Puas muaj zaum twg koj hnov yus lub neej no tsuas yog kev quaj ntsuag, kev puas tshuaj xwb? Tias yus tab tom xuas kev hauv qhov tsaus ntuj, tshuav Vajtswv ces nyob ntsiag to? Puas muaj zaum twg koj ris rawv txoj kev iab siab twj ywm, thiab hnov cuag li Vajtswv tig nruab qaum rau yus? Phooj ywg, txawm yog thaum uas tib neeg lub siab tsis ntseeg los, Vajtswv yeej ncaj ncees tsis muaj hnub hloov pauv. Vajtswv tsis tau muaj ib zaum twg tsis hlub koj thiab yeej tseem ua twjywm ntsiag to ua haujlwm txhim kho koj lub neej.

Hnub no, yog hnub 13/09/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kellin Gibson dhau ntawm Zaj kawm TAU CAWM DIM TAWM HAUV NTAU QHOV KEV IAB SIAB.

“Yog nws kam mas yuav zoo heev; yog nws tsis kam, kuv thov cog lus rau Vajtswv tus uas muaj sia nyob hais tias kuv yuav yuav koj.” (Luv 3:13)

Muaj ib zaj xwm txheej hauv Vajluskub hais txog ib tug pojniam muaj lub siab tawv heev. Pog kam tso pog lub tebchaws, txais yuav txoj kev mus nyob rau ib qhov chaw tshiab tiv tej yam uas tsis paub tom ntej. Thiab, twb yog txoj kev ntawd coj pog mus txog rau tej koob hmoov tiv dhau tej yam uas pog cia siab. Tej zaug koj yuav xav tias nws yog hais txog Luv. Tiamsis ntawm kuv, tus pojniam ntawd nws yog Na-au-mis.

Yog ib tug pojniam twb muaj hnub nyoog hauv nws lub siab ris rawv ntau txoj kev iab siab. Tomqab tej teeb meem tshwm los raug nws, pog yeej muaj yam uas xav tias Vajtswv tab tom npau taws rau nws. Thaum kev tshaib nqhis tshwm tuaj hauv Npelehees, pog thiab tsev neeg thiaj khiav mus rau tebchaws Mau-as. Tiamsis ntawm lub tebchaws ntawd, pog tus txiv thiab pog ob tug tub puav leej tuag lawm – tej neeg uas txheeb ze tshaj, yog kev zoo siab thiab qhov chaw pheeb rau pog lub neej. Thaum txoj kev mob siab ti nkaus txha ntawd tshwm tuaj, pog hais rau ob tug tub tias: “Tus Tswv tau tso kuv tseg lawm, thiab kuv hlub neb heev, kuv tsis xav hais tias neb lub neej yuav zoo li no.” (Luv 1:13).

Lub npe Na-au-mis no txhais tias yog qab zib. Tiamsis thaum rov qab los rau hauv Npelehees, pog yuam kom lawv hu nws ua “Malas” – txhais tias “Iab siab”. Pog hais: “Vim li cas nej tseem hu kuv ua Na-aumis, thaum tus Tswv uas muaj Hwjchim loj kawg nkaus rau txim thiab tso kev txomnyem los rau kuv?” (Luv 1:21).

Kuv cim civ nug, yam dabtsi ua rau Na-au-mi xav tias Vajtswv tab tom tawm tsam pog? Puas yog pog xav tias yus tab tom raug teem txim vim ib qhov kev txhaum twg yav dhau los? txawm yog Vajluskub tsis hais meej txog tej uas pog ntsib dhau los, muaj ib yam tab pov tias: Vajtswv yog tus siab zoo. Tej zaug, nyob ntawm tej kev mob sib tsuam zaws ntawd, pog ntsia tsis pom Vajtswv txhais tes ncaj ncees foom hmoov rau pog.

Txawm yog yuav ntsib dhau tej kev puas tshuaj ntau los, Na-au-mi tsis nyob ib leeg. Luv yog pog tus nyab – tsis yog nrog pog nyob vim khuv leej lossis vim lub nra, tiamsis vim nws yeej hlub pog tiag. Nws hais meej meej tias: “Tiamsis Luv teb hais tias, “Tsis txhob txwv kuv! Cia kuv nrog koj mus. Koj mus qhov twg, kuv yeej yuav nrog koj mus qhov ntawd; koj nyob qhov twg, kuv yuav nrog koj nyob qhov ntawd. Koj haivneeg yuav yog kuv haivneeg thiab koj tus Vajtswv yuav yog kuv tus Vajtswv. Koj tuag rau qhov twg, kuv yuav tuag qhov ntawd, thiab cia luag muab kuv faus nrog koj rau qhov ntawd.” (Luv 1:16-17).

