Noel òs geh tơngkah tus be kơnhai bơta hòn chò di, bơta àng di mơ jơnau driau ñŏ. Mơya, ò di cau lơi kŭng buơn dòp git bơta hơ̆. Gơs dơ̆, digul ală sèng đơs chò hòn chò mơ jơnau driau ñŏ đơs gut dăr, nùs bŏl he găm njnjơ̆-njŭt bơh ală bơta tềl sồt, gơlòng bŏl glăr, ò git nđợ bơta òhềt wil tơl. Digơlan tòm ală tŭ gơlơh lơbơn lơño mơ klăm jơngọ rlau jơh, bŏl he càng ơm mŏmŏ nùs he wơl nàng đal git lah Yang găm òs dòn sŏng mơ Kơnrẵn òhềt dô dơ̆ lơi săng lòi bŏl he.

Ngai do, ngai 16/12/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl mò Linda Vulcano dê bơh Tơnggume “CƠNÒNG YÒ SA” BƠTA DÒN SŎNG YANG DI.

“Cau song ring gơkòl oă bơta bòl glar kalke, Mơya Yàng Jehôwa dong tă khai bơh di jơh ală bơta hơ̆.” (Đơs Crih 34:19)

Kơnhai Noel năm lài, digul bơta yò sa chò hòp băl mơ ală bơyô, ăñ ntào mŏmŏ tòm hiu lòt tuh dìh.

Đah bơdih la jơnau driau ñŏ hòn chò, mơya tòm nùs ăñ njơ̆-njŭt tài bơh hìu nhă gơlik gơs broă. Tòm tŭ hơ̆, dô bơta kơlôi sơnơng òs yau gơ ơm tòm bồ dơngoh : Digơlan rài kis bŏl khai geh Yang ai lơngai rlau mơ he. Digơlan Kơnrẵn koñ gơboh bŏl khai rlau mơ he.

Gen ală jơnau iơh hơ̆ gơ rơp gơlik gơs tom bồ dơngoh ăñ, ală jơnau lơh glài gen ăñ neh kơno iat nđợ rhiang dơ̆: “Mê ò niam her ò”, “jơh ală bơta là glài mê dê lơh”, “rài kis mê iơh rmơh jơh rau, ò gơs bơta lơi nàng dŏng tơwài mê tai.”

Mơya tòm tŭ hơ̆ mo, digul bơta nggà ndriau tòm nùs, ăñ kơno iat jơnau Yang đơs òm lah: “Hừh hơh tĕ bơta dòn sŏng Añ ji”

Tòm tŭ hơ̆ mo, ăñ git Yang găm tơngkah ăñ dơh wơl, sền tơnggor, mơ kah wơl jơh ală bơta Kơnrẵn neh lơh tòm rài kis he.

Ăñ kơlôi bơh gơs dô cơnòng yò sa dờng, bềng tơl ală phăn sa bơkah sơñio bơh ală bơta Yang neh lơh ăñ ĭn. Gen ăñ iat kơno bơtơl dô jơnau tơngkah lơbơn niăm mơya jrô ndơp: “Băñ moat bơh ală bơta òhềt gơs hơđăng cơnòng. Ưnngai tĕ mơ hòn chò bơh ală bơta găm gơs”

Ăñ ơm mŏmŏ dô ơthoa, nàng ală jơnau hơ̆ bôr jrô tòm nùs he. Tŭ lik lòt, ăñ geh pơrdòn tŭ jơ digah ală cau ăñ koñ gơboh. Bơta bassilmow ò suk ơm rọh jơh, ala wơl tềng hơ̆ bơta hòn chò mơ rĭng lơngai.

Tus di tŭ tòm pà bơta họi dăn, ăñ yăl wơl liah bơh bơta gơlik gơs he di mơ geh ală cau họi dăn ala. Tơnơ̆, ăñ dô nùs băl tòm jơnau driau ñŏ mơ hòn chò băl mơ ală cau bơyô sŏng ngăn. Tŭ đơs băl chò “Chò Gọh Noel” ăñ dòp git bơta lơngap lơngai hơ̆ tòm nùs.

Bơta git lăm hơ̆ lơh ăñ ĭn dòp git he òs buơn gơtơmut tòm bơta ơnnia mìng kơlôi tus bơta siơ̆u siar tòm rài kis, chàn ala wơl git ưnngai bơh ală bơta lơngai Yang neh ai pà. Mơ bơta hơ̆sơñio lăm ăñ tus bơta moat jrung, tơ’ai lah rọh bơta gơn kơnòm tai.

