Geh tŭ lơi bol he sền gŏ rài kís he geh dờng tòm bơta git wă bơh Yàng, mờ kư̆ lơh tìs sùm ala tìs ờ păl cang. Jơnau Yàng geh pơn yơu bè “Ƀañ bơta kís” ròng siam rài kís đah hwềng cau dòn Yàng. Gen rơp bè lơi di lah dồ nă cau dòn Yàng ò bài sa ƀañ hơ kơp ngai taih? Bè cau hơ̆ rgơi dờng dilah lơi hŭi ala bơta tề lăm Yàng dê bơh Jơnau Yàng taih?

Ngai do, ngai 13/12/2025, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Kathryn Graves bơh tơnggume BƠTÊ GIT NÙS KÒÑ YÀNG.

“Ơ oh mi, añ kòñ oh mi in git lah: Jơnau Niam añ neh bơto yal do, ò di tus bơh kòn mơnus; bơh añ ò dòp mơ kung ò bơtê Jơnau Niam hơ̆ bơh dô nă cau lơi, mơya neh dòp geh bơh jơnau yal tơlik Yàng Jesu Krist dê.”

Lài tòm mang lik ling, ùr klau bol hi găm lơh dê rdeh coh kòn klau in. Do là phăn ƀàn bol hi koñ pà bol kòn in. Bau añ dồñ dồ nơm bơ lòng dit bơh đơm mpang hìu mờ ơn gơ tòm rdeh, mờ ya bau añ dê kung ò git krăñ cê bơta hơ̆ di là ờ. Añ ò sup ơm ngăn, sền dê jơ mờ đal gŏ neh lòt găn 1 jơ rau mờ bol hi kung ò hềt sir gùr broă lơh sơl.

Bau añ tă nhơm jòng, lời wơl bơlòng tòm ala phăn găm mờ đớs lah bol hi păl lơh sir rdeh lài mờ tŭ rê bik, bơh bàr nă kòn sùm guh bik drà tòm àng drim lik lìng. Bol hi ò rgơi lơi phăn ƀàn bol kòn gơlơi rùs bè hơ̆ ò.

Añ jòi mơ ala phăn lơh rdeh mờ ni sơ na jòi gŏ dồ mpang sră bơtê lơh bè lơi. Añ đớs: “ gen bol he kung ò rgơi git lơh rdeh coh do ờ, hala đọk té jơnau cih do!” añ đớs, añ pờ tơn mpang sră hơ.

Lơh jat jơnau tề lăm do, mìng tòm 30 phúk, bol hi neh lơh sir rdeh coh màu prơ hê hàng mơ né mờ ơn gơ mrêp tờm nho Noel. Bulah bol, mờ ya añ hừh nùs ngăn. Găm tai dồ nơm rdeh păl lơh, tơ nơ̆ mờ sir, bol hi rơp geh rơ lô lài dồ êt jơ geh tơng guh bơh jơnau driau chò bol kòn bơh tòm tŭ trồ ờ hềt àng.

Tŭ kah dê jơnau driau hòn chò bàr nă kòn klau tòm àng drim lik lìng năm hơ̆, añ đăl git broă ò đọk mpang sră cih lăm neh lơh bol hi ò geh bik tòm bàr pe jơ mờ bol glăr ò păl càng geh. Broă hơ̆ lơh añ kơlôi tus dê să tòm he lah, oă dơ̆ añ kung neh lòi hŭi bơta tề lăm Yàng Tòm Trồ dê tòm Jơnau Kơnràñ. Mơ bơta moat jrùng ngăn hơ̆ là oă cau dòn Yàng kung ò đọk Jơnau Yàng.

