Tòm gùng lòt jat Yàng, cau lơi tòm bol he kung gơs tú nàng tìp ală tú “jơ fuk lơh nền”, tú ală ngai rơp tus gơlơh bè dồ bơta kơnjớ hơđang bơnì he dê. Hớ digơlan là dồ broă nrơt nrơl, hala dồ broă dờng lơh he in pal ai bơta lơh nền nàng sac rwah. Tòm ală tú bè hớ, bol he mhar rngòt mơ oă ngan bơta rồn bơklơn. Mơya, Yàng Tòm Trồ neh rcang lài bol he in rau, nàng bol he rgơi rcang nàng lòt gan mơ lơh àng sơnđan Yàng.

Ngai do, ngai 19/11/2025, rơndap Bơta Hòi Dăn Kòp Ngai hòi jà ồng mọ oh mi kơlôi sơ-nơng Jơnau Yàng bal mơ ồng Tori Troncone bơh tơnggume GEH RCANG SIR BƠH LI BƠTA GƠLÒNG BÒL GLAR.

“Hòn chò tĕ bơh bơta hơ̆, bulah tŭ do oh mi pal kong li bơta gơlòng bòl glar tòm dô êt jŏ,” (‭‭I Pier‬ ‭1‬:‭6)

Kòp năm an chò hòp ngan nàng kơp sền môn bóng chày. Gơwèt mơ an, vòng loại trực tiếp là dồ pơnah niam mơ kalke ngan tòm bơta pơrlòng. Oă dớ, an mìng sền lơm mơ an kung neh sền gó kalke ngan, rlau mơ hớ la ală cau kơnhơl pơrlòng ngan pal kong oă bơta rồn bơklơn tú bol khai kơnhơl plai.

Tòm môn bóng chày, cau cơm plai ờs mờng mut tòm sân tú bơta pơrlòng mìng gam dùl hala bàr hiệp lồi dut. Tú do, ală bơta la kalke ngan, digơlan mìng dồ dớ cơm plai kung rgơi cèng cồng nha dờng – phalin hala ờ phalin, jơh dồ bơta pơrlòng rơp gơlik cồng nha hala ờ. He gó ngan do là dồ broă lơh bềng bơta rồn bơklơn ngan.

An kơ-lôi is pơnah nàng dong bol khai rgơi kong jai ală bơta rồn bơklơn hớ la ơm tòm broă bol khai rcang lài. Lòt gan tòm bơta pơrlòng, bol khai geh bơta bơtào nùs nhơm kung bè poac să nàng rcang tòm tú pơrlòng. Lài mơ tú mut tòm bơta pơrlòng, bol khai neh rcang sir. Lài mơ tú cơm plai, bol khai kung neh rcang sir mơ gơs să jan, bồ tơngoh niam nàng rgơi cơm plai dồ bă di ngan. Ală broă gơlơh bè là dềt rhền mơya la bơta dờng màng nàng rcang lài bol khai in tòm bơta pơrlòng.

Dồ tòm oă cau an kờn tòm Sră Goh hớ là ồng Jôsep. Tus dê Sră Sơnrờp tạp 41, ồng Jôsep neh lòt găn oă bơta gơlòng: kong ală cau bi tac ồng gơlik cau dí, gơkòl bau ùr cau tờm ồng dê yă blac, tơnớ cau jàm ồng tòm hìu jàm tài bơh ală broă mơ ồng ờ lơh. Mơ tòm Sră Sơnrờp 41:14-15, he gó ồng Jôsep ntào dê đap Pharaon, geh hòi tus nàng ràng tơlik bơta gơtha bơta mpau mơ ờ gơs cau rgơi ràng tơlik. Dilah la să tờm an, ngan an rơp sền gó do la broă kalke ngan! Mơya ồng Jôsep neh geh rcang lài ală bơta do.

Lòt gan ală broă gơlik gơs, bulah tìm bơta gơlòng bòl glar lơi, ồng Jôsep sùm gơn kơnờm dê Yàng Tòm Trồ (Sră Sơnròp 39:2, 8-9, 21-23). Gen tú ồng ntào dê đap Pharaon, ồng ờ rơmsă, tài bơh ồng git Yàng Tòm Trồ sùm gam at bồ.

