Ngai Noel la ngai oă đeng bơka ang mơ niam mơné lam bă tiah. Mơya, ngai Noel sơnròp ò behớ ò. Tú cau dunnia jong rơ ală bơta hang mơné, gơnoar pràn mơ bơta pràn kơldang mat sên gó dê, gen Yàng Tòm Trồ sac ală bơta lơbơn lơnọ, dềt rhên mơ pơndềt să nang rang tơlik gơnap gơ noar Kơnràn dê. Mơ rai kis Yàng Jesus dê tú gam kis tòm ù do la dô cơng tang loh lang.

Ngai do, ngai 12/12/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Brian Simmons dê bơh Tơnggume BƠH BÒNG ÑHƠT  TUS DÊ CHI PƠNG.

“Kơnràñ la tòm ryas bơta kis tòm Yàng Krist Jesu, Kơnràñ neh gơlik gơs bơta jak chài bol he in bơh Yàng Tom Trồ, mơ bơta song ring, bơta gơlik gơs sàng goh mơ bơta tơwài glài.” (‭‭I Kôrintô‬ ‭1‬:‭30‬)

Gơs ală bơta yal yau lơh he in gơboh gơbài, tòm hớ gơs ală bơta yal yau gơs ală bơta lơh he in nrơt nrơl, ờ rgơi git lài bơta lơi. Be la, dô nă cau klau lơbơn niam, êt cau kah tus, gen gơs dô nă cau ur gơboh gơ, tú hớ gen dô nă cau klau oă cau kah mơ git tus gen khai ò sac. Hala tòm bơta tòm lơh, cau lơbơn, tôn lah khai ò jai, mơ lôi dut gen khsi pha rlau mơ cau pràn kơl dang mơ passơm rlau. rai kis gơs ală bơta krơi ngan, ală bơta dềt rhên, ò pràn gen rgơi pha rlau mơ bơta pràn kơldang mơ gơkló.

Bol he sên gó bơta yal yau behớ, digơlan gơ êt gơlik gơs tòm rai kis kòp ngai. Mơya, tòm ngai do gen ală cau pass gơs gen gơs gơnoar rlau mơ cau ò sô ò soan, la ală cau ò gơs bơta lơi.

Mơya, tòm bơta rơndap tap seng Yàng Tòm Trồ dê ai kon mơnùs in, Kơnràn lơh sơrlớ wơl bơta òs gơs tòm ù do, hớ la ală cau ò sô ò soan geh yò tơngguh, gen ală cau pơnhừ să gơpừ; cau siớu siar geh hòm tơl. Bơta do geh đơs tus tòm bơta đơs chò Mari dê: “Kơnràñ neh ai tê Kơnràñ mơ lơh gơs bơta pràn kơldang, lơh gơprah gơpring cau gơs nùs kơlôi pơnhừ să, Tă tơlik cau gơnoar pràn bơh di sơbàn, Yò tơngguh cau ò diă ò diơng, Ai cau jơgloh in bềng phan bơkah, Mơ cau pas rê gòi.” (Luka‬ ‭1‬:‭51‬-‭53‬).

Gơwèt mơ ală cau “gơs bơta pơnhừ să” gen bol khai gơn kơnòm rlau mơ kơnòm di Yàng Tòm Trồ, kơlôi lah he neh tơl mơ ò cang bơta dong klàs tai. Bơta kơlôi sơnưng pơnhừ să do geh sên la tồi glài, bè tòm sră Pơnđik 16:18 cih lah: “Bơta pơnhừ să lòt lài bơta rung rài jat tơnơ̆; Mơ bơta tơngguh is să lòt lài mơ bơta gơtup pừ.”. Să tòm Kơnràn rơp tơnliah bol khai mơ “rê gòi”. Ming ală cau ji gloh tơhir Yàng Tòm Trồ rơp geh hòm.

Tòm rai Yàng Jesus, lang bol Israel kol lang bol Rôma at bồ. Bol khai kis hơđơm gơnoar at bồ bêng bơta pas-gơs, pràn kơldang mơ ham hà. Bol khai kơp gơn Bơtau Mesia tus bè ală bơtau ndai tus, nggui bơta pràn kơldang is nàng dong tă bol khai. Mơya, pha is mơ bơta kơp kỡn bol khai dê, Yàng Jesus, Bơtau Mesia geh ho ai bơh rai yau, geh deh tòm bong nhơt, ò gơs bơta lơi dơng mang hala pas-gơs.

