Pơhrăm Nơ̆r Kră Yang jơ̆ mĭnh lăm tơdrong kăl kơ đei lăm Bơngai Lui. Yua kơ thoi noh, Khŭl Bơngai Lui ling lang kơ nhăm lăm tơdrong bơtho păng hŏk pơhrăm Nơ̆r Kră Yang. Mă lei đei layơ lu bơ̆n ‘bôh kơdih tơhiong tơdrong kơnhăm đơ̆ng tơdrong jang ‘noh ưh? Tơdah Nơ̆r Kră Yang jơ̆ nơ̆r arih păng ‘bĕnh tơdrong mơsêh mơyang, lei lu bơ̆n kăl kơ pơm thoi yơ wă kơ bơtho Nơ̆r ‘noh? Yua kơ tơdrong kơnhăm kơjung đơ̆ng Bơtho Bơngai Lui ưh kơ dơ̆ng ‘bơ̆t tơdrong bơtho pơhrăm dôm lu bơngai đei ‘bĕnh tơdrong gơh hơgei gah Nơ̆r ‘Bok Kei-Dei, mă lei kŭm đei bơtho pơjuăt dôm lu bơngai pơhrăm đei yua, jơ̆ dôm lu bơngai đei tơdrong arih lĕi lăi thoi ‘Bok Krist.

Năr ‘nâu, ‘năr 14/09/2025, năr Tơpơh Pơhrăm Tơdrong Lui Kơ Krist, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang kơ̆l ‘bai BƠTHO TƠBĂT NƠ̆R KRĂ YANG TÔM MAH.

“ ‘Bok Kei-Dei wă kơ inh jang tơgŭm lu bơngai khŭl nai lui kơ Sư wă khan lu iĕm âu boih; păng Sư wă kơ inh bơtho tơbăt kơ đe tơdrong Sư jơ̆p-jang kơ anih.” (Kôlôssê 1:25)

Kơplah oei hơ’lơ̆p, bơyan phang rŏ lăng jơ̆ khei jơnăr inh hơiă hloh. Năr ‘nâu inh tơchĕng: “Yua kơ liơ mĭnh sơnăm hŏk gơh đei kơjung thoi noh?”. Bơyan phang truh, inh chơt hiôk yua kơ inh gơh pơdơh tơdrong hŏk, mă lei rai chơt hloh yua kơ gơh năm pơhrăm hŏk Nơ̆r ‘Bok Kei-Dei bơyan phang tơ khŭl bơngai lui. Inh oei ‘blŏk nhen dêh dôm lu năr ‘lơ̆ng hơiă ‘noh, kơplah gơh năm tơ hnam akŭm, hŏk pơhrăm lăm dôm anih phŏng đei pơgong lăng ‘lơ̆ng, sŏng sa ‘băt ‘ngam, dah lăp hmă đĕch jơ̆ đei hơri suang hơdai buăl kơdih.

Kơplah oei hơ’lơ̆p, inh jơ̆ mĭnh ‘nu bơngai ‘lơ̆p đei jơhngơ̆m pơ-ang. Khŭl Lui nhôn ngăl đei pơjing dôm tơdrong tơdă đŏk thuơk Nơ̆r ‘Bok Kei-Dei lăm rim kơplah Hŏk Pơhrăm Nơ̆r ‘Bok Kei-Dei bơyan phang dah Nô-el. Rim wơ̆t thoi noh, inh ngăl adrin pơhrăm pơnam tơpă. Mĭnh pah yua kơ inh ‘maih wă kơ mĕ ‘bă lăp đon kơ inh. Inh kŭm hơiă lăm jơhngơ̆m đei dơ̆ng ‘bơ̆t anăp Khŭl Bơngai Lui wă iŏk tơmam apah, dah hmă đĕch jơ̆ ‘maih gơh mơ̆ng bơngai nai pơma khan inh jơ̆ mĭnh ‘nu bơngai hơ’lơ̆p “ gơh hơgei păng ‘mêm kơ Kră Yang”, mă khan tơdrong ‘noh phŏ lăp trŏ gah ‘nguaih đĕch.

