Lub caij koob tsheej ua rau peb nco txog txoj kev cia siab thiab tej lus cog tseg txog Vajtswv txoj kev cawmdim. Tsheej txhiab xyoo dhau los, thaum cov neeg Yixalayees ua qhev txomnyem ntsuav lawv tau tos ntsoov tus Mexiyas los thiab tso lawv dim. Kuj ib yam li cov pej xeem thaum ub, peb txhua tus niaj hnub nim no kuj tab tom cheem tsum tus ntawd los nyob rau hauv peb lub siab.

Hnub no, yog hnub 09/12/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kenneth W. Osbeck dhau ntawm Zaj kawm EMANUES THOV KOJ LOS!

“Ib tug nkauj xwb  yuav xeeb tub thiab yuav yug tau ib tug metub, nws yuav muab tis npe hu ua ‘Emanu-ees” (Yaxayas 7:14).

Txoj kev npaj rau koob tsheej Tswv Yexus yug pib los ntawm plaub lub thiv ua ntej yuav txog hnub ua kevcai nco txog. Lub sijhawm no hu ua lub caij npaj tos. Nyob rau lub caij no, peb nco txog tej lus cev lus nyob hauv Vajluskub Qub hais txog tus Mexiyas, yog tus yuav los cawm Nws haiv neeg thiab tsim tsa Vajtswv lub tebchaws hauv ntiajteb. Rau pua xyoo ua ntej Tswv Yexus los yug, tus cev lus Yaxayas twb tshaj xo tias: “Ib tug nkauj xwb yuav xeeb tub thiab yuav yug tau ib tug metub, nws yuav muab tis npe hu ua ‘Emanu-ees” (Yaxayas 7:14).

Thaum cov neeg Yixalayees ua qhev nyob rau tim Npanpiloos, ntau xyoo dhau, lawv tos ntsoov ib tug tso lawv dim, yog tus Mexiyas yuav los thiab cawm lawv haiv neeg dim txoj kev ua qhev no.

Thaum kawg, yam uas lawv tos ntsoov kuj los. Tus Mexiyas uas cov cev lus hais txog tau los lawm tiag. Nyob rau hmo uas Tswv Yexus los ug, cov timtswv tau tshaj xo txog txoj xov zoo ntawd rau txhua haiv neeg: “Hnub no nej tus Cawmseej twb yug los rau hauv Daviv lub nroog lawm, nws yog Khetos uas yog tus Tswv!” (Lukas 2:11).

Emanues muaj lub ntsiab tias “Vajtswv nrog peb nyob” (Mathais 1:23). Lub npe no ntuas peb nco txog Vajtswv txoj kev hlub thiab kev tshwm ntsej muag nyob rau hauv txhua tus lub neej uas ntseeg nws. Nyob rau tej lub caijnyoog tsaus ntuj nti nyuaj siab, tag kev cia siab hauv lub neej, peb yeej muaj ib tug Vajtswv nrog peb nyob thiab pab peb nyob rau tej hnub zoo li ntawd.

Txhua zaug uas koob tsheej Tswv Yexus yug los txog, peb yuav hnov zaj nkauj “Emanues, thov koj cia li los!” feem ntau zaj nkauj no tau hu nyob rau hauv tej tuam tsev rau lub sijhawm no. Zaj nkauj no lub hauv paus yog pib puag thaum ub los. Ua ntej hmo ua kevcai, zaj nkauj no hu rau thaum cov Pawg Ntseeg lawv ua kev cai rau yav tsaus ntuj. Txhua nqe ntawm zaj nkauj nthuav tawm txoj kev tos ntsoov tus Mexiyas, thiab qhuas Nws los ntawm lub npe uas siab tshaj plaws: Tus Txawj Ntse, Tus Muaj Hwjchim, Yexais tus ntsuag kaus, Lub Hnub qub uas ci tshaj, tus uas muaj Daviv tus yaum sij.

Zaj nkauj no hais txog Vajtswv cov neeg tej lus thov dhau ntau tiam. Thaum hnov dhau, txhua nqe zoo li cov neeg tab tom tos ntsoov tus cawm seej tej lus thov: “Thov Emanues los saib Vajtswv haiv neeg. Ntau xyoo dhau ua qhev txomnyem no.” Hnub no, txawm peb tsis nyob hauv txoj kev ua qhev li cov neeg Yixalayees thaum ub lawm los, peb yeej tab tom nyob hauv txoj saw hlau kev txhaum, ntshai thiab nyob ib leeg. Cov lus thov “Emanues, cia li los!” yog cov lus taij thov Tswv Yexus los rau hauv peb lub neej thiab cawm peb dim kev txhaum, kev nyuaj siab hauv lub neej, thiab pub peb muaj kev cia siab tshiab hauv Nws:

Thov Emanues los saib Nws haiv neeg.
Ntau xyoo dhau ua qhev txomnyem.
Txoj kev ua neej txomnyem tsaus ntuj nti
Thov Emanues los saib Nws haiv neeg.
Cia li hu zoo siab, tos ntsoov tus Tswv yug los.
Coj txoj kev cia siab, koob hmoov nplua mias rau neeg lub siab.

Thov caw nrog kuv peb thov Vajtswv ua ke: Tus Tswv muaj kev hlub, koj yog kuv txoj kev cia siab! Kuv ua Koj tsaug vim Koj tau lus yug kom tso kuv dim ntawm tej kev ntshai thiab raug khi ua ke nrog kev txhaum. Nyob rau txhua lub caijnyoog, thov koj qhia rau kuv paub tias koj yeej nyob ntawm kuv ib sab, thiab coj kuv mus dhau tej hnub tsaus ntuj nti hauv lub neej. Kuv thov hauv Tswv Yexus Khetos lub npe, Amees.

Cov kwv tij txhua tus, lub npe Emanues ntuas kom peb nco txog ib tug Vajtswv nrog nraim peb nyob: nyob rau hauv txhua txoj kev ua pa, txhua txoj kev zoo siab thiab tag nrho thaum peb qaug zog, nyuaj siab tshaj. Koj tab tom tom nyob hauv lub nra uas ris kev txhaum nyhav nyhav? Cia li thov Emanues, tus zoo siab hlo zam txim thiab hloov pauv koj dua tshiab. Koj tab tom nyob rau tej hnub nyob ib leeg thiab muaj kev tu siab los? Cia li cawm Emanues los saib koj; Nws yuav txhawm kom puv nkaus Nws txoj kev hlub. Nyob rau hauv koob tsheej xyoo no, thov kom koj paub tias Emanues – Vajtswv nrog peb nyob tab tom tshwm ntsej muag, tso peb dim, pub kev cia siab rau peb txhua tus txhua feeb hauv lub neej.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.