Kơp nă cau tòm bol he kung geh Yàng ơn tòm ală tiah gơlik gơs pha is: hiu nhă, klơng bơtê, tiah lơh broă hala mpôl jơnum gut dar. Gơnoăr broă Cau Dòn Krist dê la dong cau ndai sền gŏ Bơtau Krist tòm he. Sèng lùp ơn tềng dô là tòm tŭ cau ndai sền dê rai kis oh mi, bol khai gơs sền gŏ bơta àng Yàng dê hala ò?

Ngai do, ngai 21/11/2025, bơta Bơta Hòi Dan Kòp Ngai dăn jà ală ồng mò oh mi bơtê bal Jơnau Yàng kơnơm dê bơta dong kơl Rich Miller dê bơh tơnggumê SOL PƠNĐANG BƠTA ÀNG YÀNG DÊ.

“Mơya gùng lòt cau song ring dê la kung be bơta àng àng drim dê, Gơ pơnđàng sòl sơlo àng rlau tai jơl tus di trồ gùl ngai.” (Jơnau Pơnđik 4:18)

Oh mi neh gơs tŭ lơi tìp dô nă cau bềng bơta kơp kờñ mơ kờñ rài kis ir tian gơs lơh oh mi in gơlơh gơboh gơbai ngăn hala ò? Mơ găn dê oă sơnăm, cau hơ̆ găm kờñ Yàng jơh nùs mơ pơnjat gŏ ală jơnau hơ Kơnràñ dê gơlik gơs ngăn tòm rai kis bol khai hala ò?

Cau mơ añ kòñ đơs tus hơ̆ la dô nă cau gơnoăr bơto tòm Hiu Jum Goh tiah añ lòt pơjum tom tŭ bơtê tòm klơng Sră Goh. Añ dơp git tòm măt ồng gơs dô bơta pơndềt să krơi is, lơh cau lơi in tìp ông kung dơp git geh bơta kòñ gơboh Yàng Jêsus dê. Ông kung gơs dô bơta chai đơs kơnhơl crih crai, sùm lơ gơboh gơbai mơ ală bơta kơnhơl añ ai. Ồng kung là cau rcăng sir cơnđòa lòt tòm bơta dòn nàng tề lăm Hiu Jum Goh sơlơ ngai sơlơ têh dơng. Mơya, la dô nă cau kơnòm să, bơta lơh añ in kol gơring mớ rlau jơh tòm ông hơ̆ là nùs nhơm sùm ơn cau ndai hơđăng rlau jơh.

Cau gơnoăr bơto añ jê ơs kong sa oă ngai nàng hôi dăn ală cau găm ơm tòm bơta sơlung sơlăng, tềng hơ̆ gơs hiu nhă añ. Ông sum wet tus bơta soh ngui he dê. Bulah trồ tơngai duh, ồng kung soh ao dô bă niam. Sền lăng gơlơh be glăr ngăn nhơm, mơya gơwet mơ ồng hơ̆ là gùng rang tơlik bơta kòñ gơboh mơ bơta sền dơng mang gơwet mơ ală cau gut dar.

Gơwet mơ să tòm añ, ồng neh oă dơ̆ chôl bơtrôt, tơmbơhbơr mơ hôi dăn mơ añ, bơh tòm ală pah tơngai kalkê rlau jơh. Tòm tŭ tơngai gơnoăr broă ồng dê, añ neh geh kơno jơnau hôi jà ơn să duh broă Yàng. Añ rơp ò tŭ lơi hŭi ală dơ̆ ồng jà añ bơto tòm bơta pơjum àng drim Ngai Rlô nê. Añ rngòt ngăn tian gơs jơnau “ò suc ơm” ò tơl nàng ràng tơlik. Mơ krơi is tai, bơta bơto añ jê àng drim hơ̆ đơs bơh gùng Yàng Tòm Trồ cèng bol he lik bơh tiah ring lơngai să tòm dê. Mơya tòm àng drim bềng bơta kơlôi rcăng hơ̆, añ neh dơp git geh bơta bong mơñà Yàng dê, mơ bơta hơ̆ sơlơ lơh añ in dòn nền lah Kơnràñ neh hôi sac mơ ngui añ.

Găn dê 25 sơnăm bơh dê tŭ añ lik klơng, añ geh sền gŏ gùng Yàng Tòm Trồ lơh broă găn dê rai kis ồng dô bă crih crai. Rai kis ông gơlơh be la dô nơm cơng tang ai tơnggit Yàng sùm sùm lơh ală bơta pa lơm. Kơnràñ sùm pờ ală tŭ lơmpah nàng ồng rgơi lơh broă mơ oă gơnoăr broă mơ ală cau at bồ mpôl cau lơh sa tòm oă lơgar pha is. Bulah lòt găn oă pah rai gơlong kălkê dô ía cau wơng git, mơya ồng kung găm prăp geh bồ dơngoh băliă be kơnòm dềt, mơ bềng bơta kơp gơn bơh ală bơta dơng rlau mơ Yàng rơp lơh pơnjat.

