Neh gơs tú lơi he dan mơ Yàng bơta lơi sơl ơ, gen tơnớ lùp Yàng lơh bè lơi nàng hơ wơl sơl ơ? Oă dớ he kơ-lôi pơnah nàng dong Yàng lơh sir ală bơta he dan hớ. Bol he ờs mờng kờn at bồ, kờn rơndap ală bơta jat nùs is he dê, sền is ală rơndap he dê la wil tơl. Mơya he git sơl ơ, mơnàng bơta dờn hớ la bol he dờn dờp tă sang bơta at bồ he dê mơ jào phi jơh ală bơta tòm tê Yàng dê. Rlau mơ tơnliă Yàng, bol he pal lời Yàng lơh jat nùs kờn krơi is Kơnràn dê.

Ngai do, ngai 03/12/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ mò Lina Johnson bơh tơnggume BAÑ TƠLIĂ YÀNG TOM TRỒ.

“Tŭ do gơwèt hơ Kơnràñ la Bơtau bơh gơnap gơnoar lơh broă tòm bol he, rgơi lơh tơngkah tơngkañ oă rlau mơ ală bơta bol he hòi dan mơ kơlôi sơnơng,” (‭‭Ephesô‬ ‭3‬:‭20‬)

“Kon klau mò dê rơp mhar geh bời oă rlau dilah bơtê lòt hơđang máy ntoat kòp ngai, rlau mơ mìng dồ dớ dồ poh,” cau mò gơnoar sơnơm đơs. Kon an dê gơkòl ờ niam bồ tơngoh, gen broă at bồ jơng tê lơh khai in kalke ngan. Cau mò bơtê kon a bơtê hơđang máy bè dồ nă cau trượt patin: dồ jơng lòt dồ jơng ờ. Kơnờm mơ hớ, bol hi rgơi dong kon hi dê rgơi cơn đoà lòt. Mơya broă kalke la bol he mìng rgơi bơtê kon hi dê dồ poh dồ dớ, tài bơh an ờ gơs jền priă nàng blơi máy ntoat do ơn tòm hìu.

Tú hớ, cau bơyô an dê kung gơs mat sơl. Bar nă bol hi sền mat bal, gen an đơs: “ơ Yàng, bol kon kờn geh dồ nơm máy ntoat. Kon ờ git Yàng rơp pà kon in mbè lơi, mơya kon dờn nền Yàng rơp rcang sir”

Bar pe ngai tơnớ, an cèng kon lòt còp mò an dê, cau bơyơ mơ kon ùr khai dê kung lòt bal sơl. Tú hớ gam 2 poh la tus dê ngai Kah Yàng Liklìng. Lài mơ tú lòt, bar nă bol hi sền gó pal tă bar nơm cơnờng nggui lik bơh rơndeh, bulah tú hơ bol hi ờ git nchi bơtài lơh broă do. Mơya bol he kứ lơh broă do.

Bol hi tus tòm hìu mè an dê tòm tú trồ neh mho rau. Dồ trồ măng niam ngan. Mè an dê hòi jà bol hi lòt sền ală đèn cau bơka ngai Yàng Likling. Bơta do niam ngan! Gen bè hớ bol hi hào rơndeh, lòt gan oă gùng, kung lòt gan ală gùng dut sơl mơ êt cau lòt gan.

Tú rơndeh bol hi wơl bồ wơl tòm dồ nơm gùng dut ne, rơndeh bol hi tup dê dồ nơm phan gah gùng. Gơs cau drau dờng lah: “ơ, do la máy ntoat ờ ơ?”mẹ an dê ruc rơndeh wơl. Ngan bè hớ: gơs dồ nơm máy ntoat ơm tềng do. An mơ cau bơyô an dê lik bơh rơndeh, ntoat tus hìu rềp tềng hớ mơ teh mpồng.

Dồ nă cau ồng lik bơh hìu, mơ bol hi lùp: “nchi bơtài máy ntoat do gơkòl cau săng lòi tềng do taih? Ồng hơ wơl: “à, an pa pà phan bau ùr an dê dồ nơm phan pà tòm ngai Yàng Liklìng, dồ nơm máy pa, niam rlau. Gen máy yau do kung gam niam, mìng là ờ gơs tiah nàng lời wơl. Dilah bol ai kờn gen dồnh té”.

Bol hi chò hòp ngan! Mè bol hi cèng bol hi rê ai rơndeh, gen an mơ cau bơyô hào rơndeh nàng cèng máy ntoat do. Gơ dipal tơn tòm rơdeh – tài bơh bol hi neh tă cơnờng nggui tòm rơndeh lài đap!

