Bơtê Jơnau Yàng la dô pơnah ò rgơi siơ̆u cau Dòn Krist dê. Tai bơh hơ̆, Hiu Jum Goh sùm wet tus hơ bơta bơto mơ bơtê Jơnau Yàng. Mơ ya gơs tŭ lơi bol he sền gŏ he lơh roh tơnggu broă hơ̆ dê hala ò? Dilah Jơnau Yàng la jơnau kis mơ bềng gơnap gơnoăr, gen bol he pal lơh mbe lơi nàng ràng tơlik jơnau hơ̆? Tai bơh tơnggu jrô ndơp Ngai Krist Bơto Sôr ò dơh tòm bơta bơto ală cau gơs bềng bơta git jak bơh Sră Goh mơ ya kung bơto ală cau bơtê công nah, la ală cau gơs rai kis ndrơm be Bơtau Krist.

Ngai do, ngai 14/09/2025, ngai Rlô là Ngai Krist Bơto Sôr, Bơta Hòi Dan Kòp Ngai dan jà ală ồng mò oh mi bơtê bal Jơnau Yàng bơh tơnggumê BƠTÔ YAL JƠNAU YÀNG DÔ BĂ WIL TƠL.

“Añ kung neh geh lơh gơs cau gơnoar duh broă Hìu Jum Goh hơ̆ dê, jat be gơnoar broă mơ Yàng Tom Trồ neh ai añ in tài bơh oh mi, nàng yal tơlik wil tơl jơnau Yàng Tom Trồ dê,” (Côlôse 1:25)

Tòm tŭ găm dềt, kơnhai duh digơlăn la tŭ lơmpah añ kòñ rlau jơh. Ngai hơ̆ añ kơlôi: “ñchi bơh tai dô sơnăm bơtê rgơi jong behơ̆?. Kơnhai duh tus, añ chò hop tai bơh geh rlô ing bơta bơtê, mơya sơlơ hòn chò rlau tai bơh geh lòt bơtê Sră Goh Kơnhai Rlô tòm Hiu Jum Goh. Añ găm kah ală ngai cho hop hơ̆, tòm tŭ geh tus hiu jum, pơjum tòm ală ơdŭ geh bơka niam măt, sa ală phăn sa bơkah, hala ming la đơs chò mơ lơh tơmya mơ ală bơyô gợi.

Tŭ găm dềt, añ la dô nă cau kơnòm kòñ pha lin. Hiu Jum Goh ơs rơndap ală bơta rơndăp bơtê prăp sèng Sră Goh mơ nùs kơp Klơng Sră Goh Kơnhai Rlô haha Yàng Lik Ling. Kơp dơ̆ behơ̆, añ ơs pơnđơl pràn bơtê tơryang tơryông ngăn. Dô pơnah bơh añ kòñ geh phan bàn, pơnah ndai bơh añ kòñ mê bèp chò hờp bơh añ. Añ kung kòñ bơta gơlik gơs geh ntao diđap Hiu Jum Goh nàng dơp geh phăn bàn, hala ming kòñ geh kơno cau ndai đơs añ la dô nă cau kơnòm “jak chai mơ kòñ gơboh Yàng”, bulah bơta hơ̆ ming tòm toh đah bơdih lơm.

Mơya ưnngai Yàng bơh Kơnràñ neh nđàc sơngit di añ, ai añ in geh tìp mơ dòn dơp Kơnràñ tòm ală sơnăm kơnhai tơnơ̆ do, tòm tŭ añ rhơi rhơi dơng. Yàng pờ măt añ nàng añ wơng lah Sră Goh ò di ming nàng añ bơtê prăp mơ nùs lơm mơ ơn tòm bồ dơngoh, mơya hơ̆ la jơnau kis mơ bă tam, gơs gơnăp gơnoăr nàng tơmgơl rài kis añ.

Sơnăm kơnhai lòt găn, añ mut bơtê ò git nđờ Klơng Ngai Rlô, ală Klơng Sră Goh Kơnhai Rlô, klơng kơnhai rlô, mơ ală klơng bơtê Sră Goh ndai. Lồi dut, tòm 9 sơnăm lai, Yàng neh ngui dô ơdŭ bơtê Sră Goh nàng cop añ, dong añ gơjràñ săng glài mơ dòn dơp Kơnràñ. Añ git ưnngai Yàng bơh neh ngui ală tŭ lơmpah hơ̆ nàng cèng añ tus tiah wơng git Kơnràñ dô bă is. Mơ tŭ geh Yàng Yàng tus cop, añ dơp git lah jơh ală bơta he geh bơtê ò di là ò kwơ, mơya kung lăm tus dô tơnggu, hơ̆ la KRist Bơto Sôr.

