Tus neeg twg tso kev ntseeg rau ntawm Vajtswv ces tus ntawd txais tau kev cawmdim thiab dhau los ua tus pejxeem nyob hauv Vajtswv lub tebchaws, tau nyob hauv Vajtswv txoj kev tshwm ntsej muag thiab saib xyuas. Tiamsis, qhov tseeb tiag, tus ntseeg Vajtswv lub neej kuj ntsib dhau ntau txoj kev txomnyem. Ntau zaug tsis yog kev zoo siab, tiamsis yog kev nyuaj siab. Puas muaj zaum twg koj cim civ nug tias “Vajtswv lub tebchaws tab tom nyob qhov twg”?

Hnub no, yog hnub 10/12/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Missey Butler dhau ntawm Zaj kawm VAJTSWV LUB TEBCHAWS NYOB QHOV TWG?

“Cov Falixais muaj qee leej nug Yexus hais tias thaum twg Vajtswv lub Tebchaws mam li los? Yexus teb hais tias, “Thaum uas Vajtswv lub Tebchaws los, yuav tsis muaj ib yam dabtsi qhia rau leejtwg paub. Tsis muaj leejtwg yuav hais tias, ‘Nej saib, nws nyob ntawm no,’ lossis ‘Nyob tod! ‘; Rau qhov Vajtswv lub Tebchaws twb los lawm” (Lukas 17:20-21).

Txhua hmo uas txog koob tsheej Tswv Yexus yug, niam hais rau kuv thiab cov tij laug kom lawv mus rau tom chav tos qhua, xaiv ib qhov khoom plig nyob hauv tsob ntoo thiab qhib los saib. Ntawm lub qhov cub nte taws, kuv kub siab lug mus rau ntawm cov khoom uas muab qhwv zoo zoo. Ke tuav, ke co txhua pob khoom, peb ke twv saib hauv yog dabtsi, lub siab kub lug puv npo kev xav.

Txawm yog thaum no kuv tsis yog ib tug menyuam mos lawm los, nyob rau lub koob tsheej xyoo no, kuv kuj tau qhib ib pob khoom koob tsheej ntxov. Pob khoom ntawd tau Leej Txiv saum ntuj pub. Kuv yuav tsis txaj muag tias nws yog ib nyob hauv cov khoom uas muaj nqis tshaj uas kuv tau txais, thiab nws coj txoj kev tso peb dim rau kuv lub neej.

Vim nyob hauv ib lub sijhawm ntev loo, kuv pom tias kuv lub hlwb raug khuam los ntawm ob yam: khuvxim tej yam yav dhau los thiab tej kev txhawj txog lub neej tom ntej, txog qhov uas kuv hnov qab tias kuv yuav tau ua lub neej kom zoo rau tamsim no. Kuv ntxhov siab rau lub neej yav tag los thiab lub neej tom ntej, ua rau kuv saj tsis tau txoj kev kaj siab rau hnub no.

Thaum kuv pom txog kuv tus kheej, kuv tau ntuas tias yus cheem tsum ua neej nyob hauv ntiajteb no zoo li tab tom nyob hauv Vajtswv lub tebchaws. Lub tebchaws ntawd tsis yoj yees, tiamsis puv npo kev ncaj ncees, kev kaj siab thiab zoo siab hauv Vaj Ntsujplig. Thiab yam uas zoo yog Vaj Ntsujplig nyob hauv kuv!
Vajluskub hauv phau Lukas tshooj 17 sau, cov neeg Falixais nug Tswv Yexus thaum twg Vajtswv lub tebchaws yuav los. Tej zaug lawv tab tom tos ib lub tebchaws muaj tiag, puv npo hwjchim thiab qhov muag ntsia pom. Tiamsis Tswv Yexus qhia paub tias Vajtswv lub tebchaws tsis los raws li qhov lawv xav, vim lub tebchaws ntawd nyob hauv peb txhua tus ntseeg lub siab. Thiab tib neeg yuav saj tau Vajtswv lub tebchaws hauv ntiajteb no thaum uas Vajtswv nyob hauv peb lub siab. Vajluskub sau:

“Cov Falixais muaj qee leej nug Yexus hais tias thaum twg Vajtswv lub Tebchaws mam li los? Yexus teb hais tias, “Thaum uas Vajtswv lub Tebchaws los, yuav tsis muaj ib yam dabtsi qhia rau leejtwg paub. Tsis muaj leejtwg yuav hais tias, ‘Nej saib, nws nyob ntawm no,’ lossis ‘Nyob tod! ‘; Rau qhov Vajtswv lub Tebchaws twb los lawm” (Lukas 17:20-21).

