Lăm chăl arih ‘nâu, ưh kơ đei bơngai bu gơh weh wer đơ̆ng dôm tơdrong ơh sơ’ngon. Đei dôm hiong răm blư truh păng lơ tơdrong, tơhiong đĭ dôm tơdrong kiơ mă lu bơ̆n ngeh kơ kơjăp. Kŭm đei dôm tơdrong ơh sơ’ngon đei pơm kơ rơka jĭ dêh, đunh kiơ̆ kơ khei sơnăm. Tơdrong ơh sơ’ngon jơ̆ tơdrong mă ưh kơ kơ đei bơngai bu chang gô, mă lei kŭm jơ̆ tơdrong ưh kơ gơh weh wer. Lei thoi noh lu bơ̆n gô pơm kiơ dah jĭ jăn tơdŭ ‘măng? Bơ̆n gô kơdâu ôn păng adrin pơm tơ’bôh kơdih oei hơđơ̆ng, dah kơdâu năm tơ Kră Yang păng nhơ̆m ơh lăm tơpang ti Sư?

Năr ‘nâu, ‘năr 12/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Diane Markins kơ̆l ‘bai TƠ‘BƠ̆P TƠDRONG ƠH SƠ’NGON.

“Ơ lu ‘nhŏng oh mă inh ‘mêm kơeng, iĕm đei boih tơdrong gleh truh wă pơlong lăng tơdrong lui iĕm, mă iĕm ‘nĕ kơ lăng hlĭch tơdrong kiơ hŏ, yua kơ tơdrong noh gô truh rim ‘nu kơ lu bơngai lui.” (I Pêtrôs 4:12)

Inh juăt kơ ‘bar ‘nu bơngai drŏkăn oei đei tơ’bơ̆p dôm kơ jơnăr anat anot lăm chăl arih. Mĭnh ‘nu- roi krao ‘noh Jen- ‘nao hiong kon drŏnglo 32 sơnăm yua kơ pơlôch kơdih, na truh tơ bơngai ‘bă klo mă duch ei ‘mêm dêh, păng bơngai klo sư hloi đei hơdai hăm sư lăm đĭ 40 sơnăm. Tơdrong răm truh ei đei truh lăp lăm dôm khei đĕch. Ưh tim mă đĭ, đĭ dôm lăm sơnăm hlôi, Jen kŭm đei tơ’bơ̆p hăm lơ tơdrong hiong răm nai dơ̆ng: đĭ kơ mĕ ‘bă sư kơdih kŭm đei lôch đĭ, păng kơdih kâu sư kŭm đei tơ’bơ̆p lơ tơdrong gah jơhngơ̆m pran.

Bơngai drŏkăn pă mĭnh- bơ̆n roi krao sư Judy- kŭm đei tơ’bơ̆p hăm lơ tơdrong ơh sơ’ngon. Đơ̆ng rŏng kơ lơ sơnăm chang gô, tuch luch sư kŭm đei tơ’bơ̆p tơdăm ‘lơ̆ng rŏ lăm chăl arih sư. Mă lei đơ̆ng rŏng kơ đunh khei sơnăm adrin bơwei hơmet wă kơjăp, hnam dơnŏ duch ei pơchah. Yua kơ ưh kơ đei hnam dơnŏ, Judy adrin đĭ jơhngơ̆m kơ tơdrong jang- ưh kơ pơdơh adrin wă bơwei iŏk anih bơ̆jang kơdih, wă pơkăm ăn kơ tơdrong arih tơ anăp. Judy kŭm đei mĭnh tơdrong gah jơhngơ̆m pran pơm kơ sư ling lang mơlŏu gah akâu jăn gah ‘ngoaih. Sư ưh kơ đei đĭ kơ mĕ hăm ‘bă hloi, păng brei mơsơ̆ ‘nâu, sư kŭm ‘nao đei pơma nơ̆r achăng hăm “bơngai buăl puăn tŏ jơ̆ng” mă sư ‘mêm.

Đĭ ‘bar ‘nu bre sư đei lơ tơdrong lơ lăi băl- mă lei kiơ̆ hăm tơdrong bre sư tơ’bơ̆p hăm tơdrong truh lei tơpă tă kơ pha ra băl.