Yàng Tòm Trồ mơ bol he deh khoai kỡn gơboh ală bơta mơ dunnia do sên ò sơp, dềt rhên, lơbơn lơnọ hala bơr ngơl gơla. Gơ di bè ală jơnau ồng Pol cih: “Mơya Yàng Tom Trồ neh sac ală phan tùl gơla dunnia dê nàng lơh ƀàssìl ală cau jak chài in; mơ Yàng Tom Trồ neh sac ală bơta lơbơn lơño dunnia dê nàng lơh ƀàssìl ală bơta pràn kơldang, Yàng Tom Trồ neh sac ală bơta dềt rhền, ală bơta kòl sền òsơp, mơ ală bơta ò gơs dunnia dê, nàng tơnroh ală bơta dunnia kơlôi la dờng màng, nàng ò gơs dô nă cau lơi geh jòng să di đap Yàng Tom Trồ. Kơnràñ la tòm ryas bơta kis tòm Yàng Krist Jesu, Kơnràñ neh gơlik gơs bơta jak chài bol he in bơh Yàng Tom Trồ, mơ bơta song ring, bơta gơlik gơs sàng goh mơ bơta tơwài glài.” (I Kôrintô‬ ‭1‬:‭27‬-‭30).

Yàng Tòm Trồ ngui ală bơta mơ kon mơnùs ai la bơrngơl gơla nàng lơh sir bơta rơndap tap seng tòm bơta dong klàs Kơnràn dê. Bơtau Krist pal kong pơng hơđang chi pơng la gung dà mơ Yàng Tòm Trồ ngui nàng dong klàs dunnia. Hớ la bơta ơ ò gơs cau lơi tòm lang bol Israel kơlôi tus, tài bơh bol khai kơp gơn dô nă bơtau pràn, pas – gơs ò di la dô Bơtau Dong Klàs kis rai kis rơbah lơ-òi, kong oă bơta jê sồt mơ bassil. Bơta do ai he in git kon mơnùs ò tú lơi rgơi ngui bơta jak chài is nàng git bơh Yàng Tòm Trồ.

Bơh bơta jak chài mơ nùs kỡn Yàng Tòm Trồ dê lòt rlau mơ bơta jak chài kon mơnùs dê, gen tang bol he pal sang sơrbì bơta pơnhừ să mơ jong să. Ò di kơnòm di pràn is hala bơta chài rgơi is he dê, Yàng hòi jà he pal pơn dềt să mơ dòn kơnòm di Kơnràn, bè ồng Jakơ neh tơng kah he: “Tơnliah tĕ să he di đap Yàng, gen Kơnràñ rơp yò tơngguh oh mi.” (‭‭Jakơ‬ ‭4‬:‭10‬)

Ngai Noel nam do, bol he bẵn ming ơm sền đeng bơka hala chò hòp đah bơdih lơm, mơya kung lòi té nùs he nàng kơlôi bơh rai kis pơndềt să Yàng Dong Klàs Jesus dê, bơh bong nhơt bớ bơl Kơnràn neh lik ling, mơ tus di chi pơng mơ Kơnràn neh kong nàng dong tă bol he. Bong nhơt mơ chi pơng la ală bơta bớ bơl, kol cau sền ò sơp mơya gơlik gơs dơng mang tòm bơta rơndap tap seng dong klàs Yàng Tòm Trồ dê. Bol he geh lơngai ngan tú bol he geh “kis tòm Yàng Krist Jesu, Kơnràñ neh gơlik gơs bơta jak chài bol he in bơh Yàng Tom Trồ, mơ bơta song ring, bơta gơlik gơs sàng goh mơ bơta tơwài glài.” (I Kôrintô‬ ‭1‬:‭30‬)

Dan jà bol he dô nùs bal tòm bơta hòi dan: Khoai Yàng Jesus, kon ưnngai Kơnràn bơh neh kỡn gơboh bol kon, neh lik ling nàng kong chơt ala tồi glài kon hơđang chi pơng. Dan nùs kon sum geh tơng-kah bơh rai kis pơn-dềt să Kơnràn dê, bơh bong nhơt tiah Kơnràn lik ling tus chi pơng mơ Kơnràn neh kong ala kon. Kon don Yàng ngui ală bơta lơbơn lơnõ, bơta gơtup pừ mơ bơta kal ke nàng tiar mon kon tồ kon in git kis pơndềt să mơ don kơnòm Kơnràn oă rlau tai. Kon jơh nùs hòi dan, ai sơnđan Yàng Jesus Krist, Amen.

Ơ ală ồng mò oh mi kỡn gơboh, ngai Noel do, lòi té tú jơ nàng ò di ming kơlôi bơh bơta lik ling Yàng Jesus dê, mơ kung pal kơlôi tus rai kis mơ bơta bol glar jê sồt mơ Kơnràn neh kong ala bol he. Bơh Kơnràn neh lòi wơl he in dô nơm krơh pơndềt să, gen tàng he pal kung tơnliah să he nàng ơn rai kis he Yàng in, dòp git lah tòm ală bơta gơlong bol glar tòm rai kis he dê ơm tòm bơta at bồ Yàng Tòm Trồ dê, bơh hớ, he in git kơnòm di gơnap gơnoar Kơnràn dê, ò di kơnòm pràn is tai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.