“Jôsep ho lah: “Hơ̆ ò di la bơh añ, mơya hơ̆ la bơh Yàng Tom Trồ ai kơnràñ in dô jơnau ho wơl hừh nùs.” (‭‭Sơnròp Gơlik Gơs‬ ‭41‬:‭16‬)

Jôsep ờ di mìng ràng tơlik bơta mpau mơya ồng kung ai jơnau tơngkah jak chài nàng rcang lai tus dê bơta jê gloh rung. Gen bè hớ la ồng Pharaon lơh nền ngui ồng Jôsep gơlik gơs cau duh broă ồng dê, at bồ jơh dà lơgar Ejiptơ (Sơnrơp 41:37-41). Do là dồ gơnoăr broă bềng bơta rồn bơklơn, mơya he sền gó Yàng Tòm Trồ neh rcang lài ồng in bơh tú ồng at bồ tòm hìu ông Photipha mơ tòm hìu jàm.

La cau dòn Yàng, bol he git lah tòm dunnia do, bol he rơp tìm bơta gơlòng bòl glar (Jang 16:33). Mơya bol he sùm kớ nùs, tài bơh git lah digùl bơta gơlòng, Yàng Tòm Trồ sùm gam lơh broă tòm bơta gơlòng hớ (Roma 8:28) mơ rcang lai bol he in rơndap mơ Yàng neh rcang sir he in (Epheso 2:10).

Tú cơnđoà lòt tòm bơta gơlòng, sền té rài kis ồng Josep bè dồ nơm krơh, dồ jơnau hơ nền cê bol he in. bè ồng, bol he pal kơlné bơta dờn he dê tòm Yàng, kớ nùs bulah ơm tòm bơta gơlòng bòl glar, tài bơh Yàng sùm gam lơh broă mơ ngui bơta gơlòng nàng lơh gơkló sơnđan Yàng. ban lòi tus dê tú jơ fuk dờng màng rài kis he dê mơ să tờm bol he ờ hềt rcang sir, mơya pal cơnđoà pơnjat tai tòm bơta chò hòp mơ bơta kớ nùs tài bơh bol he la kon kờn gơboh Yàng Tòm Trồ dê, tài bơh git lah he neh geh Yàng hòi sac mơ neh rcang sir.

“Hòn chò tĕ bơh bơta hơ̆, bulah tŭ do oh mi pal kong li bơta gơlòng bòl glar tòm dô êt jŏ, … bulah tŭ do oh mi ò tìp Kơnràñ, mơya dòn Kơnràñ mơ hòn chò dờng ngan, mơ ò rgơi yal. Bơh oh mi dòp geh cồng nha bơh bơta dòn dê, la bơta dong klàs hwềng soàn he.” (‭‭I Pier‬ ‭1‬:‭6‬, ‭8‬-‭9)

Dan jà bol he dô nùs bal tòm bơta hòi dan: Khoai Yàng, kon ừn ngài Yàng tài bơh tòm gùng lòt kon dê sùm ơm tòm rơndap niam Yàng dê. Dan dong kon kớ nùs dờn lah Yàng gam ngui ală broă kalke, broă ờ lơh sir mơ bơta gơlòng bòl glar nang lơh niam rài kis kon dê tus dê rơndap dờng màng mơ Yàng neh rcang sir. Tú kon lòt gan tòm broă dờng rài kis kon dê, dan dong kon ờ rơmsă mơya khin cha nàng cờnđoà lòt tus bơh bơta chò hòp mơ bơta kớ nùs, tài bơh kon git lah kon gơrê mơ Yàng. dan rài kis kon dê ràng tơlik bơta gơkló Yàng dê bơh broă lơh kon dê. Kon jơh nùs hòi dan, ai sơnđan Yàng Jesus Krist, Amen.

Ơ ală ồng mọ oh mi kờn gơboh, Yàng ờ tú lơi lòi bol he ơm is tòm bơta gơlòng hala tòm ală broă gơlik gơs. Yàng sùm ngui ală broă gơlòng bòl glar, ală broă neh gơlik gơs nàng tồl tiăr bol he, dong bol he rcang sir tus dê ală broă mơ Yàng neh rcang lài he in. gen bè hớ, tú he tìp ală broă dờng tòm rài kis he dê, pal kah lah he ờ ơm is dồ nă. Pal kứ kớ nùs cơnđoà lòt tus, gơn kơnờm dê bơta rcang sir Yàng dê, mơ dờn nền lah Yàng rơp ngui rài kis he dê nàng ràng tơlik bơta gơkló Yàng dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.