Kòn mơnus bol he sùm gớs bơta gê ga, kơlôi rcăng oă bơta: broă lơh, jền priă, ngai hìng bè lơi, kung bè ala broă mờ bol he ò rgơi git. Mơya gớs tŭ lơi bol he ơm wơl dồ êt tŭ mờ tơr gơl hơ đăng trồ sền: ala kòn sềm păr hơđăng gŏ bè tùc, gŏ bè twès, hala prap phăn, mơya kòp ngai Bèp đăng trồ sùm ròng siăm ờ siơ̆u dồ bơta lơi! Dilah Yàng sùm ê sề gàr kòp kòn sềm dêt rhền, gen Kơnràñ rơp ờ sền gàr bol he mờ añ sơl ò ơ?

Ngai do, ngai 28/11/2025, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Missey Butler bơh tơnggume ÑCHI KƠLÔI RCĂNG?

“Sền tĕ ală sềm hơđang trồ; gơ ò sih, ò toès, kung ò prap tòm đam, mơ Bèp bol mê hơđang trồ kung ròng siam gơ. Bol mê ò di la màng rlau mơ gơ ò ơ?” (‭‭Mathiơ‬ ‭6‬:‭26)

Tŭ găm kơnòm să, geh tŭ añ neh pơnđơl pờ măt jŏ ngăn nàng sền jơnau cih rơ mit ò loh tai-dồ bơta cih hơđăng mpang lơ pàn dêt geh yồng tòm hìu tru să cau bơyô añ dê.

Hơ̆ là dồ phăn pà neh jŏ ngăn, mờ hìu nhă bơyô añ neh yồng tềng hơ̆ lòt găn oă sơnăm. Gơ kư̆ ơm sùm tềng hơ̆, ò lơh cau in sền rmê, mìng kơ̆ cê kơp gơn dồ nă cau nàng ơm mờ sền gơ.

Dô bơta gơdan ño hơ̆ là mpang lơpàn dềt hơ̆ sùm geh yồng gơ sơleh dồ pơnah, bè là cau koñ lơh bè hơ̆. Kư̆ bè chồl he păl tus dê gơ, yồng wơl gơ nàng ring, gen..păl đọk ala jơnau cih hơđang hơ̆.

Tòm dồ àng drim, tơnơ̆ neh bik tòm hìu cau bơyô, añ sền dê máy lơh cà phê, kơp gơn gơ dùh dà dut. Ni sơ na, añ ò jai kong. Añ tus mrêp, bàr đah tê añ neh yồng wơl mpang lơpàn dêt hơ̆ tian gớs geh ring.

Mơ kung drờm bè ala cau bơh lài, añ neh geh sền rmê mơ ala jơnau neh cih hơ̆ dồ bă krơi ís. Añ đọk kòp jơnau, kung ò rgơi git lah gơ neh prap jrô tòm hwềng nùs añ.

Jơnau cih geh tơnggume “ Iat kơñhau tòm suơn plai chi” bơh cau cih sră Elizabeth Cheney, neh geh cih bè do:

Sềm tơliàng đớs mờ sềm rac: “ Añ ngăn koñ git ñchi bơh tài kòn mơnùs sùm kơlôi rcang, sơr bac mờ chê choa oă ngăn?”

Sềm rac hơ wơl: “Ơ bơyô, añ kơlôi lah bơh bol khai ờ gớs Bèp Đang Trồ, Bơtau sùm ờs ê sền bơyô mơ añ.

Gen đớs ngăn, tŭ añ đọk añ gơlơh krơi ís ngăn. Mơ añ koñ gơboh mơ jơnau cih hơ̆. Añ gơboh rùp Bèp Đang Trồ bềng bơta koñ gơboh, neh geh ràng tơlik dồ bă niam ngăn bơh jơnau boh bơr bàr nơm kòn sềm dêt rhền!

Ờ rgơi kơlôi lah, mìng “iat kơñau” bàr nơm kòn sềm boh bơr tòm suơn mơ bồ tơngngoh añ neh geh cih kah jrô bè hơ̆?