Gơwet mơ añ, ồng la dô nơm krơh ràng tơlik bơta àng Yàng dê dô bă àng gơcrà. Gar măt cau ndai ai ồng in la cơng tàng ai tơnggit tŭ bol he sơlơ gơklac dềt mêr rlau mơ Bơtau Krist tòm rai kis is, oă cau rơp sền gŏ Yàng Jêsus dô bă loh lang găn dê bol he. Mơ bulah digơlăn bol he ò gơring tus cau ndai dô bă jrô ndơp be ồng, mơya kơp nă bol he kung la pơnah bal tòm săjăn Bơtau Krist, geh crơng gơs nàng lơh broă niam.

“Bơh bol he la broă lơh Kơnràñ dê, neh geh Kơnràñ crơng gơs tòm Yàng Krist Jesu nàng lơh broă niam, mơ Yàng Tom Trồ neh rcang lài nàng bol he in lơh jat.” (Êphêsô 2:10)

Dilah oh mi neh cơnđòa lòt mơ Yàng tòm tŭ jơ jong, nền cê oh mi rơp gŏ lah Kơnràñ găm tơmgơl nùs nhơm oh mi jat sơnăm kơnhai: lơbơn niam rlau, kòñ gơboh rlau, mơ sơlơ ngai sơlơ ràng tơlịk bơta àng Kơnràñ loh lang rlau. Bol he geh Yàng hôi sac la cau song ring, ò di tai bơh bol he wil tơl, mơ bơh Yàng Jêsus neh soh bol he in bơta song ring Kơnràñ dê găn dê bơta chơt mơ phi să hơđăng chi pơng. (II Kôrinhtô 5:21). Mơ Kơnràñ kung hơ rơp lơh wil tơl broă niam neh sơntơm tòm bol he jơl tus lôi dut (Philip 1:6). Behơ̆ gen, ngai dô lơi tĕ tŭ jơ nàng ưnngai Yàng bơh ală bơta tơmgơl lơi mơ Kơnràñ neh lơh tòm rai kis oh mi. Tòm tŭ wet măt tus hơ Kơnràtŭ, oh mi rơp geh tơmgơl sơlơ ngai sơlơ ndrơm Kơnràñ rlau, bơh “gơklŏ tus gơklŏ” (II Kôrintô 3:18). Mơ dilah oh mi la cau pa dòn mơ cơnđòa lòt mơ Yàng, añ hôi dăn nàng oh mi mơ mpôl cau dòn oh mi dê rơp pơnjat sol pơnđang bơta àng tòm ală ngai rơp tus.

Dan jà bol he dô nùs bal tòm bơta hòi dan: Khoai Yàng kòñ gơboh, kòn ưnngai Kơnràñ bơh neh hôi sac kòn gơlik gơs cau sol pơnđang bơta àng Kơnràñ dê. Dan ai kòn in dơp git bơta do, nàng kòn sum ràng tơli rùp să Kơnràñ găn dê kơp jơnau đơs, bơta lơh lòt mơ gùng kis kòn dê kơp ngai. Dăn Yàng rcăng sir kòn nàng kòn rgơi lơh ală broă niam mơ Kơnràñ neh rcăng lai. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, tòm tŭ cau ndai lăng tòm rai kis oh mi, bol khai gơs sền gŏ rup să Yàng Jêsus găn dê gùng oh mi kis, đơs mơ lơh lòt kơp ngai hala ò? Dilah ngai dô Yàng kòñ ngui oh mi nàng sol pơnđang tòm ơnih tiah tŭ dô, bulah la tòm hiu nhă, klơng bơtê, tiah lơh broă, hala ală tiah lơi ndai, gen oh mi gơs niam nùs rcăng sir tơmgơl mơ kis ràng tơlik bơta àng Kơnràñ dê hala ò?
Dilah gơs bơta lơi lơh oh mi ò rgơi ràng tơlik bơta ang hơ̆, gơjràñ săng glài tĕ mơ hôi dăn mơ Yàng tơmgơl nùs nhơm oh mi. Bơh oh mi neh geh kơp la song ring kơnơm dê Yàng Jêsus, gen tang dòn nền tĕ tòm jơnau song dô mơ cơnđòa lòt tòm gùng song ring Kơnràñ kơp ngai. Kơp ngai oh mi rgơi git lam Jơnau Yàng đơs hơđăng rai kis he lah: “gùng lòt cau song ring dê la kung be bơta àng àng drim dê”. (Jơnau Pơnđik 4:18)

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.