Cau gơnoăr bơto dơng Pol, tòm gơnoăr broă ông di, neh ai bol he in git lah bơta têh dơng mơ bơtao tơngguh Hiu Jum Goh ò rgơi siơ̆u bar bơta dơng mang, hơ̆ la bơto yal mơ Krist Bơto Sôr. Bơto yal nàng ceng cau òhềt dòn tus mơ Bơtau Krist, ai Krist Bơto Sôr la nàng rong siam, bơt bơtao cau dòn gơlik têh dơng mơ wil tơl tòm Kơnràñ. Tòm sră pơyoa ală cau dòn tòm Côlôse, ông Pol đơs lah: “Añ kung neh geh lơh gơs cau gơnoar duh broă Hìu Jum Goh hơ̆ dê, jat be gơnoar broă mơ Yàng Tom Trồ neh ai añ in tài bơh oh mi, nàng yal tơlik wil tơl jơnau Yàng Tom Trồ dê,” (Côlôse 1:25)

Cau gơnoăr bơto dơng Pol ò ngui jơnau đơs lơbơn tòm tŭ đơs tus gơnoăr sôr bơto yal Jơnau Yàng Tòm Trồ mơ ồng neh dơp lềng. Ông ràng tơlik gơnoăr sôr hơ̆ la “yal tơlik wil tơl jơnau Yàng Tom Trồ dê,”. Jơnau “wil tơl” gơtha la lơh mbe lơi nàng Jơnau Yàng geh wơng dô bă bềng tơl, ò di ming la tơl ală bơta pal ai tơnggit, mơ kung “tơl” đah jrô, dong cau ndai wơng loh jơnau song mơ geh jơnau song ngăn tơmgơl.

Tòm dunnia bềng ală bơta pal iat mơ bơta jak chai, Cau Dòn Krist ntao diđap mơ dô nơm bơta gơlong, hơ̆ la: lơh mbe lơi nàng cah nền digùl “ngăn” mơ “blac”, digùl “jơnau song” mơ ală bơta “gơlơh be la jơnau song”. Tòm pah rai mơ Sră Goh hôi la “ală ngai lôi dùt”, mơnang bơta bơto sôr song ngăn gen kol sền òsơp, ai bơta tis gen geh jong rơ. Ntao diđap bơta hơ̆, bol he càng kơnòm nđàc Yàng nàng “yal Jơnau Yàng dô bă wil tơl”, gơtha la pal lơh cơng, bơto sôr, tòmpà bơh Jơnau Niam dô bă dipal, nang cau kơno gơs bơta dòn ngăn tòm Yàng Dong Klas. Be ồng Pol, bol he càng dơp git lah do la gơnoăr broă Yàng ơn hơđăng he, gen ò di lơh dô bă bară barai hala lòt găn, mơ pal lơh mơ bơta dòn song mơ nùs phi să wil tơl.

Mơ ya lơh mbe lơi nàng bơto yal dô bă wil tơl? Cau gơnoăr bơto dơng Pol đơs ông ming bơto bơh Yàng Dong Klas Jêsus. Kơnràñ la cau ming dùl nàng ông bơto yal, mơ tơnggu la nàng ală cau gơlik gơs “wil tơl” tòm Kơnràñ: “Bol he bơto yal bơh Kơnràñ mơ ai jơh ală bơta jak chài bơto tơngkah kòp nă cau, bơto sồr kòp nă cau nàng tơlik mat bol khai dô bă wil tơl tòm Bơtau Krist.” (Côlôse 1:28).

Ngai do, bol he gơs ngăn bơto yal bơta bơto bơh Yàng dong Klas hala ò, hala Kơnràñ ming gơs mat tòm pơnah dềt tòm bơta bơto bol he dê? Dunnia ngai do gơs oă pơnah “jơnau niam” geh gơtơmklai bal mơ bơta jak chai is, bơta cang nùs nhơm dê, hala bơta công nha rai do dê. Bulah kơno niam ngăn, mơ ya ală “jơnau niam” do ò cèng tus bơta dong klas cau dòn in bơh ò ơn Bơtau Krist la pơnah dơng bơta bơto yal dê, ò đơs tus bơh bơta sang goh Yàng Tòm Trồ dê, ò đơs tus tồi glài mơ bơta gơjrañ săng glài, ò lăm cau kơno tus hơ bơta tơmgơl rài kis, mơ ming lơh bah bơta jak chai mơ nùs kòñ. Dô Jơnau Niam mơ ò gơs chi pơng, ò gơs gơnăp gơnoăr tơmgơl, gen ò di là Jơnau Niam tai.

Tòm bơta gơlik gơs dunnia ngai do dê, dơng mang ngăn ò git nđờ dilah bol he kung rgơi lơh be ông Pol, hơ̆ la “ngui jơh ală bơta jak chai” nang “kơryăn” mơ “bơto” ală cau, gơtha la nàng lơh cau ndai in kah rngal bơh tồi glài mơ pal cang gơjrañ săng glài, mơya kung rcăng Jơnau Yàng bol khai in. Gơnoăr sôr Hiu Jum Goh in ò bơdơh tòm broă cèng cau ndai tus mơ Yàng, mơ kung nang bol khai rgơi “tơlik măt dô bă wil tơl tòm Bơtau Krist” be ông Pol neh đơs pràn. Tŭ hơ̆ cau hơ̆ geh “wil tơl” tòm bơta dòn: git Yàng, kòñ Kơnràñ mơ kis Kơnràñ in.

