Digơlăn tòm rai kis bềng bơta ò song ring do, bol he neh mờng ir mơ broă păl tơm pơndăng nàng tơmpit ai pơnah oă rlau. Bol he tơm lơh nàng geh dơp rò, nàng lơh cơng tang he phalin, hala nàng tơmpit ai dô êt bơta song ring lơi. Mơya bơta Lik Ling yal wơl bol he in dô nơm yal yau ndai, yal yau bơh Bơtau neh săng lơi jơh ală bơta nang dơp ai bơta nđàc mơ bơta kờñ nđàc ală cau ò dipal in – la să tòm oh mi mơ añ.

Ngai do, ngai 14/12/2025, Bơta Hoi Dan Kơp Ngai dăn jà ală ồng mò oh mi bơtê bal Jơnau Yàng kơnòm dê bơta dong kơl Gene Markland dê bơh tơnggumê BƠTA NĐÀC MƠ BƠTA KỜÑ NĐÀC.

“Gơklŏ ngan Yàng Tom Trồ ơm hơđang tap trồ jòng rlau jơh, Ring lơngai tòm ù ai cau geh nđàc in niam nùs Kơnràñ.” (Luca 2:14)

Gơs dô nă cau lơh broă bal lùp añ: “Bơta nđàc mơ bơta kờñ nđàc pha is mbe lơi tiah?” Añ ò hơ tơn mơ, mơ đơs kơnhơl lah: “Bơta nđàc lơh broă àng drim, ai Bơta kờñ nđàc lơh broă mhô.” Ală cau gut dar ai lơh kôr nhó bơh bơta pơnyơu ràc añ jê.
Mơya tơnơ̆, sèng lup hơ̆ kư gơ ơm tơm dơngoh añ. Añ kơlôi bơh bơta nđàc Yàng Tòm Trồ dê, la bơta nđàc dong klas geh ai dô bă gợi lơm, là bơta lơngai mơ bol he ò dipal geh dơp lèng. Gen añ kơlôi bơh nùs kòñ nđàc Kơnràñ dê, bơta kơ̆dơn mơ git wơng, niam nùs toh glài bulah bil he dipal kol lơh glài. Dingăn, Bèp Hơđăng Jong la krơh crih crai rlau jơh ràng tơlik Bơta nđàc mơ bơta kờñ nđàc.

Tŭ kơlôi bơh gùng mơ bơta nđàc mơ bơta kơñ nđàc lơh broă bal, añ kah tus dô bơta gơs ngăn tòm Bơta Kơlin Gơtòa dơ̆ Dùl. hơ̆ la mang NGai Lik Ling năm 1914, tom tiah tòm lơh đah mattơngai mut, tiah mpôl ling Anh mơ Đức găm tòm lơh dơng ngăn. Dô nă cau ling Anh gơs măt tòm măng hơ̆ neh cih sră pơyoa tus hiu nhă:

“Añ ò hềt sền gŏ bơta gơlik gơs lơi niam behơ̆. Làm gùng mpôl ling Đức, bơh kiau tus ma ngai ngai la rbô oă bơta àng dềt.

Añ lùp: “Hơ̆ là ñchi lơi tiah?”

Bơyô añ hơ wơl: “Chi n’hô Noel!”

Ngăn behơ̆. Mpôl ling Đức neh ơn ală chi nhô diđap tiah tơmlơh, pơnđang mơ ôs jrêng mơ ôs đèng, gơlơh be ală ôs đèng pơn đang digah dàling bềng nus niam.
Gen bol he kơno bol khai ai jonau đơs chờ: Stille Nacht, Heilige Nacht…

Chờ goh hơ̆ ò mơng mơ ală cau Anh, mơ ya bơyo añ blan wol añ in: Silent night,

Holy night… (Măng lơngai, măng goh do)

Digul măng ngêt ngơt, tom tŭ matkơnhai pơnđang, añ òhềt kơno sèng chờ lơi niam mơ gơs gơtha behơ̆.

Tòm tŭ chờ pơndut, ală cau ling tòm mpol tơm lơh bol he Tap tê dơng. Ơi mpôl ling Anh tap tê prơyom mpôl ling Đức. Gen dô nă cau ling tom bol he sơn tơm đơs chờ:

The First Noel, the angel did say…

(Noel sơnrop, cau gơnroh yal…)

Ngăn bol he đơs ò niam be bol khai, mơ ya mpôl ling Đức kung tap tê hơ wơl mơ đơs pơnjat:

O Tannenbaum, o Tannenbaum…( Ô chi Noel, Ô chi Noel…)

Bol he hơ wol:

O come, all ye faithful…(Ơ cau don song mơ Yang …)

Mơ tŭ do, bol khai dô nus bal đơs chờ mơ jơnau Latin:

Adeste Fideles…

Jơnau đơs chờ mpôl Anh mơ Mpôl Đức gơtơmklac bal tòm kơnhwal “tiah chơt”.

