Ală sèng đơs chò jong-ro ngai lik ling neh sơntòm mơ tus tom ală ƀòn, tiah gơs oă cau, mơ tom hiu is bol he dê. Kơnhai Lik Ling òs sùm sơnđan la kơnhai kòñ gơboh, gơn kơnòm, mơ hòn-chò, tom tŭ rbô nă cau dồ nùs bal wèt hơ Yang Đăng Trồ Bơtau Bar mơ jòng ro Kơnràñ. Bơh tiah ngềt-ngơt Betlehem ngài òr tus làm bă tiah hơđang plai ù ngai do, jơnau hòi jà tus tĕ duh khoai mơ sền Yàng Dọ̆ng-Klàs gam sùm bè òs ò tơmgơl.

Ngai do, ngai 08/12/2025, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Kenneth W.Osbeck bơh tơnggume Ơ CAU DON-SỌ̆NG MƠ YÀNG.

“Tŭ ală cau gơnrơh neh lòi bol khai mơ guh rê hơ lơgar trồ rau, ală cau ê belàt đơs bal lah: “Heh! Bol he lòt lă tus hơ Betlehem nàng sền broă neh gơlik gơs mơ Yàng ai bol he in git.” Chòp bol khai sơrbac sơrbang lòt tus tềng hơ̆, gŏ Mari, Jôsep, mơ oh nga bic tòm bòng ñhơt. (Luka 2:15-16)

Gơwèt mơ añ, ală sèng đơs chò tom kơnhai Lik Ling la ală sèng đơs chò chò-hòp mơ gơs gơtha niam rlau jơh mơ kòn mơnùs neh git. Digùl rbô rhiàng sèng đơs chò hơ̆, “Ơ Cau Dòn Song Mơ Yang” la dùl tom ală sèng đơs chò geh kòñ gơboh rlau jơh hơđang plai ù do. Ngai do, sèng đơs chò do geh jòng-ro làm bă tiah hơđang plai ù tài bơh neh geh cih tơlik bơh jơnau Grek tus hơ dồ rhiang jơnau đơs ndai. Ală rùp sơnio tom sèng đơs chò do geh bơta kis, gơs gơtha mơ gơs dô gơnoar pràn gơwèt mơ ală pah rài, jơh ală sơnoa rnoàs.

Sră tơnggu tơm jơnau Grek gơs poan jơnau. Jơnau sơnròp hòi jà bol he tus sền Kọn dềt Jesu bìc tom bọ̆ng ñhơt tom Betlehem:

“Ơ cau dòn song mơ Yang, tus mhăr mơ nùs hòn-chò, mut tom ƀọn Betlehem nang duh khoai Yàng Kọn. Yang hơđang trồ jọng neh tus lik-ling tom dunnia.”
Jơnau dơ̆ bàr tơngkah bol he bơh dô bơta bơto dờng mang, Yàng Jesu la Yàng Tom Trồ. Jơnau tom sră tơnggu tòm jơnau Grek ai wơl la dô bơta dờng mang bơta dòn Cau dòn dê, ting hơ̆ cih, “Yàng Tom Trồ bơh đăng trồ, Bơta Àng bơh Bơta Àng, la Yàng Tom Trồ ngan, geh deh mơ ò di geh crơng gơs”. Jơnau cih tơlik tom Sră Đơs chò jơnau Yoan bè do:

“Yang Jesu bơh đăng trồ, la Kọn Yàng Tom Trồ ngăn, mơ koñ lik ling tom ù dọ nang dọ̆ng bol he. Bol he păl đơs chò jong-ro Yàng Kọn neh lik ling.”

Jơnau dơ̆ pe cih loh sèng đơs chò bîng hòn-chò ală cau ling bơh trồ, cau gơnrơh mơ ală cau î belàt bă lĭa ngai or neh kơnọ:

“Cau gơnrơh hơđăng trồ đơs chò driau dờng jong Yàng, ơ lang bọ̆l tom ù păl dô nùs nang jong Yang. Ang sơnđăn Yang Bèp hơđăng ală tap trồ jọng.”

Mơ jơnau lồi dut sèng đơs chò dê neh ơn bơta jong ro Yàng Jesu neh gơlik gơs Kọn mơnus, la Bơtau Jơnau, la Bơtau neh ơm băl mơ Yàng Bèp bơh lài mơ tŭ crơng gơs trồ tiah:

“Hòn-chò ngăn mơ wă rò Yàng lik ling ơm mơ he; bơta gơklọ̆ păl gơrê hơ Yàng sum sum. Yàng Kọn neh lik-ling la Bơtau tus bơh Yàng Bèp.”

Tom oă sơnăm, “Ơ Cau Don Sọ̆ng Mơ Yang” geh sền la sèng đơs chò ò git loh cau cih. Bulah behơ̆, ală cau sền sơwì wơl neh jòi bàn ală sră geh cih mơ tê ai gọ̆ sèng đơs chò do neh geh cih tom năm 1744 bơh dô nă cau tom ƀòn Anh sơnđăn la John Wade, mơ ồng kung la cau cih ală ‘nốt nhạc’ sèng đơs chò in jat be gùng ngai do. Sèng đơs chò do dơ̆ sơnròp geh rang tơlik tom tap Cantus Diversi tom lơgar Anh tom năm 1751. Pơgap tơnơ̆ mơ dô rhiang năm, dô nă cau gơnoar bơto Anh Giáo sơnđan la Fredrick Oakeley neh cih tơlik jơnau Anh nàng geh ngui tom Hiu Jum Goh ồng dê. Sơnđan la “Adeste Fideles” la jơnau geh ai tom ală jơnau sơnròp sră Grek dê, gơs gơtha la “Ơ ală cau don sọ̆ng, tus tĕ sền.”

