Kawm Vajtswv tejlus yog feem uas yuav tsum muaj ntawm cov ntseeg. Yog li, Pawg Ntseeg thiaj tsom ntsoov rau kev cob qhia thiab kawm Vajtswv tejlus. Tiamsis puas muaj zaum twg peb pom yus ua poob lub homphiaj ntawd lawm? Yog Vajtswv tejlus yog cov lus ciaj sia thiab puv npo hwjchim, ces peb yuav ua li cas kom thiaj qhia tau cov lus ntawd? Rau qhov cov ntseeg lub homphiaj cob qhia tsis yog tas nrau ntawm cob qhia kom tib neeg muaj kev totaub txog Vajluskub xwb, tiamsis tseem qhia kom muaj cov thwjtim tawg paj txi txiv, yog cov neeg uas muaj lub neej zoo li Yexus Khetos.

Hnub no, yog hnub 14/09/2025, Yog hnub so ntawm cov ntseeg Vajtswv txoj kev cob qhia, kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm QHIA VAJTSWV TXOJLUS KOM TXAUS.

“Vajtswv tsa kuv ua ib tug tubtxib pab cov ntseeg. Vajtswv kom kuv ua tes haujlwm no thiaj pab tau nej. Tes haujlwm no yog qhov uas qhia txog nws zaj.” (Kaulauxais 1:25).

Thaum tseem yau, lub sijhawm ntuj so yog lub sijhawm uas kuv nyiam tshaj. Hnub ntawd kuv xav tias: “Vim li cas ib lub xyoo kawm ntawv yuav ntev li ntawd ua luaj?” Lub caij ntuj so los txog, kuv zoo siab vim yus tau so kev kawm, tiamsis tseem zoo siab dua vim tau mus kawm Vajluskub rau lub caij ntuj so hauv Pawg Ntseeg. Kuv yeej tseem nco ntsoov tej hnub zoo ntawd, thaum tau mus tom tuam tsev, pehawm hauv tej chav tsev zoo, noj tej pluas noj qab, lossis tsuas yog tau nrog tej phooj ywg hu nkauj ua ke.

Thaum tseem yau, kuv yog ib tug menyuam yaus xav kom yus yog tus yeej xwb. Kuv Pawg Ntseeg lawv pheej npaj tej homphiaj kawm cim nco Vajluskub rau lub caij ntuj sov lossis koob tsheej. Txhua zaug zoo li no, kuv siv zog nquag heev. Ib feem yog kuv xav tau ib qhov khoom plig, lwm feem yog kuv xav kom niam txiv tau ntsej muag rau kuv. Kuv nyiam qhov uas tau sawv ntawm Pawg Ntseeg txais khoom plig, lossis xav tau lwm tus hais tias kuv yog ib tug menyuam “txawj thiab hlub Vajtswv”, txawm yog qhov ntawd ntau zaug tsuas yog nyob sab nraud xwb.
Tiamsis ua Vajtswv tsaug vim Vajtswv tau hlub tshua txog kuv, pub kuv tau ntsib Vajtswv thiab ntseeg nws rau tej xyoo dhau los tom qab no, thaum kuv loj hlob zujz uas tuaj. Vajtswv qhib kuv lub qhov muag kom kuv nkag siab Vajluskub tsis yog cia kom kuv kawm nco thiab khaws cia hauv hlwb xwb, tiamsis nws yog cov lus ciaj sia muaj hwjchim, hloov pauv kuv lub neej.

Caijnyoog dhau mus, kuv mus kawm ntau lub rooj kawm hnub so, kawm ntau lub rooj kawm Vajluskub ntuj so, koom rooj txhawb siab, thiab lwm txoj kev kawm Vajluskub. Thaum kawg, nyob rau cuaj xyoo dhau los, Vajtswv tau siv ib lub rooj kawm Vajluskub los txhawb kuv, pab kom kuv lees txim thiab ntseeg Nws. Kuv nco Vajtswv tshav ntuj vim tau siv lub sijhawm ntawd los coj kuv mus txog rau ntawm qhov uas paub Vajtswv ntawm tus kheej. Thiab thaum tau Vajtswv hlub tshua, kuv pom tias tag nrho tej uas kuv kawm tau tsis yog tsis muaj nqis, tiamsis puav leej taw mus rau ib lub homphiaj, ntawd yog kawm kev ntseeg.

