Muaj ntau tus yuav xav txog lub koob tsheej “Halloween” thaum hnov hais txog hnub 31 hli 10. Tiamsis hnub no, peb yuav tau saib hnub no raws li ib seem txawv. Peb yuav tig rov qab mus saib keeb kwm hais txog ib tug tub txawg neeg Đức – Martin Luther, nrog rau tej yawg tau ua pub rau txoj kev ntseeg Vajtswv ncaj rau hnub no ntau xyoo dhau los, thaum uas yawg hloov pauv tag nrho keeb kwm Pawg Ntseeg txog rau thaum no.

Hnub no, yog hnub 31/10/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lina Johnson dhau ntawm Zaj kawm HNUB HLOOV PAUV

“Yog koj lub qhov ncauj lees hais tias Yexus Khetos yog tus Tswv thiab koj lub siab ntseeg hais tias Vajtswv twb tsa Yexus Khetos sawv hauv qhov tuag rov qab los lawm, koj yuav dim” (Loos 10:9)

Raws li tsab xov Britannica.com, Martin Luther yug rau hnub 10 hli 11 xyoo 1483. Yav tas los, cov ntseeg Txojmoo Zoo lawv pheej ua kevcai nco txog hnub yawg tuag rau thaum hnub (18 hli 2) nco txog yawg. Tiamsis tomqab no, feem ntau puav leej xaiv hnub 31 hli 10.

Qhov uas lawv xaiv hnub no yog vim xyoo 1517, Martin Luther tau dai “95 nqe kevcai” rau ntawm lub tuam tsev Castle nyob Wittenberg, tebchaws Đức lub qhov rooj. Lub sijhawm ntawd, yawg nqua hu cov thawj coj saib xyuas sab kev ntseeg lub sijhawm ntawd kom lawv yuav tau lees txim thiab tig rov qab los rau qhov tseeb hauv Vajtswv tej lus. Rau qhov tiam ntawd, cov pejxeem lawv tsis tau nyeem Vajtswv txojlus li peb tamsim no, tshuav cov thawj coj lawv ho qhia tej yam uas tsis yog raws li Vajluskub- tshwj xeeb yog qhov uas sau cov ntseeg nyiaj los pauv tau txoj kev zam txim.

Loj hlob hauv Pawg Ntseeg, kuv pheej muaj kev khuab xeeb tias: Yog Tswv Yexus twb thov Vajtswv rau peb kom koom ua ib lub siab lawm (Yauhas 17:21), vim li cas ho muaj ntau pab pawg ua luaj? Kuv yeej tsis kam khav tias kuv muaj lo lus teb, tiamsis dhau ntawm tej uas kuv tshawb nrhiav, kuv ntseeg tias Martin Luther yeej tsis muaj lub siab xav cais lossis tsim dua ib txoj kev ntseeg tshiab. Yawg tsuas nqua hu Pawg Ntseeg thaum ntawd kom yuav tau lees txim. Yog ib tug nkag siab zoo txog Vajluskub, yawg paub yus yuav ua li cas thiaj ceev tau tag nrho txoj kevcai. Yawg kuj tau nthuav tawm meej meej txog Vajtswv lub siab hlub tshua thiab Vajtswv txoj kev zam txim dhau ntawm Tswv Yexus. Yawg pom tias yus yeej yuav cim civ qhib tsis tau kev mus rau ntuj ceebtsheej, thiab yeej yuav muab nyiaj pauv tsis tau. Yawg tsuas yog txais yuav tej uas Tswv Yexus tau ua rau yawg xwb – Tswv Yexus twb ua ib lub neej zoo kawg nkaus thiab kam tuag rau yawg. Vim li no, yawg thiaj tawm tsam rau qhov tseeb kom Vajtswv thiaj tsis raug muab qhia yuam kev.

Tshuav peb niaj hnub nim no zoo li cas? peb puas paub tias yus yeej yuav ua tsis tau lub neej uas tsis muaj Vajtswv txojkev zam txim uas tsis yog los ntawm Tswv Yexus los? Peb puas tab tom sawv khov kho rau saum Vajtswv tej lus?

Loos 3:23 sau: “Rau qhov txhua tus puavleej ua txhaum thiab tu ncua Vajtswv lub tshwjchim lawm.”

Peb yuav ua tsis tau ib lub neej uas tsis yuam kev.

Tiamsis Loos 10:9 ho sau: “Yog koj lub qhov ncauj lees hais tias Yexus Khetos yog tus Tswv thiab koj lub siab ntseeg hais tias Vajtswv twb tsa Yexus Khetos sawv hauv qhov tuag rov qab los lawm, koj yuav dim.”

Dhau ntawm txoj kev ntseeg rau Tswv Yexus txoj kev tuag thiab Nws txoj kev muaj yeej txoj kev tuag, peb thiaj txais tau txoj kev cawmdim. Tseem tshuav yam dabtsi tau koob hmoov tshaj thiab!

Thov caw nrog kuv peb thov Vajtswv ua ke: Tus Tswv, kuv tawm suab ua Vajtswv tsaug, vim hnub no kuv tau ntuas txog txoj kev zam txim thiab txoj kev cawmdim tsuas muaj nyob hauv Tswv Yexus xwb. Thov Vajtswv ntuas kom kuv rov qab ntsia kuv lub siab, tshuaj kuv lub neej txhua hnub saib puas tau haum Vajtswv siab lawm tau. Thov Vajtswv taw tej qhov uas cheem tsum yuav tau hloov pauv hauv kuv, thiab qhia kom kuv paub pheeb kom ruaj ruaj rau qhov tseeb hauv Vajtswv tej lus. Thov kom kuv lub neej tau hloov pauv txhua hnub, kom kuv yim hnub dhau los zoo li Vajtswv dua thiab fij lub koob meej rau Vajtswv. Kuv thov hauv Tswv Yexus Khetos lub npe. Amees.

Cov kwv tij txhua tus, nyob rau hnub nco txog txoj kev ntseeg hloov pauv hnub no, sawv daws tseg ib mentsis sijhawm los ua Vajtswv tsaug rau Vajtswv txoj kev zam txim rau peb. Tshuaj peb lub neej dhau ntawm txhua qhov tseeb hauv Vajluskub, thiab thov Vajtswv ua ke: “Tus Tswv, puas muaj qhov chaw twg hauv kuv lub neej yuav tau hloov pauv? Hnub no, Koj xav qhia qhov tseeb dabtsi rau kuv?” Thaum twg peb cia Vajtswv txojlus coj kev, ntseeg tias Vajtswv yuav coj peb nkag rau hauv txoj kev hloov pauv tiag tiag, pib ntawm peb lub siab mloog lus.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.