Gơs tŭ lơi oh mi sền gŏ he giga ngan, kư ntoàt jat broă lơh, gơnoar broă hala ală bơta kơlôi rcang rài do, tiàn gơs hŭi đơs jơnau ưnngai sơl? Bol he buôn cih kah ală bơta jê-sồt, roh gơn kơnòm hala ală bơta òhềt niam nùs, mơ ya hŭi sền wơl ală bơta lơngai hòr lik gùt dar he. Gơs ală ngai sơrlèt rlau mơ nùs nhơm bol he ò tŭ lơi đơs “ưnngai”, mơ să tòm bol he kung sền gọ̆ hut-hâng, siău bơta rĭng-lơngai. Dilah kong òbat tài dô ềt lơm, bol he rơp đal git lah ală tŭ tơngai la tŭ lơmpah nàng bol he ơn jơnau ưnngai Yàng, tài bơh kờp phuk jây tê Kơnràñ òs sùm yò đo, lăm gùng rài kis bol he.

Ngai do, ngai 23/11/2025, Bơta Hòi Dan Kờp Ngai dan jà cau iat kơlôi sơnơng Jơnau Yàng kơnòm di bơta dong kơl Marissa Nordlum bơh tơnggume BƠTA BƠTÊ BƠH JƠNAU ƯNNGAI.

“Ăñ rơp jơh nùs ưnngai Yàng Jehôwa, ăñ rơp yăl tơlik jơh ală broă crih-crài Kơnràñ dê.” (Đơs Crih 9:1)

Tom tŭ gam dềt, kờp dơ̆ añ lòt kơnhơl hiu cau bơyô, mè sùm tơngkah: “Kòn kah tĕ đơs jơnau ưnngai yo.” Dilah geh jà sa piăng, añ pal đơs ưnngai. Dilah geh ai pà phan ai gòi, kung pal đơs ưnngai. Kờp dơ̆ añ lòt kơnhơl tom hiu cau bơyô rê, mè sùm lùp: “Ngai do kòn neh đơs ưnngai hala ò?” Bàr jơnau “ưnngai” gơ tăm jrô tơm añ bơh tŭ găm dềt, tiàn gơs añ đơs bơta hơ̆ be òs ò bassil, tài bơh añ git lah hơ̆ la bơta pal lơh. Mơ ya oh mi sền gọ̆ sơl, digùl dô jơnau “ưnngai” đơs jat bơta òs mòng mơ jơnau ưnngai lik bơh nùs nhơm gen la dô cơnđòa jòng ngan.

Tom Luka 17, Sră Goh yal dô bơta yal yau lơh añ sùm kơlôi sơnơng-dô pơnyơu bơh nùs git kah bơta nđàc dờng ơnàng, sọ̆ng-ngan. Yàng Jesu tom gùng lòt tus hơ Jerusalem, lòt gan Samari mơ Galile, Kơnràñ tus hơ dô ƀòn gơs 10 nă cau dun ntào ngài ngai. Sră Goh yal lah jơh ală bol khai hòi Kơnràñ. Mơ tom tŭ Yàng đơs, jơh tơl nă geh sơmbòi (Luka 17:11-14).

Bol he ò git oă bơh bơta yal yau do, kung be bol khai neh gơkòl kòp dun do nđò jọ̆. Mơ ya loh lang bol khai la ală cau gơkòl cau săng-lòi, kis tom bơta jê-sồt, mơ ò găm bơta gơn kơnom lơi geh sơmbòi wĭl tơl. Digơlăn bol khai neh kis jọ̆ sơnam tom bơta kòp ji, kơp gơn dô bơta gơn kơnom bơh dô bơta krơi. Mơ Yàng Dong-Klàs Jesu tơlik mat, mơ mìng tom dô tŭ, jơh tơl nă geh sơmbòi.

Mơ ya krơi ngan, mìng gơs dô nă tom bol khai rê wơl nàng ưnngai Yàng. Sră Goh cih:

“Gơs dô nă cau tòm mpồl bol khai gŏ he neh geh bòi, gen rê wơl, ai jơnau driau dờng jòng ro Yàng Tom Trồ, tơmbic să di jơng Yàng Jesu mơ ưnngài Kơnràñ.” (Luka 17:15-16)

Añ kơlôi ală bơta hơ̆. Cau dun do dơ̆ sơnròp dòp git wĭl tơl bơta krơi gơlik gơs, nùs nhơm bîng bơta ưnngai, mìng git tơmbĭc să di jơng Yàng mơ đơs jơnau ưnngai. Ngan la dô tŭ jơ rngoh-rngàc rlau jơh, rgơi đơs la “nùs git ưnngai ò jơh bơh nùs nhơm.” Cau hơ̆ tơmbic să di đap Yàng, bơta hơ̆ lik bơh nùs nhơm ai lơh krơi ngan mơ git ưnngai.

Ai sĭn nă cau ne mbe lơi? Bol khai lòt mơ ò tŭ lơi rê wơl. Kờp dơ̆ sền tap do, añ lùp is: “Ñchi bơh tai bol khai ò ưnngai Yàng?” Mơ ya añ đal git lah…să tom añ kung òs hŭi ưnngai Yàng tài bơh ală bơta crih-crài Kơnràñ lơh tom rài kis añ. Añ òs sùm hŭi rê wơl mơ ưnngai Kơnràñ. Añ kung la dùl tom sĭn nă cau hơ̆. Bơta crih-crài Yàng dê gùt dar añ, mơ ya añ hŭi ơ̆t wơl nàng đơs lah: “Kòn ưnngai Kơnràñ.”

Gơs tŭ lơi oh mi lùp is he: bol he đơs ưnngai mìng tài bơh bơta òs mong, mìng tài bơh geh sồr la pal đơs behơ̆, hala lik bơh nùs nhơm ngan hala ò? Nđò dơ̆ rau bol he hŭi ưnngai Yàng tài bơh ală bơta niam rlau jơh Kơnràñ lơh kờp ngai tom rài kis he?

Ngai do, gơs dô bơta hòn-chò! Ò di òbat nàng rê wơl, nàng kah wơl jơh ală bơta Yàng neh lơh bol he in. Tŭ do mo, bol he rgơi ơn Bèp Hơđang Trồ in jơnau ưnngai bơh nùs nhơm.

Đơs Crih 9:1 tơngkah oh mi mơ añ lah:

“Ăñ rơp jơh nùs ưnngai Yàng Jehôwa, ăñ rơp yăl tơlik jơh ală broă crih-crài Kơnràñ dê.”

Dan jà bol he dô nùs bal tòm bơta hòi dan: Khoai Yàng Dọ̆ng-Klàs Jesu, kòn ưnngai Kơnràñ tài bơh ală bơta lơngai Kơnràñ neh ai tom rài kis kòn, bulah oă dơ̆ kòn hŭi ò bài dòp git. Dan dong kơl kòn ơm bơdơh wơl digùl ală giga rài kis dê, nàng pò nùs mơ đal git ngan bơta gơs mat Kơnràñ dê. Dan bơto kòn git ơn jơnau ưnngai bơh nùs nhơm, ò di mìng mơ jơnau đơs mơ ya mơ jơh rài kis kòn dê. Dan nùs nhơm kòn sùm ò dơh bơta ai lơh krơi, git ưnngai mơ hon-chò tom bơta niam rlau jơh Kơnràñ dê. Kòn dan kŭn bồ di đap Yàng tom bơta yal tơlik nùs nhơm git ưnngai ngan, mơ dan kis mơ nùs nhơm git sền dờng mang jơh ală bơta Kơnràñ ai. Kòn jơh nùs hòi dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, ngai do, bơta crih-crài gam kư pơnjat gơlik gơs gùt dar bol he. Oh mi gam pơnjat cơnoà lòt tai mơ hŭi ơm bơdơh wơl nàng đơs jơnau ưnngai Yàng sơl? Hala oh mi rơp rê wơl, tơmbic să di đap Kơnràñ, mơ bơh nùs nhơm kòñ ơn jơnau ưnngai? Do la jơnau hòi jà ai jơh kờp nă bol he in: rê wơl tĕ mơ Yàng, sền wơl ală bơta niam rlau jơh Kơnràñ neh lơh, mơ ơn wĭl tơl nùs nhơm git ưnngai- ò di mìng mơ jơnau đơs lơm, mơ ya mơ jơh plai nùs.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.