Thaum uas ob tug pojniam ntawd rov qab los rau Npelehee ncaj rau lub caij sau nplej, sawv daws puav leej sib tham txog nkawd zom zaws (Luv 1:19). Tas nkawd ntsib Npau-as, yog ib tug txiv nej nplua nuj tiamsis txo hwjchim, puv npo kev hlub thiab hwm Vajtswv. Lawv yog kwv tij txheeb ze ua ke.

Tom qab no, Na-au-mi tus neeg uas muaj kev iab siab tau tsa suab tias: “Tus Tswv coj kuv rov qab los tes dawb tes npliag” (Luv 1:21) – tau pom Luv nqa nplej ntau los tsev. Npau-as tau hais tias: “Txhob rov qab tes dawb mus cuag koj niam” (Luv 3:17). Zoo kawg nkaus li, Vajtswv yeej tseem ncaj ncees nchuav koob hmoov rau Na-au-mi, txawm yog thaum uas pog puv npo kev iab siab thiab ua xyem xyav rau Vajtswv.

Tej zaj xwm txheej no yeej tseem tsis tau xaus los. Luv muaj cuab kav sib yuav nrog ib tug nyob hauv caj ces, tiamsis yog tus txheeb ze ntawd tsis kam yuav Luv, Npau-as thiaj tsis ua xyem xyav hais tias: “Hmo no koj cia li pw ntawm no, tagkis kaj ntug peb mam nug saib nws puas kam yuav koj los tsis kam. Yog nws kam mas yuav zoo heev; yog nws tsis kam, kuv thov cog lus rau Vajtswv tus uas muaj sia nyob hais tias kuv yuav yuav koj.” (Luv 3:13). Thiab yawg tau ua raws li yawg tej lus cog tseg.

Koj puas hnov lub suab hu ntawd yeej tseem ntxhia ntawm Ntoo Khaub Lig, qhov chaw uas Yexus Khetos cov ntshav tau ntws los vim koj thiab kuv? Cia siab tias peb yuav tig mus rau ntawm Tswv Yexus – tus cawm peb dim. Nws tau tuag thiab sawv los tau kho Na-au-mi, Luv thiab tag nrho peb txhua tus – cov neeg uas saib cuag li twb hnov qab hauv txoj kev mob, tiamsis tseeb tiag yeej tsis tau muaj ib zaum twg txav deb Vajtswv txoj kev hlub uas tsis muaj nrim li.

Thov caw nrog kuv peb thov Vajtswv ua ke: Tus Tswv, ua Vajtswv tsaug vim tej koob hmoov zoo uas koj pub vij puas ncig kuv. Thaum kuv raug nqus mus rau hauv tej kev nyuaj siab, thov Vajtswv pab kom kuv nco ntsoov tias Koj yeej tseem hlub thiab pab rau kuv txhua yam. Ua ntej, ntawd yog qhov khoom plig cawm dim dhau ntawm Nws tus tub Yexus Khetos. Txawm yog kuv hnov iab siab lossis npau taws los, thov pab kom kuv ntseeg rau koj txoj kev hlub kev ncaj ncees. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug koj tab tom tsau tsawv hauv txoj kev puas tshuaj, koj hnov iab siab vim tej teeb meem tsis ncaj ncees tau tshwmsim los nyob hauv yus lub neej. Thov kom peb nco ntsoov tias: txawm yog koj yuav zoo li cas los, Vajtswv txoj kev hlub pub rau koj yeej tsis hloov pauv. Txawm yog koj npau taws Vajtswv, xav tias Nws tau tso koj tseg los Vajtswv yeej tseem hlub tshua thiab tu koj txhua lub sijhawm. Nws tsis khuv xim nws txojsia vim koj – yog li nws yeej yuav tsis hnov qab koj thaum uas koj cheem tsum nws tshaj thiab los?

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.