Bol he găm kah kòp tŭ nisơna kup điện bơh càl dờng hala mìu rbut sơl? Tŭ đèn nisơna chơt mờ bơta klam jơngo tús dô bă mhăr ngăn lơh bol he in rngòt mờ wi wơ sơl? Bol he jòi mhăr ngăn dồ ết àng di kòp tiah nàng jòi gùng lik sơl?

Ngai do, ngai 20/11/2025, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Wendy O’rourke bơh tơnggume CAU LĂM GÙNG.

“Bơh lài òr oh mi la klam jơngo, mơya tŭ do oh mi la àng tòm Yàng; lơh lòt tĕ be cau ơm tòm bơta àng,” (Ephesô‬ ‭5‬:‭8‬)

“Tơngai là nchi hah bi?”, Thanh, dồ nă oh dê mờ añ pa kwèng tus băl mờ mpồl bơyô tus còp dê klờng bơ srăm cau jơngo mat neh lùp. “ À, tơngai là..”, añ sơ bac sơ băng hơ wơl, mờ ờ đơs tai. Añ păl cong sơñio bè lơi oh Thanh in bơh măt oh ờ dồ dơ̆ lơi sền gŏ bơta lơi dê gut dăr oh. Añ wi wơ, añ mìng at tê oh cèng tus dê tiah geh tơngai gơcrà dê ala tê tờm chih mờ đớs: “do là tơngai”. Thanh ơm mŏ ò đớs nchi lơi mờ kơno. Tơ̆ nơ̆, oh đớs: “ Oh gơlơh duh”. “Dingăn oh”, añ đơs. “Tơngai đăn màu hah bi?”, oh lùp tai. Añ kah tus jơnau đơs “Tơngai màu rmit” tòm bài “Tŭ mho sơ tềp” cau cih sră Huy Cận dê. Añ hơ̆ nền lah “Tơngai geh màu rmit wa oh.” “Màu rmit là màu bè lơi hah bi?” Tŭ do, bồ tơngoh jơt poh năm añ dê ò rgơi hơ wơl.

Jơnau đớs bol he dê kư̆ găm tai. Añ nhềm măt bè jơnau Thanh đớs nàng geh wă oă bơh bơta bol oh sền ala phăn kís gut dăr. Oh đớs dồ bă lơhơn: “Tềng do, pugru koñ gơboh bol oh ngăn. Pugru kơ̆ nùs bơto bol oh tơl bơta. Pugru bơtê bol oh cih chữ guh, dong kòl bol oh git teh kơñi.” Sap đơs niam oh Thanh yăl bơh bơta kal ke tŭ lòt bơ srăm lơh añ in gơ lơh hang ngăn tòm măt.

Gen añ kơlôi tus Helen Keller, là cau cih sră tòm lơgăr Mỹ, dồ nă cau jơngo mat mờ tồr ò gớs kơno sơnrờp geh cờng tang bơ srăm sir Đại học. Mọ neh geh oă cau git tơnơ̆ mờ cồng nha mọ dê, mơya, gớs dồ êt cau kah tus dê bơta bol glăr mờ cau pugru sơnrờp mọ dê, pugru Anne Sullivan.

Kung bè cau oh bơ srăm, pugru Anne kung neh gớs bơta kòp bơh măt tŭ rơp prăm năm. Bơta kòp hơ̆ lơh măt pugru jơngo tơn. Tŭ găm dêt, Bèp pugru dê neh sang lời pugru gen păl kis tòm hìu cau ròng bol oh dêt klơ hat mờ siơ̆u siăr. Lồi dut, tŭ oă cau sền koñ dê Anne, pugru neh geh reh mờ gớs bơta sền gŏ dồ êt. Pugru gớs bơta chài rgơi ngăn gen geh cèng tus klờng PerKins tiah Massachussets, klờng geh cơng pơnrơ là tiah ala cau ò gŏ mat. Tềng do, pugru lơh gớs dồ nă cau nàng bơtê Helen Keller, dồ nă oh bơ srăm poh năm, ò gŏ măt mò ò tồr tí. Oh dêt koñ ngăn dồ nă cau nàng tề lăm tòm lơgăr ò gớs jơnau đớs, ờ gŏ rùp, tiah mờ oh dêt bulah gớs bơta jơm gòm bơh bơta koñ gơboh, mơya gớs ơm dồ nă.

Lòt găn bàr pe tŭ bơ srăm ò gớs cồng nha bè bơta mờng òs, pugru Anne git lah do là tŭ păl càng tòm gơl gùng dà bơtê dê. Pugru sền gŏ bơta kơp koñ oh bơ srăm dê mờ bơtê kòp jơnau jat bè ală broă lơh hala phăn drờm bè hơ̆. Pugru Anne dong Helen Keller neh đớs kờp chữ mờ ràs tê. Pugru neh lời oh bơ srăm sền mờ jòi gŏ phăn gut dăr jat bè bơta chài oh dê. Mờ ràs tê. Tơ nơ̆ prau kơnhai, pugru Anne neh bơtê oh bơ srăm dêgit drờm prau rơhiăng từ, ala jơnau cih guh Braille mờ phép nhân! Tơnơ̆, pugru dong oh bơ srăm jơnau cau Pháp, Đức, Hy Lạp mờ jơnau La-tin. Cồng nhă oh bơ srăm là bơta chòp dòng ngăn, pugru Anne neh pơnjat bơ srăm oă ală tơng gu is tai nàng bơtê oh bơ srăm bulah cau jak neh đớs bơh broă đọk oă hơ̆ rơp lơh ờ niam tus dê măt pugru.