Vajtswv tseem ua rau kuv pom Vajtswv lub tebchaws tau los thiab kuv saj tau lub tebchaws ntawd kiag hnub no, tsis yog nyob tom ntej. Vim li ntawd Tswv Yexus thiaj hu kom sawv daws yuav tau lees txim kom thiaj nkag tau mus nyob hauv Vajtswv lub tebchaws:

“Nej yuav tau tso kev txhaum tseg, vim Vajtswv lub tebchaws twb los zes lawm.” (Mathais 4:17).

Thaum peb qhib peb lub siab thiab cia Tswv Yexus kav peb lub neej, thaum ntawd yog lub sijhawm peb saj tau Vajtswv lub tebchaws. Tswv Yexus yog lub hauv paus ntawm txojsia, yog kev kaj siab thiab yog koob hmoov. Txoj kev zoo siab puv npo hauv kuv thaum kuv paub tias Yexus Khetos yog tag nrho rau kuv tamsim no thiab mus ib txhis. Vajluskub hais rau peb tias: “Yexus Khetos yog tag nrho thiab hauv txhua yam” (Kaulauxais 3:11). Tswv Yexus twb ua, tab tom ua thiab yuav tshwm ntsej muag yav dhau los, tamsim no thiab tom ntej hauv peb lub neej!
Tomqab tau Tswv Yexus hloov pauv lub hlwb, kuv pom txog txoj kev zoo nkauj thiab kev ywj pheej hauv lub neej no. Kuv xyaum saib tej yam me hauv lub neej, piv txwv li tej suab luag ntxhi ntawm tej menyuam mos, lossis tej zaug cua tuaj laj ntxiag dhau ntawm tej nplooj ntoo tuaj. Kuv tsis maj nroos hla dhau tej yam uas cuag li tsis muaj dabtsi hauv lub neej no ntxiv, thiab kuj tsis cia tej kev txhawj txog lub neej tom ntej lossis tej kev txaj muag yav dhau los ua rau kuv hnov qab lub sijhawm muaj nqis tamsim no.

Thaum koob tsheej Tswv Yexus yug los, kuv ua Vajtswv tsaug vim tau qhib ib qhov khoom plig muaj nqis heev rau kuv, ntawd yog qhov khoom plig tamsim no. Dhau ntawd, kuv thiaj txais tau txoj kev zoo ntawm txhua lub sijhawm uas Vajtswv muab pub rau kuv. Kuv kawm tau tias yus yuav tau saib txhua feeb hauv lub neej no tseem ceeb, vim tsis muaj leej twg paub dabtsi yuav tshwmsim tuaj rau tag kis. Thaum peb ua lub neej yam li tab tom nyob hauv Vajtswv lub tebchaws, peb yuav pom txog txoj kev tshwm ntsej muag cia siab rau txhua lub caijnyoog. Vim tom qab txhua yam, Nws nrog nraim peb nyob.

Thov caw nrog kuv peb thov Vajtswv ua ke: Tus Tswv uas muaj kev hlub! Ntau zaug kuv tau cia kuv lub siab raug tswj rau lub neej yav dhau los thiab tej kev txhawj yav tom ntej. Txawm yog tab tom ua neej nyob hauv ntiajteb no, tiamsis thov Vajtswv pub kom kuv saj tau Vajtswv lub tebchaws. Thov kom kuv lub neej yuav yog lub neej mloog lus, thiab nthuav tawm tus pa tsw qab saum ntuj ceebtsheej rau tej neeg ib ncig. Kuv thov hauv Tswv Yexus Khetos lub npe, Amees.

Cov kwv tij txhua tus, Vajtswv nrog nraim peb nyob txhua lub sijhawm hauv lub neej. Txawm yog yav dhau los peb muaj ntau qhov yuam kev, tamsim no thiab tom ntej yeej tseem tshuav ntau txoj kev txomnyem, los peb yeej tso siab ntseeg Nws, yog tus tswj hauv txoj kev ntawd. Cia li thov Vajtswv pab koj saj tau Vajtswv lub tebchaws tab tom nyob hauv ntiajteb no, yog lub tebchaws puv npo kev kaj siab thiab nplua mias. Nco ntsoov tias Vajtswv lub tebchaws tsis nyob qhov twg deb, tiamsis yog nyob hauv cov neeg uas txais yuav tus menyuam yaj los yug, ua neej nyob hauv Vajtswv txoj kev tshwm ntsej muag thiab nrog Nws mus ua ke hauv lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.