Yàng Lik Ling la kơnhai bơta chò hòp mơ bơta gơn kơ nòm dê. Digul bơta chò hòp bal mơ ntas chò mơ ală đèng sọl pơnđang lam bă tiah, bol he bươn ngan kơ loi tis lah ala bơta đah bơdìh mơ la bơta chò hòp ngan. Mơya ồng mò oh mi git lah bơta chò hòp mơ bơta ring lơngai ngan kơnhai Yang Lik ling sơn tfm bơh bong nhơt Betlehem bơh rài yau, bă tiah Yang Tòm Trồ neh gơlik gơs poac să, mut tòm dunnia do nàng dong klas kòn mơ nus.

Ngai do, ngai 11/12/2025, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dêbơh tơnggume: LƠNGAI DUNNIA.

‘Tồ bơta lơngai lơngò Abraham dê kơnòm di Yàng Krist Jesu geh tus hơđang làng bol bơdìh, nàng bol he in kơnòm di bơta dòn mơ dòp geh Yàng Hwềng jat be jơnau neh ho ai. ‘ (Galati 3:14)

“Lơngai dunnia hala “Joy to the World” la sèng đơs chò goh tòm ngai wer Yang Lik Ling gơs ntas ring niam rlau jowh. Chò goh do ò dê tơngkah tus ala cau ê gar be làt, cau gơn rơh hala ala cau jak chài tu Yang Dong Klass Jesu lik ling. Neh oă rài rau, kòn mơ nus ji gloh tơr hir geh sền go Yang Tòm Trồ ràng tơlik să tòm dô bă loh làng, mơ bơta hơ neh gơlik di ngan tu : ‘Bơtau Jơnau neh gơlik gơs poac să, ơm digùl bol he, bềng bơta nđàc mơ jơnau song. ‘ (Jang 1:14). Kơnhai ngai wer Yang Lik Ling bơh hơ gơlik gơs tu jow nàng bol he kơ lôi sơ naowng tus Yang Jessu, la bơta ai pà dờng màng Yang Tòm Trồ dê, neh ai pà dunnia tồi glai do.
Chò goh “Lơngai dunnia” ai bơta bơta kơ lôi sơ nơng bơh sra Đơs Crih 98: ‘Ơ jơh plai ù, ai tĕ jơnau dờng hòn chò jòng ro Yàng Jehôwa, ….’Lòi ală hiòng dà tih tap tê, Ală mơnơm hòn chò đơs chò dô bă bal di đap Yàng Jehôwa, ‘Bơh Kơnràñ tus nàng cahrña dunnia. Kơnràñ rơp ai bơta song ring nàng cahrña dunnia, Mơ cahrña ală làng bol dô bă ring bal.’ (Đơs Crih 98:4,8,9)

Cau gơ noar cih sra Đơs Crih 88 ràng tơlik bơta chò hòp tài bơh Yang Tòm Trồ neh sền gar làng bol Kơnran. Ồng kung ràng tơlik bơta kơp gơn ngai Yang gơlik gơs la ngai Yang Tòm Trồ lam dunnia dê. Mơya Isaac Watts, caugơ noar cih chò họ “Lơ ngai dunnia”, neh rang tơ lik Đơs Crih 98 jat gơ tha Sra GohYau dê, đơs bơh bơta dong klas tòm Bơtau Krist. Bơta đồng klas sơn tòm bơh Bơtau Jơnau gơlik gơs poac să, lik ling tòm rùp să là kòn oh nga.Yang neh lik ling nàng dong klas bol he lik bơh bơta srat rma bơta boh lam dê, nàng bol he rgơi dòp rò bơta lơ ngai. Sră Goh cih: ‘Bơtau Krist neh tơwài bol he lik klàs bơh bơta srat sơntơm bơta boh lam dê, Kơnràñ neh tài bơh bol he mơ gơlik gơs bơta srat sơntơm, bơh neh cih lah: “Pal srat ngan di cau lơi kong yồng hơđang chi pơng, ‘tồ bơta lơngai lơngò Abraham dê kơnòm di Yàng Krist Jesu geh tus hơđang làng bol bơdìh, nàng bol he in kơnòm di bơta dòn mơ dòp geh Yàng Hwềng jat be jơnau neh ho ai. ‘ (Galati 3:14)

