Rim kơ sơnăm, na lăm năr mă mônh giĕng mă ‘bar lăm khei 10 tơ Canada, na lăm năr puăn lăm giĕng mă puăn lăm khei 11 tơ Mi, đei kơ phĕt anăn Phĕt Bơnê. ‘Nâu jơ̆ năr pơdơh lăng nhen thoi phĕt kơ lăm dêh char noh tơ gah yă nơ̆m dêh char Mi. Lăm năr noh, lu hnam dơnŏ hơ oei jum dăr kơ kơ’bang sŏng sa tơmam, tơ ăn băl kơthơ hăm jơhngơ̆m băt bơnê tơpă. Phara ‘biơ̆ noh, hăm lu hnam dơnŏ lui kơ ‘Bok Kei-Dei, ‘nâu kư̆m jơ̆ năr phara ‘biơ̆ wă bơnê kơ ‘Bok Kei-Dei yua kơ Sư tuh ăn kơ hnam dơnŏ, tơdrong jang, kơ kon hơ’lơ̆p hăm tơdrong arih. Thoi noh, ‘nâu ưh kơ sĭ khan năr phĕt hmă đĕch, dah tơdrong juăt kơpơm lu bơngai Mi, mă năr wă tơ’blŏk kơ bơngai lui kơ Kră Yang gah jơhngơ̆m băt bơnê lăm tôm tơdrong. Inh đei jet kơdih: pơm thoi yơ wă pơtăm bơwei păng pơm kiơ̆ đei jơhngơ̆m băt kơ bơnê đơ̆ng lăm hnam dơnŏ kơdih, anih mă inh arih tơ Viêt Nam, ataih đơ̆ng dêh char Mi minh puăt kơ teh đak?

Năr ‘nâu, ‘năr 25/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai ARIH HĂM JƠHNGƠ̆M BƠNÊ KƠ KRĂ YANG.

“Năr iĕm chơt hiôk, dah năr iĕm đei tơdrong gleh sơ’ngon iĕm kư̆m athei bơnê kơ ‘Bok Kei-Dei mơ̆n, dui jơhngơ̆m mă tai wă kơ huay ơh sơ’ngon. Hăm ‘nĕ hiơt krao khan kơ Sư ling-lang. Thoi noh boih ‘Bok Kei-Dei wă kơ bơ̆n lui kơ Kon Sư Yêsu Krist.” (I Têsalônika 5:16-18)

Phĕt Bơnê lăm nơ̆r English jơ̆ khan Thanksgiving. Lăm sơnăm 1620, đei lu bơngai English kiơ̆ kơ tơdrong lui anăn sư ‘Lơ̆ng Rơgoh (Puritans) đei lĕch đơ̆ng teh đak Englishtruh tơ tuch luch kơ Dêh Char (Mi hrei âu), tơ lăm duk Mayflower wă chă tơdrong rơngei gah tơdrong lui. Kơplah lu sư truh tơ pơlei Plymouth, dêh Massachusetts, đei kơ bơyan tơngiĕt dêh, đei wă minh puăt lăm lu khŭl bơngai năm hơdai lu sư lôch yua kơ pơngot, tơngiĕt, hăm tơdrong jĭ truh tơ lu sư.

Kơplah lăm tơdrong arih thoi noh, ‘Bok Kei-Dei đei yua bơngai kơ tă tơ dêh char Mi, pơma mă trŏ hloh noh adrĕch adrŭng bơngai Wampanoag hăm lu bơngai Squanto đei tơgŭm lu bơngai năm truh tơnoh hăm lơ tơdrong tơgŭm pơm phara băl lăm tơdrong arih thoi kơ: bơtho lu sư choh pơtăm, chă druh sem bri, na phara ‘biơ̆ noh bơtho lu sư băt kơ bơwei akâu kơplah bơyan tơngiĕt tơ anih ‘nâu. Bơyan kĕch iŏk lăm sơnăm blŭng a noh lăm sơnăm 1621, hăm dôm kơ kơ hơ’bo, ‘ba kĕch iŏk đei hloh kơ lu sư tơchĕng. Lu bơngai năm arih tơnoh đei pơjing sŏng sa tih wă bơnê kơ Kră Yang hơdrol hloh na đơ̆ng rŏng kơ noh bơnê kơ lu kon pơlei kơtă tơ noh, đei tơgŭm lu sư đei arih đơ̆ng dôm kơ khei năr lu sư truh tơnoh. Sŏng sa hăm jơhngơ̆m chơt hiôk, đei jơhngơ̆m ‘mêm păng đei jơhngơ̆m băt kơ bơnê dih băl. Na đơ̆ng noh, Phĕt Bơnê ‘net ‘net jing tơdrong juăt tih păng jing phĕt đĭ kơ lơ dêh char pah yă nơ̆m kơ dêh char Mi.