Tus dê tú do, kờp tú kah wơl, an mơ cau bơyô an dê kung gam ai lơh krơi bơh ală broă neh gơlik gơs. Cau ồng hớ gơlơh bè neh geh Yàng rcang lài nàng kơp gơn bol hi tòm trồ măng ngai hớ. Yàng Tòm Trồ la niam ngan! Kon klau bol hi gơs dồ bơta kơp kờn, mơ an neh ờ tề lam Yàng lơh jat nùs is an dê – an mìng gơn kơnờm Yàng rơp lơh sir an in. mơ ngan bè hớ, Yàng neh pà ai, jat pơnah niam rlau jơh, dờng rlau mơ bơta kơlôi sơnơng an dê.

Oă dớ bol he kờn Yàng lơh ală broă, gơlơh bè Yàng pal iat rơndap he dê. Mơya dilah bol he kah prap bơta do dê – hớ la Yàng Tòm Trồ sùm la niam rlau jơh, Yàng kờn gơboh bol he mơ sùm kờn pà ai he in bơta niam rlau jơh tus dê kòn sau Yàng dê- gen nùs he dê tú hớ sùm geh lơngap lơngai oă ngan.

“Tŭ do gơwèt hơ Kơnràñ la Bơtau bơh gơnap gơnoar lơh broă tòm bol he, rgơi lơh tơngkah tơngkañ oă rlau mơ ală bơta bol he hòi dan mơ kơlôi sơnơng,” (‭‭Ephesô‬ ‭3‬:‭20‬)

Gen bè hớ, nchi bơtài bol he pal kờn tơnliă Yàng tòm Trồ la Bơtau rgơi lơh dờng rlau ală broă mơ bol he rgơi kơlôi sơnơng taih?”

An rơp ờ tú lơi híu măng kah Yàng Liklìng năm hớ. Kờp tú kah wơl, an kơlôi tus dê cau mò bơnrau tòm sră 2 Ală cau bơtau tap 4. Cau mò mìng gam dồ êt mơñà, mơya Yàng Tòm Trồ neh ngui bơta dềt rhền hớ nàng ròng siăm mò. Broă kup kơryan tú hớ mìng la cau mò do ờ tơl gri nàng ơn mơñà Yàng ai pà mò in.

Dan jà bol he dô nùs bal tòm bơta hòi dan: Khoai Yàng kờn gơboh, kon ừn ngai Yàng tài bơh Yàng sùm git loh kon kờn bơta lơi, lài mơ tú kon ờ hềt đơs. Dan bơtê kon in git gơn kơnờm Yàng oă rlau tai, lời bơta kơlôi rcang mơ ờ at bồ ală broă jat nùs is kon dê. Bulah kon ờ rgơi git gùng dà Yàng dê, dan pà ai kon in sùm kớ nùs dờn lah Yàng sùm kờn pà ai bơta niam rlau jơh kon in, mơ jơh ală broă Yàng lơh sùm wil tơl. Dan dong kon pờ nùs kon dê nàng dờp git ală broă crih crài mơ Yàng sùm gam lơh hơđang rài kis kon dê kờp ngai. Kon jơh nùs hòi dăn, ai sơnđan Yàng Jêsu Krist, A-men.

Ơ ală ồng mọ oh mi kờn gơboh, gơnap gơnoar Yàng dê he ban tơnliă, mìng ală nùs kơlôi he dê rơp kup kơryan bol he dê lơm. Yàng ờ tú lơi lơh jat pơnah bè kon mơnus kơlôi, tài bơh Yàng la Bơta crih crài ngan, gùng dà Yàng dê la dờng màng rlau jơh! Gen bè hớ, rlau mơ kờn tề lăm Yàng, he pờ té nùs, gơn kơnờm mơ jào phi rài kis he dê Yàng in nàng Yàng khat gơboh lơh broă. Tú bol he gơn kơnờm Yàng bơh bơta dờn dềt rhền he dê, Yàng rơp pơnjat cih ală bơta niam hơđang rài kis he dê dồ bă crih crài ngan, nàng he dờp git Yàng la Bơtau sùm sền mơ ròng siăm bol he kờp ngai. Kơp kờn ngan bol he ờ tơnliă Yàng Tòm Trồ, mơya kứ gơn kơnờm Yàng tòm kir sơnre kah Yàng Liklìng nam do, mơ jơl jơh tòm rài kis bol he dê sơl.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.