Boh he neh geh tŭ dơ̆ sền gŏ rài kís bol he mìng là bơta ờ bơtoah, mờ roh lơm sơl? Gen bol he mìng dồ nă lòt jòi tòm klăm jơngo, mờ ya Yàng kư̆ ơm mŏ mŏ lơm? Geh tŭ lơi bol he cèng nùs sràt bơtăng ís, mờ sền bè Yàng neh wèt kời mờ he sơl? Ơ oh mi koñ gơboh, ngăn dê tòm tŭ hwềng nùs kòn mơnús bềng bơta wi wơ, Yàng Tòm Trồ song ring sùm ờ tòm gơl. Kơnràñ ờ tŭ lơi jơh bơta koñ gơbog bol he mờ Kơnràñ sùm găm lơh broă nàng lơh wơl pa rài kís boh he dê.

Ngai do, ngai 13/9/2025, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Kellin Gibson bơh tơnggume GEH DŎNG TĂ BƠH DI GÙL RBÔ BƠTA SRÀT BƠTĂNG.

“Dilah khai ò bài lơh be dô nă cau tơwài wơl ai in…. añ rơp lơh bơta hơ̆ be dô nă cau tơwài wơl ai in. (Ru-tơ 3:13)

Gớs dồ bơta yăl yau tòm Sră Goh yăl bơh dồ nă cau ùr ruh khin cha ngăn. Mọ neh khin cha lik bơh dồ bă tiah mờng ờs, nàng cơn đoà tús dồ bă tiah ngài mờ krơi ís mờ păl tòm toh mờ ală broă gơtơng tús ò git lài. Mờ ngăn, bơh gùng dà hơ̆ neh cèng mọ tús dê ala bơta lơngai lòt găn rlau mờ ala bơta mọ neh kơnờm. Gen bol he rơp kơlôi tús bơta yăl bơh mọ̀ Rutơ. Mơya, gơwèt mờ añ, dồ nă cau ùr ruh kră kơdăng hơ̆ là Na-ô-mi.

Hơ̆ là dồ nă cau ùr sơnăm kung là bè trồ mho rau, cèng tòm nùs oă bơta sràt bơtăng. Tơnơ̆ mờ ala bơta rung rài tús, gen mọ rgơi kơlôi lah Yàng Tòm Trồ gớs nùs gơ jrañ mờ mọ. Tŭ bơta jê gloh rung tús tòm bòn tờm Bêt-le-hem, mọ mờ hìu nhă păl lik lòt bơh hơ̆, tús dê dồ bă tiah Mô-áp. Mơya dê dô bă tiah ò di ƀòn tờm hơ̆, mọ neh roh tơn bau klau kung bè bàr nă kòn klau-là ală cau koñ gơboh, bơta chò hòp mờ tiah sơn đìng rài kís mọ dê. Tòm bơta moat jrùng jê sồt ngăn hơ̆, mọ neh ñìm đớs mờ bàr nă kòn băn khai lah: “Nùs mè sràt bơtang oă rlau mơ ală kòn, tài bơh tê Yàng Jehôwa dê neh tơrwơl tòmdră mơ mè.” (Rutơ‬ ‭1‬:‭13)

Sơn đăn Na-ô-mi gơtha là lơngồt. Mơya tŭ rê wơl Bêt-le-hem, mọ neh sồr cau hòi khai dê là “Ma-ra”- gơtha là “sràt bơtăng”. Mọ đớs: Ñchi bơh tài hòi añ la Naômi taih? Tòm tŭ Yàng Jehôwa neh lơh dô bă kràñ cê mơ añ, Bơtau Gơnap Gơnoar Dờng neh đùh bơta rung rài hơđang añ.” (Rutơ‬ ‭1‬:‭21‬)

Añ neh lùp ís, bơta lơi lơh Na-ô-mi in kơlôi lah Yàng găm tòm dră mờ mọ? Hơ̆ ngăn lah mọ neh kơlôi să tòm păl kong bơta lơh tơmàl bơh dồ bơta glài tòm bơh lai òr sơl? Bulah Sră Goh ờ yăl loh làng bơh ală bơta mờ mọ neh lòt găn, mơya gớs dồ bă kơcê ngăn lah: Yàng Tòm Trồ là Bơtau lơbơn niam. Di gơlăn, digùl bơta jê sồt oă ngăn, mọ ò sền gŏ tai blàng tî song ring sùm găm bơtơl mọ in.

