Tòm rài kis do, ò gơs cau lơi pleh klas bơh ală bơta jê sồt. Gơs ală bơta roh gơcoh tus dô bă nisơna mơ oă ngăn, ai jơh ală bơta he tồn la kơ cê ngan. Kung gơs ală bota jê sồt òm òm gơlơh jê ngan, jo jòng bơh nam do tus nam ne. Bơta jê sồt ò cau lơi kơp kòn mơya kung ò rgơi pleh klas. Gen lơh be lơi tu bơta jê sồt gơtơntus taih? Bol he rơp dô pồn mơ pơn đơl la he pràn, hala ntoat tus mơ Yàng mơ mơ nhìm dờng tòm tê Yàng tiah?

Ngai do, ngai 12/09/2025, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Diane Markins bơh tơnggume: TÒM LƠH MƠ BƠTA JÊ SỒT.

‘Ơ ală cau kòñ gơboh, tòm tŭ bơta gơlòng bòl glar gơtơntus kung be ồs nàng lòng oh mi, gen oh mi bañ ai lơh mơp dơl be he tìp dô nơm broă krơi is. ‘ (I Pier 4:12)

An git bar nă cau ur pal lòt gan tu tơngai kalke ngan rài kis dê. Dô nă – sơnđan la Jen – khai roh dô nă kòn klau 32 sơ nam tài bơh tơnchơt is să tòm, gen tus bèp bau klau khai jơh nus kòn gơboh, mơ kung bau klau lòt bal mơ khai tòm 40 sơ nam. Ală bơta jê sồt hơ gơtơntus mìng tòm dùl kơnhai gòi. Ò hềt jơh, tòm ală nam neh sơrlèt, Jen kung geh tìp ală bơta roh gơ coh ndai tai: mè bèp tòm khai dê kung roh, mơ să tòm khai kung gơs oă bơta kòp ji.

Mơ cau ur ndai – sơnđan la Judy – kung pal kong oă bơta jê sồt. Tơnơ mơ oă sơ năm kơp gơn, lồi khai kung geh tìp bau klau khai dê. Mơya , tơnơ mơ oă sơ năm pơn đơl jơm gòm, sền gar bơta tòm bau khai dê kung ò gam tai. Tài bơh ò gơs hiu nhă, Judy jơh nus lơh broă – ò dơh pơnđơl pràn nàng prap gar broă lơh he dê, nàng lơh nền rài kis tơ nơ in. Judy kung ò tơl pràn kơldang gen gơlơh khai in ò hoan khin cha bơh să jan să tòm he dê. Khai neh roh mè bèp, mơ pa do khai kung pal đơs tòm ngac mơ “dô nă bơyô poăn jơng” khai dê. Bar nă gơs bơta dròm bal – mơya pơnah bol khai tòm lơh mơ bơta sơ bơng rơng gen pa is ngan.

Jen gơlơh be kis tòm mhal dà tu oă bơta jê sồt roh gơcoh dê. Khai moat jrùng, ơm is, pơn đơl lòt gan kòp ngai – mơya kư pơnđơl cơnđòa tai. Tòm jơh rài, Jen sùm lòi tu jơ mơ nus nhơm nàng bơt bơtào bơta tòm klac bal mơ hiu nha, boyô – gen jơ do, bol khai la ală cau ơm di gah, yo đo mò tòm tu kal ke rlau jơh. Bulah ò git nchi bơtài bol he pal lòt gan oă ir bơta roh gơcoh hơ, Jen òhềt yoăm dê Yàng, kung ò ngài bơh Yàng – tài bơh tu ntào dờng, khai neh kis tòm bơta tòm klac bềng tơl bơta kòn gơboh mơ Yàng. Khai git Yàng, mơ khai git lah Yàng ơm bal. Kơnràñ rơp tề lam khai lòt gan bơta bol gar do.

‘‘Bơh Yàng neh dong kòl añ, Tòm tiah mƀur pơnđar Kơnràñ dê añ rơp đơs chò bơh nùs hòn chò. Hwềng soàn añ gơđềt mơ Kơnràñ; Tê ma Kơnràñ dê yò tơngguh añ.’’ (Đơs Crih 63:7-8)

Jen neh git làm bơta dong kòl Yàng dê mơ tu jơ do, khai gơ đềt dê jơnau song hơ nàng lòt gan ală tu tơngai bềng tơl bơta moat jrùng do.

Mơya, bơta sơm bòi Judy dê mhar ngan tơnơ mơ bơta roh gơcoh. Mơya pa is mơ Jen, khai òhềt gơs oă bơyô hala cau gơp să di gah nàng tòm pà, dong kòl. Khai os gơlơh ò gơs cau lơi ơm bal, oă dơ ơm is. Tòm nus mò bềng tơl bơta gơ jran – gơ jran Yàng Tòm Trồ tơn. Tian gơs mò sơn tòm lùp is : digơlan mò kòn sơnđal să tòm la dô nă cau jat Yàng hala ò.