Tŭ ri tòm hìu, ăñ kah wơl sèng Sră Goh he neh sền: “Cau song ring gơkòl oă bơta bòl glar kalke, Mơya Yàng Jehôwa dong tă khai bơh di jơh ală bơta hơ̆.” (Đơs Crih 34:19)

Ăñ ơn nùs kơlôi tus ală jơnau yăl tơnggit ndai, jơnau “bơta bòl glar kalke” geh ràng tơlik là “bơta kalke” “bơta rung rài” “bŏl glăr kalke” “bơta gơlik gơs” mơ ăñ dòp git he òs sền kơlôi bơh “bơta bŏl glăr kalke” mơ hŭi wơl “Yàng Jehôwa dong tă khai bơh di jơh ală bơta hơ̆”

Ăñ sơntom cih tơlik ală bơta “bŏl glăr kalke” mơya Yang neh dŏng tă ăñ lik bơh di jơh ală bơta hơ̆. Sơlơ cih, ăñ sơlơ đal git lah khà ăñ cih do rơp jọng ngăn.

Khà cih hơ̆ prap oă bơta tồi glài mơya Yang neh hwài ăñ tă tơlik. Mơ tŭ kơlôi sơnơng bơh ală bơta hơ̆, gơlơh ăñ nggòc rlau. Dilah Kơnrẵn neh dŏng tă ăñ, gen Kơnrẵn kŭng rơp dŏng tă ală cau ăñ koñ gơboh lik bơh tồi glài bŏl khai di.

Kơnhai Noel do, ăñ koñ ngăn “nggùi cơnòng yò sa” gen Yang neh rcang lài he ĭn – cơnòng sa bơta dòn sŏng Kơnrẵn di. Ăñ koñ cơnđòa lòt lĕ lơn nàng sền wơl mơ ưnngai bơh jơh ală bơta niăm ngăn Kơnrẵn neh lơh, ală tiah klăm jơngọ mơya Kơnrẵn neh sơñio lăm ăñ lik klàs.

Ală “bŏl glăr kalke” găm sơl ơ? Ăñ dòn Yang găm lơh broă, mơ ăñ sơmbat kơ̆ jơnau ho pơgon tòm Ephesô 3:20

“Tŭ do gơwèt hơ Kơnràñ la Bơtau bơh gơnap gơnoar lơh broă tòm bol he, rgơi lơh tơngkah tơngkañ oă rlau mơ ală bơta bol he hòi dan mơ kơlôi sơnơng,”
Gơs ală bơta ăñ òs dòn nền : Bơta dòn sŏng Yang di găm os kơ̆ cê, bơta koñ gơboh Kơnrẵn di gơwèt ăñ ĭn ò tŭ lơi tòmgơl bulah mbe lơi, mơ Kơnrẵn òs sum ơm băl mơ ăñ.

Mình 3 jơnau sŏng hơ̆ lơm kŭng tơl nàng ăñ hòn chò hừh hơh tòm Kơnhai Noel do!

Dan jà bol he dô nùs bal tòm bơta hòi dan: Khoai Yang, digul ală ngai hòn chò rcang ngai Noel ĭn, dăn dŏng kọn dơh wơl nàng sền tơnggơr Kơnrẵn. Ò di mìng tòm bơta hòn chò, mơ tòm ală tiah lơbơn lơño, dơrcul mơ ji sồt rlau jơh kọn di. Ưnngai Yang tài bơh Kơnrẵn găm dòn sŏng, găm koñ gơboh kọn bulah kọn gơtup tìs oă dơ̆ mơ pin wil wơl bơta koñ gơboh hơ̆, dăn ai nùs kọn bềng lìu bơta git ưnngai, nàng kọn òhềt sền tòm bơta òhềt gơs, mơya hòn chò jọng ro tài bơh Yang găm lơh broă tòm rài kis kọn bơh bơta koñ gơboh dòn sŏng Kơnrẵn di. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, digơlan he kŭng găm lòt găn dô kơnhai Noel ò be bơta kơp koñ, bơh ală bơta tềl sồt ò bòi mơ bơh ală jơnau họi dăn neh jŏ ò geh dòp. Mơya dơh wơl tĕ dô êt tồ sền gut dăr “cơnòng yò sa” rài kis he: Kòp nhờm tă kòp ngai he găm kis, git nđợ dơ̆ Yang neh sền gar mơ dŏng tă he lik klàs tiah klăm jơngọ – jơh ală bơta hơ̆ là cơng tàng nền cê ràng tơlik bơta dòn sŏng Kơnrẵn di. Mơ Kơnrẵn găm lơh broă, găm cih pơnjat jơnau yăl tơnggit rài kis he bơh bơta koñ gơboh ò tòmgơl. Kơ̆ cê tĕ di bơta dòn sŏng Kơnrẵn di, tồ bơta hòn chò Noel do ngăn geh chồl tòm hwing nùs he ngai do.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.