Nàng rgơi bơto yal bơh Yàng Dong Klas dô bă wil tơl, cau gơnoăr bơto dơng Pol neh kong oă bơta bol glar. Ông cih: “Kung bơh bơta hơ̆ mơ añ kong bòl glar lơh broă, tòmlơh jơh nùs kơnòm di pràn Kơnràñ dê mơ Kơnràñ lơh broă tòm añ dô bă gơs gơnap gơnoar.” (Côlôse 1:29). Ngai do, rlau jơh, bol he hoi dă mơ ơn pơnah tòm broă Bơto sôr in, bơh bol he găm tơmlơh mơ “ală gơnoar at bồ, mơ ală gơnoar, mơ ală bơtau at bồ rài klam jơngo do, mơ mpồl cà jàñ bơsak ơm tòm pah gòi.” (Ephêsô 6:12). Krist Bơto Sôr găm ntao mơ bơta tơm dră bơh carak, mơya kung găm ntao diđap oă bơta kalkê bơh dơlăm: siơ̆u cau, siơ̆u nùs nhơm, hala siơ̆u bơta wet tus bơh mpôl bơta dòn. Bulah behơ̆, Pol neh đơs pran dô bơta dơng mang la: ông ò lơh broă mơ tơmlơh mơ pràn is, mơya mơ gơnoăr pràn Yàng Tòm Trô lơh broă pràn kơldăng tòm ông. Bulah kalkê ò hềt tŭ lơi bơdơh, kơya bol he cang sơmbat prăp jơnau hơ, hơ̆ la: tŭ Yàng jao gơnoăr broă, gen Kơnràñ kung ai bơntơl nđàc mơ bơntơl pràn bol he in.

Tòm tŭ sền wơl cơnđòa lòt bơta dòn he dê, añ git ưnngai Yàng bơh neh bgui broă lơh Krist Bơto Sôr, găn dê ală ơdŭ bơtê Klơng Ngai Rlô, ală tŭ pơjum bơtao tơngguh đah hwềng, klơng kơnhai rlô, hala ală ơdŭ bơtê Sră Goh băliă, nàng lơh he in têh dơng rlau tòm bơta dòn. Añ kung dơp git lah ò di ming ală cau neh duh broă Yàng tòm gơnoăr broă Krist Bơto Sôr lơm cèng nùs kơlôi be ông Pol, mơya kơp bol he kung geh hoi sac nàng bơtê Jơnau Yàng mơ gơs pơnah tòm bơta lơh cơng, tòm pà, chôl bơtrôt, bơto sôr cau ndai, nang să tòm he in mơ cau ndai geh tơlik măt wil tơl tòm Bơtau Krist.

Dan jà bol he dô nùs bal tòm bơta hòi dan: Khoai Bèp koñ gơboh! Kòn ưnngai Yàng bơh kơnòm Jơnau Kơnràñ mơ kòn geh lik klas rai kis yau mơ mut tòm bơta àng Kơnràñ dê. Dan ai kòn in don song bơtê Jơnau Kơnràñ, mơ ai kon in nđàc Kơnràñ nàng kon bơto yal bơh Yàng Dong Klas dô bă dòn song mơ gơnăp gơnoăr, kung be git bơto tơngkah, tề lăm cau ndai tus tiah dơp git Kơnràñ. Kòn jơh nùs hôi dan ai sơnđăn Yàng Jêsus Krist, Amen.

Ơ ală ồng mò oh mi kòñ gơboh, ngai Krist Bơto Sôr là tŭ lơmpah bol he lăng wơl gơnoăr sôr bơtao yal jơnau song mơ Yàng Tòm Trồ neh jao Hiu Jum Goh mơ kơp nă is bol he. Bulah la ală cau găm duh broă tom pơnah Krist Bơto Sôr, hala ming la cau dòn bơtê Sră Goh gợi, bol he kung cang dơp git gơnoăr sôr bơtê git mơ prăp gar Jơnau Song Yàng Tòm Trồ dê, mơ lơh nền ò lơi jơnau song kol tis. Behơ̆, hoi dăn tĕ mơ ơn pơnah tòm broă Krist Bơto Sôr dê tòm Hiu Jum Goh oh mi dê. Kung dòn song tĕ bơtê Jơnau Yàng tòm ală ơdŭ bơtê Sră Goh mơ dăn Yàng ngui jơnau hơ̆ bơt mon rai kis oh mi, nàng oh mi geh rcăng sir mơ lơh ală broă niam.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.