Digul dunnia bềng bơta ò ring lơngai mơ bol glar, kòn mơnus găm sum jigloh tơhir bơta gơn kơnơm, lah gơs dô bơta lơi niam găm gơn hơđap. Mơ să tòm Ngài Lik Ling la jơnau đơs nên bềng bơta kòñ gơboh Yàng Tòm Trồ dê, lah bơta gơn kơnơm hơ̆ là gơs ngăn. Mơ să tòm Kơnràñ neh tus tòm rùp să kòn dềt, ceng bal bơta ang bơta dòn ală nùs nhơm găm kơp gơn jôi jat in.

Ngai do, ngai 06/12/2025, Bơta Hôi Dăn Kơp Ngai dăn jà ală ồng mò oh mi bơtê bal jơnau Yàng kơnơm dê bơta dong kơl Wally Odum dê bơh tơnggumê LIK LING GƠN KƠNƠM.

“Bañ rngòt, do, añ yal bol mê in dô nơm jơnau niam hòn chò dờng, gơ rơp dờng màng ală làng bol in;” (Luka 2:10)

Gơwet mơ oă cau, Lik Lik ming la kơnhai ông Nôel dê mơ ală phan bàn. Añ gơs dơ̆ sền geh bar nơm sră pơyoa ală oh dềt pơyoa ông Nôel in ting hơ̆ gơs dô nă oh cih: “Ông Nôel kòñ gơboh, sơnăm or ông ò ceng phan lơi niam kòn in. Sơnăm lai tai kung behơ̆, dô la sơnăm lôi ai ông in.”

Kơno gen gơlơh kôr nhó ngăn, mơya ală jơnau cih băliă hơ̆ kung lơh añ in nrơt đăl git: gơs dơ̆ bol he kung behơ̆, mhăr hŭi gơtha ngăn bơta Lik Ling dê digul oă bơta àng gơcrà đah bơdih.

Cau Gơnoăr Bơto Phillips Brooks la cau cih chờ goh “Ô, bon dềt Betlehem”, neh ràng tơlik wil tơl gơtha ngăn Ngai Lik LIng dê ming tòm dô nơm sèng chờ: “Bơta kơp kòñ, bơh tòm rai yau, neh gơlik gơs măng do.”

Sătòm tòm Betlehem dềt hơ̆, Yàng Tòm Trồ neh hơ wơl bơta kơp kòñ jơh dunnia dê găn dê bơta lik ling Kòn Kơnràñ – Yàng Dong Jêsus Krist.

Bơta kơp kòñ hơ̆ ò di mìng ai lang bol Juda in lơm – ală cau neh gơs Sră Goh mơ ală jơnau gơnoăr hwơr – mơ kung ai jơh làng bol bơdih in sơl. Ală cau jak chai bơh đah Mattơngai lik, lă ală cau chai sền sơmañ tus bơh Ba Tư, neh tơnggơr hơđăng trồ nang jôi til sơnio bơh dô nă Bơtau mor lik rai. Sră Mathiơ cih wơl lah bol khai neh ai dô seng lùp: ““Ntềng đah Bơtau làng bol Juda pa deh taih? Bơh bol hi neh gŏ sơmañ Kơnràñ bơh đah mattơngai lik, gen lòt tus nàng duh khoai Kơnràñ.”(Mathiơ 2:2)

Sơmañ mơ bol khai sền gŏ la têl sơnio bơh să tòm Yàng Tòm Trồ ai, nang tề lăm ală cau bơdih, ală cau gơlơh be “đah bơdih”, geh tus tip Kon Kơnràñ.

Chò ngăn, ală cau sền sơwì neh jôi bàn ală mpan yau tòm Ba Tư, geh kơp la dô rai bal mơ Yàng Jêsus, ting hơ̆ gơs cih wơl jơnau gơnoăr hwơr lah: “ dô nă cau bơtau ryŭ ryơm rơp lik rai đah mattơngai mut, lơgar Kơnràñ dê rơp bềng liu bơta song ring, lơngap lơngai mơ chơ hòp.” bol khai tian gơs sơndăn bơtau hơ̆ in dô nơm sơnđăn: Sosiosh.

