Thaum ntseeg Vajtswv, peb txhua tus puav leej tau nqua hu los ua Vajtswv haujlwm thiab koom tes rau txoj kev nthuav Vajtswv lub tebchaws nyob hauv ntiajteb no. Tiamsis, muaj ntau zaug peb hnov cuag li yus me heev, yus lub peev xwm muaj nrim, thiab nrhiav tej haujlwm los tab kaum tes haujlwm Vajtswv cob rau peb. Yog li yam dabtsi pab kom peb tiv dhau tej kev ntshai thiab zoo siab hlo txais yuav tes haujlwm Vajtswv txib?

Hnub no, yog hnub 30/10/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lina Johnson dhau ntawm Zaj kawm VAJTSWV PUAS SIV KUV?

“Tus Tswv hais rau Mauxes hais tias: Leejtwg yog tus tsim neeg kom muaj qhovncauj? Leejtwg yog tus uas ua rau neeg lag ntseg lossis ruam? Leejtwg ua rau neeg tsis porn kev lossis dig muag? Kuv yog tus Tswv uas ua tej no” (Khiavdim 4:11)

Koj puas muaj zaum twg tau Vaj Ntsujplig tshoov kom ua ib txoj haujlwm twg, txog qhov uas txoj kev ntshai kav koj lub hlwb lawm tau? Koj puas tau muaj zaum twg hais rau Vajtswv tias: “Tus Tswv, kuv tsis paub kuv puas ua tau txoj haujlwm ntawd, vim kuv ntshai tsam ua puas.” Tshuav kuv, kuv twb ntsib dhau qhov no ntau zaug lawm.

Muaj ib hnub, thaum tab tom pehawm Vajtswv hauv Pawg Ntseeg txoj kev ntshai ntawd nkag los rau hauv kuv lub hlwb. Tomqab pehawm tas, kuv mus ntsib thiab nrog tus xibhwb qhia hnub ntawd. Kuv hais rau yawg tias kuv ntshai tsam ua tsis tiav yam uas Vajtswv hu kuv, kuv tsis paub tseeb Vajtswv puas yuav xav siv kuv tiag, thiab kuj tsis paub yuav ua li cas rau tej uas Vajtswv tso rau ntawm kuv lub neej.

Tus xibhwb qhia luag thiab hais rau kuv tias: “Twb yog vim koj paub tias koj tus kheej cim civ ua tsis tau, ntawd thiaj yog qhov uas Vajtswv siv koj. Yog tias koj ua tau txhua yam tsis yuam kev, koj yuav yooj yim dhau los ua neeg khav theeb. Tiamsis Vajtswv xaiv koj kom Vajtswv tau koob meej.” Tej lus no tau hloov pauv kuv! Kuv pom tias yus tsis tas yuav ua ib yam dabtsi kom zoo kawg nkaus, tiamsis yam Vajtswv xav ntawm kuv yog lub siab zoo siab hlo mloog lus.

Nyob hauv Khiavdim 3-4, Mauxes ntsib Vajtswv ntawm tsob ntoo cig. Nyob ntawd, Vajtswv hais kom yawg mus ntsib Falaus thiab coj cov neeg Yixalayees tawm hauv tebchaws Iziv (3:10). Tomqab no, Vajtswv nthuav tawm Vajtswv lub homphiaj rau Mauxes (3:11-4:13). Thaum nyeem Mauxes tus cwjpwm coj nyob hauv Khiavdim 4, kuv pom kuv tus kheej nyob rau hauv.

“Tiamsis Mauxes hais rau Vajtswv hais tias, “Tus Tswv, thov koj tsis txhob txib kuv mus. Kuv yeej ibtxwm hais lus txhav, txawm yog thaum koj nrog kuv tham los kuv yeej hais tsis tau lus nrawm li. Kuv yeej ibtxwm hais tsis tau lus zoo thiab nplaig yeej txhav” (nqe 10).

Nyob ntawm yawg txoj kev ntshai, Vajtswv ntuas yawg tias Vajtswv thiaj yog tus kav, tus loj dua txhua txoj kev qaug zog thiab tib neeg tej nrim. Vajtswv hais tias: “Tus Tswv hais rau Mauxes hais tias, “Leejtwg yog tus tsim neeg kom muaj qhovncauj? Leejtwg yog tus uas ua rau neeg lag ntseg lossis ruam? Leejtwg ua rau neeg tsis porn kev lossis dig muag? Kuv yog tus Tswv uas ua tej no. Koj cia li mus! Kuv yuav pab koj hais thiab yuav qhia kom koj txawj hais” (nqe 11-12).
Txawm li los Mauxes yeej hais rau Vajtswv tias: “Tiamsis Mauxes teb hais tias:Thov koj txib lwm tus mus” (nqe 13).