Paulus, nyob rau hauv yawg tes haujlwm, tau ua rau peb pom kev loj hlob thiab Pawg Ntseeg huam vam muaj ob yam tseem ceeb, ntawd yog tshaj tawm Txojmoo Zoo thiab cob qhia kev ntseeg. Tshaj tawm yog coj tus tsis tau ntseeg los cuag Yexus Khetos, tshuav cob qhia yog tu lawv, txhawb lawv kom dhau los ua tus neeg loj hlob thiab zoo kawg nkaus hauv Nws. Tsab ntawv xa rau cov ntseeg Kaulauxais, Paulus hais tias: “Vajtswv tsa kuv ua ib tug tubtxib pab cov ntseeg. Vajtswv kom kuv ua tes haujlwm no thiaj pab tau nej. Tes haujlwm no yog qhov uas qhia txog nws zaj.” (Kaulauxais 1:25).

Paulus tsis siv lo lus maj mam thaum hais txog tes haujlwm tshaj tawm Txojmoo Zoo uas yawg tau txais los. Yawg hais txog tes haujlwm ntawd yog “tshaj tawm Vajtswv txojlus kom puv npo”. Lo lus “puv npo” muaj lub ntsiab tias yog ua li cas kom Vajtswv txojlus tau ntuas kom puv npo, tsis yog tsuas paub tej xov xwm xwb, tiamsis tseem yog “txaus” rau seem paub zoo, pab kom lwm tus nkag siab qhov tseeb thiab tau qhov tseeb hloov pauv.

Nyob rau lub ntiajteb puv npo xov xwm li no thiab kev kawm txawj, cov ntseeg Vajtswv ntsib txoj kev sim siab ntawd yog: Yuav ua li cas thiaj cais tau “qhov twg tseeb” thiab “cuav” ntawm “qhov tseeb” thiab tej yam uas “cuag li yog qhov tseeb”. Nyob rau tiam uas Vajluskub hu ua “hnub kawg”, qhov tseeb raug ua saib tsis taus, tshuav qhov cuav no ces tau qhuas. Sawv ntawm tej ntawd, peb yuav tau vam khom Vajtswv ‘qhia Vajtswv tej lus kom puv npo”, txhais tias yog peb yuav tau ua tim khawv, qhia txoj moo zoo kom yog, kom cov mloog lawv muaj kev ntseeg tseeb hauv Tswv Yexus. Zoo li Paulus, peb yuav tau paub tias ntawm no yog lub nra Vajtswv muab cob rau peb, yog li peb thiaj tsis tau cai lam tau lam ua kom dhau, tiamsis yuav ua los ntawm txoj kev ncaj ncees thiab muab lub siab fij tiag tiag.

Tiamsis yuav ua li cas kom thiaj qhia tau puv ntoob? Paulus hais tias yawg tsuas yog qhia txog Tswv Yexus xwb. Tswv Yexus tib leeg thiaj yog tus yawg qhia lub homphiaj yog cia kom sawv daws dhau los “zoo kawg nkaus” nyob hauv Nws: “Peb paub li no, peb thiaj qhia Yexus Khetos zaj rau sawvdaws. Peb ntuas thiab qhia txhua tus raws li peb muaj tswvyim qhia, rau qhov peb xav kom txhua tus uas ntseeg Yexus Khetos ua tau lawv lub neej zoo thiab coj tau lawv mus cuag Vajtswv” (Kaulauxais 1:28).

Niajhnub nim no peb puas yog qhia txog Tswv Yexus tib tug xwb tiag, los yog Tswv Yexus tsuas tshwm me me hauv peb cov lus qhia xwb? Lub ntiajteb niaj hnub nim no tshwm sim ntau “txoj moo zoo” tau muab tov xyaw nrog tus kheej txoj kev totaub, tej kev xav thiab txoj kev muaj koob nto npe tiam no. Mloog cuag li zoo, tiamsis tej “txoj moo zoo” no tsis ua rau tus ntseeg tau txais kev cawmdim vim tsis muab tso rau hauv Yexus Khetos thiab tsis cia Tswv Yexus ua tus nruab nrab hauv txoj kev cob qhia, tsis hais txog Vajtswv txoj kev dawbhuv, tsis hais txog kev txhaum thiab kev lees txim, tsis ua rau cov mloog muaj kev hloov pauv hauv lub neej, tsuas ua rau txaus siab rau txoj kev txawj ntse thiab kev xav xwb. Ib txojmoo zoo tsis muaj ntoo khaublig, tsis muaj lub hwjchim hloov pauv, ces tsis yog txojmoo zoo lawm.

Nyob rau lub caijnyoog hauv lub ntiajteb niaj hnub nim no, tseem ceeb heev yog tias peb kuj muaj txoj kev mob siab txog ib yam li Paulus, ntawd yog “siv tag nrho tej kev txawj ntse” los “ceebtoom” thiab “cobqhia” sawv daws, txhais tias ke ceeb toom lwm tus txog kev txhaum thiab txoj kev cheem tsum lees txim, tiamsis tib txhij ntawd kuj qhia Vajtswv txojlus rau lawv thiab. Pawg Ntseeg qhov haujlwm tsis yog tas rau ntawm coj lwm tus los ntseeg Vajtswv xwb, tiamsis yog cia kom lawv “sawv ntawm Yexus Khetos lub xub ntiag zoo kawg nkaus” ib yam li Paulus tau hais txog. Thaum ntawd tus neeg no yuav “zoo kawg nkaus” hauv txoj kev ntseeg: Paub Vajtswv, hlub Vajtswv thiab ua neej rau Nws.

