngăn?

Gớs dô sèng đơs tiang pơnrò geh đơs tùs tòm oă sơnăm neh lòt găn be do:

“Rài kis mơ bol he neh git, ò găm nđờ jơ̆ tai rờp lòt găn. Mìng ală bơta lơh kwơ Yàng Jesu in ngăn rơp găm wơl!”

Ngăn la behơ̆!, di gơlăn, tŭ bol he git lah, jơh ală bơta mơ bol he gŏ ngai do mơ măt òs dô ngai lơi hơ̆ rop lòt găn. Tŭ hơ̆, bol he rop pal sơntòm rơndăp wơl kơnă sơnrơp lai ngăn rài kis he di dô bă tòm toh jat bơta sol pơnđang bơta kàs ngăn găm sùm sùm. Bol he pal càng lơi Bơtau Krist geh lơh sìr wil tơl mơ wil tơl tòm bol he nàng jơh ală bơta găm wơl la bơta lơh lòt bơta gơ klŏ Kơnràñ di! Bơh lồi dùt, hơ̆ rơp la bơta ming dùl dờng màng ngăn.

“Bơh bol he ò tơnggờr bơta gŏ mơ mat, mơya tơnggơr bơta ò gŏ mơ mat; bơh ală bơta gŏ mơ mat la ing lơm, mơya bơta ò gŏ mơ mat la găm sùm sùm.” (2 Kôrintô 4: 18)

Dan jà bol he dô nùs bal tòm bơta hòi dan: Khoai Yàng kòn dê, tŭ kòn kơlôi sơnơng bơh rài kis gớ rnòas să tòm he di, ngăn kòn ò ring lơngai. Mơya tŭ kòn kơlôi tùs bơh rài kis gơs kwơ geh ai pà tòm mpang tê Yàng dê, nùs kòn bềng liu bơta chò hòp mơ gơn kơnòm. Ưn ngai Yàng, bơh Kơnràñ là Bơtau ò lơi lồi neh ƀư tus di rài kis dềt rhền gơs tŭ lồi kòn dê, nàng kòn geh kis tom bơta gơtòm klĕ mơ Kơnràñ tòm rài do mơ tòm rài găm sùm sùm. Dan Yang dong kòn kis dô rài kís ntoat jăt ală bơta ò gơ̆ mơ măt. Hơ̆ la kòp tŭ tòm ală bơta sac rwah, hala bơta lơh nên he di, kon lơi Bơtau Krist gơlik gơs tòm kòn dô bă wil tơl, nàng Kơnràñ chờ nùs boh rài kis kòn neh kis nàng ràng tơlik bơta gơ klŏ Kơnràñ dê-là bơta găm wơl jơl tùs sùm sùm. Kòn jơh nùs hoi dăn, ai sơnđăn Yàng Jesu Krist, Amen

Ơ ală ông mò oh mi kờñ gơboh, bol he geh crơng gơs rài găm sùm sùm in ò di mìng dunnia tŭ do in. Mơya gùng bol he kis tòm rài do rơp lơh nền rài găm sùm sùm in. Behơ̆ tàng, dilah mìng ơn khà kàs mang, gơn kơnòm, hala bơta ring lơngai he di sơnđing di ală bơta lơi dunnia do di sôr lăm, bol he rơp ƀuôn roh gơn kơnòm, kơlồi rngòt, bơh nùs nhờm wăh- wời ò rgơi tuh bềng, bơh jơh ală bơta ròp lòt găn. Ala tòm hơ̆, bơtê sền tĕ lòt găn tŭ do mơ bơtê sền rmề tòm rài găm sùm sùm. Hơ̆ la dô bơta gơtòm klĕ mơ Bơtau Krist- Bơtau neh tùs mơ dŏng bol he lik bơh rai kis wi-wơ bơh ală bơta tòmlơh ò kwơ nàng kis dô rai kis gơs gơtha. Bol he geh tòm gơl pa mơ nùs nhơm sàng goh, mơ ngui ală bơta lơi Yàng ai pà. Hơ̆ la rai kis di păl kis tŭ bol he pơnđang wơl bơta àng Hơđăng Trồ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.