Kòp năm, kư̆ tus ngai bar, poh dơ̆ bar kơnhai 10 tom Canada di, mơ ngai pram poh dơ̆ poăn kơnhai 11 tom lơgar Mĩ, gơs dô nơm ngai pơjum wer dờng geh họi bơh sơnđăn Pơjum Ưnngai. Do la ngai rlô geh kòp la dô ngai dờng lơh nền tòm ală dà lơgar tom đah đăng lơgar Mĩ di. Tòm ngai hơ̆, ală hiu nhă òs tòm klac băl gut dăr cơnong ram, tòm pà ală jơnau ưnngai niăm rlau jơh geh cih tòm ală sră pơyoa gơp ĭn. Gen, gơwèt mơ ală hiu nhă dòn duh Yang, do kŭng la tŭ ơn jơnau ưnngai Yang Tom Trồ bơh bơta ai gòi ò git lơh hơđăng hiu nhă, broă lơh, ală kọn mơ bơta lơh lòt tòm rài kis. Crap wơl, do ò di mìng là dô ngai wèr lơm ò, hala dô bơta lơh lòt niăm ală cau digah đah mattơngai lik, mơya kung là tŭ tơngkah ală kọn sau Yang bơh nùs nhờm ưnngai tòm ală bơta gơlik tus. Ăñ lùp is he: lơh mbe lơi nàng bur tăm mơ lơh jat nùs nhờm ưnngai Yang tòm hiu nhă dềt ăñ ji, tiah ăñ kis tom lơgar Việt Nam, ngài lơgar đah mat tơngai lik gùl plai ù taih?

Ngai do, ngai 25/11/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê bơh Tơnggume KIS BƠH NÙS NHỜM ƯNNGAI YANG.

“Mơya bol he la cau neh bal mơ trồ ngai, gen tàng ngac mat tĕ, dòp soh bơta dòn mơ nùs kòñ gơboh kung be ào lòs, ai bơta gơn kơnòm bơh bơta dong klàs lơh gơs kung be sơgơn lòs.” (I Tesalônika 5:8)

Wèr Ưnngai tòm jơnau Anh la Thanksgiving. Tom năm 1620, gơs dô êt nă cau Anh jat gùng duh khoai Thanh Giáo (Puritans) lik bơh lơgar Anh tus Tân Thế Giới (lơgar Mĩ ngai do) hơđăng ơhò Mayflower nàng jòi bơta khat gơboh tòm gùng duh khoai. Tŭ bŏl khai tus Plymouth, tiểu bang Massachusetts, tiah gơs kơnhai mrềt noat ngăn, gơs rlau mơ nggul nă cau neh săng rài bơh jơglọh, bơh mrềt, bơh kòp ji gut dăr.

Tòm bơta gơplơ̆ nùs behơ̆,Yang Tom Trồ neh ngùi mpồl làng bŏl cau Mĩ, đơs tòmtọh ngăn la mpồl cau Wampanoag băl mơ mpồl cau Squanto neh dŏng kòl ală cau hành hương bơh ală bơta pha is, be là: sơñio bŏl khai ĭn bơta tùc tăm, lòt păñ phăn brê, mơya kŭng bơtọ bŏl khai bơh bơta tòm pơndăng bơh trồ mrềt kalke ngăn tòm kơnhai mrềt di. Bơta tòes wơl cồng nha lồi dut kơnhai ro jrùh ñha 1621, bơh cồng nha plai đo rlau mơ bơta kơp koñ. Ală cau hành hương neh rơndăp bơta kir sơnre dờng nàng ưnngai Yang lài ngăn, mơ tơnơ̆ ưnngai mpồl cau neh dŏng kòl bŏl khai neh sền gar bơta kis tòm ală ngai neh lòt găn. Bơta rơndăp hơ̆ neh tơlik măt niăm ngăn, ram, bềng lìu bơta koñ gơboh mơ lài ngăn la nùs nhờm ưnngai sŏng ngăn gơwèt băl mơ gơp. Bơh hơ̆, Ngai Wer Ưnngai rhòi rhòi gơlik gơs bơta kir sơnre niăm ngăn mơ kung la ngai wèr dờng dà lơgar tòm ală lơgar tòm Bắc Mĩ.

Việt Nam, tiah ăñ kis ngai bơh Bắc Mĩ rlau gùl plai ù. Tŭ mattơngai ơm tòm tiah do geh tơlik tŭ rĭng àng drim, gen mattơngai mut lọh lang tòm trồ măng. Bulah behơ̆, rhòi rhòi jat bơh phương tiện truyền thông mơ ală mạng xã hội, Ngai Wer Ưnngai mơ gơtha gơ neh gơlik gơs òs mòng rlau tòm Việt Nam, lài ngăn là digul mpồl cau dòn jat Yang, tơrgòm gơs hiu nhă dềt ăñ ji.

Nùs dòn kơnòm mơ ưnngai Yang Tom Trồ, là Bơtau Crơng gơs, tòm ală bơta gơlik gơs rài kis di, bulah bơtoah hala ò bơtoah, bulah hòn chò hala moat jrung, neh lơh ăñ ĭn kah tus sèng Sră Goh geh cih tòm sră I Tesalônika 5:18 “Bulah tòm broă lơi kung pal ưnngài Yàng Tom Trồ, bơh nùs kòñ Yàng Tom Trồ dê tòm Yàng Krist Jesu gơwèt mơ oh mi la behơ̆.”

Do la sèng Sră Goh geh cih ai bơh ală sră pơyoa sơnrờp ồng Pol di pơyoa Hiu Jum Goh ĭn tom Tesalônika năm 50-51 Ngkơi Yang. Sră do geh pơyoa tus ală cau dòn găm lơbơn tòm bơta dòn tòm Rô ma tŭ hơ̆, găm tìp bơh bơta kòl kup kơryan tòm pơndăng bơh cau Do Thái mơ mpồl cau lang bŏl bơdih. Lài hơ̆, Pol bơtọ tơngkah mơ chồl bơtrut làng bŏl Yang :

“[16] Hòn chò tĕ sùm sùm. [17] Hòi dan tĕ ò dơh. [18] Bulah tòm broă lơi kung pal ưnngài Yàng Tom Trồ, bơh nùs kòñ Yàng Tom Trồ dê tòm Yàng Krist Jesu gơwèt mơ oh mi la behơ̆.”

Jơnau “tĕ” tềng do gơtha bơh gơnoăr sôr gơ tềng rềng tus nùs nhờm càng gơs cau dòn jat Yang. Là làng bŏl Yang di, bŏl he păl ưnngai Yang tòm ală bơta. Đơs lọh rlau là, bulah tòm bơta gơlòng bŏl glăr hala ji sồt moat jrung ngăn, tơ’ai lah iơh rlau tŭ tìp bơh ală bơta tìp bơta rọh gơcọh bềng ji sồt, gen cau dòn Yang găm òs git lah Kơnrẵn găm tơlik mat mơ ơm băl mơ he tòm rài kis, Kơnrẵn at bồ ală bơta. Nùs ưnngai ò di mìng la broă lơh nùs kơp koñ òs gơs, mơya hơ̆ la bơta đal git bơh dô bơta kis di păl tòm bơta gơtòmklac băl mơ Yang Tom Trồ. Mìng tŭ lơi ơm tom bơta gơtòmklac he dềt mềr băl mơ Yang Jesu Krist, gen kọn mơnùs rơp dòn bơr Yang Tom Trồ dô bă wil tơl mơ ưnngai Yang tom ală bơta.

Bơh bơta bơtọ jrô ndơp tòm jơnau Yang, ăñ cèng ơn tom nùs ală cau kơnòm tòm tŭ jơ hìu nhă pơjum họi dăn tòm măng lài mơ tŭ ngai Wer Ưnngai gơlik gơs. Ăñ kơrhia tơngkah ală kọn lah: Ngai hìng me rơp rcang dô êt phăn sa bơkah ală kọn koñ, jơh hìu nhă he rơp sa băl dô bă pha is mơ ală ngai ndai. Tơnơ̆, kòp nă cau tòm hiu nhă rơp tơngkah wơl ală bơta nđàc Yang neh lơh gơwèt mơ hiu nhă he tòm ală ngai lòt găn, băl mơ đơs jơnau niăm her koñ gơboh gơwèt băl mơ gơp.
Tòm măng ngai hơ̆ niăm her ngăn, bŏl hi dô bă băl rcang phăn ngùi sa măng, chu nđợ nơm jrềng nàng cơnòng sa tồ răm, rơndăp prèng ơn plai đo, lik bơh suơn koh bơkao digah pơnggar, mơ phăn sa geh rcang niăm ngăn, niăm her bơh măt rlau mơ ală ngai ndai. Lồi dut, bŏl hi oan tŭ jơ họi dăn lài mơ tŭ sa nàng Ưnngai Yang bơh bơta nđàc Kơnrẵn ai pà hiu nhă he tòm ală tŭ jơ neh lòt găn. hơ̆ là broă bŏl hi cèng jơnau Niăm mơ bơta gơs kwơ nùs nhờm ưnngai Yang mơ ưnngai băl ală cau tòm hiu nhă he di. Pơjum Wer Ưnngai hiu nhă bŏl hi dính gơlik gơs tòm bơta hòn chò, ram niăm mơ bềng bơta tơngkah bơh bơta nđàc Yang ai.

Dan jà bol he dô nùs bal tòm bơta hòi dan: Khoai Yang la Yang koñ gơboh bŏl kọn di, bŏl kọn ưnngai Yang Tom Trồ tài bơh bơh Yang Dong Jesu, bŏl kọn geh lơh gơs kọn Kơnrẵn di. Bŏl kọn geh Kơnrẵn koñ gơboh, , sền gar mơ ai pà bơta nđàc bŏl kọn ĭn kòp ngai. Jơnau Yang bơtọ sôr bŏl kọn sum hòn chò tòm bơta koñ nđàc Yang di, kơrmap gar bơta gơtòmklac dềt mềr băl mơ Yang bơh bơta họi dăn kòp ngai. Òs păl ưnngai Yang tòm ală bơta gơlik gơs tòm rài kis. Kọn họi dăn dăn Yang bơtọ sôr kọn kòp ngai kis jat bơta bơtọ sôr Yang di mơ lơh jat. Kơp koñ rài kis bŏl kọn òs sum ưnngai Yang tòm ală bơta mơ sền kwơ màng ală bơta ai pà Kơnrẵn di. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, kis git ưnngai là dô bơta kis niăm. Mơya, la cau don jat Yang gơwèt bơta đal git bơta nđàc là phăn bàn kas màng Yang Tom Trồ ai pà, broă lơh jat bơta kis git ưnngai là dô nơm gơnoăr sôr kalke lơh jat ndăng, mơya kŭng la dô gơnoăr sôr niăm nàng dŏng să tom he wil tơl bơta lơh lòt niăm tòm bơta gơtòmklac dô nă cau gơwèt mơ Yang Tom Trồ ndăng. Băl mơ hơ̆, tŭ lơh jat bơta kis git ưnngai ală cau geh Yang sac rwah, nàng bŏl khai cèng tus bơta niăm gơrềng tus hơđăng rài kis să tom he tòm kòp tŭ jơ mơ broă gơlik gơs pha is, la broă bŏl he găm ràng tơlik sơnđăn Yang tus ală cau gut dăr he. Kơp koñ kòp nă cau dòn Yang păl đal dòp git mơ lơh jat bơta kis git ưnngai Yang tòm ală bơta gơlik gơs nàng sơnđăn Yang geh jòng ro.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.