Mơ tòm ming dô ít jơ lai, bol khai cuh phao tơn chơt bal mơ gơp!

Mơ gơs cau đơs: “bol he dô nus bal ò cuh phao jol tus tơnơ̆ nggul măng ngai hing.”

Mơ dô ết tŭ, rhiang nă cau ling bar đah lik tus digul tiah tơm lơh, kup tê, tơmbơhbơr, pà phăn bal mơ gơp, chê tơmgơl càphe, poac hộp tơmgơl xúc xích. Añ tian gơs tơmgơl pềs dềt ai wơl che kơt but gơltau, phăn kirsơnre kas mang nang ceng ri hiu.

Lôi dut, jơh ală cau đơs bal chờ Auld Lang Syne (Chờ tơ ngac) digah ôs, gen tơngac mơ jơnau hơ tip wol tòm ngai hing, tian gơs kung đơs rơp lơh gơs dô bơta coh ple gơtơmklac bal!

Tŭ sền wơl yal yau rngoh rngac hơ̆, añ lùp is: bơta lơi rgơi lơh bar mpôl ling găm tơmdră, digùl bơta tơmlơh bềng mham rcăng sir ơn ală phăn tơmlơh hơđơm mơ kup tê bal be ală cau bơyô?

Ming bơta nđàc mơ bơta kờñ nđàc hơ̆ neh tus mơ dunnia rlau mơ bar rbô sơnăm lai, tòm dô măng crih crai yau or.

Măng hơ̆, cau gơnrơh yal ală cau ê belat in: “Gơklŏ ngan Yàng Tom Trồ ơm hơđang tap trồ jòng rlau jơh, Ring lơngai tòm ù ai cau geh nđàc in niam nùs Kơnràñ.” (Luca 2:14)

Ală cau ê belàt hơ̆ neh jôi tus tiah bong ñhơt, tip Mari, Jôsep ma Kòn dềt. Tom tŭ sền gŏ Yàng Dong Jêsu, bol khai neh gŏ mơ mat bơta nđàc mơ nùs kờñ nđàc Yàng Tòm Trồ dê, tom tŭ Kơnràñ pơndềt să he gơlik gơs kòn mơnus mơ kis digùl kòn mơnùs dô.

Kơp kòñ lah bol he kung rơp jat krơh Bèp Hơđăng Jong dê, git ràng tơlik bơta nđàc mơ nùs kờñ nđàc gơwet mơ ală cau mơ bol he tìp tòm gùng lòt rai kis he.
Kơp kờñ ồng mò oh mi gơs dô kơngai Lik Ling ring lơngai, bềng bơta nđàc mơ kờñ gơboh!

Dan jà bol he dô nùs bal tòm bơta hòi dan: Khoai Yàng Jêsus, kòn ưnngai Kơnràñ bơh bơta nđàc mơ nùs kờñ nđàc Kơnràñ neh ràng tơlik kòn mơnus in mơ să tòm kòn in găn dê bơta lik ling Kơnràñ dê. Dăn dong kòn git sền cau ndai mơ măt Kơnràñ dê, git sac toh glài ala mơ gơjrañ, mơ ai bơta kờñ niam răm ala mơ kư prăp sơmbat bơta jêsồt. Kơp kờñ rai kis kòn rơp gơlik gơs cơng tang kis, sol pơnđang bơta nđàc mơ nùs kờñ nđàc bềng liu Yàng dê digùl dunnia dô. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, oh mi kơlôi lah bơta nđàc mơ nùs kơñ nđàc la dô bơta đơs jrô ndơp ơ? Ò, hơ̆ la bơta răm niam ngăn digul dùl nơm dunnia lơngit nùs kơñ gơboh kòn mơnus dê. Hơ̆ là tom tŭ bol he sac toh glài ala bơh sal wơl, sac kòñ gơboh ala bơh gơjrañ kơuing bal mơ gơp. Kơp tŭ lơh behơ̆, bol he găm sol pơnđang dô nơm “ôs đèng Lik Ling” niam răm tòm nùs cau lơi hơ̆, kung be tom să tơm hwing nùs bol he tai. Hơ̆ la gùng nàng bol he kis ràng tơlik wil tơl bơta nđàc mơ nùs kờñ nđàc Yàng Jêsus dê kơp ngai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.