Kuv pom kuv zoo li Mauxes, vim kuv kuj hais rau Vajtswv tias: “Tus Tswv, kuv ua tsis tau, thov koj xaiv lwm tus.” Tiamsis Vajtswv tsis xaiv lwm tus, Vajtswv txib neeg los pab kuv. Zoo li Vajtswv tau txib Aloos pab Mauxes, ces Vajtswv kuj siv tus xibhwb hnub ntawd los txhawb kuv.

Thaum uas nyeem Khiavdim mus ntxiv, peb yuav pom Vajtswv ua tiav Vajtswv txhua lo lus cog tseg. Vajtswv siv cog neeg uas tsis muaj zog thiab tsis zoo los nthuav tawm Vajtswv lub hwjchim, kom Vajtswv lub npe tau koob meej! thiab hnub no Vajtswv yeej tseem ua haujlwm raws li txoj kev ntawd.

Tsis ntev los no, kuv muaj sijhawm nrog ib tug xibhwb sib tham. Yawg ua tim khawv tias yawg yuav pab tswv yim tsis tau txog lub neej txij nkawm vim txhua nkawm niam txiv hnub no yawg kuj tau ntsib dhau teeb meem hauv lub neej txij nkawm. Txawm yog tamsim no yawg twb rho tau ntau zaj kawm nyob hauv, thiab tab tom muaj ib lub neej sib hlub, tiamsis tej kev xav ntawd yeej tseem caum yawg. Txoj kev ntshai ntawd txeeb yawg lub sijhawm uas yuav pab tau lwm tus thiab txhawb lwm nkawm niam txiv hauv Pawg Ntseeg.

Feem ntau muaj peb yam rau peb kawm. Zoo tshaj yog kawm ntawm lwm tus txoj kev ua tiav tau zoo. Tsis tshua tau sawv daws nyiam yog kawm ntawm lwm tus qhov yuam kev. Thiab ib txoj kev yog feem ntau peb puav leej tsis nyiam, ntawd yog kawm ntawm tus kheej qhov yuam kev.

Kuv qhia txog tej kev kawm no kom peb pom tias, txawm yog zoo tsis txaus los, peb yeej muaj cuab kav tau Vajtswv siv. Peb yuav yuam kev, tiamsis peb kuj muaj cuab kav kawm kho tej qhov yuam kev ntawd. Ntau zaug, tej uas peb ntsib dhau tseem dhau los ua zaj kawm txhawb thiab txhim kho lwm tus. Vajtswv muaj cuab kav siv peb tej qhov zoo tsis txaus ntawd los ua Vajtswv haujlwm, tsuav yog peb zoo siab hlob ua xwb. Thaum ntawd Vajtswv yuav tau txhawb nqa!

Yog li, yog tias hnub no koj muaj kev khuab xeeb txog qhov uas Vajtswv puas siv koj? Lo lus teb tias: Muaj! Txhob cia tej kev ntshai ntawd tav koj kev ua Vajtswv haujlwm, tiamsis yuav tau mus nrog kev ntseeg, mloog Vajtswv lus, thiab muab txhua lub koob meej fij rau Vajtswv.

Thov caw nrog kuv peb thov Vajtswv ua ke: Leej Txiv muaj kev hlub, kuv paub tias kuv zoo tsis txaus thiab ua yuam kev ntau yam, tiamsis tus Tswv, kuv ua Koj tsaug kawg nkaus vim koj tseem siv kuv. Thov pab kom kuv tsis qaug zog thaum pom kuv tseem ua tsis tau ntau yam, tiamsis pub kuv muaj lub siab zoo siab hlo teb koj lub suab hu, kom tau koj siv thiab cob qhia kuv. Kuv thov hauv Tswv Yexus Khetos lub npe. Amees.

Cov kwv tij txhua tus, Mauxes twb tau yog ib tug neeg ntshai thiab tsis txais yuav Vajtswv lub suab hu, dhau los ua ib tug neeg tau Vajtswv siv los coj Vajtswv haiv neeg. Puas muaj zaum twg koj hnov tub qaug thaum ntsia pom ib ncig muaj ntau tus neeg txawj ntse tab tom ua Vajtswv haujlwm, tshuav koj pom cuag li yus tsis muaj txaus peev xwm los ua Vajtswv tes haujlwm?

Phooj ywg, Vajtswv tsis tso peb tseg vim tej nrim lossis vim peb muaj tej kev qaug zog tiamsis Vajtswv yeej tseem siv peb txawm yog peb pom tias yus zoo tsis txaus. Nco ntsoov tias Vajtswv pub rau peb txhua tus nyias muaj nyias peev xwm thiab tso peb ua tes haujlwm sib txawv, tiamsis peb puav leej koom ib lub suab hu ntawd yog: Koom tes qhib Vajtswv lub tebchaws hauv ntiajteb no.

Yog li, cia li thov Vajtswv pub rau kom koj muaj lub siab mloog lus thiab cia koj zoo siab hlo teb Vajtswv lub suab hu. Thiab ntseeg tias thaum Vajtswv muab haujlwm cob rau koj, ces kuj yog lub sijhawm Vajtswv yuav ntxiv zog rau koj.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.