Ală cau hơ̆ ò hềt git Yàng TÒm TRồ Israel dê, mơya bol khai gơs nus jigloh tơhir joi jat jơnau song. Mơ Yàng Tòm TRồ neh hơ wơl jơnau bol khai. Kơnràñ kung găm sùm hơ wơl ală nùs nhơm găm jôi jat Kơnràñ.

Jơnau Niam mơ Ngai Lik Ling ràng tơlik là: Yàng Tòm TRồ cèng bơta gơn kơnơm tus jơh tơl nă cau in, ò kơp bol khai tus bơh lơi, jat gùng duh khoai lơi hala gơs ală bơta lơh lòt bơh yau lơi. Cau gơnrơh yal ală cau ê in tòm blang măng hơ̆: “Gen cau gơnrơh đơs mơ bol khai lah: “Bañ rngòt, do, añ yal bol mê in dô nơm jơnau niam hòn chò dờng, gơ rơp dờng màng ală làng bol in;” (Luka 2:10).

Lik Ling la kơnhai bơta Gơn kơnơm dê, ai ală cau lơi in jigloh tơhir geh dong klas, ală nùs nhơm kơp gơn Yàng Tòm TRồ mù tus mư tơmgơl rai kis he. Mơ jơnau niam hơ̆ la Kơnràñ neh tus rau!Kơp kòñ kơnhai Lik Ling năm do, Yàng Dong Jêsus rơp pơnđăng tòm nùs bol he dô bơta gơn kơnơm pa, àng loh mơ kis. Ndrơm be jơnau đơs chờ ală cau gơnrơh dê đơs tòm măng hơ̆: ““Gơklŏ ngan Yàng Tom Trồ ơm hơđang tap trồ jòng rlau jơh.

Ring lơngai tòm ù ai cau geh nđàc in niam nùs Kơnràñ.”

Dan jà: bol he dô nùs bal tòm bơta hòi dan: Khoai Yàng Dong Jêsus kòñ gơboh, kòn ưnngai Kơnràñ bơh neh tus mơ dunnia klăm jơngọ dô nàng cèng tus bơta gơn kơnơm mơ lơngai ngăn. Ưnngai Kơnràñ bơh neh sac tus tòm bơta pơndềt să, nàng kòn mơnùs dềt rhền be kòn kung rgơi tus rềp Kơnràñ. Bềp ơi, tòm ală tŭkòn lơbơn, roh gơn kơnơm hala roh bơta dòn, dăn chu wơl tòm nùs kòn bơta àng gơn kơnơm bơh să tòm Kơnràñ. Kơp kòñ nùs kòn sùm git jôi jat Kơnràñ, nàng bơta bơta chơ hòp Lik Ling sùm geh kis tòm kòn kơp ngai. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, Kơnhai Gơn Kơnơm la tŭ lơmpah nàng bol he bơdơh wơl dô ết, lăng wơl nùs nhơm he dê. Digơlăn oh mi găm gơn dô nơm sèng hơ, dô bơta krơi, hala ming kơp gơn joi ban bơta lơngai digul ală ngai oă bơta. Mơ ya jrô ndơp tòm jơh ală bơta hơ̆, digơlăn Yàng găm kòñ oh mi dơp git lah să tòm Kơnràñ la bơta oh mi pal càng ngăn. Kơp kòñ lah kơnhai Lik Ling do, oh mi rơp sền gŏ Kơnràñ be ală cau jak chai rai yau, mơ nùs nhơm ji gloh tơhir. Bơh cau lơi jơh nus joi jat Yàng Dong gen nên cê rơp tìp geh Kơnràñ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.