Jơ̆ bơngai kiơ̆ Kră Yang, bơ̆n oei yak năm tŏk bŏk mĭnh tơdrong tơblah ưh kơ ‘bôh păng măt. Mă ưh kơ đei đao gưm dah ‘nhui ŭnh, mă lei pơhngol bơ̆n băt hơđăl: tơpă đei mĭnh tơdrong tơblah kơnê̆ krưp oei đei, anih mă măng mu păng ŭnh hơdah oei tơblah. Dang ei hloi trŏ jơ̆ kơplah ‘Bok Kei-Dei krao kon pơlei Sư krăng kơchăng, dơ̆ng ‘bơ̆t anih kơdih- yua nơ̆r krao khan pran kơtang, ‘bĕnh tơdrong mơsêh mơyang wă tơblah hăm lu ayăt gah bơhngol. Lei buăl hăm mơ̆ng kơtơ̆ng ‘bôh hlôm keng oei re tơ lăm đon?

Năr ‘nâu, ‘năr 18/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jonathan Santiago kơ̆l ‘bai TƠBLAH GAH BƠHNGOL.

“Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu.” (Êphêsô 6:12)

Lăm dôm giĕng ‘nâu, inh păng dôm ‘nu ‘nhŏng mŏ oh pơtơm hơkŭm hơdai lăm pơge hrôih wă krao khan kơ dôm tơdrong tơm kơ teh đak. Bu kŭm mơn đei sơng iŏk tơdrong gĭt kăl đơ̆ng jơ năr ‘nâu. Lĕi lăi thoi dôm lu bơngai lĭnh gak tơ kơpal dur pơlei, rim ‘nu bơ̆n dơ̆ng ‘bơ̆t anih mă Kră Yang pơjao- kral kơchăng, wă mơ̆ng kơtơ̆ng hloi nơ̆r athei đơ̆ng ‘Bok Soi Tơm.

Bơngai ‘noh đei krao năm tơ anăp, bơngai ‘noh lei chang gô; đei bơngai đei pơtrŭt athei kral kơchăng, bơngai nai đei chông anhăk lăm tơdrong pơdơh- đĭ đăng đei truh kiơ̆ trŏ jơnăr mă Yang Bơhngol ‘Lơ̆ng bơtho tơ’bôh. Yua kơ lăp đei Sư ‘mơ̆i băt hơđăl dôm tơdrong kiơ oei đei truh lăm chăl arih ling lang, păng dôm lu bơngai bu đei jơhngơ̆m mơ̆ng kơtơ̆ng gô băt kơ trong Sư, wă kơ krao khan tơgŭm đei yua hloh lăm tơdrong tơblah gah bơhngol.

Tơdrong tơblah gah bơhngol đơ̆ng chăl sơ̆ oei tim mă đei pơdơh. Đơ̆ng rŏng kơ lơ jơhnơr iung blah, tơdrong pơgơ̆r đơ̆ng hơdah păng măng mu oei pơtrơp wă tơblah ưh kơ pơdơh. Dah lăp lăng hăm măt gah akâu jăn, bơ̆n ‘bônh dêh tơchĕng khan dôm tơdrong tơblah đei lăm teh đak ‘nâu đĕch. Mă lei tơpă ưh kơ thoi noh. ‘Bok Pơgơ̆r Tih Hloh kơ lu bơ̆n ling lang tơ’blŏk kơ khŭl lĭnh Sư khan:

“Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu.” (Êphêsô 6:12)
Mĭnh wơ̆t dơ̆ng, Kră Yang tơ’blŏk lu bơ̆n lăng tôm tơdrong hăm măt gah bơhngol: ‘nâu ưh kơ trŏ jơ̆ tơdrong tơblah blah tơduă kon bơngai. Tơdrong tơblah tơpă oei đei tơ kơpal plĕnh- ataih hloh kơ tơdrong pơgơ̆r đơ̆ng kon bơngai. Păng mưh lăp măt gah bơhngol buăl đei pơih hloi, buăl gô ‘bôh hơđăl ayơ bơih jơ̆ tơdrong tơblah tơpă.

