Lăm tơdrong arih, đei lơ wơ̆t ‘bơ̆t minh anih, lu bơ̆n ‘bôh tơdrong kiơ noh gĭt kăl dêh, mă lei hăm jơ năr gô hlôi hloh, lăng ming tơrŏng, dôm kơ tơdrong đêl bơ̆n lăng khan gĭt kăl dêh mă dang ei pă đei gĭt kăl bơih. Bu bu lăm lu bơ̆n kư̆m đei tơdrong arih kơ đeh đĕch lăm chăl arih kon bơngai, tơ lăm tơdrong arih jum dăr kơ bơ̆n. Dôm tơdrong oei đei, oei ‘bôh ‘bơ̆t anăp mă pă ‘biơ̆ đĕch gô pơchah hiong răm đĭ, pă đei kiơ bơih. Lei tơdrong drong kiơ kăl hloh lăm chăl arih lu bơ̆n kăl kơ chơchă păng pơm hơmet wă kơ đei kăl yua kơjăp ling lang?

Năr ‘nâu, ‘năr 11/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Missey Butler kơ̆l ‘bai TƠDRONG MĂ KĂL TƠPĂ.

“Tơdrong kiơ mă bơ̆n gơh ‘bôh, nhôn ưh kơ tơchĕng ôh; nhôn tơchĕng kơ tơdrong mă bơ̆n ưh kơ gơh ‘bôh, yua kơ dôm tơdrong măt bơ̆n gơh ‘bôh sư hiong tôch, ưh kơ gơh oei đei ling-lang ôh. Pôm tơdrong măt bơ̆n ưh kơ gơh ‘bôh đĕch, gơh oei đei ling-lang ưh kơ layơ tôch.” (II Kôrintô 4:18)

Dôm wơ̆t inh đei tơchĕng ko lu bơhngol gĭt kăl hiong bơih lăm pơge ‘năr 11/9, inh lăng tơ kơdih inh păng jet kơdih akâu: “Tơdrong arih gô thoi yơ, tơdah dơning pơtơm đơ̆ng blŭng a mă ưh kơ đei inh?”

Minh năr ayơ noh, tơdrong ‘nâu gô đei truh. Gô pă đei ‘bôh gah pơge hrôih. Dôm kơ năr, khei, dah sơnăm gô dơ̆ng. Jơ năr mă lu bơ̆n oei mơn dang ei ưh pă đei bơih. Dôm kơ mŭk tơmam gĭt kăl lăm kơ pal teh đak ‘nâu, minh năr ayơ noh gô hiong răm. Nhen thoi bơngai pơm tơwir pơih đĭ đăng kơ lu gĕl, na lu bơngai lăng klĕch tơ pah to ‘bôh ưh kơ đei kiơ lăm noh.

Mă mŭk tơmam kiơ, đei anăn đe pôk pơ ư dah yŏng pơgơ̆r mă lu bơ̆n đei lăm chă arih ‘nâu ưh kơ đei yua kiơ bơih. Đĭ đăng gô pă đei jing kiơ.

Nơ̆r ‘Bok Kei-Dei đei khan kơ ‘bok khan lê̆ hơdrol Êsai gah tơdrong gô đei tơpă thoi âu:

“Âu Inh gô pơjing plĕnh ‘nao teh ‘nao; Dôm tơdrong adrol sơ̆ ưh pă đei ‘blŏk dơ̆ng bơih, kư̆m ưh pă đei bu tơchĕng dơ̆ng bơih lăm kơ̆l ‘ngok.” (Êsai 65:17)

Buăl hăm tơchĕng lăng tơdrong kơdih pă đei ‘blŏk tơdrong kiơ kơ chăl arih oei đei kơ pal teh ‘nâu ưh?

Tơpă thoi noh, noh trŏ tơpă kơ nơ̆r ‘Bok Kei-Dei ‘nâu pơma. Dôm tơdrong so pă đei ‘blŏk bơih mă kư̆m truh tơ lăm kơ̆l ‘ngok pă đei ‘blŏk bơih.

Rim wơ̆t inh đei đŏk nơ̆r ‘Bok Kei-Dei ‘nâu, nhen thoi chăl arih inh thoi kơ pơm ngôi đĕch ưh kơ đei tơpă. Inh ‘bôh inh oei tơ âu mă lei kư̆m ưh kơ đei tơ âu. Inh rai “pơdơh lăm akâu inh”, wă kơ dôm tơdrong tơchĕng lĕch hlôi đơ̆ng akâu jăn ‘nâu, na đơ̆ng rŏng kơ tơchĕng thoi noh, dang ei ưh kơ đei kiơ hloi!

Inh ưh kơ pơma wă kơ lăp ai ‘biơ̆ dah, pơm kơ đe bu noh bơ̆l hăl kơplah pơma ‘bơm tơdrong ‘nâu. Inh ‘maih wă klah song dôm kơ jơhngơ̆m đon tơchĕng ‘nâu nhen thoi nơ̆r tơ’blŏk gah tơdrong arih ‘biơ̆ đĕch!

