Nyob rau lub ntiajteb tsis muaj kev tso siab thiab muaj kev txomnyem, tib neeg yeej ntshaw kom nrhiav tau ib txoj kev cia siab, tias puas muaj ib yam dabtsi twg zoo tab tom tos tom hauv ntej. Thiab koob tsheej Tswv Yexus yug yog Vajtswv cov lus tab pov muaj kev hlub, tias txoj kev cia siab ntawd yog muaj tiag. Vim Nws tau los yug zoo li tus menyuam mos, coj qhov pom kev, rau cov neeg uas tab tom tos ntsoov thiab nrhiav tshuav ntawd.

Hnub no, yog hnub 06/12/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Wally Odum dhau ntawm Zaj kawm KOOB TSHEEJ TSWV YEXUS YUG MUAJ KEV CIA SIAB.

“Nej tsis txhob ntshai! Kuv los ntawm no yog coj txojmoo zoo uas yog txojkev zoo siab kawg nkaus rau txhua haivneeg los qhia rau nej paub” (Lukas 2:10)

Nyob ntawm ntau tus, koob tsheej Tswv Yexus yug tsuas yog ib lub caij uas muaj tus yawm laus hu ua Noel thiab tej qhov khoom plig xwb. Kuv nco muaj zaug nyeem tau tej menyuam yaus ob tsab ntawv xa rau tus yawm laus Noel, nyob hauv muaj ib tug sau: “Nyob zoo yawm laus, xyoo tas los koj tsis pub ib qhov khoom plig twg zoo rau kuv. Xyoo tom ntej los kuj ib yam. Ntawm no yog lub sijhawm kawg pub rau koj lawm xwb”.

Mloog zoo luag, tiamsis cov lus no ua rau kuv ceeb thiab pom ib qhov tias: ntau zaug peb kuj ib yam li ntawd, yooj yim hnov qab lub ntsiab tiag ntawm koob tsheej Tswv Yexus yug thaum muaj ntau yam ci lam lug nyob sab nraud.

Xibhwb Phillips Brooks yog tus sau zaj nkauj “Oh, Npelehees yog lub zos me” tau hais txog lub ntsiab tiag ntawm koob tsheej Tswv Yexus yug nyob rau hauv ib zaj nkauj: “Ntau txoj kev cia siab, ntau txoj kev txhawj txhua qhov, thaum no ntsib rau thaum ib tag ho.”

Twb yog nyob rau hauv lub nroog Npelehees me me ntawd, Vajtswv tau teb tib neeg ntiajteb txoj kev cia siab dhau ntawm Tswv Yexus txoj kev los yug ua neeg – yog cawm seej Tswv Yexus Khetos.

Txoj kev cia siab ntawd tsis yog tsuas tseg rau cov neeg Yudais, cov uas twb muaj Vajluskub thiab tejlus cov lus cev – tiamsis tseem tseg rau lwm haiv neeg thiab. Cov tub txawg nyob sab hnub poob, yog cov txawj saib hnub qub lawv tuaj hauv tebchaws Pawxias tuaj, tau saib lub ntuj thiaj paub txog lub cim yuav muaj ib tug Vajntxwv yuav yug los. Phau ntawv Mathais hais tias lawv tau nug lo lus nug: “Tus rnetub uas yuav ua cov Yudais tus vajntxwv, nws yug rau qhov twg? Peb porn nws lub hnubqub uas qhia hais tias, nws yug los lawm tawm tim sab hnubtuaj tuaj, peb thiaj tuaj pehawm nws.” (Mathais 2:2).

Lub hnub qub uas lawv pom yog lub cim uas Vajtswv pub rau lawv, coj lwm haiv neeg, cov neeg uas cuag li yog neeg “nyob sab nraud”, tau tuaj ntsib Vajtswv tus tub.