Bulah lòt găn oă bơta jê sồt roh lơm dờng ngăn, mơya Na-ô-mi ờ ơm ís dồ nă. Ru-tơ-kòn ban kơnòm mọ dê-ờ ơm mò mọ bơh nùs nđàc sơngit hala bơta păl càng, mơya bơh cau melŏ koñ gơboh ngăn dê cau mọ. Cau melŏ khin cha đớs: “Mè lòt tiah lơi añ rơp lòt tiah hơ̆, mè ơm tiah lơi añ rơp ơm tềng hơ̆. Làng bol mè dê rơp la làng bol añ jê, mơ Yàng Tom Trồ mè dê la Yàng Tom Trồ añ jê. Mè chơt tiah lơi gen añ rơp chơt tiah hơ̆, mơ geh tơp tềng hơ̆ sơl.”(Ru-tơ 1:16-17).

Tŭ bàr nă cau ùr hơ̆ rê wơl Bêt-lê-hem là tòm kơnhai tơ wès, cau tòm ƀòn gớs nggồr nggàc tài bơh bol khai (Ru-tơ 1:19). Gen bol khai tìp Bô-ô dô nă cau klau pás gớs mờ ya pìn pơndit să, bềng bơta koñ gơboh mờ duh rngòt Yàng Tòm Trồ. Gen bol khai kung là jơi bơtiàn mrêp băl.

Tơ nơ̆, să tòm Na-ô-mi-là cau neh srat bơtang mơ đớs “ Yàng Jehôwa neh lam añ rê wơl tê gòi.” (Ru-tơ 1:21)-neh sền gŏ Ru-tơ cèng bềng kòi mi rê hìu. Bô-ô neh đớs “ bãn rê wơl tê gòi hơ po me ai dê.”(Ru-tơ 3:17). Crih crài ngăn, Yàng Tòm Trồ sùm song ring tuh tơl bơta lơngai dê Na-ô-mi in, bulah nùs mọ bềng bơta sràt bơtang mờ bơta pin wi wơ mờ Kơnràñ.

Mơya jơnau yăl yau ờ hềt til wơl. Ru-tơ rơp chài tòm bau mờ dồ nă cau ndai tòm jơi bơtiàn bol khai dê, mơya di lah cau hơ̆ ờ bài, Bô-ô neh đớs: “dilah khai ò bài lơh be dô nă cau tơwài wơl ai in…. añ rơp lơh bơta hơ̆ be dô nă cau tơwài wơl ai in. (Ru-tơ 3:13). Mờ ồng neh lơh jat jơnau hơ hơ̆.

Bol he kơno sơl jơnau hòi jà hŏ gơpong bơh dî tiah chi pơng, là tiah mờ Bơtau Krist neh hòr mhàm bơh bol he sơl ơ? Kơp koñ bol he sùm wèt măt dê Yàng Je-su là Bơtau Dong Klàs bol he dê. Kơnràñ neh chơt mờ kís wơl nàng bơta bơtào wơl Na-ô-mi, Ru-tơ băl mờ jơh bol he-là ala cau sền bè neh ơm huĭ tòm bơta jê sồt, mơya ờ hềt tŭ lơi lòt ngài bơh bơta koñ gơboh ò lồi Kơnràñ dê.

Dan jà bol he dô nùs bal tòm bơta hòi dan: Khoai Bèp koñ gơboh, ưn ngài Yàng bơh ala bơta lơngai Kơnràñ dê sùm gơrwàng gut dăr kòn. Tŭ kòn gơ hwài tòm ala bơta roh moat jrùng, dăn dong kòn sùm kah lah Kơnràñ găm koñ gơboh mờ bơtơl kòn in tơl bơta. Hơđăng rlau jơh, hơ̆ là phăn bàn dong klàs bơh Kòn Kơnràñ là Bơtau Dong Klàs Yàng Je-su Krist. Bulah kòn gơlơh bè srat bơtang hala moat jrùng gơ jrăñ, dăn dong kòn sùm git kơnờm dê bơta gơboh song ring Kơnràñ dê. Kòn jơnùs hòi dăn tòm sơnđăn Yàng Je-su Krist, A-men.

Ơ ồng mọ oh mi koñ gơboh, di gơlăn bol he găm gơ krăm tòm bơta jê sồt moat jrùng, bol he gơlơh sràt bơtăng bơh ala broă ò song ring gơ tơng tús tòm rài kís bol he dê. Mơya kah té lah, bulah he gơlơh bè lơi, bơta koñ gơboh Yàng dê ai bol he in ò tŭ lơi tòm gơl. Bulah gơ jrăñ dê Kơnràñ, kơlôi lah Kơnràñ sang lời he, gen Kơnràñ sùm wèt sền mờ jơm gòm kòp phuk kờp tŭ. Kơnràñ ò sền dờng màng bơta kís să tòm Kơnràñ bơh bol he- Gen Kơnràñ rơp lời hŭi bol he tòm tŭ bol he koñ Kơnràñ rlau jơh sơl ờ ơ?

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.