Digơlan digul ală ngai lồi năm kơlôi rcang giga broă, bŏl he òs buơn hŭi ñchi bơh tai ngai Yang lik ling gơkrơi is ngăn behơ̆. Dilah tòm dô măng lơi he ơn is tŭ jơ nàng măt tơnggor sền hơđăng trồ bềng sơmăñ trồ, digơlan he gơlơh dô bơta lơi gơkrơi is. Gơlơh be jơh plai ù đơs òm dô jơnau Niăm jŏ or: “Kọn Yang Tom Trồ neh lik ling lơh gơs kọn mơnùs” Ò di tiah gơlăng Bơtau màng ryŭ, kŭng ò geh wă rò phăn mơna bềng lìu: Kơnrẵn tus tòm să jan kọn dềt tom bŏng ñhơt dềt rhền. Bơta gơlik gơs hơ̆ sơntom bơta pơndềt să git nđợ, mơya neh lơh lơnggơr jơh plai ù do sum sum.

Ngai do, ngai 02/12/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl mò Linda Vulcano dê bơh Tơnggume BƠTA GƠLIK GƠS HƠĐĂNG ALĂ BƠTA GƠLIK GƠS.

“Ơ Betlehem Ephrata, mê la dềt tòm mpồl hìu nhă Juda dê, mơya bơh di mê rơp tơnggơs añ in dô bơtau at bồ Israel, tòm ryas Kơnràñ dê la bơh tòm rài yau, bơh ală tŭ tơngai rài yau òr.” (Mice 5:1)

Mang Noel năm 1968, 3 nă cau phi hành gia Frank Borman, Jim Lovell và William Anders gơri hơ phi hành đoàn Apollo 8 neh gơlik gơs ală cau sơnrờp geh sền gŏ plai ù bơh bơdih pah gòi. Măng ngai hơ̆, tŭ tiah ơm bŏl khai hào par lĕ lon gut dăr Mattơngai Àng trồ măng, bŏl khai sền dô nơm plai ù tơlir dềt ngăn, àng gơcrà tiah klăm jơngọ dờng, mơ truyền hình trực tiếp rùp hơ̆ jơh dunnia ĭn sền gŏ.

Tòm bơta rơndăp geh oă cau sền rlau jơh tom pah rài, bŏl khai neh sền tap sră Sơnrờp gơ lik gơs bơh jơnau yăl crơng gơs, gen pơndut bơh jơnau dềt rhền mơ bềng lìu bơta bơta rngoh rngac: “Noel niam ngăn, kơp koñ Yang Tom Trồ ai lơ ngai jơh tơl nă cau găm kis tòm Plai Ù niam her do.”

Cau yăl tơnggit jơnau Walter Cronkite, cau đơs tòm toh broă ngai hơ̆, neh rngoh rngac driau lah: “Do la dô bơta gơlik gơs rlau hơđăng ală bơta gơlik gơs”

Tŭ lơmpah hơ̆lơh jơi kọn mơnùs ơm mŏ mŏ, tŭ sơnrờp bŏl he geh sền gŏ Plai Ù dềt ngăn behơ̆, lơhơ mơya niăm hàng mơnĕ digul plai ù dờng ơnang. Dô măng Noel krơi is ngăn, tŭ kọn mơnùs găm ơm bơdih pah gòi tơngkah jơi kọn mơnùs kah tus Bơtau Crơng gơs.

Kọn mơnùs jă jơng bơdih Plai Ù là dô bơta gơkrơi dờng pah rài kọn mơnùs. Mơya bulah broă dờng màng hơ̆ dờng mbe lơi, bơta hơ̆ kŭng ò pơndròm broă Yang Tom Trồ bơh trồ lik ling, gơlik gơs rùp să be kọn mơnùs bŏl he.

