Cau lơi tòm bol he kung kờn kis chò hòp, lơngap lơngai. Mơya oă cau ờs kơ-lôi lah bơta chò hòp mìng tus tú tìp bơta ring lơngai. Mơya Sră Goh yal he in git, bulah tìp bơta gơlòng bòl glar, bol he kung gơs bơta chò hòp sơl. Tài bơh bol he git lah Yàng gam lơh bơta gơlòng bòl glar gơlik gơs cồng nha nàng bơta bơtào bơta dờn bol he dê mơ ràng tơlik gơnoar at bồ Yàng dê. Bol he chòp hòp ờ di mìng tú trồ niam, mơ la tài bơh Bơtau gơs gơnoar hơđang trồ tiah sùm ơm bal mơ bol he sùm.

Ngai do, ngai 26/11/ 2025, rơndap Bơta Hòi Dăn Kòp Ngai hòi jà ồng mọ oh mi kơlôi sơnơng Jơnau Yàng bal mơ ồng Dr Tony Evans bơh tơnggume ÑCHI BƠTÀI HE CHÒ HÒP

“Ò di mìng behơ̆ lơm ò, mơya bol he kung jòng să tòm bơta jê sồt bòl glar sơl, bơh git lah bơta jê sồt bòl glar tơnggơs bơta kơ̆ nùs” (Rôma 5:3)

Dilah tus dê tú jơ do he ờ hềt lòt gan bơta gơlòng bòl glar lơi, gen rcang té, tài bơh bơta gơlòng bòl glar rơp tus mhar. Ờ gơs cau lơi tòm bol he rgơi pleh klàs bơta gơlòng bòl glar jơl jơh rài kis he dê. Gen tàng bè hớ bơta dờng màng la bol he pal đal git ală bơta pràn mơ Yàng neh pà ai he in, tồ rgơi ntào kớ tú tìp bơta gơlòng bòl glar.

Bèhớ bơta gơlòng bòl glar la bơta lơi tiah? Hớ la ală tú kal ke mơ Yàng Tòm Trồ ai gơnoar gơlik gơs, mơ oă dớ Yàng kung cèng tus ală bơta gơlòng nàng lơh pràn bơta dờn bol he in. bol he rơp dờp git lah ală bơta gơlòng tus ờ di nàng lơh gơkram rài kis he dê, mơya nàng bơto bol he in git bơt bơtào rài kis pràn kơldang rlau tai. Bè ồng Pol mơ ồng Jakơ neh đớs, bol he rgơi chò hòp tú tìp bơta gơlòng bòl glar, tài bơh git lah Yàng gam lơh dồ broă crih crài hơđang rài kis he dê.
Bơta gơlòng bòl glar rgơi tus tòm oă pơnah. Gơs tú să tờm Yàng ai gơnoar dồ bơta gơlòng nàng bơtê bol he in dồ nơm bơta bơtê. Gơs tú bơta gơlòng tus tài bơh bol he gam kis tòm dunnia bềng bơta tồi glài at bồ, gen cồng nha tồi glài dê neh ràng tơlik hơđang rài kis he dê – gơlơh bè gơkòl bơta tung kơnau, bơta sơbơng roh, hala bơta kòp jê gơtơntus dồ bă nisơna.

Kung gơs tú bơta gơlòng bòl glar tus tài bơh tồi glài he neh lơh. Tú bol he lơbơn gơkòl tòm bơta ơnai, gơ tề lam bol he tòm oă broă kalke, kơnjớ mơ bol he pal kong. Mơ ban híu, cau sò tơm bol he dê, gơ sùm ngui ală bơta gơlòng nàng tomdră dê he, bơh nùs kờn lơh bol he in gơplớ mơ sang lòi gùng lòt jat Yàng.

Gen bè hớ, bơta mơ an kờn đơs pràn ờ di la nchi bơtài he tìp bơta gơlòng bòl glar, mơya la he rơp lơh bơta lơi tú tìp bơta gơlòng hớ. Broă he lơh gơwèt mơ bơta gơlòng bòl glar rơp ràng tơlik rài kis đah hwềng he dê tú he lik klàs bơh bơta gơlòng hớ. Mơya he ban rngòt, he ờ ơm is dồ nă. Bulah bơta gơlòng tus bơh tiah lơi, Yàng sùm gam at bồ hơđang ală bơta hớ tòm tê Kơnràn dê. Bulah bơta gơlòng hơ tus tài bơh să tờm he lơh gơlik, Kơràn sùm rgơi tomgơl gơ nàng lơh sir broă dờng Yàng dê hơđang rài kis he.

Gơs dồ pơnah niam ngan nàng bơtê git tú tìp bơta gơlòng bòl glar, hớ la sền dê ală cau ndai kung gam gơkòl bơta gơlòng bè bol he sơl. Lòt té bal mơ gơp, mơ he rơp dờp git lah tòm tú oă bơta gơlòng bòl glar tus kàr lơi, Yàng Jêsus sùm at bồ jơh, mơ Kơràn sùm gơs gơnoar dờng rlau jơh hơđang ală bơta gơlòng bòl glar tòm rài kis he dê.

Dan jà bol he dô nùs bal tòm bơta hòi dan: Khoai Bèp kờn gơboh, tòm ală ngai ring lơngai, kon mhar híu lah Yàng la bồ dà bơ ta chò hòp kon dê. Mơya tú bơta gơlòng tus, nùs kon rngòt, mơ kon geh tơngkah wơl lah Yàng sùm ơm bal mơ kon. Dan bơtê kon in git dờp rò ală bơta gơlòng bòl glar bè dồ nơm phan tòm tê Yàng ngui nàng lơh pràn bơta dờn kon dê. Dan pà ai kon in bơtê git chò hòp tòm tú tìp càl rbut, tài bơh git lah Yàng gam ngui ală bơta hớ nàng cèng kon tus rềp mơ Yàng rlau tai. Kon dờn nền ngan lah ơm tòm Yàng, kon sùm gơs bơta chò hòp ờ jơh. Kon jơh nùs hòi dăn. Ai sơnđan Yàng Jesus Krist, Amen.

Ơ ală ồng mò oh mi kờn gơboh, digơlan tú do he gam ơm tòm bơta gơlòng bòl glar, hala pa lik klàs bơta bơta gơlòng. Hala kung rcang tìp ală bơta gơlòng hơ đap. Bulah he ơm tòm pơnah lơi, pal kah lah Yàng sùm ơm bal, mơ Yàng gơs gơnoar hơđang bơta gơlòng tòm rài kis he dê. Mơ ban kơp tus dê tú tìp bơta gơlòng sùm jòi tiah gơn kơnờm. He pal rcang lài nùs nhơm he dê bơh tú jơ do, hớ la gơn kơnờm dê Yàng, sùm tomklac mơ Jơnau Yàng, mơ cơnđoà lòt bal mơ Yàng Jesus kòp ngai. Tài bơh gơs Yàng ơm tòm ơhò rài kis he dê, he sùm gơs bơta chò hòp, tài bơh bơta gơlòng bòl glar tus la tú he đal git rlau tai bơta kờn gơboh mơ gơnap gơnoar dờng Yàng dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.