Zoo tshaj, cov tub txawg tau nrhiav pom cov duab tebchaws qub nyob hauv Pawxias, tau suav tias yog nrog Tswv Yexus tiam ua ke, nyob hauv sau tseg cov lus cev lus tias: “Muaj ib tug vajntxwv zoo heev yuav yug nyob lwm lub tebchaws, nws lub tebchaws yuav puv npo kev ncaj ncees, kev kaj siab thiab kev zoo siab”. Ntau zaug lawv tseem tis ib lub npe rau tus vajntxwv ntawd hu ua: Sosiosh.
Cov neeg ntawd lawv tsis paub cov neeg Yixalayees tus Vajtswv, tiamsis lawv muaj siab nrhiav qhov tseeb. Thiab Vajtswv tau teb lawv tej lus thov. Vajtswv yeej niaj hnub teb cov neeg uas muaj lub siab nrhiav Nws tiag tiag.

Txojmoo zoo uas koob tsheej Tswv Yexus yug xav qhia yog: Vajtswv coj txoj kev cia siab los pub rau txhua tus, txawm lawv yuav los qhov twg los, yuav ntseeg txoj kev ntseeg twg thiab txoj kev coj noj coj ua twg. Timtswv tshaj xo rau cov yug yaj tom roob rau hmo ntawd: “Nej tsis txhob ntshai! Kuv los ntawm no yog coj txojmoo zoo uas yog txojkev zoo siab kawg nkaus rau txhua haivneeg los qhia rau nej paub” (Lukas 2:10).

Koob tsheej Tswv Yexus yog lub caij ntawm txoj kev cia siab, tseg rau tus uas tab tom ntshaw kom tau txais kev cawmdim, cov neeg uas muaj lub siab tos ntsoov Vajtswv los nyob hauv thiab hloov pauv yus lub neej. Thiab txojmoo zoo ntawd yog Tswv Yexus twb los lawm!

Thov kom koob tsheej Tswv Yexus yug xyoo no, cawm seej Tswv Yexus yuav zes kom cig rau hauv peb txhua tus lub siab txoj kev cia siab tshiab, thiab ciaj sia. Zoo li cov lus uas timtswv tau tsa suab rau hmo ntawd: “Thov kom Vajtswv tus uas nyob saum ntuj ceebtsheej tau koob meej, thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug!” (Lukas 2:14).

Thov caw nrog kuv peb thov Vajtswv ua ke: Tswv Yexus, kuv ua Koj tsaug vim koj tau los rau hauv lub ntiajteb tsaus ntuj nti no coj txoj kev cia siab thiab kev kaj siab tiag los. Kuv ua Koj tsaug vim koj tau xaiv nyob hauv txoj kev txo hwjchim, kom tib neeg me zoo li kuv kuj tau los nyob ze koj. Leej Txiv, lub sijhawm uas kuv qaug zog tshaj, tas kev cia siab thiab poob kev ntseeg, thov ntsaub qhov pom kev nyob hauv kuv lub siab kom muaj kev cia siab. Thov kom kuv lub siab paub nrhiav koj, kom txoj kev zoo siab thaum koob tsheej no yuav ciaj sia txhua hnub. Kuv thov hauv Tswv Yexus Khetos lub npe, Amees.

Cov kwv tij, koob tsheej Tswv Yexus yug yog lub sijhawm tseg rau peb nres ib mentsis, tig rov qab mus saib yus lub siab tej zaug koj tab tom tos ib lo lus teb, ib qhov txujci, lossis tsuas tab tom nrhiav kev kaj siab nyob rau tej hnub tsis khoom ntawd. Tiamsis nyob tob tob puag hauv tej ntawd, tej zaug Vajtswv xav kom koj paub tias Nws thiaj yog yam uas koj cheem tsum tiag tiag. Cia siab tias koob tsheej Tswv Yexus yug xyoo no, koj yuav nrhiav tau Nws ib yam li cov tub txawg txawj saib hnub qub thaum ub, los ntawm lub siab ntshaw. Vim tus uas tas siab nrhiav Vajtswv yuav ntsib tau Nws.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj