Gơs tŭ lơi oh mi lùp is lah ñchi bơh tai bol he pal hòi dan, tòm tŭ mơ Yàng Tom Trô neh git jơh ală bơta kơlồi, jơh ală bơta kòp kờñ bol he dê? Kơnràñ git bơta jề sồt dunnia dò, git jơh ală ntih dà mat gơhòr òm, mơ Kơnràñ kung git jơh ală bơta mơ oh mi mòr đơs tơlik lài mơ tŭ ală jơnau hơ̆ lik bơh di bờr. Behơ̆ gèn ñchi bơh tài Kơnràñ găm bơtô bol he pal hòi dăn mơ yal jơh ală bơta he dê Kơnràñ in? Broă hòi dăn ngăn gơs gơtha lơi?

Ngai do, ngai 24/11/2025, tơnggu Hoi dan Kòp Ngai dan jà ông mò oh mi kơlồi sơnờng bal jơnau Yàng kơnòm bơta dong kòl Missey Butler bơh tonggu LÀI MƠ TŬ BOL KHAI HÒI DAN.

“Lài mơ tŭ bol khai hòi dan Añ ròp hơ wơl.” (Esai 65:24)

Pa do, tòm tŭ ăt rơndeh lòt lơh broă, añ tòmbơh bơr mơ Yàng be òs lơh. Añ hòi dan: “Khoai Yàng, Kơnràñ git loh bơta jề sồt jrồ ndơp mơ ală kòn sau Kơnràñ tòm oă tiah pal kong. Kòn dòn lah nùs Kơnràñ kùng lề làc bơh ală bơta hơ̆.”

Behơ̆ gèn nùs añ dòp git Yàng găm tơngkah añ lah: Kơnràñ là Bơtau òs neh mòng mơ bơta moat jrùng mơ jề sồt. Kơnràñ ò di mìng sền gŏ kơnhwal tiah tơrlah tơrlìng, mơya kùng sền gŏ jơh dunnia găm păl kong bòl glăr, bơh măt Kơnràñ sền sơwì làm bă tiah. Tòm tŭ añ mìng gŏ bơta di đăp măt he, gèn Kơnràñ sền gŏ mpan rùp wil tơl.

Tŭ hơ̆, añ sền gŏ nùs he ngăn rngòt rngơt, kah tùs jơnau Yàng tom Esai 55: 8: “Bơh ală bơta kơlôi sơnưng añ jê ò di la bơta kơlồi sơnưng bol mê dê, hala gùng dà bol mê di ò di la gùng dà añ jê.”

Añ hơ mơ Kơnràñ lah: “Khoai Yàng, ngăn la behơ̆. Bơh nhar kòn mơnùs dê, oă tŭ bol kòn ƀuôn pìn wil wơl bơh bơta kờn gơboh Kơnràñ dê, ò dòn lah Kơnràñ sùm kờp kờñ dong twoai, sơmbời mơ lơh pa wơl kờp tŭ hwềng soàn kàs màng găm tis nrah tòm dunnia gơpừ do.”

Tòm tŭ hơ, Yàng tơngkah añ kah tùs bàr sèng Sră Goh bềng gơnăp gơnoăr, đơs bơh bơta git jơh Kơnràñ dê. Tòm Esai 65: 24, Kơnràñ tơngkah bol hi: “Lai mơtŭ bol khai hòi dan añ ròp hơ wơl.” mơ tòm Đơs Crih 139: 4, Sră Goh cih: “Tian gơs lơmpiat añ ò hềt đơs dô jơnau, Ơ Yàng Jehôwa, Kơnràñ neh git tơl jơh rau.”

Nisơna, añ lùp is: “Ơ Yàng, dilah Kơnràñ neh git lai jơh ală bơta lài mơtŭ bol kòn hòi dăn, gèn ñchi bơh tai Kơnràñ găm bơtô bol kòn pal hòi dăn?”

Tom nùs añ be geh Yàng chồl tơngkah: “Hòi dăn ò lơh Añ tòm gơl, mơya hòi dan tòm gơl să tòm kòn.”

Nisơna añ driau dơng tòm nùs: “Ôh!” añ ò hềt tŭ lơi kơlồi behơ̆, mơya sơlò kơlồi sơnừng, añ sơlờ sền gŏ hơ̆ la ngăn.