Añ lùp is să tòm bơh lơi mờ lơh pugru Anne jơh nùs mờ oh bơ srăm tian gớs ờ rngòt phi bơta pràn să tòm. Mờ..añ đăl git lah. Hơ̆ là bơh pugru neh ơm tòm bơta jơngo gen rlau jơh, pugru git nền bơta ò chài lơh bè lơh mờ oh bơ srăm ò gŏ măt pugru dê păl lòt găn. Rlau jơh, pugru rgơi kơno jơnau koñ dong kòl dê oh bơ srăm, ò di mờ tồr, mờya bơh plai nùs dồ nă cau kung neh lòt găn bơta hơ̆.

Añ pò măt tơnơ̆ jơt phuk lòt găn tòm bơta jơngo mờ sền ala phă jat bè gùng mờ oh Thanh đớs. Jơt puk tòm jơngo. Jơt phuk ờ gớs bơta gơn kơnơm. Jơt phuk hơ̆ dong añ wă lah kís tòm jơngo ngăn là ò đwơn soh mờ bơta àng gen là kwơ màng ngăn

Kís tòm bơta jơngo là kal ke, kís tòm bơta jơngo đah hwềng hala jơno hwềng soàn gen là kal ke rlau bè lơi tai. Pugru Anne Sullivan, dồ nă pugru ò gŏ măt ờ rngòt kal ke, bơta gơlòng nàng cơn đoà mờ cèng dồ nă cau oh bơ srăm lik bơh lơgăr klăm jơngo, gen bol he bè lơi taih? Bol he, ala cau “Bơh lài òr oh mi la klam jơngo, mơya tŭ do oh mi la àng tòm Yàng; lơh lòt tĕ be cau ơm tòm bơta àng,” (Ephesô‬ ‭5‬:‭8‬), bol he găm rngòt,wi wơ ờ khinčha cơn đoà lik bơh lơgăr să tòm ís nàng lơh gớs bơta àng tòm lơgăr klăm jơngo do, nàng lơh gớs dồ nă cau lăm gùng dê dồ nă cau ndai in kơp koñ geh tề lăm sơl? Ngai do, bol he jơh nùs nàng cơn đoà lik, mờ cơn đoà mut tòm dồ lơgă mờ dồ nă cau nàng pà bol khai in bơta àng bơh Jơnau Song Jơnau Yàng dê sơl?

Dan jà bol he dô nùs bal tòm bơta hòi dan: Khoai Bèp koñ gơboh, ưn ngài Yàng bơh Kơnràñ là bơta àng. Ưn ngài Yàng bơh tòm Kơnràñ, kòn là bơta àng bè Jơnau Kơnràñ neh đơs tòm E-phe-sô 5:8. Ơ Yàng, dăn dong kòn cơn đoà lòt bè là kòn bơta àng mờ dờng màng rlau jơh, dăn dong kòn sùm jơh nùs cơn đòa lik mờ pà bơta àng bơh jơnau song Jơnau Kơnràñ dê kòp nă cau lơi koñ tus. Kòn ưnngài Kơnràñ. Kòn jơh nùs hòi dăn, tòm sơnđăn Yàng Je-su Krist, A-men

Ơ ồng mọ, oh mi koñ gơboh. Ngai do bulah bol he là cau lăm đah hwềng, pugru tòm klờng rlô hala dồ nă cau dòn găm sùm ràng tơlik mờ yăl tơlik bơta koñ gơboh Yàng dê bơh rài kís dòn duh kòp ngai, kah te lah bol he eh geh hòi sak nàng cơn đoà lòt tòm bơta àng. Bol he là bơta àng tòm Yàng. Bol he là cau lam gùng dê gùl lơgăr klăm jơngo do. Gen tàng, kư̆ cơn đoà té mờ sol pơn đàng bơta koñ gơboh Yàng dê bơh “ nùs nđàc sơngit, hala bơta koñ gơboh là jơnau mờ ala cau ti rgơi kơno mờ cau ò gŏ măt rgơi gŏ” (Mark Twain).

Ngai do kung là ngai Lơh Wèr cau pugru Việt Nam, bơta hòi dăn kòp ngai dăn bơyoa tus jơnau ưn ngài mờ jơnau hòn chò tus dê ala cau pugru, ala cau pugru bơtê Sră Goh klờng rlô, là ala cau lam đah hwềng, bơto Jơnau Yàng/ Dăn Yàng chò nùs ngui rài kis kòp rài kis bol he lơh gớs ala cau lam gùng, tề lăm kòp nă cau tús dê Bơtau Dong Klàs Yàng koñ gơboh he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.