Tú kìr sơnre kah Yàng likling tus, làm bă tiah bềng tơl bơta bơka niam. Gơs cau yồng đèng gơcrà, ơn tờm noel, rcang phan pà mơ sac ală phan bơka niam. Mơya kung mhar ngan lơh he in mìng kơlôi đah bơdì lơm mơ ờ kah tai bơta dờng màng tòm tú Yàng likling – hớ la ngai Yàng Dong Klàs tus tòm dunnia. Kơnràn bè dồ nơm bơkào tơlik niam di gah ranh rsớh, cèng tus bơta kis mơ bô bơkah tus dê ală nùs nhơm tơhìr bơta nđàc Yàng dê.

Ngai do, ngai 17/12/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ mò Cathy Irvin bơh tơnggume BƠKÀO PHỒNG KƠNHAI YÀNG LIKLÌNG.

“Añ la bơkào phồng Sarôn dê, bơkào gun thòng dê.” (‭‭Đơs Chò‬ ‭2‬:‭1‬)

Kòp nam tú ală sèng đơs chò kah Yàng likling geh pờ, nùs nhơm an gơlơh rngoh rngac ngan dồ bă krơi is. Digơlan tài bơh an kờn gơboh ală tú tơngai kah Yàng likling. An gơboh tú an bơka hìu ơm bềng bơta niam. Tú an yồng ală đèng, bơka tờm chi nho mơ ơn gùt dar mơ ală phan niam, gen bèhớ la an neh sền gó bè ngai Yàng likling téh mpồng.

An sùm bơka hìu dồ bă mhar ngan, gơs tú sơntờm kơnnhai 12 tus an neh ai phan bơka mơ jơl tus dê kơnhai 1 an sùm sờr ală phan an neh bơka hớ. Kòp ală phan sùm gơs dồ nơm jơnau yal yau. Gơs nam, an roat dồ ết bơkào phồng bò mơ dồ ết vàng gơcrà, sền niam ngan. An ơn bơkào hớ hơđang chi nho, mơ tú ngai hớ neh sir an tă jơh, mơ prap wơl dồ bă nền cê. Nam tơ nớ, an ngui wơl ală bơkào hớ nàng bơka tai tus dê ală phan an pà tus dê ală cau tòm hìu nhă an dê. Bè dồ nơm jơnau tơngkah bơh bơta chò hòp geh tom pà bơh nam lài đap.

Gen gơs dồ năm, an sền gó dồ khàr bơkào phồng, sền niam ngan. An gơlơh bè neh jòi bàn dồ nơm phan kass màng ngan, sac nền cê kòp bơkào, gen cèng rê tòm hìu. Ală cau bơyô an dê đơs nhó mơ an lah “an neh gơboh ir” bơta bơka ngan. Mơya an git an lơh bơta do ờ di mìng gơboh bơkào, mơya an gơs dồ nơm broă đah ngkời.

Tòm Sră Goh, Yàng Jêsus geh tơmoh sơn đan la “bơkào phồng Saron dê” – rùp Yàng dê bè dồ nơm bơkào àng gơcrà dê gùl ù tiah ranh rsơh, cèng wơl bơta kis mơ bơta niam tus dê tiah ờ niam. Kòp tú an sền gó bơkào phồng, an kah wơl sơnđan hớ. Ală bơkào dềt mơya ràng tơlik bơta bô bơkah mơ bơta do tơngkah an bơh bơta kờn gơboh Yàng dê, dồ bơta kờn gơboh pràn kơl dang mơ niam lơhơn.
Hơđang chi nho an gơs oă phan: cau gơnrơh, plai ù, sơman, trồm lú dềt. Mơya ală bơkào phồng lơh an in kờn sền jó rlau jơh. Cau lơi tus còp an tòm kơnhai kah Yàng likling kung jòng rơ chi nho an dê niam mơ lùp an nchi bơtài an ơn oă bơkào bè hớ. Gen bè hớ, an gơs tú lơmpah nàng yal yau wơl bol khai in, ală bơkào phồng do bè dồ nơm jơnau tơngkah bơh Yàng Dong Klàs.

Niam ngan tú phan dềt rhền bè hớ mơya pờ wơl tú lơmpah nàng tòm pà bơh Yàng Jêsu. an ờ càng ràng tơlik oă jơnau, mìng đơs dồ bă buơn soh ngan hớ la Yàng la “bơkào phồng Saron dê” Bơtau neh cèng wơl bơta kis mơ gơn kơnòm tus dê dunnia. Tu đơs bơta hớ, an sền gó tòm oă mat cau kơno gơs dồ bơta krơi is, gơlơh bè bol khai neh dờp git gơtha ngan ngai Yàng likling dê.