Tòm măng gọh hơ̆, Kọn Yang Tom Trồ neh sọh rùp să bơh poăc mơ mham, dơñ dòp kis digul dunnia, wil tơl di ndrom be kọn mơnùs. Mìng kơlôi tus bơta hơ̆ mo gen tơl nàng lơh bŏl he ĭn ơm mŏmŏ. Mbe nàng jơnau hơ̆ rơp ràng tơlik jơh bơta phi să dờng màng hơ̆, tŭ Kơnrẵn gơlik gơs “Emmanuel” gơtha la “Yang Tom Trồ ơm băl mơ bŏl he”?

Bŏl he rơp ò tŭ lơi wă lọh jơh bơta krơi jrô ndơp hơ̆, tŭ Yang Tom Trồ gơlik gơs kọn mơnùs. Mơya kòp dơ̆ kơlôi tus Ngai Noel, nùs bŏl he gơhào guh wơl bơta ưnngai git nđợ: Ơ, Yang Dŏng bŏl he di niăm her ngăn ò git jơh!

Poh rhiang năm lài mơ tŭ Yang Jesu lik ling, cau gơnoăr hwơr Mice neh yăl lài bơh di tiah Bơtau Mesia lik ling: “Ơ Betlehem Ephrata, mê la dềt tòm mpồl hìu nhă Juda dê, mơya bơh di mê rơp tơnggơs añ in dô bơtau at bồ Israel, tòm ryas Kơnràñ dê la bơh tòm rài yau, bơh ală tŭ tơngai rài yau òr.” (Mice 5:1)

Yang Dŏng Jesu tus tom dunnia nàng ràng tơlik bŏl he ĭn git lọh lang bơh Yang Tom Trồ. Mơya gơs tŭ lơi he sền sơwì is : Ñchi bơh tai jơnau yăl tơnggit hơ̆ sơntom wơl bơh Betlehem – dô nơm bọn dềt, ò hoan gơs cau kơlôi tus?

Mơya, tiah Yang sác nàng lik ling ràng tơlik oă bơta bơh nùs koñ Kơnrẵn di. Kơnrẵn ò tus digul mhwăl àng gơcrà, hào ơsẹh kọ, digul tơlak tơmàn cau gơnrơh jòng ro. Kơnrẵn kŭng ò tus tòm gơlăng Bơtau màng ryŭ, nàng lơh gơs bơtau dô dà lơgar pràn kơldăng. Sơlơ̆ wơl, Kơnrẵn neh sac tus tòm dô wang belat bong ñhơt dềt rhền, trồ nót mrềt, rùp să kọn dềt lơbơn pràn càng geh kơndơt kơnđu.
Kơlôi tus bơta hơ̆, bŏl he rngoh rngac git nđợ! Dô Yang Tom Trồ dờng ryŭ, gơnap gơnoăr, sac rwah wơl cơnđòa mut tòm dunnia jat be bơta lơbơn niăm pơndềt să behơ̆. Kơnrẵn tus nàng ràng tơlik nùs koñ gơboh mơ sŏng rĭng Yang Tom Trồ di, cèng wơl jơnau sŏng cau kòl rồn bơklơn ĭn, mơ tă tơlik ală cau kòl cap ĭn.

Lài mơ tŭ Bơtau Krist lik ling, kọn mơnùs prap gar bơta bọh lăm Yang Tom Trồ di bơh bơta rngòt rngơt ò di bơh koñ gơboh Yang. “Bơtau Jêhôwa” tòm bồ dơngoh bŏl khai là dô Yang Tom Trồ ơm ngài ngăn, bŏl khai dùh khoai Kơnrẵn bơh ală bơta boh lăm. Kơnrẵn ò găm là Bơtau dềt mềr ồng A đam mơ Ebia cơnđòa lòt băl tòm suơn Eđen.

Mơya gen, tòm măng gọh tòm Betlehem, Yang Tom Trồ neh ai kọn mơnùs ĭn phăn bàn ò gơs bơta pơndròm băl: Bơh Kọn Dùl Kơnrẵn di. Tŭ Yang Jesu tus, bơta tòm tơlah digul Yang Tom Trồ mơ kọn mơnùs gơtòmklac wơl. Bơh hơ̆, bŏl he ò găm sền sơwì is Yang Tom Trồ ngăn là Bơtau mbe lơi tai, tài bơh Kơnrẵn neh ràng tơlik Kơnrẵn tòm Yang Jesu rau.