“Mă-lei iĕm ưh kơ băt kơ năr dơning iĕm thoi yơ, băt kơ iĕm oei arih băt kơ thoi yơ. Tơdrong arih bơ̆n thoi lĕ kơ tŭk, dang ei bơ̆n oei ‘bôh sư gom kông, pă ‘biơ̆ kơ ‘noh ưh pă ‘bôh kiơ dơ̆ng.” (Yakơ 4:14)

Tơpă, lu bơ̆n oei lăm teh đak ‘nâu ưh kơ đei kiơ, sĭt tơpă lu bơ̆n gô weh đơ̆ng âu kư̆m thoi noh. Lei tơdrong kiơ kăl tơpă?

Đei kơ minh nơ̆r pơma hơiă tơ’blŏk lăm sơnăm hơdrol ki sơ̆ thoi âu:

“Tơdrong arih mă lu bơ̆n đei mơn băt, pă đunh bơih gô hlôi hloh. Dôm lu tơdrong đei yua kơ Yang Yêsu đĕch mă oei đei khŏm khŏm!”

Tơm thoi noh bơih! Rŏ lăng, kơplah lu bơ̆n mơn băt, dôm tơdrong lu bơ̆n ‘bôh dang ei hăm măt kon bơngai minh năr ayơ noh gô hlôi. Kơplah noh, lu bơ̆n gô pơtơm proh hơmet kiơ̆ kơ hơrĭ đơ̆ng chăl arih kơdih mă ‘lơ̆ng trŏ, kiơ̆ kơ tơdrong tơ’bôh gĭt kăl khŏm khŏm. Lu bơ̆n athei dan Yang Yêsu Krist oei lăm lu bơ̆n wă kơ tôm tơdrong đơ̆ng rŏng kơ noh jơ̆ tơ’bôh tơdrong hơdah đơ̆ng Kră Yang! Yua kơ tuch luch, noh jơ̆ minh tơdrong gĭt kăl tơpă.

“Tơdrong kiơ mă bơ̆n gơh ‘bôh, nhôn ưh kơ tơchĕng ôh; nhôn tơchĕng kơ tơdrong mă bơ̆n ưh kơ gơh ‘bôh, yua kơ dôm tơdrong măt bơ̆n gơh ‘bôh sư hiong tôch, ưh kơ gơh oei đei ling-lang ôh. Pôm tơdrong măt bơ̆n ưh kơ gơh ‘bôh đĕch, gơh oei đei ling-lang ưh kơ layơ tôch.” (II Kôrintô 4:18)

Apĭnh đĭ đăng krao khan hơdai: Kon kơkuh kơ Kră Yang, kơplah kon tơchĕng kơ chăl arih ưh kơ đei ling lang kơdih, kon ưh kơ hơđơ̆ng. Mă lei kon tơchĕng gah chăl arih đei yua đei pơjao đơ̆ng ti Ih, jơhngơ̆m kon ‘bĕnh blai kơ hiôk chơt păng đei chang hơmĕng. Bơnê kơ Kră Yang, yua kơ Ih jơ̆ tơ’ngla ưh kơ đei layơ tôch oei hơdai chăl arih kon mă ‘bônh kơ hiong tôch, wă kơ kon đei tơdrong arih pơgơ̆p hăm Ih lăm chăl arih ‘nâu păng lăm đei tơdrong arih ling lang. Apinh Kră Yang tơgŭm kon arih đei minh chăl arih druh kiơ̆ dôm tơdrong mă măt kon ưh kơ đei ‘bôh. Noh jơ̆ dôm kơ rơih iŏk, dah drơ̆ng iŏk đơ̆ng kon, kon ăn kơ Yang Yêsu Krist oei lăm kon, wă kơ Ih lăp đon kơ chăl arih kon păng ư ang kơ Ih – jơ̆ dôm tơdrong ding truh tơ anih đei tơdrong arih khŏm khŏm. kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lu bơ̆n đei pơjing ăn tơ anih đei khŏm khŏm mă ưh kơ thoi dêh char dang ei. Mă lei lu bơ̆n oei arih dang ei thoi yơ gô ăn kơ lu bơ̆n truh tơ anih đei tơdrong arih khŏm khŏm. Yua kơ thoi noh, dah dan tơdrong gĭt găl, chang hơmĕng, dah tơdrong ‘lơ̆ng kơdih gơnang kiơ̆ kơ teh đak ‘nâu đei pơkă khan, lu bơ̆n ‘bônh kơ sơ’ngon, hiơ̆k bơngơ̆t, hăm lăm jơhngơ̆m rơhông ưh kơ đei kiơ wă gơh tơ’bĕnh, yua kơ tôm tơdrong gô hlôi hloh. Tơplih kơ lăm noh, athei pơjuăt lăng tơ anăp păng kơ nhăm tơ tơdrong arih đei khŏm khŏm. Noh jơ̆ pơgơ̆p hăm Yang Yêsu Krist – Tơ’ngla jur dŏng pơklaih lu bơ̆n lĕch đơ̆ng tơdrong kơnê̆ wă kơ arih đei yua ăn kơ Sư. Lu bơ̆n đei tơdrong arih tơplih đơ̆ng lăm jơhngơ̆m ‘lơ̆ng rơgoh, păng yua iŏk tôm tơdrong đơ̆ng Kră Yang ăn. Nơh jơ̆ chăl arih trŏ kơ lu bơ̆n arih kơplah lu bơ̆n pơchrang tơdrong hơdah đơ̆ng Kră Yang.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bŏp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.