“Bơh añ la Yàng Jehôwa ò tŭ lơi tòmgơl.” (Malaci 3:6).

Tŭ hơ̆ añ đal git lah bol he ò hòi dăn nàng bơklơn Yàng tòmgơl nùs kờñ Kơnràñ dê. Pơrlơ̆ wơl, Yàng ngui bơta hòi dan nàng tòmgơl bol he, nàng bol he gơlik gơs do nơm gri gời rcăng sìr tòm broă Kơnràñ dê. Mơ bơh hơ̆ Kơnràñ tuh bèng liu gơnap gơnoăr hơđăng bol he, tiar mòn bol he jat rùp Kơnràñ dê. Hơ̆ kùng là tơnggu Yàng Jesu neh bơtô bol he hòi dăn: “Dan nùs kơñ Bèp gơs dê, ò di jat nùs kòn!” tŭ hơ̆, bol he gơlik gơs đò tê Yàng dê sơnoa, tùs mơ dunnia bềng bol glăr găm rò jruh, mơ pal càng ngăn Kơnràñ bừ tus.

“Bơh bol he git lah ală phan tòm trồ tiah neh ràc ròc mơ kong bol glăr jề sồt be bơta jề deh jơl tùs di tŭ do.” (Rôma 8:22).

“Bơh ală phăn tòm trồ tiah jơh nùs kop kờñ mơ gơn kòp bơta ràng tơlik ală kòn sau Yàng Tom Trồ dê. Ală phăn tòm trồ tiah neh kol dòn duh bơta roh lơm, ò di bơh nùs is gơ di, mơya bơh nùs kòñ Bơtau neh sồr gơ dòn duh. Ală phan tòm trồ tiah gơn kơnòm gơ ròp geh hồ toh lik klàs bơh di bơta lơh gơs dĭ gơna bơta roh lơm dê, tồ dòp bơta khat gơboh tòm bơta gơklŏ kòn sau Yàng Tom Trồ dê.” (Rôma 8:19-21).

Tŭ ală rơndeh gơ ntoat mhăr mhăr tom tŭ jơ ang drim, añ kơlồi sơnưng òm bơh ală jơnau do. Dô dơ̆ tai, añ be geh sền git làm nùs nhờm bơtau hơđăng ală bơtau dê, mơ nùs añ ơn dô bơta kờn gơboh jơh nùs.

Dan jà bol he dô nùs bal tòm bơta hòi dan: Khoai Yàng kờñ gơboh, kòn ưn ngai Kơnràñ bơh Kơnràñ sùm git jơh ală bơta kòn găm tòm tip, lai mơ tŭ kòn ò hềt yăl mơ Kơnràñ. Dăn toh glài kon in bơh oă tŭ kòn pin wil wơl bơh bơta kờñ gơboh mơ gơnăp gơnoăr Kơnràñ dê. Dăn bơtô kòn git joi git nùs kờñ Kơnràñ dê rlau mơ ntoat jat nùs kờñ he dê. Dan tòmgơl nùs kòn găn di bơta hòi dăn, nàng kòp ngai kis pơnđàng bơta kờn gơboh mơ bơta lơbơñ niam Kơnràñ dê ai ală cau gam càng gơn kơnòm. Kòn jơh nùs hòi dăn tòm sơnđăn Yàng Jesu Krist, Amen.

Ơ ală ông mò oh mi kờn gơboh, ồng mò oh mi rcăng sìr hơ wơl jơnau Yàng di hòi ja bol he hòi dan sơl? Oh mi ai lơh crih crài ngăn tòm tŭ dal git lah bơh lài mơtŭ bol he rac dăn, Yàng neh git mơ neh rcăng sìr hơ wơl ràu. Hoi dan ò lơh Yàng tòmgơl nùs, mơya hòi dăn tòmgơl nùs nhờm bol he dê nàng gơlik di ngăn tòm toh mờ nùs kờñ Kơnràñ dê. Mơ tŭ hơ̆, Kơnràñ rgơi ngui bol he be ală phan ngui cèng wơl bơta kờn gơboh, bơta sơmbời mơ bơta gơn kơnòm tùs ai dô dunnia găm jề sồt. Niam ngăn ò git lơh tòm tŭ bol he geh duh broă dô nă Yàng Tom Trồ be hơ̆!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.