Kơnrẵn gơlik gơs be kọn mơnùs bŏl he, kŏng bŏl glăr, tìp bơbơta ơnnia, mơya găm kis dô rài kis wil tơl ò gơs glài. Kơnrẵn là krơh niăm wil tơl bŏl he păl đòn jat. Mơ bơh rài kis Yang Dŏng Jesu, Yang Tom Trồ kŭng ai bŏl he ĭn git lọh bơta Kơnrẵn kơp koñ: “ “Ơ kòn mơnus, Kơnràñ neh yal mê in bơta lơi la niam; Bơta mơ Yàng Jehôwa jòi lùp mê. Hơ̆ ò di la lơh bơta song ring, gơboh bơta lơbơn niam, mơ cơnđoà lòt dô bă pơndêt să mơ Yàng Tom Trồ ò ơ?” (Mice 6:8)

Yang Jesu neh tus, nàng bŏl he ò di mìng git bơh Yang Tom Trồ, mơya găm cơnđòa lòt băl mơ Kơnrẵn tòm bơta koñ gơboh, bơta sŏng rĭng mơ nùs nhờm pơndềt să kòp ngai.

Noel do, họi dăn Yang dăn dŏng bŏl he gơlik gơs be Kơnrẵn rlau tai, git pơndềt să, koñ gơboh mơ kis sŏng rĭng kòp ngai. Kŭng Ưnngai tĕ Yang Dŏng Jesu tài bơh bơta phi să dờng màng ngăn, Kơnrẵn neh săng lơgar trồ gơklŏ, passơm, tus tòm dunnia do nàng dŏng tơwài bŏl he. Bơta Lik Ling Kơnrẵn di rơp sum là “Bơta Gơlik Gơs hơđăng ală bơta gơlik gơs”!

Dan jà bol he dô nùs bal tòm bơta hòi dan: Khoai Yang Dŏng Jesu kơñ gơboh! Kòp dơ̆ kah tus măng Kơnrẵn Lik ling tòm bŏng ñhơt dềt rhền, nùs kọn gơhào guh bơta ưnngai git nđợ. Ưnngai Kơnrẵn neh săng lòi bơta gơklŏ hơđăng trồ nàng tus tòm dunnia, cèng jat bơta koñ gơboh mơ bơta dŏng tơwài kọn ĭn do. Dăn dŏng kọn kah sum bơta gơtha ngăn Ngai Noel, tồ kọn sum kis tom bơta hòn chò sum sum tài bơh git lah Yang Tom Trồ òs ơm băl mơ kọn. Dăn bơtọ kọn ĭn git kis pơndềt să, koñ gơboh, cèng bơta sŏng rĭng, koñ nđàc Kơnrẵn di tus tòm dunnia klăm jơngọ dọ. Kọn jơh nùs họi dăn, Kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, digơlan bŏl he ò càng jòi tiah lơi wic ngai nàng dòp git gơtha ngăn ngai Noel. Mìng càng ơn dô êt tŭ jơ lòi nùs he ơm mo mŏ wơl, wèt sền plai ù Niăm gơkrơi do. Kah wơl bơh Kọn Dềt lài or, Bơtau neh săng lòi lơgar hơđăng trồ gơklŏ nàng cơnđòa mut tòm dunnia bơ̆ bơl do, tồ Kơnrẵn rơp tus rềp he mơ ăñ. Tŭ bŏl he đal git geh bơta hơ̆, gen Noel ò di là dô ngai geh cih sơnđăn tòm sră tai, mơya rơp gơlik tòm ryas bơta lơngai kis tòm hwing nùs bŏl he. Ngăn, bơta lơh tềl krơi Niăm rlau jơh ngai Noel ò di là trồ àng gơcrà bơh ală cau gơnrơh năm lài or, mơya là jơnau sŏng dềt rhền hơ̆: Yang Tom Trồ găm ơm băl mơ bŏl he, dềt mềr mơ kis sum, tòm tŭ jơ do mo.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.