Làng bol Y-sơ-ra-ên neh ơm tòm bơta hơ̆. Bulah git Jơt Bơta Boh Lăm, mờ ya bol khai găm lơh jat nùs koñ ís bol khai. Geh oă ngăn tŭ dơ neh geh Yàng Tòm Trồ hòi jà bol khai rê wơl mờ Kơnràñ. Bulah bol khai gơ jrăñ sang glài mờ rê wơl, mờ ya broă hơ̆ ờ di là bol khai ò càng kŏng ala cồng nhă bơh bơta ò dòn bơr bol khai dê.
Tòm I Yăl Yau 13, bol he sền broă lơh bơtau Da-vit neh cèng brê Đài Bơta Hơ Bal tus Je-ru-sa-lem. Sră Goh cih:“Dabit bal mơ jơh Israel lòt bal tus hơ Baala tòm Juda (Kiriat Jearim) bơh hơ̆, cèng brê Đài Bơta Ho Bal Yàng Tom Trồ, Yàng Jehôwa dê la Bơtau ơm nggui digùl ceruƀim, la Đài geh tơmoh jat sơnđan Kơnràñ. Bol khai pơdiang Đài Bơta Ho Bal Yàng Tom Trồ dê hơđang dô nơm rơndeh kơnrồ pa bơh di hìu Abinadap, gơs Uja mơ Ahiô at rơndeh kơnrồ. Dabit bal mơ jơh ală cau Israel jơh nùs jơh pràn tòmya di đap Yàng Tom Trồ, ngui ală bơta đơs chò bal mơ ală kơñi pĕ, kơñi rơs, ală sơnggơr dềt, tur cing mơ uh kơlwòk.” (6‬-‭8 )

Mơya, tòm tŭ làng bol găm hòn chò, bơ ña jòng ro Yàng, ala kơnrồ gơcồt jơng, mờ ồng Uja tơlik tê nàng đơ̆ Đài, gen “Bơta gơjrañ dờng Yàng Jehôwa dê gơhào mơ Uja, mơ Kơnràñ tơnchơt Uja tài bơh khai ơn tê hơđang Đài Bơta Ho Bal. Behơ̆ khai chơt tềng hơ̆ di đap Yàng Tom Trồ.” (10)

Yàng Tòm Trồ neh bơto loh làng mìng là cau Le-bi gớs gơnoăr tùng Đài Bơta Hơ Bal, mờ ò geh dồ nă cau lơi tup dê Đài, dilah ƀư gen rơp chơt (Khà Làng Bol 4:15). Mơya, bơtau Da-vit neh lơi Đà Bơta Hơ Bal hơ đăng rdeh kơnrồ mờ sồr bàr nă cau ndai ò di là cau Lê-bi tùng. Gen bơtau Da-vit neh siơ̆u bơta duh rngòt mờ ò tơl bơta git wă bơh bơta sàng goh Yàng Tòm Trồ dê.

Mơya, tơnơ̆ mờ broă moăt jrùng hơ̆ gơlik gớs, bơtau Da-vit neh đăl git bơta tìs he dê mờ ồng neh jơh nùs lơh jat bơta tề lăm Yàng Tòm Trồ dê. Tŭ Da-vit bơt gơlang bơtau he in, ồng rcăng dồ bă tiah Đài Bơta Hơ Bal in. Tŭ do, Da-vit rgum cau Le-bi nàng tùng Đài bơh ồng git lah: “Gen Dabit ò ai gơnoar sồr cau lơi rlau mơ cau Lebi nàng tùng Đài Yàng Tom Trồ dê, tài bơh Yàng Jehôwa neh sac rwah bol khai nàng tùng Đài Yàng Jehôwa dê mơ duh broă di đap Kơnràñ gam sùm sùm.”(‭‭I Yal Yau‬ ‭15‬:‭2)

Bơ dìh hơ̆, bơtau Dabit ò ai gơnoar sồr cau gơnoar ơn phan duh khoai mơ ală cau Lebi lơh sàng goh să tòm bol khai, nàng tùng Đài, mờ ồng kung sồr cau Lebi sac rwah cau jak chài đớs chờ nàng đớs chờ jòng rơ Yàng. Tŭ Đài geh rọ, làng bol driau dờng hòn chò bal mơ ntas cau uh ngke be dam mơ ală kơlwòk, tur cing dềt pĕ mơ rơs ală kơñi. lơh gớs dồ bơta duh khoai àng gơklŏ.