Jen nhen oei arih lăm tŭk gom hơbơ̆l đơ̆ng tơdrong lôch ơh sơ’ngon. Sư sơ’ngon, mĭnh adrô̆, tơglơ̆m lĕch hlôi rim năr- mă lei oei adrin yak tơ anăp. Đĭ chăl arih sư, Jen ling lang ‘măn jơnăr păng jơhngơ̆m wă tơiung pơjing tơdrong pơgơ̆p hăm hnam dơnŏ, bôl buăl- thoi noh na dang ei, trŏ kơ lu sư jơ̆ dôm lu bơngai oei hơdai, dŏng tơgŭm sư lăm kơplah pơmat tat hloh. Mă khan ưh kơ hlôh yua kơ kiơ kơdih đei tơ’bơ̆p lơ tơdrong hiong răm, Jen ưh kơ đei pơma hil kơ Kră Yang, kŭm ưh kơ weh ataih đơ̆ng Sư- yua kơ đơ̆ng kơplah wơ̆ ‘lŏ, sư đei arih lăm mĭnh tơdrong pơgơ̆p ‘bĕnh tơdrong ‘mêm mơnat hăm Kră Yang. Sư băt kơ Kră Yang, păng sư băt khan Kră Yang oei hơdai hăm sư. Kră Yang gô chông sư yak hlôi kơ tơdrong pơlong lăng ‘nâu.

“Yua kơ Ih đei tơgŭm inh boih, Ala yơ̆p pơnăr Ih na inh gô hơri chơt hiôk. Bơhngol inh oei kơjăp lăm Ih, ti ‘ma Ih tơgŭm tơiung inh.” (Hơriso 63:7-8)

Jen hlôi đei mơn tơdrong tơgŭm đơ̆ng Kră Yang, păng dang ei, sư oei rôp iŏk kơjăp tơdrong tơpă ‘noh wă kơ hlôi kơ jơnăr ‘bĕnh kơ tơdrong ơh sơ’ngon ‘nâu.
Na Judy lei kliah praih hrĕnh tĕnh đơ̆ng rŏng kơ tơdrong hiong răm ‘nao brei mơsơ̆ ‘nâu. Mă lei pha kơ hăm Jen, sư ưh kơ đei lơ bôl buăl dah ‘nhŏng ŏh lăm hnam dơnŏ oei hơdai wă klah asong, dŏng tơgŭm. Sư ngăl đei mơn rơhông, păng lơ wơ̆t tơ’bơ̆p hăm tơdrong ơh sơ’ngon mĭnh adrô̆ tơpă. Lăm jơhngơ̆m sư mong ‘bĕnh kơ tơdrong hil blĕk- blĕk hloi kơ ‘Bok Kei-Dei. Phŏ sư kŭm đei pơtơm jet kơdih: lei sư hăm pă đei ‘maih drơ̆ng kơdih jơ̆ mĭnh ‘nu bơngai kiơ̆ Kră Yang dah ưh.

Jen rơih iŏk tơdrong tơ’bơ̆p hăm tơdrong ơh sơ’ngon đơ̆ng kơ tŏsĕt. Rim năr, sư pơih jơhngơ̆m ‘net tŏ sĕt, ăn kơdih mơn đei kơ tơdrong ơh sơ’ngon lăp kơ jơhngơ̆m kĕ pŭ iŏk, na kŭm adrin ‘măn jơnăr wă dan hơmet lê̆ tơdrong ơh sơ’ngon lăm jơhngơ̆m.

Na Judy ‘noh jrok tơpăt lăm tơdrong ơh sơ’ngon, oei lăm tơdrong ơh sơ’ngon đĭ mĭnh giĕng. Na sư hăt hot iung hloi păng adrin tang lê̆ tơnang ‘măng jơhngơ̆m ‘bĕnh kơ sơ’ngon. Hơkŭng sư adrin hiĕk, păng gah ‘nguaih rŏ kơ nhen đei hlôi kơ tôm tơdrong đei ‘lơ̆ng ‘bơih.