Jen sac rwah tòm lơh mơ bơta jê sồt dô êt. Kòp ngai, khai pò nus dô êt, ai gơnoar să tòm kong bơta jê sồt tơl mơ bơta kong jai, gen kung pơnđơl lòi tu jơ nàng sang lòi nus nhơm moat jrùng.

Mơya Judy mut song tòm bơta jê sồt, gơ crăm tòm hơ tòm dô poh tơn. Gen khai nisơna nă ntào mơ pơnđơl til mpồng hwềng soan bềng tơl bơta jê sồt. Sơn đồi mò pơnđơl no, mơ đah bơdih gơlơh be neh lòt gan, ală broă neh niam rau.
Cau lơi tòm bol he kung rơp geh tìp ală bơta roh gơcoh, moat jrùng, bulah dờng hala dềt, mhar jơh hala jo jòng. Be jơnau cau bơtê Pier neh cih:

‘Ơ ală cau kòñ gơboh, tòm tŭ bơta gơlòng bòl glar gơtơntus kung be ồs nàng lòng oh mi, gen oh mi bañ ai lơh mơp dơl be he tìp dô nơm broă krơi is. ‘ (I Pier 4:12)

Pơnah bol he pơn dang tu bơta jê sòt gơtơntus nisơna rơp dong kòl lơh nền să tòm he kung be gùng lòt hơđap he dê. Dilah ò lòi Yàng sơm bòi ală bơta jê sồt jrô ndơp tòm nus, gen mhar hala ò bat ală bơta lơh lòt, ală bơta tòm nklac he dê kung rơp tòm gơl. Tu kư pơnđơl pôn ndơp mơ bơt mơ nàng cang king nàng sền gar să tòm he, bol he rơp kalke ngan nàng kis dô bă jơh nus mơ kòn gơboh dô bă wil tơl.

Tu bơta sơrlồng sơr làng mơ bơta moat jrùng gơ tơn tus, bol he ò dê dô pồn hala jòi pưnah nàng pơndang sang, kung ò gơ jran hala tòm dră. Bol he pal khin cha cơnđòa lòt gan lơm piat ôs hơ. Mơ ală jơnau ho pơ gon Yàng dê la bơta pràn kơl dăng yò tơngguh bol he, be jơnau Yàng tòm I Pier 5:10: ‘Yàng Tom Trồ la Bơtau ai jơh ală bơta nđàc neh hòi sac ală oh mi tus hơ bơta gơklŏ gam sùm sùm Kơnràñ dê tòm Bơtau Krist, tơnơ̆ mơ tŭ oh mi neh kong bòl glar jê sồt dô êt jŏ, gen să tòm Kơnràñ rơp lơh oh mi in gơlik wil tơl, kơ̆ nền, mơ bơtơl pràn oh mi in. ‘

Dan jà bol he dô nùs bal tòm bơta hòi dan: Khoai Yàng, kòn git lah rài kis rơp gơs ală kalke ò pleh bơh ală bơta chơt roh, bơta moat jrùng mơ dà mat. Dan Yàng dong kòl kòn ò plơ mat mơ Yàng tu bơta jê sồt gơ tơn tus, mơya sơlo moat jrùng kòn sơlo gơđềt dê Yàng, king cru hơđơm tê Yàng. Dan Yàng sơm bòi ală bơta jê sôt jrô ndơp tòm hwềng soàn kòn. Kòn dòn lah nulah ngai do kòn lơ bơn lơ no, mơya Yàng rơp lơh pa wơl mơ lơh kòn in pràn kơldăng rlau jơh. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, ồng mò oh mi gơs bơta jê sồt lơi tòm nus òhềt sơm bòi sơl? Digơlan ồng mò oh mi pơnđơl lòt gan, hala bơtê pơnah nàng pồn bơta jê sồt bơh ngkòi bơta he no. Mơya dan ồng mò oh mi kah lah: Yàng ò ơm ngài ồng mò oh mi dô êt lơi, Kơn ràn bàn ală dà mat ndơp ndơr, .wờng jơh ală jơnau ồng mò oh mi òhềt đơs. Yàng gam kơp gơn ồng mò oh mi pò nus, nàng Yàng lơh pa wơl, dong kòl mơ dong bol he gơlik pràn kơldang rlau mơ bol he ngai do. Sơm bat tê Yàng, gen ồng mò oh mi rơp git làm bơta ring lơngai tòm bơta jê sồt oh mi dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.