Mă lei bơnê kơ Kră Yang yua kơ Ih đei mơnat ăn kơ inh, ăn kơ inh gơh tơ’bơ̆p păng lui sơng iŏk Ih lăm dôm khei sơnăm ning mônh, kơplah inh rai ‘net wơ̆ ‘lŏ. Kră Yang pơih măt inh ăn kơ inh hlôh khan Nơ̆r ‘Bok Kei-Dei ưh kơ sĭ wă kơ inh đŏk thuơk păng ‘blŏk răk lăm đon tơchĕng, mă lei ‘noh jơ̆ nơ̆r arih păng gô jing đei tơpă, đei tơdrong mơsêh wă tơplih tơdrong arih inh.

Khei sơnăm đei hlôi, inh đei hŏk lơ lăm Pơhrăm Trưng Năr Tơpơh, lu tơdrong tơdă Nơ̆r ‘Bok Kei-Dei bơyan phang, kăm trăi, păng lu tơdrong hŏk pơhrăm Nơ̆r ‘Bok Kei-Dei nai. Tuch luch, lăm sĭn sơnăm adrol, Kră Yang đei yua mĭnh lăm hŏk Nơ̆r ‘Bok Kei-Dei wă năm ngôi tơ inh, tơgŭm inh tơbral păng lui sơng iŏk Sư. Inh băt bơnê kơ Kră Yang yua kơ đei yua dôm kơ jơ ‘noh wă ba inh truh tơ anih hlôh băt kơ Sư kơdih kâu. Păng dah đei Kră Yang oei hơdai, inh băt kơnăl kơ đĭ đăng dôm tơdrong kơdih đei pơhrăm hŏk gô đei yua, mă lei đei lăng truh tơ mĭnh tơdrong kơnhăm, ‘noh jơ̆ Pơhrăm Tơdrong Lui Kơ Krist.

‘Bok Pôl, lăm tơdrong bơ̆jang sư, đei ăn kơ lu bơ̆n ‘bôh khan tơdrong wơ̆ ‘lŏ păng Khŭl Lui wơ̆ pran kăl kơ đei ‘bar tơdrong gĭt kăl, ‘noh jơ̆ chă năm bơtho păng Pơhrăm Tơdrong Lui Kơ Krist. Chă năm bơtho nơ̆r ‘Bok Kei-Dei wă ba bơngai tim mă lui năm tơ ‘Bok Krist, na Pơhrăm Tơdrong Lui Kơ Krist jơ̆ wă wei rong, pơjing tơiung bơngai lui jing wơ̆ pran păng tôm mah lăm Sư. Lăm kơthơ gơih kơ bơngai lui tơ Kôlôsê, ‘bok Pôl pơma khan: “’Bok Kei-Dei wă kơ inh jang tơgŭm lu bơngai khŭl nai lui kơ Sư wă khan lu iĕm âu boih; păng Sư wă kơ inh bơtho tơbăt kơ đe tơdrong Sư jơ̆p-jang kơ anih.” (Kôlôsê 1:25)

‘Bok Pôl ưh kơ yua nơ̆r pơma pơ’lơ̆ng kơplah pơma gah nơ̆r tơtă bơtho Nơ̆r ‘Bok Kei-Dei mă sư gơh đei sơng iŏk. Sư roi tơ’bôh nơ̆r tơtă ‘noh jơ̆ “bơtho tơbăt nơ̆r Sư kiơ̆ hăm tơdrong tôm mah”. Nơ̆r “tôm mah” đei tơdrong tơm ‘noh pơm thoi yơ wă kơ Nơ̆r Kră Yang gơh hlôh băt tôm mah hloh, ưh kơ sĭ lăp tơdong tơbăt tôm, mă kŭm “tôm” gah lăm jrŭ, tơgŭm bơngai nai hlôh hơđăl tơdrong tơpă păng gơh đei tơdrong tơplih tơpă.

