Gơs tŭ lơi oh mi sền gọ̆ rài kis he kung be rơndeh mơ kòng gơ dê kư gơpài sùm digùl bọ̆ rluh- sơlo pơnđơl lik klàs, kòng rơndeh sơlo gơtăp jrô rlau tài? Oh mi gam kìs, gam lơh broă, mơ ya gơlơh bè jơh ală bơta ò tus di tơnggu lơi. Hơ̆ la tŭ oh mi sền gŏ gam kư pơrwài sùm mơ ală bơta neh sơrlèt rlau, bal mơ ală bơta òhềt geh wĭl tơl, bal mơ ală bơta rngòt- rngơt ò gơs sơnđan kơryăn he cơnoà tus, ală bơta kơp kòñ gơlơh bè ngài ngan, bơta dòn gen gơhùc ngềt…mơ oh mi ò git lơh mbe lơi nàng lik klàs. Mơ ya digùl tiah “gơkòl” hơ̆, gơs dô Bơtau gam ai tê pun ndơp nàng dong kơl oh mi. Hơ̆ la să tòm Yàng, mơnàng bơta kơ̆-cê ai hwềng soan bol he in.

Ngai do, ngai 01/12/2025, Bơta Hòi Dan Kờp Ngai dan jà cau iat kơlôi sơnơng Jơnau Yàng kơnòm di bơta dong kơl Lorie Hartshorn dê bơh tơnggume BĂÑ LÒI GƠKÒL SÙM TOM BROĂ NEH RLAU.

“Ơ hiu Juđa mơ hiu Ysrael! Bol mê neh gơlik gơs làng bòl cau srat-sơntơm di gùl ală lơgăr mbe lơi, gen ăñ rơp dọ̆ng-klàs bol mê, mơ bòl mê rơp gơlik gơs bơta lơngai-lơngò. Băñ rngòt-rngơt, mơ ya păl lơh pràn kơldăng tĕ tê he dê!” (Sacari 8:13)

Gơs tŭ lơi oh mi neh gơdùh tom bơta “gơkòl ò git mbe lơi” hala òhềt? Ăñ kah gơs nđò dơ̆, digùl kơnhai mrềt tom Canada, rơndeh ăñ gơkòl tom pliar. Kòng rơndeh kư gơpài sùm mơ ò gơtă dô ềt lơi. Mbe lơh nàng rgơi lik klàs taih? Cau Canada ƀòn tòm gen git mo: oh mi pal lơh gơs dô mơnàng lơi hơ̆ nàng kòng rơndeh in kơnhăp. Oh mi chọ̆ pliar, ai phan kră lơi hơ̆ lơh jơng jă hơđơm kòng rơndeh. Tom tŭ gơs tiah kơnhăp, gen rơndeh rgơi lik klàs bơh tiah gơkòl.

Tom rài kis do, gơs tŭ bol he kung sền gọ̆ he kư “pơrlă kòng rơndeh” mơ ò tus di tơnggu lơi. Gơkòl sùm tom broă neh rlau, kư gam sền wơl ală bơta lơi neh sơrlèt rlau gen tang bol he ò rgơi cơnoà tus hơ ngai tơnơ̆. Gơkòl tom ală bơta kơlôi sơnơng ò niam hala nùs nhơm kơnjơ̆-kơnjùt lơh bol he ò rgơi ntoàt hơđap. Behơ̆ mbe lơh nàng rgơi lik klàs bơh bơta hơ̆ taih? Lơh mbe lơi nàng ò dơh pài sùm tom bơta roh gơn kơnòm mơ ya ngan ñă ntào cơnoà lòt?

Tom sră Sacari, làng bòl Ysơrael kung neh ơm tom bơta behơ̆. Bòl khai rê wơl bơh di tiah gơkòl kup lơh dĭ Babilôn 20 nam, broă bơt bơtào wơl Hiu Duh Khoai gam ơm dơh wơl. Bòl khai git he pal cang lơh bơta lơi, mơ ya gam kư gơkòl- gơkòl tom “ală bơta neh rlau” mơ bal mơ ală bơta kalkê bòl glar tŭ do. Bòl khai pĭn wĭl-wơl, moat-jrùng, ò dòn lah broă bơ̆t bơtào wơl rgơi lơh sir. Dùl tom ală bơta lơh bol khai ò rgơi ñtoàt hơđap hơ̆ la tài bơh bol khai lòi ală bơta neh rlau kư at-bồ. Bol khai neh kong alah, săng-lòi jơh ală bơta kơp kòñ mơ gơn kơnòm bơh ngai tơnơ̆. Gen tang, Yàng Tom Trồ sồr cau gơnoar hwơr Age mơ Sacari tus dong kơl bol khai “lik klàs”

Jơnau Yàng tom Sacari 8:13 cih lah: “Ơ hiu Juđa mơ hiu Ysrael! Bol mê neh gơlik gơs làng bòl cau srat-sơntơm di gùl ală lơgăr mbe lơi, gen ăñ rơp dọ̆ng-klàs bol mê, mơ bòl mê rơp gơlik gơs bơta lơngai-lơngò. Băñ rngòt-rngơt, mơ ya păl lơh pràn kơldăng tĕ tê he dê!”

