Bŏl he neh gơs kơlôi lah he păl “kơrmap gar să” tồ geh oă cau ki ngàm, koñ gơboh sơl? Tŭ lơi kŭng sền he gơlơh ò gơs broă lơi gơlik gơs, he pràn kơldăng, wil tơl…bulah tòm dơlăm la oă bơta gơtòmcrè, lơbơn pràn gen he găm pơnđơl pồn prap? Gơs tŭ, ò di la bơh ală bơta ò wil tơl, gen bơh nùs jòng să mơ poăc să gen la bơta lơh bŏl he ĭn tơnrọh bơta gơklŏ ngăn tom Lơgar Trồ.

Ngai do, ngai 16/09/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Ken Barnes dê bơh Tơnggume GEH KI NGÀM BƠH NÙS PƠNDỀT SĂ.

“Bơta duh rngòt Yàng Jehôwa bơto sồr bơta jak chài; Mơ bơta pơndêt să lòt lài mơ bơta ki ngàm.” (Jơnau Pơnđik 15:33)

Ăñ neh găm dùh broă tom dô mpồl bơtọ yăl jơnau niam gơs sơnđăn la Youth With A Mission – Cau Kơnòm Să bơh Gơnoăr sôr, òs họi liah wơl la YWAM. Tŭ hơ̆, broă lơh ăñ ji lah họi jà mơ rơndăp ală tŭ nàng tòm tip măt mpồl bơtọ yăl tòm 35 bòn dờng gan mat tơngai lik lơgar Mĩ. Ơm tòm kòp bă tiah, ăñ gơs tŭ lơmpah geh lơh broă băl mơ ală ọh mi niăm ngăn. Mơya, ală cau bơtọ yăl kŭng mìng la ală cau òs mòng sơl, geh Yang ai pà bơta nđàc dùh broă Kơnrẵn ĭn lơm. Mơya kŭng gơs tŭ, ăñ gơlơh be cau ndai sền bŏl he bơh gar măt ki ngàm…ir rlau bơta òs mòng.

Tòm dô ngai lồi pọh ne, gơs ur klau tus còp YWAM la tiah ăñ kis. Bŏl khai găm dŏng kòl ăñ tòm ală broă. Bŏl khai gơboh gơbài gơnoăr sôr mơ sền dờng màng ală gơnoăr broă bŏl he găm lơh. Mơya tòm tŭ hơ̆, ăñ gơlơh krơi ngăn bơh git ñchi bơh tai bŏl khai koñ gơboh bŏl he ngăn behơ̆.

Àng drim ngai rlô hơ̆, bar nă ur klau bŏl khai tus còp hìu bŏl he sào drim, gen rơp lòt tiah pơjum băl. Ăñ kư̆ ntoat kiau ma digul pah tiah bic mơ tiah sào, wă rò nác ndăng, rcang kon dềt ndăng. Ală bơta lơh ăñ ĭn giga. Òs mòng kon niăm ngăn, mơya àng drim ngai hơ̆kư̆ kơldăng bồ, ò koñ iat jơnau ăñ. Lồi dut, ăñ ò jai kŏng mơ lah pơrhơng kon dô bă siơ̆u bơta koñ gơboh. tơnơ̆ mơ tŭ jơnau lik bơh di bơr, ăñ git he neh tía. Ăñ mhăr dăn să kon, kung be ală cau kơnòm ndai, kon kŭng mhăr tọh glài ăñ ĭn sơl.

Mơya broă gơlik gơs digah ơdŭ tiah nac găm nggùi. Ăñ sơntom kơlôi sơnơng : “ò git bŏl khai iat kơno sơl ơ?” gen bơta basil baso gơtơntus mo. Ăñ kơlôi òm lah: “ò git bŏl khai kơlôi bơh ăñ mbe taih?”

Jơh dô àng drim ngai hơ̆, ăñ gơlơh be dô nă cau kơnòm git he lơh tìs, gen ò khin sền sŏng diđap măt me bap. Gơwèt mơ ăñ, tòm tŭ hơ̆ gơlơh ăñ ĭn basil ngăn.
tơnơ̆ mơ tŭ sa drim , ăñ git he ò tŭ lơi pồn măt bŏl khai jơh ngai. Gen tus digul ngai, bŏl he lọt sa băl. Lài mơ tŭ họi dăn sa ngai , ăñ lơh nin yăl tơlik jơh. Bulah bŏl khai iat kơno jơnau đơs àng drim do hala ò, ăñ găm koñ đơs sŏng – tồ bŏl khai gŏ bơta lơbơn ăñ ji, mơ kơnòm họi dăn ala ăñ ĭn git bơta măt tòm tọh mơ măt broă njơ̆ njŭt gơlik tus niăm rlau.

Ăñ yăl tơnggit broă. Bau klau chò hòp gen đơs: “Tài bơh behơ̆ gen bŏl he sền màng ryŭ YWAM – ală ọh mi òs ràng tơlik nùs he dô bă sŏng ngăn mơ pò mpồng nùs he.!”

Ăñ nisơna nrat. Jŏ ngai ăñ neh dòn dô jơnau đơs blac lah: dilah cau ndai git cau ngăn he di, bŏl khai rơp ò găm koñ gơboh mơ ki ngàm ăñ tai. Ñchi bơh tai ăñ kòl pơrlồm behơ̆ taih? Hơ̆ la bơh nùs pơnhừh să. Ăñ lòi ir broă cau ndai kơlôi bơh he. Mơya tŭ ală bơta lơbơn lơño ăñ ji geh ràng tơlik, ăñ ò kòl basil baso tai, mơya sơlơ̆ wơl găm geh cau ki ngàm rlau tai!

Tài bơh lơgar Yang Tom Trồ di, bơta màng ryŭ mơ gơklŏ òs sơntom bơh hwing nùs pơndềt să.

Dan jà bol he dô nùs bal tòm bơta hòi dan: Khoai Bèp koñ gơboh kọn di, kọn ưnngai Yang bơh bơta nđàc Kơnrẵn di găm tơngkah tơngkăñ kọn ĭn bulah kọn ò geh pha mơ lơbơn pràn. Dăn Bơtọ kọn kis sŏng ngăn, khin cha ràng tơlik rài kis he pơndềt să. Dăn dŏng kọn băñ pơnđơl ir nàng kơrmap gar rùp să niăm, mơya sum kis sŏng diđap măt Kơnrẵn mơ diđap ală ọh mi gơs bơta dòn dô bă băl gen Kơnrẵn ơn bŏl khai gut dăr kọn. Kơp koñ kọn geh hòn chò tòm bơta gơklŏ ngăn bơh di Yang. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, tŭ să jan he găm oă bơta siơ̆u tơl ò di là bŏl he ò geh sền ki ngàm ò. Tŭ he khin cha pơndềt să kis sŏng diđap măt Yang, he rơp dòp geh dô bơta kas màng lah gơnoăr pràn Yang di wil tơl nàng jơm ndơp ală bơta lơbơn he di, bơta koñ gơboh Kơnrẵn di tơngkah tơngkăñ tồ yò đo he kòp ngai. Mơ tŭ he pơndềt să, Yang rơp ngùi ală broă he kơlôi la basil baso nàng ràng tơlik bơta gơklŏ Kơnrẵn di dô bă niăm her ngăn.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.