Cau lơi dờn dờp Yàng gen geh bơta dong klàs mơ gơlik gơs làng bol lơgar Yàng Tòm Trồ dê, geh kis tòm bơta gơs mat mơ at bồ Yàng dê. mơya, hơđang rài kis do, cau dờn Yàng kung pal lòt gan oă ngan bơta kalke. oă dớ rlau mơ dờp bơta chò hòp, gen bol he tìp oă bơta moat jrùng. gơs tú lơi he lùp is lah “lơgar Yàng Tòm Trồ gam tềng lơi taih” hala ờ?

Ngai do, ngai 10/12/2025 rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ mò Missey Butler bơh tơnggume LƠGAR YÀNG TÒM TRỒ TỀNG LƠI TIAH?

“Cau Pharisi lùp Yàng Jesu lơgar Yàng Tom Trồ tŭ lơi tus, gen Kơnràñ ho lah: “Lơgar Yàng Tom Trồ tus ò rgơi gŏ mơ mat. Cau kung rơp ò rgơi đơs lah: ‘Tềng do,’ hala ‘Tềng hơ̆!’ Bơh lơgar Yàng Tom Trồ ơm tòm bol mê.” (‭‭Luka‬ ‭17‬:‭20‬-‭21)

Kờp mang kah Yàng liklìng, mẹ an dê sồr an bal mơ ală cau bi an dê mut tòm ơdú wă rò nac, sac dồ nơm phan pà hơđơm tòm chi noel mơ pờ. rềp mơ bơnhă ồs, bol hi chò hòp ngan lòt tus dồnh phan pà neh geh pồt dồ bă hàng mơné ngan. ăt ndang, rgô ndang, bol hi đơs lài phan pà do là bơta lơi, nùs bol hi dê kơp kờn ngan.

Bulah tú do an ờ di là dồ nă cau kơnòm dềt tai, mơya tòm kơnhai noel, an kung geh dờp dồ nơm phan pà. phan pà hớ geh pà bơh Bèp hơđang trồ. an rơp ờ bàssìl mơ đơs do la phan pà kas màng rlau jơh mơ an neh dờp, mơ bơta do neh cèng tus bơta dong tă hơđang rài kis an dê.

Tài bơh tòm oă sơnam, an dờp git nùs tồr an sùm gơkòl tòm bàr bơta: ală bơta moat jrùng bơh ală broă an neh lơh mơ ală bơta kơlôi rcang bơh ală broă ờ hềt tus, tian gơs bơta do lơh an in híu lah an pal kis dồ bă wil tơl tòm tú do. bồ tơngoh an gơkòl tom dră broă rài yau mơ broă ngai rơp tus, lơh an in ờ rgơi đal git bơta ring lơngai ngai do dê.

Tú an dờp git broă do dê, an geh tơngkah lah an pal càng kis hơđang ù do kung bè kis tòm lơgar Yàng Tòm Trồ dê. lơgar hớ ờ tú lơi lơngơr, mơya bềng bơta song ring, lơngap lơngai mơ chò hòp tòm Yàng Hwềng Goh. mơ bơta crih crài hơ la Yàng Hwềng Goh gam ơm tòm să tờm an dê!

Sră Goh Luca tap 17 cih lah, cau Pharisi lùp Yàng Jesu tú lơi lơgar Yàng Tòm Trồ rơp tus taih. digơlan bol khai kơp gơn dồ nơm lơgar tòm ù do, sền gó ală bơta gơkló mơ mat poac să dê. mơya Yàng Jesu ai bol khai in git lah lơgar Yàng Tòm Trồ dê ờ di tus jat bè bơta bol khai kơlôi sơnơng, tài bơh lơgar hớ ơm tòm kòp nùs nhơm ală cau dờn Yàng dê. mơ kon mơnus mìng rgơi dờp git lơgar Yàng Tòm Trồ hơđang ù do tú lời Yàng at bồ rài kis cau hớ dê, bè Sră Goh cih:

“Cau Pharisi lùp Yàng Jesu lơgar Yàng Tom Trồ tŭ lơi tus, gen Kơnràñ ho lah: “Lơgar Yàng Tom Trồ tus ò rgơi gŏ mơ mat. Cau kung rơp ò rgơi đơs lah: ‘Tềng do,’ hala ‘Tềng hơ̆!’ Bơh lơgar Yàng Tom Trồ ơm tòm bol mê.” (‭‭Luka‬ ‭17‬:‭20‬-‭21)