Nền ngan, bơta lik ling Yang Jesu dê la ring lơngai dờng rlau joh mơ dunnia geh dòp rò. Tài bơh hơ la tu Yang Tòm Trồ gơlik gơs poac să kòn mơ nus, nàng rgơi git lo ală bơta chò hòp hala moat jrung bol he dê. Kơn ràn ò ơm ngài mơya neh ‘‘gơlik gơs poac sa mơ ơm digul bol he’’. Kơ nòm dê Yang Jessu lik ling, bơta tòm klac Yang Tòm Trồ mơ kòn mơ nus geh tòm gơl. Kòn mơ nus geh toh glai, geh kòp la song ring, geh dong klass mơ geh gơ tòm sor wol mơ Yàng Tòm Trồ, mìng kơ nòm dê Yang Jesu. Bol he os đơs bơta “lơngai” bơh phan mơ na hala tiang pơnrơ, mơya bơta lơngai mơ bơta chò hòp rlau jowh hơ la geh dong klass mơ gơlik gơs kon Yang Tom Trồ.

Chò Goh “Lơngai dunnia’’ bơh sơn ròp gơs tơnggume la “The Messiah’s Coming and Kingdom” (gơtha la Bơtau Mesia tus mơ Dà Lơgar Yang at bồ), geh sir tòm tap cho goh Isaac Watts tòm nam 1719. Ntas chò chò goh do dê geh cau lìp kơni dòn Yang cau Mỹ sơnđan lah Lowell Mason lơh ntas. Ồng ai nus nhơm bơh jơnau tòm khà chò tiang pơn rơ “Yang hơđang ala Yang” ((The Messiah) ồng George Frederick Handel dê, geh ràng tơlik dơ sơn ròp tòm nam 1742.

‘‘Lơngai dunnia’’ la cồng nha bơta tòm klac niam ngan pe na cau tom pe rai pa is: Isaac Watts, cau jak chài pơnah đơs crih đơs chò cau Anh dê tòm thế kỷ 18; Geogre Frideric Handel, cau jak chài ntas đơs chò cau Đức dê, mơ Lowell Manson, cau cih chò mơ cau bơte cau My thế kỷ 19 dê. Bơh nus nhơm gơboh dê Yang Jessu, dô nơm chò goh tiang pơn rơ neh gơlik gơs, là chò jong rơ Yang tài bơh bơta chò hòp mơ ring lơ ngai dờng ngan mơ Yang neh ai pà dunnia in.

Dan jà bol he dô nùs bal tòm bơta hòi dan: Khoai bèp kòn gơboh, nus kòn bêng bơta ưn ngai tài bơh Yang neh lik ling nàng kòn ò kis tòm bơta srat sơn tơm tồi glai dê, mơ geh kis tòm bơta khat gơboh mơ ring lơngai. Tòm ala ngai Mùa Vọng, nus kòn rngoh rngac dê đap bơta kòn gơboh Yangf dê, nàng kòn kis tòm toh mơ bơta lơh gơs la kòn sau Yang dê, ai kòn in bơta git làm kis niam tòm bơta tòm klac mơ Yang, mơ joi ban bơta ring lơngai bơh Yang ai hơ đang rài kis kòn tòm ala bơta gơlik gơs rài kis dê. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, ngai Yang Lik Ling nam do, kop nă bol he ban loi nus nhơm he pơn dô jat ala bơta kơ lôi sơ nơng, ala bơta gil ga nang gơ hui ala bơta ring lơngai ngan he gơs, hơ la Yang Dong Klas, Yang Tom Trồ la Bèp, geh lơh nền tòm rài do kung be rài tơ nơ. Dòp git bơta do, kis te be dô nă cau neh dòp rò bơta ring lơngai, ò prap bơta lơngai hơ să tòm in, mơya lơh sir tòm pà đơs bơh Yang, yal wol ala bơta ring n iam Yang neh lơh rài kis he in, kung gơlik gơs la ống lăm ala bơta ring lơngai hơ đang trồ ala cau gùt dar war we in.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.