Kră Yang tơ’bôh kơ bơ̆n băt ayăt tơpă jơ̆ bu. Păng thoi Nơ̆r Sư đei akhan: “Bơngai bu yŏng sư ăn jang tih hloh kơ đe, bơngai noh, dah sư ưh kơ chu, yŏng sư gô phak sư kơtang hloh kơ đe.” (Luk 12:48). Thoi noh, dah bơ̆n tơ̆n kơiĕng hăm tơdrong tơpăt păng yak năm tơblah, bơ̆n oei rôp iŏk mĭnh tơdrong đei yua kơ bơ̆n hloh mă Kră Yang đei hơmet ăn kơ kon pơlei Sư.

“Truh tơ pơgê, đĭch đam, Êlisê bơngai mă Kră Yang ‘Bok Kei-Dei yua, iung đơ̆ng hrôih, lĕch tơ jih ‘bôh khŭl linh lơ, hăm aseh, gre aseh hloi, oei wang tăp kơ pơlei ei. Sư kơdâu roi kơ Êlisê: “Ơ yŏng tơ’ngla bơ̆n wă pơm liơ ‘nâu?” ”Êlisê khan: “’Nĕ kơ hli đei lu bơngai oei hăm bơ̆n lơ hloh kơ bơngai oei hăm lu sư.” ”Đơ̆ng noh, Êlisê krao khan thoi âu: “Ơ Kră Yang apinh Ih pơih ăn măt đĭch đam inh wă kơ sư gơh ‘bôh.” Kră Yang pơih ăn măt đam noh, na sư ‘bôh rơwơ̆nh rơwănh kơ aseh ‘bĕnh kơ kông păng gre aseh ŭnh tăp tang kơ Êlisê.” (II Lu Pơtao 6:15-17)

Dah pơtrơp tơblah lăm tơdrong krao khan, athei rôp iŏk mĭnh tơdrong hơđăl tơpă: lĭnh ‘Bok Krist trŏ kơ đei kĕjei lăm tơdrong tơblah ‘nâu bơih. Tơdrong mă bơ̆n kăl kơ pơm dang ei jơ̆ dơ̆ng kơjăp lăm tơdrong tơblah ‘noh, rôp kơjăp nơ̆r pơkă gah tơdrong kĕ jei, păng pran kơtang yak năm, năm ră roi tơdrong ư-ang Kră Yang:

“ĂN KƠ DÊH CHAR IH TĔNH TRUH; ĂN KƠ TƠDRONG TƠCHĔNG IH GƠH JING, MĂ TƠTEH ÂU KŬM THOI TƠPLĔNH TI!”

Apĭnh đĭ đăng krao khan hơdai: Kơkuh kơ Kră Yang, tŏk bŏk tơdrong tơblah gah bơhngol ‘bĕnh tơdrong kơnê̆ krưp, apĭnh tơgŭm kon ling lang kral kơchăng wă chơ chă nơ̆r Ih athei, păng dơ̆ng ‘bơ̆t trŏ anih mă Ih oei krao kon. Apĭnh ăn kơ kon jơhngơ̆m hlôh băt wă chu kiơ̆ tơdrong chông anhăk đơ̆ng Yang Bơhngol ‘Lơ̆ng. Hơpơi kơ kon ling lang bơwei jơhngơ̆m lui kơjăp păng ưh kơ ngĭl ngŭl, wă kơ gơh dơ̆ng kơjăp lăm kĕjei mă Ih đei ‘măn ăn kơ kon đơ̆ng adrol kơ đĭ đăng. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, Kră Yang đei hơmet ăn kơ bơ̆n tôm tơmam tơblah gah bơhngol. Sư đei tơ’bôh kơ bơ̆n băt ayăt lu bơ̆n tơpă ‘noh bu. Tơdrong tơblah kơnê̆ krưp oei đei. Athei dơ̆ng ‘bơ̆t anih kơdih bơ̆n. Păng athei ‘blŏk răk tơdrong gĭt kăl hloh: Kră Yang đei ăn tơdrong kĕ jei kơ bơ̆n bơih! Dang ei, bơ̆n lăp kăl kơ dơ̆ng kơjăp lăm nơ̆r pơkă ‘noh, chu yom tơdrong chông anhăk đơ̆ng Yang Bơhngol ‘Lơ̆ng, păng yak năm ‘bĕnh tơdrong kĕ jei lăm tơdrong tơ blah gah bơhngol.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.