Lăm teh đak ‘bĕnh ‘bang kơ tơdrong tơbăt păng tơdrong hlôh băt, Bơngai Lui tơ’bơ̆p hăm mĭnh tơdrong pơlong lăng, ‘noh jơ̆: pơm thoi yơ gơh băt hăm “tơpă” păng “ưh kơ tơpă”, hăm “tơpăt” păng dôm tơdrong “wă lơlăi kơ tơpăt”. Lăm jơhnơr mă Sơ̆p Hla Bơar ‘Bok Kei-Dei gơh ‘noh “dôm năr tuch luch”, tơdrong bơtho trŏ tă kơ lăng ưh kơ gĭt, na tơdrong ưh kơ trŏ đei pôk tơiung. Dơ̆ng ‘bơ̆t anăp tơdrong ‘noh, lu bơ̆n kăl kơ yua tơdrong mơnat ăn đơ̆ng Kră Yang “bơtho tơpăt Nơ̆r Kră Yang kiơ̆ hăm tơdrong tôm mah”, wă khan kăl kơ pơm kơdranh, bơtho, ră roi gah Tơdrong ‘Nao ‘Lơ̆ng mă trŏ, wă kơ bơngai mơ̆ng đei đon lui tơpă anăp Kră Yang Dŏng Pơklaih. Lĕi lăi thoi ‘bok Pôl, lu bơ̆n kăl kơ băt kơdih ‘nâu jơ̆ tơdrong jang Kră Yang pơjao ăn kơ bơ̆n, na ưh kơ gơh bơ̆jang ưh kơ bơngơ̆t dah iŏk kơ đang, na thei jang hăm tơdrong tơnăp păng pơyơ̆r đĭ jơhngơ̆m.

Mă lei pơm thoi yơ wă bơtho tơbăt đĭ tôm? ‘bok Pôl pơma sư lăp bơtho gah Kră Yang Dŏng Pơklaih Yêsu. Mĭnh Kră Yang đĕch jơ̆ bơngai mă sư bơtho tơbăt, hăm tơdrong kơnhăm jơ̆ wă kơ đĭ đăng bơngai jing “‘lơ̆ng tơpăt” lăm Sư: “Tơdrong ‘Bok noh boih nhôn bơtho dang ei, ‘Bok noh boih mă nhôn gơnang kơ ‘Bok Kei-Dei, wă kơ ‘Bok Kei-Dei ăn kơ nhôn hơgei tôm tơdrong Sư na gơh năm bơtho khan kơ jơ̆p-jang bơngai. Yua kơ tơdrong ‘Bok noh boih na nhôn pơjao kon bơngai kơ ‘Bok Kei-Dei wă kơ kon bơngai wih đĭ tơ ‘Bok Kei-Dei jing bơngai ‘lơ̆ng tơpăt hăm Sư boih, pôm đon hăm Yêsu Krist.” (Kôlôse 1:28)

Dang ei, bơ̆n hăm tơpă bơtho tơbăt nơ̆r Kră Yang gah mĭnh Kră Yang ‘Bok Dŏng Pơklaih ưh? dah Sư lăp tơ’bôh thoi kơ mĭnh tơdrong ưh kơ tơm lăm nơ̆r bơtho đơ̆ng lu bơ̆n? Teh đak dang ei đei ‘bôh đei lơ khŭl “tơdrong lui” đei lŭk lăk hăm tơdrong bơtho kiơ̆ kơdih, thoi kơ mơn lăm jơhngơ̆m, dah tơdrong kĕjei lăm chăl ‘nâu. mă khan mơ̆ng hơ iă dêh, mă lei dôm “tơdrong lui” ‘nâu ưh kơ ba truh tơdrong dŏng pơklaih kơ bơngai lui yua kơ ưh kơ dan ‘Bok Krist pơm tơm kơ tơdrong bơtho tơbăt, ưh kơ pơma gah tơdrong ‘lơ̆ng rơgoh đơ̆ng ‘Bok Kei-Dei, ưh kơ pơma ‘bơn truh tơdrong yoch păng tơdrong tơbral, ưh kơ chông bơngai mơ̆ng truh tơdrong tơplih tơdrong arih, mă lăp pơm pơhiôk tơdrong gơh hơgei păng mơn lăm jơhngơ̆m. Mĭnh Tơdrong Lui mă ưh kơ đei ‘long pơglang, ưh kơ đei tơdong mơsêh mơyang tơplih, lei ưh kơ trŏ jơ̆ Tơdrong Lui ‘lơ̆ng bơih.

Lăm jơhnơr đơ̆ng teh đak dang ei, tơpă gĭt kăl dêh tơdah lu bơ̆n kŭm gơh pơm tơ’bôh thoi kơ ‘bok Pôl, ‘noh jơ̆ “yua đĭ đăng tơdrong gơh hơgei” wă “pơma tơbăt” păng “bơtho” đĭ đăng bơngai, wă khan tơbăt bơngai nai gah tơdrong yoch păng kăl kơ tơbral, mă lei kŭm hơmet Nơ̆r Kră Yang ăn kơ lu sư. Nơ̆r tơtă kơ Khŭl Bơngai Lui ưh kơ dơ̆ng ‘bơ̆t tơdrong ba bơngai nai năm tơ Kră Yang, mă kŭm wă kơ lu sư gơh “tơ’bôh ‘lơ̆ng tôm tơdrong lăm ‘Bok Krist” thoi ‘bok Pôl đei kơnhăm. Kơplah noh bơngai ‘noh gơh “ ‘lơ̆ng tôm” lăm đon lui: băt kơ Kră Yang, ‘mêm kơ Sư păng arih kơ Sư.

Wă kơ gơh bơtho tơbăt gah Kră Yang Dŏng Pơklaih tôm mah, ‘bok Pôl đei pŭ iŏk lơ tơdrong pơmat tat. Sư chih: “Inh gơnang kơ Yêsu Krist, na mă inh đei tơdrong anat anot dang ei, Sư ăn kơ inh jơhngơ̆m pran oei adrin jang tôch bơneh tơdrong Sư khŏm khŏm.” (Kôlôsê 1:29). Dang ei, hloh kơ đĭ đăng, lu bơ̆n kăl kơ krao khan păng pơjing kơ tơdrong bơ̆jang Pơhrăm Tơdrong Lui Kơ Krist, yua kơ lu bơ̆n oei tơblah hăm “Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu.” (Êphêsô 6:12). Pơhrăm Tơdrong Lui Kơ Krist đei tơ’bơ̆p hăm tơdrong blah pơrăm đơ̆ng yang kơnê̆, mă lei kŭm đei tơ’bơ̆p hăm lơ tơdrong pơmat tat đơ̆ng gah lăm: ưh kơ đei bơngai, ưh kơ đei jơhngơ̆m, dah ưh kơ đei hloi tơdrong hiơ̆k bơngơ̆t đơ̆ng khŭl tơpôl bơngai đei đon lui. Mă lei, ‘bok Pôl đei kơnhăm mĭnh tơdrong gĭt kăl ‘noh: sư ưh kơ bơ̆jang păng tơblah hăm jơhngơ̆m pran kơdih, mă hăm jơhngơ̆m pran đơ̆ng ‘Bok Kei-Dei bơ̆jang pran kơtang lăm sư. Mă khan pơmat tat ưh kơ đei pơdơh, mă lei lu bơ̆n kăl kơ chĕp kơjăp nơ̆r pơkă, ‘noh jơ̆: dah Kră Yang đei pơjao ăn tơdrong jang, lei Sư kŭm pơthim ăn tơdrong pŭn păng pơthi jơhngơ̆m ăn kơ lu bơ̆n.

Dah lăng đêl trong yak năm đon lui đơ̆ng kơdih, inh băt bơnê kơ Kră Yang yua kơ đei yua tơdrong jang Pơhrăm Tơdrong Lui Kơ Krist, đơ̆ng lăm pơhrăm Trưng Năr Tơpơh, hơkŭm tơiung tơdrong lui, kăm trăi, dah phŏ kŭm jơ̆ dôm jơ pơhrăm Nơ̆r ‘Bok Kei Dei hăm đĕch, wă pơm kơ inh wơ̆ pran hloh lăm đon lui. Inh kŭm băt kơnăl khan ưh kơ sĭ lăp dôm lu bơngai bơ̆jang kơ Kră Yang lăm tơdrong jang Pơhrăm Tơdrong Lui Kơ Krist đĕch đei chĕp jơhngơ̆m thoi ‘bok Pôl, mă lei rim ‘nu lu bơ̆n đei gơh krao wă kơ đei jơhngơ̆m hŏk pơhrăm Nơ̆r Kră Yang tơpă, păng hơdai lăm tơdrong jang pơm kơdranh, ră roi, pơlung, tơgŭm bơngai nai, wă kơdih kâu păng bơngai nai gơh tơ’bôh ‘lơ̆ng tôm lăm ‘Bok Krist.

Apĭnh đĭ đăng krao khan hơdai: Kơkuh kơ ‘Bă mă ‘mêm! kon bơnê kơ Kră Yang yua kơ nơ̆r Ih na kon gơh lĕch hlôi đơ̆ng tơdrong arih so păng yak lăm hơdah đơ̆ng Ih. Apĭnh ăn kơ kon tơnăp pơhrăm Nơ̆r Ih, păng ăn kơ kon tơdrong pŭn Ih wă kơkon bơtho tơbăt gah ‘Bok Dŏng Pơklaih hơđăl tơpă păng mơsêh mơyang, kŭm thoi tơbăt kơ bơtho tơ’bôh, chông anhăk bơngai nai năm tơ anih sơng iŏk Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, năr Pơhrăm Tơdrong Lui Kơ Krist jơ̆ jơ kơplah lu bơ̆n lơ̆ng đơ̆ng nơ̆r tơtă bơtho tơbăt tơpăt mă ‘Bok kei-Dei đei pơjao kơ Khŭl Lui păng rim ‘nu lu bơ̆n. Mă khan jơ̆ dôm bơngai oei bơwih bơwăn lăm tơdrong jang Pơhrăm Tơdrong Lui Kơ Krist, dah lăp jơ̆ bơngai pơhrăm Nơ̆r ‘Bok Kei-Dei hmă đĕch, lu bơ̆n kŭm kăl kơ băt kơnăl nơ̆r tơtă pơhrăm apĭnh păng bơwei Nơ̆r Tơpă đơ̆ng ‘Bok Kei-Dei, păng pơdrơ̆ng ưh kơ ăn tơdrong tơpăt đei ưh kơ trŏ. Yua kơ thoi noh, athei krao khan păng tơiung pơjing kơ tơdrong jang Pơhrăm Tơdrong Lui Kơ Krist tơ Khŭl Bơngai Lui lăm pơlei buăl. Kŭm athei tơnăp pơhrăm Nơ̆r Kră Yang lăm lu anih hŏk pơhrăm Nơ̆r ‘Bok Kei-Dei păng apĭnh Kră Yang yua nơ̆r ‘noh ‘bơ̆ hơmet tơdrong arih buăl, wă kơ buăl đei hơmet păng bơ̆jang dôm tơdrong jang ‘lơ̆ng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.