An gơboh ngan kơnhai do, mơya sơlơ dờng tòm bơta dờn, an dờp git Yàng likling ờ di la kơnhai bềng bơta gơcrà bơh đèng, tờm chi nho, phan pà gời hala ală tú sa chò hòp. Mơ dilah ờ sền nền, hớ la tú lơh he in híu bơta gơtha ngan bơh Yàng likling. An ờ kờn să tờm an gơ tơmut tòm bơta do hớ la sền hìu cau lơi bơka niam rlau mơ cau ndai. Mơya an mìng kờn jơh ală phan tòm hìu an dê, bơh đèng tus dê bơkào, sùm tề lăm nùs nhơm an dê gơwèt hơ Yàng Jêsu – do la gơtha ngan kơnhai Yàng likling.

Kòp tú an sền dồ bơkào phồng, an kah wơl jơnau đơs chò tòm khà “dờng rlau jơh ală bơta” ồng Paul Baloche mơ Lenny LeBlanc:

“Bè bơkào phồng gơkòl cau já hơđang ù, Yàng chơt ala, tài bơh kờn gơboh kon rlau mơ jơh ală phan.”

Bơta kờn gơboh hớ jrô ndơp ngan – dờ bơta kờn gơboh chò nùs nàng gơkòl jê sồt, pơrlớ să, nàng dong tă să tờm an dê. “Bơkào phồng Saron” neh gơkòl cau já hơđang ù tiah tòm dunnia do, nàng bơh hớ tiah do rgơi gơlik bơta kis pa.

Gèn bè hớ, an ờ bàssìl nàng tòm pà bơta dờn an dê bơh ală phan dềt rhền. Gơwèt mơ an, ală bơkào phồng hơđang chi nho mơ trồm lú dềt tòm ơdú an dê la pơnah an jòng rơ Yàng. bol gơ ờ di lơh hìu an niam rlau, mơya kung lơh nùs nhơm an dê niam rlau. Kòp tú pờ đèng an sền gó bơta àng hớ tơngkah an lah Yàng Jêsu la bơta àng ngan neh tus tòm bơta klam jơngo.

Dilah gơs bơta lơi dong he kah Yàng, gơlơh bè dồ nơm phan bơka, dồ khà đơs chò, hala mìng dồ bơta bô bơkah ồs jrềng Yàng likling, gen ban rngòt nàng tòm pà tus dê oă cau. Lời té ală bơta hớ gơlik bơta lơh cơng he dê tòm kơnnhai do dê. Tài bơh kìr sơnre Yàng likling ờ di mìng là tú he bơka hìu, mơya la tú lơmpah nàng Yàng Dong Klàs geh jòng rơ tòm kòp nùs nhơm cau dê.

Mơ digơlan, sătờm ală bơta dềt rhền hớ, bè dồ nơm bơkào phồng, dồ khà đơs chò, hala ală bơta àng niam, rơp gơs cau dờp git Bơtau Dong Klàs mơ bol khai ờ gềt rgơi git.

Dan jà bol he dô nùs bal tòm bơta hòi dan: Khoai Yàng Jêsu, kon ừn ngài Yàng tài bơh neh likling mơ pơndềt să nàng ai bơta kis kon in. dan tơngkah kon ờ híu nchi bơtài gơs kir sơnre do. Tòm jơh ală bơta kon lơh, dan dong kon sùm wèt nùs hơ Yàng, nàng bơh kon, cau ndai rgơi gó bơta niam mơ bơta kờn gơboh dờng rlau jơh Yàng dê. Kon jơh nùs hòi dan, ai sơnđan Yàng Jêsu Christ, Amen.

Ơ ală ồng mò oh mi kờn gơboh, he gam lời ală bơta niam đah bơdì mơ neh híu gơtha ngan kir sơnre Yàng likling sơl ơ? Tòm kir sơnre do, lời té tú jơtơngai nàng tơngkah să tờm he dê kah tus Yàng Jêsu la bồ dà jơh ală bơta chò hòp dê, mơ cèng bơta chò hòp hớ tus dê ală cau gùt dar he. Yàng la bơkào phồng dê gùl ù tiah ro ranh, la bơta gơn kơnòm dê gùl dunnia roh bơta gơn kơnòm. dê gùl bơta niam gùt dar he, dan Yàng Dong Klàs sùm la bơta niam rlau jơh mơ bol he sền dờng màng, mơ là jơnau niam mơ he tòm pà tus dê ală cau ndai tòm kir sơnre Yàng likling nam do dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.