Kom yuav qhia tau txog Tswv Yexus kom puv ntoob, Paulus twb tiv ntau txoj kev kom txomnyem. Yawg sau: “Yexus Khetos twb pub nws lub zog rau kuv lawm, kuv thiaj muab siab rau siv lub zog uas Yexus Khetos pub rau kuv ua kom tau raws li tej uas kuv xav ua” (Kaulauxais 1:29). Niaj hnub nim no, tshaj txhua yam, peb yuav tau thov Vajtswv thiab nqes peev rau txoj kev cob qhia, vim peb tab tom tawm tsam nrog “Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj , tej uas muaj hwjchim loj thiab tej uas muaj hwjchim kav tiam tsaus ntuj” (Efexaus 6:12). Cob qhia kev ntseeg ke ntsib dab ntxwgnyoog kev tawm tsam, tiamsis kuj ntsib ntau txoj kev txomnyem sab hauv: tsis muaj neeg, tsis muaj neeg muaj siab nqes tes ua, tsis muaj kev hlub tshua ntawm cov ntseeg. Tiamsis, Paulus hais meej meej txog ib qhov tseem ceeb yog: yawg tsis ua haujlwm thiab tsis tawm tsam nrog nws tus kheej lub zog, tiamsis los ntawm Vajtswv lub hwjchim ua haujlwm hauv yawg. Txawm yog kev txomnyem tsis nres los, peb kuj yuav tau tuav kom ruaj cov lus cog tseg, ntawd yog: thaum Tswv Yexus muab haujlwm cob, ces nws kuv ntxiv laj lim tswv yim thiab ntxiv zog rau peb.

Thaum tig rov qab mus saib peb txoj kev ntseeg, kuv nco Vajtswv tshav ntuj vim tau siv txoj kev cob qhia cov ntseeg, dhau ntawm tej lub rooj kawm hnub thiv, tej lub rooj txhawb siab, cob qhia caij ntuj sov, lossis tej kev kawm Vajluskub, kom ua rau kuv dhau los loj hlob hauv txoj kev ntseeg. Kuv paub tias ntawm no tsis yog tsuas yog tus uas ua Vajtswv haujlwm hauv txoj kev cob qhia cov ntseeg xwb thiaj muaj lub siab zoo li Paulus, tiamsis peb txhua tus puav leej tau nqua hu los kom rau siab kawm Vajtswv tej lus thiab koom tes rau hauv txoj kev ua tim khawv, qhia moo zoo, txhawb zog thiab qhuab ntuas lwm tus, kom yus thiab lwm tus yuav zoo kawg nkaus thaum sawv ntawm Yexus Khetos xub ntiag.

Thov caw nrog kuv peb thov Vajtswv ua ke: Leej Txiv! Kuv ua koj tsaug vim dhau ntawm koj tej lus kuv thiaj dim hauv lub neej qub thiab los nyob rau hauv qhov pom kev. Thov pub kom kuv ncaj ncees kawm Vajtswv tej lus, thiab pub kom kuv tau koj tej tswv yim kom kuv qhia txojmoo zoo txog Tswv Yexus ncaj ncees thiab muaj hwjchim, kuj ib yam li paub txhawb, coj lwm tus los txais yuav koj. Kuv thov hauv Tswv Yexus Khetos lub npe. Amees.

Cov kwv tij txhua tus, hnub nco txog cov ntseeg Vajtswv txoj kev cob qhia yog ib lub sijhawm rau peb tig rov qab mus saib txoj kev cob qhia txog qhov tseeb tau muab cob rau Pawg Ntseeg thiab peb txhua tus. Txawm yog cov neeg tab tom ua haujlwm nyob rau hauv seem cob qhia, lossis tsuas yog ib tug ntseeg kawm Vajluskub xwb, peb yuav tau paub txog lub luag haujlwm kawm thiav tuav Vajtswv tej lus, thiab txiav txim siab kom tsis mus yuam kev. Yog li, yuav tau thov Vajtswv, thiab nqes peev rau txoj kev cob qhia hauv Pawg Ntseeg zej zos. Kuj yuav tau ncaj ncees rau txoj kev kawm Vajtswv txojlus nyob rau hauv txhua lub rooj kawm Vajluskub thiab thov Vajtswv siv cov lus ntawd cob qhia koj lub neej, kom koj tau cob qhia thiab ua tej haujlwm zoo.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.