Yàng kung neh pà ai an in rgơi gó lơgar Yàng dê neh tus mơ an rgơi dờp git lơgar hớ tòm ngai do, ờ di la broă tòm ală ngai rơp tus. gen tàng bè hớ mơ Yàng Jesu neh hòi jà kòp nă cau pal gơjran sang glài tồ rgơi mut mơ kis tòm lơgar Yàng dê:
“Bol mê gơjrañ sang glài tĕ, bơh lơgar đang trồ neh tus rềp.” (‭‭Mathiơ‬ ‭4‬:‭17‬)

Tú bol he pờ nùs he dê mơ lòi Yàng Jesu at bồ rài kis he dê, hớ là tú bol he dờp git lơgar Yàng dê. Yàng Jesu la bồ da bơta kis, bơta ring lơngai, mơ lơngap lơngai. bơta chò hòp dờng bềng lìu tòm an tú an dờp git Bơtau Krist la tơl jơh ală bơta an in ngai do mơ jơl tus dê sùm sùm. “Bơtau Krist la jơh ală bơta mơ tòm jơh ală bơta.” (‭‭Kôlôse‬ ‭3‬:‭11). Yàng neh, gam, mơ rơp ơm bal mơ bol he tòm ngai òr, ngai do, mơ ngai hìng.

tơnớ mơ tú Yàng neh tomgơl nùs nhơm, an sơntờm dờp git bơta niam mơ bơta khat gơboh tòm rài kis do. an bơtê sền ală bơta dềt rhền tòm rài kis do, gơlơh bè jơnau nhó niam kòn dềt dê, hala càl khồm dê ală nha chi. tú do an ờ mhar nàng lòt gan ală bơta gơlơh bè dềt rhền tòm rài kis do tai, kung ờ lời ală bơta kơlôi rcang bơh ală ngai rơp tus hala bàssìl bơh ală broă an neh lơh. tồ an ờ lơh roh tú jơ tơngai kas màng ngai do dê.

Tú kơnhai Noel tus, an ừn ngài Yàng tài bơh neh pà an in dồ nơm phan pà niam rlau jơh, hớ la phan pà bơta kis ngai do dê. bơh hớ, an rgơi dờp git ală tú tơngai niam mơ Yàng pà ai an in. an bơtê git lah an pal sền dờng màng kơp jơ fuk ngai do dê, tài bơh ờ cau lơi rgơi git broă lơi rơp gơlik tòm ngai hìng dê. tú bol he kis bè kis tòm lơgar Yàng Tòm Trồ dê, bol he rơp dờp git bơta ơm bal sùm sùm Yàng dê tòm kờp jơ fuk rài kis he dê. tài bơh, Yàng sùm sùm ơm bal mơ bol he.

Dan jà bol he dô nùs bal tòm bơta hòi dan: Khoai Bèp kờn gơboh! oă dớ kon lời nùs nhơm kon dê moat jrùng bơh ală broă neh gơs mơ ală bơta kơlôi rcang ală broă ờ hềt gơs at bồ kon. bulah gam kis hơđang ù do, mơya dan Yàng pà ai kon in rgơi dờp git lơgar Yàng dê. dan rài kis kon dê rơp gơlik gơs rài kis dờn bơr, mơ ràng tơlik bơta bơkah niam lơgar đăng trồ dê tus ală cau gùt dar kon dê. kon jơh nùs hòi dăn ai sơnđan Yàng Jêsu Krist, A-men.

Ơ ală ồng mọ oh mi kờn gơboh, Yàng sùm gam ơm bal mơ bol he tòm kòp jơ fuk rài kis he dê. bulah he neh lơh oă broă tìs, tu do mơ ngai pơnjat sùm gơs oă bơta kalke, gen bol he kứ kớ nùs dờn kơnờm dê Yàng, la Bơtau At Bồ jơl jơh rài kis he dê. dan té mơ Yàng dong he đal git lơgar Yàng dê tòm tú he gam kis hơđang ù do, la lơgar bềng lìu bơta ring lơngai mơ pràn kơldang. pal sùm kah prap lah lơgar Yàng Tòm Trồ ờ di ơm ngài mơ he ờ, mơya hớ là tòm nùs nhơm ală cau neh dờn dờp Yàng Jêsu likling, kis sùm tòm bơta tomklac mơ Yàng, mơ cơnđoà lòt mơ Yàng jơl jơh rài kis he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.