Hơ̆ la jơnau Yàng đơs mơ làng bòl Kơnràñ dê ngai or, mơ kung la jơnau pơndòm-pơniàng ai jơh ală cau lơi gam “gơkòl” ngài do: Băñ sền wơl di ngkòi. Băñ lòi ală broă neh rlau-bulah niam, iơh hala jê-sồt- gơs gơnoar pràn dờng tŭ do. Yàng đơs lah: “gen añ rơp dong-klàs bòl mê mơ bòl mê rơp gơlik gơs bơta lơngai.” Kơnràñ neh rcang sir ală bơta niam rlau jơh gam kơp gơn oh mi di đap. Yàng rcang sir dong kơl oh mi lik klàs bơh tiah gơkòl, dilah oh mi git lòi kơrwàl rài kis he dê hơđang mơ nàng kơ̆-cê la să tòm Kơnràñ- Bơtau rgơi lơh jơh ală bơta. Mơ ya bơta hơ̆ sồr oh mi pal lơh broă.

Băñ rngòt. Pràn kơldang tĕ mơ kup tê tom broă Yàng jao. Jao phi tĕ bơta rngòt-rngơt oh mi dê Kơnràñ in mơ cơnoà lòt jat Jơnau Kơnràñ đơs. Dòn nền lah Kơnràñ gam ơm bal mơ oh mi, mơ ngai tơnơ̆ oh mi dê àng gơcrà ngan.

Dan jà bol he dô nùs bal tòm bơta hòi dan: Khoai Yàng kòñ gơboh, gơs oă dơ̆ kòn sền gŏ kòn gơkòl digùl rài kis ò git gùng dọ. Kòn kư ơm sùm tom ală bơta rngòt-rngơt, pĭn wĭl-wơl mơ ală bơta neh rlau neh yau jọ̆ jòng ngan. Kòn bòl glar tài bơh pơnđơl pràn mơ ò rgơi cơnoà dô cơnđoà lơi. Dan Yàng dong kơl kòn ơm kơ̆ tom Kơnràñ, nàng Kơnràñ gơlik gơs mơnàng kơ̆-cê kờp cơnđoà lòt kòn dê. Dan dong kòn lik klàs bơh ală bơta gam kư lơh pơrwài, ting jat kòn wơl, mơ bơto kòn khin cha ntoàt tus tom bơta lơngai, bơta gơn kơnòm mơ tơnggu dờng Kơnràñ neh ai kòn in. Kòn jơh nùs hòi dan tom sơnđan Yàng Jesu Krist, A-men.

Ơ jơh ală ồng mò, oh mi kòñ gơboh, mùt tom kơnhai Jơt Bar, wă rò dô kơnhai kah kưrsơnre bơta lik ling Yàng Jesu dê, bơta lơi gam lơh oh mi gơkòl tom tiah yau-kư ơm sùm tom bơta rngòt-rngơt, ală bơta “kung bè” mơ “di pal ngan”? Ơ oh mi, Yàng gam kơp gơn oh mi cơnoà pơnjat. Jao phi tĕ jơh ală bơta àñ ơnòng kơnjơ̆ hơ̆ Kơnràñ in, khin cha dòn kơnòm di jơnau ho Kơnràñ dê, mơ khin cha cơnđoà lòt jat jơnau hòi jà Kơnràñ dê. Tom tŭ ñtào hơđang mơnàng kơ̆-cê la să tòm Yàng, oh mi rơp sền gŏ Kơnràñ pò gùng dô bă crih-crài. Mơ tom tŭ hơ̆, oh mi ngan rơp geh “dong-klàs” nàng pơnjat tom gùng lòt bîng bơta nđàc Kơnràñ ai oh mi in, nàng kơnhai Jơ̆t Bar nam do, gùng lòt bơta dòn kờp nă bol he rơp bêng tơl ală bơta git làm pa bal mơ Yàng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.