Viêt Nam, anih inh arih ataih đơ̆ng dêh char Mi minh puăt kơ teh đak. Kơplah măt năr lĕch tơ pah âu kơplah pơge hrôih pah to jơ̆ tŏk bŏk măng. Mă khan thoi noh, ‘net ‘net đơ̆ng dôm tơmam pơdah thoi kơ tivi, Phĕt Bơnê noh jing thoi ‘bôh juăt jue bơih tơ dêh char Viêt Nam, mă loi lăm lu khŭl bơngai lui kơ ‘Bok Kei-Dei, lăm noh đei hnam dơnŏ inh.

Jơhngơ̆m đei lui gơnang păng băt bơnê kơ ‘Bok Kei-Dei, jơ̆ Tơ’ngla pơjing, tôm kơ tơdrong arih, mă tơdrong ‘lơ̆ng dah tơdrong ưh kơ thoi bơ̆n wă, mă khan hiôk chơt dah ơh sơ’ngon, pơm kơ inh ‘blŏk tơ nơ̆r ‘Bok Kei-Dei lăm hla bơar I Têsalônika 5: 16-18: “Năr iĕm chơt hiôk, dah năr iĕm đei tơdrong gleh sơ’ngon iĕm kư̆m athei bơnê kơ ‘Bok Kei-Dei mơ̆n, dui jơhngơ̆m mă tai wă kơ huay ơh sơ’ngon. Hăm ‘nĕ hiơt krao khan kơ Sư ling-lang. Thoi noh boih ‘Bok Kei-Dei wă kơ bơ̆n lui kơ Kon Sư Yêsu Krist.”

‘Nâu jơ̆ nơ̆r ‘Bok Kei-Dei đei chih iŏk đơ̆ng lăm kơ thơ blŭng a ‘bok Pôl chih ăn kơ Hnam Akŭm Têsalônika dang kơ sơnăm 50-51 đơ̆ng rŏng kơ Yang Yêsu tŏk tơplĕnh. Kơthơ ‘nâu gơih ăn kơ khŭl bơngai lui ‘blŭng a đon lui oei tam mă hlôh wao lơ tơ dêh char Grĕk kơplah noh, lu sư đei tơ’bơ̆p tơdrong truh pơm kơnê̆ đơ̆ng bơngai Isơrael păng đơ̆ng khŭl bơngai gah ‘ngoaih kơ dêh char sư. Hơdrol kơnoh, ‘bok Pôl bơtho păng pơlung khŭl bơngai lui kơ ‘Bok Kei-Dei:

“Athei chơt hiôk ling lang” (trong 16), “Krao khan khŏm khŏm” (trong17). Păng “Athei krao khan bơnê kơ Kră Yang mă khan đei tơdrong gleh truh thoi yơ” (trong18)

Nơ̆r “athei” ‘nâu wă khan wơh đei đơ̆ng lăm jơhngơ̆m kăl kơ đei lăm bơngai lui. Jơ̆ bơngai lui kơ Kră Yang, lu bơ̆n athei bơnê kơ Kră Yang lăm rim trong tơdrong arih. Pơma mă rơđah ‘biơ̆, mă khan lăm dôm tơdrong pơlong lăng dah chhŭr nuih, truh tơ‘bơ̆p dôm tơdrong hiong răm ơh sơ’ngon, na bơngai lui kơ Kră Yang athei ling lang băt kơ Kră Yang ling lang yak năm hơdai hăm bơ̆n lăm chăl arih, sư pơgơ̆r tôm tơdrong. Jơhngơ̆m băt bơnê ưh kơ sĭ pơm đĕch, noh jơ̆ đơ̆ng tơdrong hlôh trŏ tơpă lăm tơdrong pơgơ̆p hăm ‘Bok Kei-Dei. Lăp minh tơdrong kơdih bơ̆n pơgơ̆p hăm Yang Yêsu krist đĕch, kon bơngai đei chu yom ‘Bok Kei-Dei tôm tơdrong păng băt bơnê kơ Kră Yang lăm tôm tơdrong.

Đơ̆ng lăm dôm kơ ‘bai hŏk gĭt kăl lăm nơ̆r Kră Yang, inh chĕp ba dan lăm jơhngơ̆m kon hơ’lơ̆p lăm hnam dơnŏ inh lăm jơ krao khan akŭm krao khan lăm hnam dơnŏ hơdrol kơ năr Phĕt Bơnê đei pơjing. Inh tơ’blŏk kơ kon hơ’lơ̆p inh thoi âu: Dơning mĕ gô hơmet tŏsĕt tơmam sa ‘lơ̆ng mă lu iĕm ‘maih wă, hnam dơnŏ bơ̆n sŏng sa tơ gah kơmăng phara ‘biơ̆ kơrim năr. Đơ̆ng rŏng kơ noh, rim ‘nu lăm hnam dơnŏ gô roi dôm tơdrong Kră Yang tuh ăn kơ hnam dơnŏ nhôn đơ̆ng ki sơ̆, na kư̆m pơma nơ̆r ‘mêm dih băl.

Kơmăng noh phara tơpă, lu nhôn wŏng hơdai hơmet tơmam sa, soh ŭnh jrĕnh pơm dan tơ kơ’bang sŏng sa rai hơ iă hloh, dan minh pơnhan chhĕr plei ‘long, lĕch tơ pơgar kăt pơkao tơdur, na tơmam sa đei hơmet ‘lơ̆ng, ‘lơ̆ng hloh kơ rim năr. Tuch luch, lu nhôn ‘măn jơ krao khan bơnê kơ Kră Yang yua kơ pŭn hiôk đơ̆ng Sư tuh ăn kơ hnam dơnŏ nhôn đơ̆ng ki sơ̆.

Noh jơ̆ lu nhôn tơ’bôh păng gĭt kăl kơ đei đơ̆ng jơhngơ̆m băt bơnê kơ Kră Yang păng băt bơnê dih băl lăm hnam dơnŏ nhôn. Phĕt Bơnê lăm hnam dơnŏ nhôn đei pơjing hiôk chơt, đei tơ’blŏk tơdrong ‘mêm đơ̆ng Kră Yang ăn.

Apĭnh đĭ đăng krao khan hơdai: Kơkuh kơ Kră Yang jơ̆ Kră Yang ‘mêm kơ lu nhôn, lu nhôn bơnê kơ ‘Bok Kei-Dei yua kơ đơ̆ng Yang Yêsu, lu nhôn jing kon Ih, lu nhôn đei Ih ‘mêm mơnat, wei rong păng tuh ăn pŭn hiôk ăn kơ lu nhôn rim năr. Nơ̆r Kră Yang bơtho kơ lu nhôn wă kơ ling lang chơt hiôk lăm tơdrong ‘mêm mơnat Ih, bơwei tơdrong pơgơ̆p hăm Ih đơ̆ng lăm nơ̆r krao khan rim năr, mă hloh loi ling lang băt kơ bơnê kơ Kră Yang lăm rim tơdrong arih rim năr. Kon krao khan apinh Kră Yang bơtho kon rim năr arih kiơ̆ kơ bơtho tơ’bôh đơ̆ng Ih păng pơm kiơ̆ nơ̆r Ih bơtho. Hơpơi kơ chăl arih lu nhôn ling lang băt kơ bơnê kơ Kră Yang lăm rim tơdrong arih rim năr păng băt kơ ‘mêm bơwei tôm tơdrong Kră Yang ăn. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, arih băt kơ bơnê noh jơ̆ tơdrong arih ‘lơ̆ng. mă lei, jơ̆ bơngai lui kơ ‘Bok Kei-Dei hăm tơdrong hlôh wao khan tôm tơmam đei ăn noh đơ̆ng tơdrong ‘mêm Kră Yang, na tơdrong arih athei băt kơ bơnê noh jơ̆ tơnat kơ wă pơm kiơ̆, noh kư̆m nơ̆r athei ‘lơ̆ng wă kơ lu bơ̆n jing bơngai ‘lơ̆ng lăm tơdrong arih kơdih pơgơ̆p hăm Kră Yang. Kơplah pơjuăt pơm kiơ̆ tơdrong arih băt kơ bơnê kơ lu bơngai mă Kră Yang rơih iŏk, wă kơ lu sư ba dôm tơdrong ‘lơ̆ng ăn kơ chăl arih lu bơ̆n, đơ̆ng lăm tôm tơdrong arih phara băl, jơ̆ lu bơ̆n tơ’bôh anăn Kră Yang ăn kơ lu bơngai jum dăr kơ bơ̆n. Hơpơi, rim ‘nu bơngai lui kơ ‘Bok Kei-Dei đei hlôh wao păng pơjuăt arih băt kơ bơnê kơ Kră Yang lăm tôm tơdrong arih wă kơ anăn Kră Yang đei ư ang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.