Tòm Sră Goh pa, ala Hìu Jum Goh mờ ồng Pol cih sră pơ yoa neh tìp ala bơta bơh bol khai ò lơh jat tề lăm Yàng dê. Gen tàng, tòm kòp sră pơ yoa, ồng neh cih ala jơnau bơtê nàng bol khai lơh jat. Ala jơnau bơtê hơ̆ kung là bơtê bol he tòm ngai do sơl. Ồng cih tòm sră pơyoa tòm Ga-la-ti 1:11-12 “Ơ oh mi, añ kòñ oh mi in git lah: Jơnau Niam añ neh bơto yal do, ò di tus bơh kòn mơnus; bơh añ ò dòp mơ kung ò bơtê Jơnau Niam hơ̆ bơh dô nă cau lơi, mơya neh dòp geh bơh jơnau yal tơlik Yàng Jesu Krist dê.”

Là niam ngăn tŭ bol he bềng tơl bơta tề lăm Yàng Tòm Trồ geh cih tòm Sră Goh! Mơya, tòm rài kís, oă dơ̆ bol he he ò koñ gơboh đọk Jơnau Yàng, kung bè añ mờ bau añ ờ gơboh đọk mpang sră bơtê lơh bulah geh tòm tê. Bol he kơlôi lah bol he ò gớs tŭ jơ đọk Sră Goh, dilah bol he lòi tŭ jơ, bol he kung rơp đọk mờ pleh oă bơta tìs ò păl càng geh. Kung geh tŭ, bơh ơ lah, sac rlô bik rlau mờ đọk Jơnau Yàng. Mơya, bơh ờ đọk Jơnau Yàng, bol he sùm ờ gơ bài bik bơh kơlôi rcăng mờ moat, bơh ò lơh jat bơta tề lăm Kơnràñ dê.

Tŭ bơta lơh rdeh ò gơlik gớs cồng nha, sồng bol hi pờ mpang sră cih tề lăm. Mờ rdeh choh, dồ mang ờ bik. Mơya tòm rài kís, bơta ò đọk Jơnau Yàng Tòm Trồ rơp lơh bol he in păl kong dòng cồng nha ò niam kas rlau tai. Gen tàng, bơh hơ̆ añ rơp lời tŭ jơ sơn rờp tòm kòp àng drim nàng bơ srăm Jơnau Yàng mờ jòi bơta jat nùs koñ Kơnràñ dê tòm kòp mpang sră Sră Goh.

Dan jà bol he dô nùs bal tòm bơta hòi dan: Khoai Bèp koñ gơboh kòn dê! Kòn ưn ngài Kơnràñ bơh neh pa ai kòn in ala bơta tề lăm Kơnràñ dê tòm Sră Goh. Daăn dong kòn sùm gơboh jòi jat Jơnau Yàng mờ kís jat Jơnau hơ̆ tòm kòp ngai. Kòn kơp koñ rài kís kòn geh dờng tòm bơta dòn mò lòt găn bơta nđàc lìu làc tũ kòn cơnđoà tòm bơta duh khoai Kơnràñ. Kòn jơh nùs hòi dăn tòm sơnđăn Yàng Je-su Krist, A-men.

Ơ ồng mọ, oh mi koñ gơboh, đăl git rài kís bol he di lah siơ̆u Jơnau Yàngm bol he rơp lơi oă tŭ jơ nàng bơ srăm mờ lơh jat nùs koñ gơboh Yàng sơl?

Dilah bol he ò geh tŭ jơ đọk Jơnau Yàng kòp ngai, sền sơwì té broă lơi lơh gơkòl bol he tus mơ Jơnau Yàng. Dilah bol he neh lời tŭ jơ đọk Jơnau Yàng kòp ngai, gen lùp ís să tòm he gớs dòp bơta lơngồt mờ gơnoăr tòm Jơnau hơ̆, tian gớs lơh bol he geh chồl nàng “ kơp koñ geh mờ kơp koñ lơh jat” nùs koñ Kơnràñ?

Bulah bol he ơm tòm bơta lơi, tìp bơta lơi, gen kư̆ gơn kơ nờm bơta nđàc Yàng nàng bơ srăm git nùs koñ Kơnràñ dê, nàng lơh bol he in kòp ngai koñ gơboh Yàng rlau tai, nàng kís dồ rài kís geh cồng nha Kơnràñ in tŭ găm kís hơđăng ù tiah do. Tòm ngai do, kís mờ Yàng Lik Lìng mờ kís tòm Jơnau Kơnràñ kờp ngai geh pa lơm.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.