Kơnhai kơp gơn tơngkah bŏl he bơh bơta gơn kơnòm mơ jơnau ho pơgon dŏng tơwài Yang Tom Trồ di. Nđợ rbô năm lài, tòm bơta lơh dĭ bŏl glăr, làng bŏl Israel neh kơp gơn Bơtau Media rơp tus mơ dŏng tă bŏl khai. Kŭng be làng bŏl lài or, kòp nă bŏl he ngai do găm gơs càng Bơtau hơ̆ tus tòm rài kis he.

Ngai do, ngai 09/12/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Kenneth W. Osbeck dê bơh Tơnggume EMMANUEL, DĂN TUS TĔ!

“ Ne, dô nă cau ơruh rơp bun mơ deh dô nă kòn klau, mơ rơp tơmoh sơnđan la Emmanuel.” (Esai 7:14)

Bơta rcang ngai Noel ĭn òs sơntom bơh poăn ngai Rlô lài ngai kir sơnrre Yang lik ling. Tŭ tơngai di geh sơnđăn la Kơnhai kơp gơn. Tòm kơnhai kơp gơn, bŏl he kah wơl ală jơnau gơnoăr hwơr tòm rài yau đơs bơh Bơtau Media, la Bơtau rơp tus nàng dŏng làng bŏl Kơnrẵn mơ bơtào gơs lơgar Yang Tom Trồ hơđăng ù. Rlau prau rhiang năm lài mơ tŭ Yang Jesu Lik ling, cau gơnoăr hwơr Esai neh yăl tơnggit: “Ne, dô nă cau ơruh rơp bun mơ deh dô nă kòn klau, mơ rơp tơmoh sơnđan la Emmanuel.” (Esai 7:14)

Tŭ cau Do Thái ơm tòm bơta lơh dĭ tòm BaBylon, oă sơnăm, bŏl khai rác ròc kơp gơn dô Bơtau Dong Klàs, la Bơtau Mesia, rơp tus mơ dŏng tơwài làng bŏl lik bơh tiah lơh dĭ.

Mơ lồi dut, bơta bŏl khai kơp gơn kŭng neh tus. Bơtau Mesia gen ală cau gơnoăr hwơr yăl tơnggit neh rơp tus ngăn. Tòm măng Yang Jesu lik ling, ală cau gơnrơh neh yăl tơnggit jơnau Niăm hơ̆ làng bŏl ĭn: “Hơ̆ la ngai do tòm ƀòn dờng Dabit dê neh deh bol mê in dô Bơtau Dong klàs, la Krist, la Yàng.” (Luka 2:11)

Emmanuel gơtha la “Yang Tom Trồ ơm băl mơ bŏl he” (Mathiơ 1: 23). Sơnđăn do tơngkah bŏl he bơh bơta koñ gơboh Yang Tom Trồ di mơ bơta tơlik mat Yang Tom Trồ di tòm rài kis kòp nă cau dòn Kơnrẵn. Tòm ală tŭ klăm jơngọ, bŏl he găm gơs dô Yang Tom Trồ ơm băl mơ dŏng kòl he tòm ală ngai hơ̆.

Kòp dơ̆ Ngai Noel tus, bŏl he rơp tìp chò Gọh “Emanuel, Dăn tus mhăr!” òs geh tìp tòm ală hìu jum tòm tŭ tơngai do. Chò Gọh do gơs tòm ryas bơh pah rài Trung Cổ. Tòm tŭ tơngai lài mơ tŭ măng Noel, chò gọh dogeh jòng ro tòm jơ pơjum mhô ală tiah pơjum di. Kòp sèng đơs wơl, jơnau chò gọh do ràng tơlik bơta kơp gơn bơh Bơtau Mesia, mơ jòng ro Yang bơh ală sơnđăn màng ryŭ be: Bơtau jak chài, Bơtau Gơnap gơnoăr, Chat sơmbut Jese di, Sơmăñ àng drim gơcrà, Bơtau gơs kài mpồng Dabit di.

Chò Gọh do đơs bơh jơnau họi dăn làng bŏl Yang di lòt găn ală pah rài. Tŭ iat kơno, jơnau chò gọh be jơnau rác ròc ală cau kơp gơn dô Bơtau Dong Klàs: “Hòi dăn Emanuel tus còp làng bŏl Kơnrẵn. Nđợ năm lài ngài ngăn bọn să jan bŏl glăr.” Ngai do, bulah bŏl he ò găm ơm tòm tiah lơh dĭ be làng bŏl Israel lài or, mơya digơlan bŏl he găm ơm tòm che sreng tồi glài di, rngòt rngơt mơ ơm is. Jơnau họi dăn “Emanuel, dăn tus mhăr!” la jơnau họi dăn Yang Jesu cơnđòa mut tòm rài kis mơ dŏng klàs bŏl he lik klàs tồi glài, moat jrung rài kis di, mơ kung ai pà wơl bŏl he in bơta gơn kơnòm pa tòm Kơnrẵn.

Hòi dăn Emanuel tus còp làng bŏl Kơnrẵn. Nđợ năm lài ngài ngăn bọn să jan bŏl glăr.

Rài kis bŏl glăr klăm jơngọ be măng ti.
Hòi dăn Emanuel tus còp làng bŏl Kơnrẵn.
Hòn chò hừh hơh, kơp gơn Yang rơp lik ling.
Cèng tus gơn kơnòm, lơ ngai lowngọ nùs cau.

Dan jà bol he dô nùs bal tòm bơta hòi dan: Khoai Yang koñ gơboh, Kơnrẵn là Bơtau gơn kơnòm kọn di! Kọn Ưnngai Yang tài bơh Kơnrẵn neh lik ling nàng kọn ĭn geh dŏng klàs bơh ală bơta rngòt rngơt mơ kòl kơt tồi glài di. Tòm jơh ală bơta, kơp koñ Kơnrẵn ai kon ĭn git lah Kơnrẵn ơm băl mơ kọn, mơ tề lăm kọn lòt găn ală bơta klăm jơngọ rài kis di. Kọn jơh nùs họi dăn, kọn ai sơnđăn Yang Jesu Krist , Amen.

Ơ ală ồng mọ ọh mi koñ gơboh, sơnđăn Emanuel tơngkah bŏl he bơh Dô nă YANG Tom Trồ òs ơm băl: Tòm kòp nhờm tă, kòp tŭ hòn chò, mơ tơ’ai lah tòm ală tŭ lơbơn lơño, moat jrung rlau jơh. He găm añ ơnòng njơ̆ tồi glài sơl? Rac dăn tĕ Emanuel, Bơtau chò nùs tọh glài jơh mơ tòmgơl pa he. He găm ơm tòm ală tŭ ơm is mơ ji sồt moat jrung sơl? Jà tĕ Emanuel tus còp he. Tòm Kơnhai Noel do, kơp koñ he git lah Emmanuel – Yang Tom Trồ ơm băl mơ bŏl he găm tơlik mat, dŏng tă, ai pà bơta gơn kơnòm kòp nă bŏl he kòp jơ phuk rài kis he.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.