Tŭ do añ neh wă, să tòm Yàng neh ngui jơnau cih hơ̆ bè dồ nơm gar sơtìl dêt rhền, sih tòm hwềng nùs añ. Gar sơtìl hơ̆ là jơnau song bơh dồ nă Yàng Tòm Trồ koñ gơboh, ê sền, Bơtau ờ mìng crơng gơs añ, mơ kung neh crơng gớs jơnau dunnia niam hàng mờ añ gơboh gơbài “jòi git”

Sơtìl dêt hơ̆ neh gớs dờng gơloh dồ nơm tòm cih dờng bơh bơta dòn kơ̆ cê mờ nùs gơn kơnờm, sùm ê sền jơm gòm rài kis añ kòp sơnăm bềng bơta gơlòng tơnơ̆ do.

Oă dơ̆ añ neh jòi wơl jơnau cih hơ̆. Kòp jơnau tơngkah añ bơh bơta dòn song ò tòm gơl mờ bơta koñ gơboh ñiam lơhơn Yàng ai añ in. Tus dê dô ngai ne, tŭ rài kis chồl añ gơ dùh tòm bơta bơcah, añ sùm rcang jào phi să añ tòm plàng tê koñ gơboh Bèp- Bơtau git loh làng păl ê sền kòn Kơnràñ tòm kòp pơnah

Bơh tŭ hơ, rài kis añ neh geh tòm gơl sùm sùm. Añ ò gơs bơta wi wơ tòm rài kis “ Kís să he in dồ bă ờ niăm” tai. Añ neh jòi gŏ jơnau song mờ sềm tơ liàng mờ sềm rac neh đơs: Bep bol he dê, Bơtau ờ tŭ lơi bik kui hala ñềm măt, sùm ê sền jơh tơl phăn Kơnràñ dê mờ măt bềng bơta koñ gơbog mờ sùm pờ ơ nàng blàng tê krơm bol he, bulah tŭ bol he lòt ò di gùng.

“Sền tĕ ală sềm hơđang trồ; gơ ò sih, ò toès, kung ò prap tòm đam, mơ Bèp bol mê hơđang trồ kung ròng siam gơ. Bol mê ò di la màng rlau mơ gơ ò ơ?”
‭‭(Mathiơ‬ ‭6‬:‭26)

Dan jà bol he dô nùs bal tòm bơta hòi dan: Ơ Bèp, geh tŭ dơ̆ kòn sền gŏ să tòm bè dồ nơm kòn sềm dềt rhền, păr ờ git gùng bơh bơta kơlôi rcăng, rngòt mờ ò gớs ring lơngai. Mơya kòn kah lah, ò gớs sềm lơi par bơ dìh bơta sền gŏ Kơnràñ dê. Dăn dong kòn git bơ srăm bơta ơm ring lơngai tòm blàng tê koñ gơboh Bèp dê, dòn lah Kơnràñ sùm ê sền kòn bè Kơnràñ sùm ê sền kòp kòn sềm dêt rhền neh. Kòn jơnùs hòi dăn, tòm sơnđăn Yàng Je-su Krist, A-men.

Ơ ồng mọ, oh mi koñ gơboh, rài kis do gớs tŭ lơh bol he in bòl glăr, chê choa, mơ ya bol he sùm gơs dồ bă tiah nàng rê: plàng tê Bèp Đang Trồ, Bơtau ờ tŭ lơi lời hŭi bol he. Sền te bơta sền gàr mờ Kơnràñ neh ai sềm par đăng trồ in: Kơnràn rơp sền gàr bol he oă rbô rhiăng bè hơ̆. Gen, ñchi bơh tài bol he kư̆ kơlôi rcăng, tŭ mờ bol he gớs dồ nă Bèp Đang Trồ sùm sền gàr, koñ gơboh mờ ò tŭ lơi sang lơi bol he? Dăn jơnùs kơp koñ bol he geh ơm lơngai tòm blàng tê sền gàr niam Kơnràñ dê tòm ngai do, mờ sùm git ưn ngài Kơnràñ bơh ala bơta lơngai Kơnràñ sùm ai bol he in.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.