Ală cau î belàt, bulah mìng la ală cau òsơp-òsọ tom dunnia, mơ ya bol khai geh tìp mơ gọ̆ Yàng Dọ̆ng-Klàs. Tơnơ̆ mơ tŭ ală cau gơnrơh lòi bol khai, bol khai lơh nền tus ƀòn Betlehem nàng sền bơta cau gơnrơh neh đơs. Mơ nùs nhơm ngac-ngar, bol khai sơrbàc-sơrbăng lòt tus joi Yàng Jesu. Sră Goh sră Luka 2:15-20 neh cih wơl be do: “Tŭ ală cau gơnrơh neh lòi bol khai mơ guh rê hơ lơgar trồ rau, ală cau ê belàt đơs bal lah: “Heh! Bol he lòt lă tus hơ Betlehem nàng sền broă neh gơlik gơs mơ Yàng ai bol he in git.” Chòp bol khai sơrbac sơrbang lòt tus tềng hơ̆, gŏ Mari, Jôsep, mơ oh nga bic tòm bòng ñhơt. Neh gŏ behơ̆, gen bol khai yal wơl ală jơnau neh yal bol khai in bơh kòn dềt hơ̆. Jơh ală cau lơi kơno jơnau cau ê belàt yal wơl, gen ai lơh krơi ngan. Ai Mari gen prap ală jơnau hơ̆ mơ kơlôi sơnơng tòm nùs. Ală cau ê belàt rê wơl, lơh àng sơnđan mơ jòng ro Yàng Tom Trồ bơh ală bơta bol khai neh kơno mơ gŏ, tòm toh be jơnau neh yal bol khai in.”
Digùl bơta chò-hòp kơnhai pơjum dê, bol he buôn ngăn gơkòl hwài tus hơ ală broă lơh giga mơ bơta hòn-chò đah bơdih, mơ hŭi lah să tòm he pal cang rê wơl mơ gơtha ngăn kơnhai Yang Lik-ling dê: hơ̆ la pal geh tìp Yang Dọ̆ng-Klàs, geh Kơnràñ tom pơrgơl nùs nhơm, nàng tom tŭ kơnhai Yang Lik-ling lòt gan, bol he kung geh tom pơrgơl kung be ală cau î belàt ngai or: “rê wơl, lơh àng sơnđan mơ jòng-ro Yàng Tom Trồ bơh ală bơta bol khai neh kơno mơ gŏ.”

Sèng đơs chò “Ơ Cau Don Sọ̆ng Mơ Yang” tơngkah bol he lah nàng geh tìp Yang Dọ̆ng-Klàs, bol he pal “mut tom Betlehem” mơ “duh khoai Kọn Yang”. Behơ̆ ală ngai lai mơ Lik-ling, oh mi ngac-ngar joi jat Yàng Jesu hala ò? Oh mi lòi nùs he duh khoai Kơnràñ “jơh nùs”, hala mìng tus duh khoai Kơnràñ dô bă ò jơh nùs, mơ cơnoà lòt dô bă bòl glar tom rài kis đah hwềng?

Digùl ală ngai giga, wàs tĕ nùs nhơm oh mi nàng tus sền mơ duh khoai Yang Dọ̆ng-Klàs kung be sèng đơs chò: “Ơ Cau Don Sọ̆ng Mơ Yang”:

“Goñ goñ lọt tus duh khoai Yang. Goñ Goñ lòt tus duh khoai Yàng, tus goñ duh khoai Jesu la Yang- Dọ̆ng he. Amen.”

Dan jà bol he dô nùs bal tòm bơta hòi dan: Khoai Yàng Jesu koñ gơboh! Kọn ưnngai Kơnràñ tài bơh neh Lik-ling nàng ai kọn in bơta kis gam sum sum. Dan ai nùs kọn đal git bơta koñ gơboh jrô ơnàng Kơnràñ dê, ò di mìng tom kơnhai Yàng Lik-ling lơm, mơ ya kờp ngai tom rài kis kọn dê. Khoai Yàng, dan ai nùs kọn mhar joi jat Kơnràñ nàng kọn kung geh tìp Kơnràñ kung bè ală cau î belàt ngai or, tò rài kis kọn geh tom pơrgơl, mơ lơh cơng Jơnau Niam bơh bơta dọ̆ng klàs Kơnràñ dê oă cau ndai in. Kọn jơh nùs hòi dan tom sơnđan Yàng Jesu Krist, Amen.

Ơ jơh ală ồng mò, oh mi koñ gơboh, bol he ò tus mơ Yàng mơ yal tơlik bơta don sọ̆ng mìng tom dô kơnhai lơi hơ̆, mơ ya bơta don sọ̆ng pal rang tơlik jơh rài kis jat Yàng. Kơnràñ gam hòi jà kờp nă bol he kis dô rài kis don sọ̆ng: don sọ̆ng tom bơta duh khoai Yàng, don sọ̆ng tom bơta joi jat Kơnràñ, mơ don sọ̆ng tom gơnoar sồr lơh cơng bơh Kơnràñ.

Ngai do, oh mi ơn tĕ tŭ jơ nàng “tus Betlehem” gan bơta rê wơl joi jat Yàng ìs să tòm he in mơ duh khoai Kơnràñ “loh lang” rlau. Ràc-dan tĕ Yàng dọ̆ng oh mi kis don sọ̆ng mơ Kơnràñ bulah la lài hala tơnơ̆ Ngai Lik-ling. Lai mơ kơnhai Yàng Lik-Ling, oh mi wàs goh nùs he nàng wă rò Kơnràñ; tơnơ̆ Yàng Lik-ling, nùs oh mi gam kư hòn-chò bîng liu mơ koñ gơboh Yàng rlau tai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.