Yog ib tug ntseeg Vajtswv, peb tab tom txhais ruam hauv ib ntsus kev tsov rog qhov muag ntsia tsis pom. Txawm yog tsis muaj riam phom, hluav taws, los peb tus ntsujplig paub zoo: yog ib ntsus kev tsov rog phomsij heev tab tom tshwm tuaj, qhov chaw uas qhov tsaus ntuj thiab qhov kaj tab tom sib tawm tsam. Txawm yog tamsim no los kuj yog lub sijhawm Vajtswv nqua hu kom Vajtswv haiv neeg yuav tau ceev faj nyob kom yog yus qhov chaw- siv cov lus thov Vajtswv muaj zog, puv npo hwjchim los tawm tsam nrog tej hwjchim sab ntsujplig. Tsis paub koj puas hnov lub suab raj txhij tub rog ntawd tab tom nrov ntawm pob ntseg?

Hnub no, yog hnub 18/09/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jonathan Santiago dhau ntawm Zaj kawm KEV TSOV ROG NTAWM SAB NTSUJPLIG.

“Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim kav tiam tsaus ntuj” (Efexaus 6:12).

Ob peb thiv los no, kuv thiab ib txhia kwv tij pib los nyob ua ke rau thaum sawv ntxov thov Vajtswv rau lub tebchaws tej teeb meem. Tus twg los puav leej pom txog qhov kev phomsij ntawm lub sijhawm no. Zoo li cov tub rog zov qhov rooj saum ntsa yeej, txhua tus nyias yuav tau nyob ntawm nyias qhov chaw tau Vajtswv cob – ceev faj, zoo siab hlo mloog cov pov thawj hlob lub suab txib.

Muaj tus ces tau cai mus tom ntej, muaj tus ces nyob tos; muaj tus tau tshoov kom yuav tau ceev faj, tshuav lwm tus ces tau coj mus rau hauv qhov chaw so – tag nrho puav leej tshwmsim los raws li lub sijhawm uas Vaj Ntsujplig coj kev. Vim tsuas yog Vajtswv xwb thiaj paub zoo tej uas tab tom tshwmsim nyob rau hauv lub neej ib txhis, thiab cov neeg uas muaj lub siab xav mloog lawv yuav paub Vajtswv txoj kev, thov Vajtswv kom muaj nqis nyob hauv ntsus kev tsov rog ntawm sab ntsujplig.

Kev tsov rog ntawm sab ntsujplig puag thaum ub los yeej tseem tsis tau tas. Muaj ntau tiam twb tawm tsam, lub hwjchim ntawm qhov kaj thiab qhov tsaus yeej tseem sib tawm tsam tsis tau so. Yog tsuas saib ntawm lub qhov muag sab nqaij tawv, peb yuav xav tias ntsus kev tsov rog no puav leej yog nyob hauv ntiajteb no. Tiamsis tsis yog li ntawd. Peb tus thawj coj ib txwm ntuas nws pab tub rog tias:
“Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj , tej uas muaj hwjchim loj thiab tej uas muaj hwjchim kav tiam tsaus ntuj” (Efexaus 6:12).

Ib zaug ntxiv, Vajtswv ntuas kom peb saib txhua yam los ntawm lub qhov muag sab ntsujplig: ntawm no tsis yog txoj kev tawm tsam tib neeg. Nws yog ntsus kev tsov rog tab tom tshwmsim saum ntuj – nyob deb tib neeg txoj kev tswj tau lawm. Thiab thaum koj lub qhov muag sab ntsujplig qhib, koj yuav pom tseeb tias qhov twg thiaj yog kev tsov rog tiag.

Vajtswv nthuav qhia rau peb paub tias peb tus yeebncuab yog leej twg tiag. Thiab raws li Vajtswv tejlus tau samhwm: “Tus uas tau ntau, tus ntawd yuav tsum pauj ntau. Tus uas tau ntau dua, tus ntawd yuav tsum pauj ntau dua.” (Lukas 12:48). Yog li, thaum peb muab qhov tseeb los ua siv sia tawm mus tom tshav rog, peb muaj qhov yeej uas Vajtswv twb npaj rau Vajtswv haiv neeg lawm.

“Elisas teb hais tias, “Tsis txhob ntshai. Peb tog muaj coob dua lawv tog.” Elisas thov Vajtswv hais tias, “Tus Tswv thov koj qhib nws lub qhov muag kom nws porn!” Tus Tswv teb Elisas tej lus thov, ces Elisas tus tubtxib thiaj porn tej nees huab cua thiab tsheb nees nplaim taws nyob puv toj roob hauv pes ibncig Elisas” (2 Vajntxwv 6:15-17).

Thaum peb tawm tsam hauv txoj kev thov Vajtswv, yuav tau paub qhov tseeb tias: Yexus Khetos pab tub rog yeej ib txwm twb kov yeej ntsus rog no lawm. Yam peb yuav ua thaum no yog sawv khov kho nyob hauv ntsus kev tsov rog ntawd, tuav kom ruaj Vajtswv tej lus cog tseg txog kev kov yeej, thiab muaj zog tawm mus tshaj tawm Txojmoo Zoo: “VAJTSWV LUB TEBCHAWS LOS, VAJTSWV LUB SIAB NYIAM TAU UA, HAUV NTIAJTEB IB YAM LI NYOB SAUM NTUJ CEEBTSHEEJ!”

Thov caw nrog kuv peb thov Vajtswv ua ke: Tus Tswv, nyob hauv ntsus kev tsov rog phom sij no, thov pab kom kuv ceev faj nrhiav Vajtswv lub siab nyiam, thiab nyob kom yog qhov chaw uas koj tab tom hu kuv. Thov pub kom kuv muaj lub siab paub mloog raws li Vaj Ntsujplig ua tus coj kev. Thov kom kuv tuav lub siab ntseeg kom ruaj tsis yoj yees, kom peb yuav sawv khov kho thiaj kov yeej uas koj tau pub rau kuv puag thaum ub los. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv twb npaj rau peb muaj txaus Vaj Ntsujplig tej cuab yeej. Nws qhia rau peb paub tias peb tus yeebncuab yog leej twg. Ntsus kev tsov rog yeej tseem tab tom tshwmsim tuaj. Nyias yuav tau nyob kom yog nyias qhov chaw. Thiab nco ntsoov yam uas tseem ceeb tshaj: Vajtswv twb pub rau peb muaj yeej lawm! thaum no, peb tsuas sawv khov kho rau ntawm cov lus cog tseg ntawd xwb, mloog raws li Vaj Ntsujplig ua tus coj kev, thiab txav kiag mus rau hauv ntsus kev tsov rog kom muaj yeej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.