Bu lăm bơ̆n kŭm gô đei tơ’bơ̆p hăm dôm tơdrong hiong răm, ơh sơ’ngon, mă tih dah iĕ, ‘bônh kơ hlôi dah mă đunh. Trŏ thoi nơ̆r ‘Bok Pêtrôs đei chih:

“Ơ lu ‘nhŏng oh mă inh ‘mêm kơeng, iĕm đei boih tơdrong gleh truh wă pơlong lăng tơdrong lui iĕm, mă iĕm ‘nĕ kơ lăng hlĭch tơdrong kiơ hŏ, yua kơ tơdrong noh gô truh rim ‘nu kơ lu bơngai lui.” (I Pêtrôs 4:12)

Tơdrong tơ’bôh mă kơplah lu bơ̆n đei tơ’bơ̆p tơdrong ơh sơ’ngon truh gô đei tơgŭm hơmet kơdih kon bơngai bơ̆n, păng hăm trong yak năm tơ anăp dơ̆ng. Tơdah ưh kơ đei tơdrong tơ’bơ̆p păng ăn kơ Kră Yang pơklaih dôm kơ rơka jrŭ tơ lăm jơhngơ̆m, lei ‘bônh dah hiơ̆ tôm tơdrong pơm, dôm tơdrong pơgơ̆p đơ̆ng lu bơ̆n kŭm gô đei hơtŭt ‘bơm. Dah nŏng kơ wă ôn hlơp păng pơjing tơnăr pơgăn wă kơ bơwei akâu jăn kơdih, bơ̆n gô anat kơ arih ‘lơ̆ng tơpăt dah ‘mêm mơnat kiơ̆ hăm tơdrong gơh tôm mah.

Dah tơdrong kơnê̆ truh păng ơh sơ’ngon đei truh, bơ̆n ưh kơ gơh klĕnh ôn dah adrin chă trong wă ưh kơ drơ̆ng ôh, kŭm ‘nĕ kơ ơh blĕk dah hil plơ̆. Bơ̆n kăl kơ đei pơ̆n nuih yak hlôi kơ pla ŭnh ‘noh. Păng trŏ kơ dôm nơ̆r pơkă đơ̆ng Kră Yang gô jơ̆ tu jơhngơ̆m pran dŏng tơgŭm bơ̆n, thoi nơ̆r Sư đei khan lăm I Pêtrôs 5:10:

“Mă-lei ‘Bok Kei-Dei krao iŏk bơ̆n Sư wă kơ bơ̆n oei hiôk hăm Sư ling-lang yua kơ bơ̆n lui kơ Yêsu Krist, na Sư ăn kơ bơ̆n pơmat tŏ sĕt đĕch ưh kơ đunh, Sư gô pơm kơ bơ̆n lui kơjăp jing bơngai tơpăt lăm tôm tơdrong. Yua kơ Sư mơnat na Sư tơgŭm bơ̆n tôm tơdrong thoi noh.”

Apĭnh đĭ đăng krao khan hơdai: Kơkuh kơ Kră Yang, kon băt khan rok trong tơdrong arih gô đei kơplah ưh kơ tơproh ‘lơ̆ng, ưh kơ gơh weh wer đơ̆ng tơdrong hiong răm, sơ’ngon păng đak măt. Apĭnh tơgŭm kon ‘nĕ kơ tơwih rŏng hăm Ih dah ơh sơ’ngon đei truh, mă lei rai ơh sơ’ngon, hơpơi kơ kon rai rôp kơjăp iŏk Ih, gơ’nơp ala pơnăr Ih. Apĭnh pơklaih dôm jĭ rơka hlơp jrŭ anih bơhngol kon. Kon lui khan mă năr ‘nâu kon rơdu, mă lei Ih gô pơklaih praih păng pơm kơ kon pran kơtang hloh dơ̆ng. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, buăl hăm oei đei chĕp lăm jơhngơ̆m mĭnh tơdrong rơka ưh tim mă klaih ayơ ưh? Rŏ lăng buăl oei đei adrin yak hlôi, dah đei hŏk iŏk tơdrong ôn lê̆ tơdrong ơh sơ’ngon đơ̆ng rŏng kơ hiĕk mơlâu. Mă lei apĭnh buăl athei ‘blŏk khan: Kră Yang ưh kơ ataih kơ buăl mĭnh yây phŭt ayơ. Sư ‘bôh đĭ dôm lu đak măt ro lăm jơhngơ̆m, hlôh đĭ dôm nơ̆r buăl oei tim mă đei roi tơlĕch. Sư oei chang gô buăl pơih jơhngơ̆m, ăn kơ Sư gơh pơklaih praih, dŏng tơgŭm păng tơgŭm buăl jing nuih pran hloh kơ kơdih buăl năr brei. Athei rôp iŏk ti Kră Yang, păng buăl gô hlôi đei mơn tơdrong hiôk hian hloi lăm tơdrong ơh sơ’ngon đơ̆ng kơdih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.