Bol he neh rlau dô bơta sơnrợp tơm kơnhai 12 di, sơlơ ngai he mơr tus rêp di ngai Kirsơnre Yang Lik ling. Kơp bạ tiah găm chờ nus wă rò ngai pơjum dơng do. Bơh ală gùng dờng, bơta hon chờ ngai Yang lik ling bìng tơl jơh kợp bạ tiah, lơh nus he di kah tus di ngai Yang Jesu neh lik ling. Mơya, digul bơta giga tơm ngai pơjum do, lời te tú jơ nàng wet nus gơrê di Bet-le-hem lai or, tơm tiah Noel sơnrợp neh tơlik tơm bơta ngệt ngơt mơ pơndệt să.

Ngai do, ngai 07/12/2025, Bơta Hòi Dan Kòp Ngai dan jà ală ồng mò oh mi kơlôi sơnưng bal Jơnau Yàng kơnòm dê bơta dong kơl Cathy Irvin bơh tơnggume: NOEL SƠNRPỢP.

“Khai deh kòn klau tơnhoa, ai ồi klơm, mơ tơmbic tòm bòng ñhơt, bơh hìu ơpah bic ò gơs tiah bol khai in ơm.”( Luka 2:7)

Oh mi găm gơs nus kơp gơn kơnhai mrệt tus sơl, cèng tus bơta noat mrệt hala ală gar piăr bọ neh tus? Să tờm an mìng kơp gơn gơs dô ngai noat mrệt ngan, nàng ơm mó tơm hìu, bic tơm bềl ram mơ nhô dô li che, dô li cafe, hala sôcôla duh.

Đơs ngan lah, kơnhai noat mrệt là kơnhai an ò kờn. Mơya, dớ dớ an kung kờn lot dô ne nàng roat phan mơ dợp git kơnhai mrêt. Gơs dớ an kung tề kơmòn an di lot gut dar gùng dờng, sền ală đèng gơcra tơm ngai Noel.

Hớ là dớ an gơs nus kờn kơnhai mrệt la pơgap 12 nam lai or, tú an neh ơm tơm tiah Toronto, Canada. Ăn kah ngar tú an neh koar di piăr gơ lơh kờn ngan, mơ dơp git gơ la rô ò di dơm. An neh lot tus tiah dơng mơ tàu điên ngầm, lot bơdih gut dar ală gùng dơng, mut di ală hìu tak phan, mơ krơi ngan la bolah trồ tiah noat mrệt mơ nus ò gơ lơh ngệt.

Đợ ngai lài or, an gơs tú nàng tơmbơhbơr mơ dô nă bơyô an di bơh ngai Noel sơn rợp. An neh lụp is la, digơlăn ngai hớ mrệt ngan sơl, hala gơs piăr duh? An kah tus di Yang Jesu bic tơm bòng nhơt, wang kơnrồ mơ klơm mơ ồi, be Sră Goh neh cih: “Khai deh kòn klau tơnhoa, ai ồi klơm, mơ tơmbic tòm bòng ñhơt, bơh hìu ơpah bic ò gơs tiah bol khai in ơm.”(Luka 2:7)

Sră Goh ò cih loh ngai Yang Jesu lik ling. Mơya bơta hớ ngan la kwơ màng rlau mơ nus nhờm bol he di kợp tú he kah tus ngai Yang lik ling sơl? Bòng nhơt lài or kung be nus nhờm he di: bing bơta klăm jơngo, ò sô ò soàng, ò di pal, mơya Yang kư ơm băl. Mơya nus nhờm bol he di găm lời tiah nàng Yang in mut hala ò? Hala nus nhờm hớ bing tơl jơh ală bơta kơlôi rcăng mơ moat jrum rài do di?

Gen tàng be hớ, tú he kơlôi tus di ngai Noel sơn rợp, bol he pal sền swì is nú he di mơ hòi dăn yang at bộ rài kis he di. Yang Jesu neh tus tơm dunnia do tơnlaih is să he nàng deh tơm bòng nhơt. Tú kah kơlôi tus di Bơtau neh kong oă bơta bol glar mơ kong kon mơnus sang tơlik, ăn gơ lơh geh sôr bơtrut nàng prap kớ nus nhờm ngai Noel, bơh di kơp tú, kợp ngai tơm rài kis. Kơnòm di bơta hớ, ăn rgơi àng pha mơ ală ngai bol glar mơ kalkle tơm rài kis, bơh an neh git Yang Jesu neh kong ală bơta ji sột dơng rlau mơ ală bơat jee sột an di.

Chờ Goh “ NôEl Sơn Rợp” yăl wơl ală” cau ê belat rbah” neh lot jat sơman tú geh cau gơnrơh yăl tơnggit. Tus di tiah bol khai sền gó Kon Dệt Jesu neh bic tơm bòng nhơt bơh bơh hìu ơpah bic ò gơs tiah bol khai in ơm. Măng Noel sơn rợp di tiah Bet-le-hem ò gơs àng đèng gơcrà, ò gơs cau jơnum chờ hợp, kung ò gơs cau lot tus ma kiau, mơya mìng gơs dô sơman àng gơcrà hơ đăng trồ măng klăm jơngo, sol àng di tiah Kon Yang di neh deh, cèng bơta àng kơp gơn tus dunnia in:

“Nô-el sơn-rip gơn-rơh yăl wơl,
cau î be-làt drơng măng tom blang.
Ơm rip mơ gơp sin gar be-làt,
tom măng ngit-ngơt, dà tŭ noat-mrit.
Nô-el, Nô-el, Nô-el, Nô-el,
lik-ling Bơ-tau I-sơ-ra-el.”

Dan jà bol he dô nùs bal tòm bơta hòi dan: Khoai Yang Kờn gơboh! Ơ Yang, kon ưn ngai Yang bơh Yang neh tơngkah kon kah kơlôi tus ngai Yang Lik Ling sơn rợp. Dăn Yang dong kon git rê wơl băl mơ nus nhờm pơn dệt să tơ măng goh hớ, nàng li bơta tơm rài kis, kon kung prap kớ nus he di dô abw wil tơl tơm Yang. dăn Yang mut tơm nus bìng bơta tội glai kon di, lơh pa wơl mơ tơm gơl să tơm kon tơm ngai Yang Lik Ling do. Kon jơh nus hoi dăn tơm Sơn Đăn Yang Jesu Krist. A-men.

Ơ ală ồng mò oh mi kờn gơboh, bol he găm ơm tơm tú giga nàng rcăng ngai pơjum dơng di. Digul bơta hớ, bol he geh hòi jạ rê wơl mơ Bet-Le-Hem lai or mơ sên gó Yang Jesu, Bơtau neh tơn liah să nàng lik ling tơm dunnia. Mơ ngai do, Yang găm joi ală nus nhờm lơbơn, chừo nus nàng wă rò Yang mut tơm nus.
Lài mơtú ngai Yang lik ling tus, oh mi kơlôi sơ nơng té bơta lơi găm at bộ nus nhờm he di, digơlan ală bơta hớ lơh oh mi in dơrcul, rô ran sơl? Hoi dăn té mơ Yang, dăn Yang was săng jơh ală bơta hớ, nàng oh mi rgơi ja Yang mut mơ at bộ, tơm gơl rài kis he di.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.